Pathian Dawtnak

Thau Internet Ministry Caan Hmannak
March 1, 2009

Nihin Bawipa thawhthan ni dam tein a kan phantertu kan Pathian a min kan thangthat. Kan thinlung timhtuahnak ngei buin Pathian thangthat ti hna usih.

Ra u law BAWIPA cu thangthat usih. Kannih a kan khamhtu Lungpi cu lunglawmhnak in hla in thangthat usih (Salm 95:1).

Kan zapi ZBC hla 132 “Holh in ka chim kho lo” kan sa hna lai:

Jesush keimah a ka dawt ca
Vailamtahnak kha a huah cang
Keimah tlanh awk ah dawtnak kha
Holh in ka hcim kho lo.

Nolhnak:
Bawi Jesuh dawtnak a vel kha
Ka hmurka in ka chim kho lo
Amah a dawtnak a tam ca’h
Holh in ka chim kho lo.

Keimah ka lu nunter awk ah
Ngaihchiat sifahnak kha a huah
Hling luchin an chinh luchin ah
Sifah ka chim kho lo.

Ka Bawipa hnangamnak ka hmuh
Pathian sinin a ka halpiak
Thisen sung in a ka tlanh cang
Holh in ka chim kho lo.

A ka naih tikah kaa lawm i
Dinhnak tha kha a ka pek ko
Ruahchannak a ka pekmi kha
Holh in ka chim cawk lo.

Nihin thawngtha a kan chimtu cu Pu Sang Uk Lian a si. Caan a kan hmanpiak khawh caah a cungah lawmhnak nganpi kan ngei. Atu cu amah nih caan a hman cang lai:

Tuzing tiang caan ttha a kan petu kan Pathian a min thangtthat si ko seh. Tutan cu Khuami hna sinah tehte khannak bia ka chim lai ka ti lio ah, Bibik sinah Pathian ai phuang i, atu bantuk in thawngttha bia chimnak caan ttha hna ka hmuh khawh caah hin Bibik sin le Pathian sinah lunglawmhnak bia ka van chim hmasa.

Bible ca kan rel hna lai: “Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a tha lei ah a ser piak ko hna ti kha kan hngalh” (Rom 8:28)

Kan tlangtar duhmi cu: Pathian Dawtnak

Biahmaitthi ah ka chim cang bang khan kan ngaihchiatnak siseh kan lunglawmhnak siseh khuami hna sin lawng ah chim phuannak kan ngei. Kan hnu January ni 18 ni zingka Sml 8:30 ah khan ruah lopi in motor accident ka tong. Ka motor cu airawk nain keimah tu cu damte in ka um. Mah hi Pathian nih a ka dawtnak cu a si.

Pathian nih khuaruahhar thil a tuahmi pakhat cu hitin asi. Motor Insurance a ka tuah piaktu hi kan Church Chairman pa Van Bawi Ven a si, online in a ka tuahpiak i liability in kan tuah piak, motor khawn den na ton sual ahcun na Insurance nih mi ta tu hi an in liam piak lai i, nangmah ta cu nangmah te in nai liam lai a ti. Cu ti cun kan dai ko. Cu ti cun caan cu a kal lengmang i, atu ruahlo pi in ka van ton taktak tikah cun Insurance ka tuahnak company nih ka motor man zatnak tam in an ka liam piak. Mah cu tangka te cun a dang motor kan kawl tthan i, ToYoTa Yaris 2008, meng 9250 lawng a tlimi motor thar te kan cawk.

February ni 8 ni ah khan Pathian sinah lawmhnak bia kan chim. Cu ni i thawngttha chimtu hi amah kan Church Chiarman pa tthiamtthiam nih caan a hman. Cu lio i a chimmi bia cu hitin a ti: Pathian khuakhan ning cu khuaruahhar cu asi ko. Mah hna chung hi Pathian nih a um pi hna ti hi nizan khan ka fiang. Motor an cawk ka ahhin keimah nih Insurance hi ka tuakpiak mi hna si. Ka tuah lio ahhin Liability lawng in a si i, One Way lawng a si tiin ka ruah. Zei ruangah dah Insurance nih hin Full Coverage in an pek ne hnga ka ti i ka khuaruah a har. Nizan ah khan ka online cun ka chek tthan i Full Coverage a rak si ko. Pathian nih an ca hrang ah thil ttha lei tu ah pei a mer piak ko hna hi ka ti i, an motor tthing te hi a thar in thlen piak a duh hna caah a si lai ka ti cu ceu cun ka lung a hung fiang a ti.

Dawtmi khuami hna, ngaihchiatnak le sunghbaunak kan ton caan zong ah hin Pathian nih hin khat te lei kap in thil ttha lei ah a kan mer piak caan zong a um ko lai. Vanchiatnak kan timi zong hi Pathian nih a kan dawtnak hi a langhter tu hna an rak si deuh tawn. Hi bantuk vanchiatnak le sunghbaunak kan ton caan ko hin micheu cu Pathian lei ah kan thazaang a der. Pumsa in kan zaw. Thlarau lei zong in kan zaw. Pathian bia in thazaang laknak ah hmang hna usih. Mah hi Bible cang te hi thazaang laaknak ah hmang hna usih.

Cu bantuk tthiamtthian cun, a der ngaingai mi kan si caah, Thlarau zong cu kanmah bawmh awk ah khan a ra. Zeiti hin dah thla ka cam awk a si ti hmanh kan hngalh lo ca ah bia in chim khawh lo mi hram ainak in Thlarau nih Pathian cu a kan nawl piak (Rom 8: 26). Thiang Thlarau chimpiaktu kan ngei ti hi philh hna hlah usih. Poipang kan ton sual tik zongah anih sual ruang ah, amah sual ruang ah ti hna hlah u sih. Bible chungah kan hmuhmi cu mitcaw cia in a chuakmi pa kha a zultu hna nih khan,"Mitcaw cia in a chuah tertu hi a ho sualnak dah asi? Amah sualnak maw a si a nu le a pa sualnak dah?" tiah an hal. Jesuh nihcun, "A mitcawtnak hi amah sualnak ruang ah siseh, a nu le a pa sualnak ruang ah siseh a si lo. Pathian tthawnnak cu amah damnak thawng hin a langh nakhnga caah a mit a cawt hi asi” a ti (Johan 9:1-3).

Pathian nih a kan dawtnak hi hmur le kaa in chim cawk ding a si lo. Hla phuahtu nih,

Jesuh dawtnak tuanbia cu keimah zungzal chim ka duh
Keimah lung a lawmh tertu hi tuanbia lawng a si.

A Bia kan chimmi kan dihlak caah Pathian nih thluachuahnak kan pek piak ko seh. Amen.

Thla kan cam lai: Misual a kan dawtu kan Pathian, na kan dawtnak hi hmur le kaa in kan chim kho lo. Atu caan zong ah kan sualnak rel cawk lo he na sinah kan rak in panh. Kan thlacamnak kan theih piak tthan rih ko. Kawlram lei ah kan chungkhat vialte ca ah thla kan cam. An herhmi ti le rawl an hmuh khawh nakhnga an ttuan kawlnak cio ah bawm hna law na thluachuahnak pe tthan rih ko hna. Dam lomi vialte hna zong atu caan theng te ahhin damnak pe hna law na sunparnak a langhter tu si hram ko hna seh. Malaysia lei ah kan khuami hna caah thla kan cam.Ttihphannak hmun ah um hmanh hna selaw nangmah nih na um pi hna ahcun kan hna a ngam ko. An nunnak nangmah kut ah kan in chanh, a ttha bik mi na thluachuaknak pe tthan rih ko hna. Na thawngtha bia ka chimmi zong hi Thau khuami kan dihlak caah thluachuahnak pe law na dawtnak kan tin co ning cio in na sunparnak a langhter tu si hram ko usih. Ngaihchiatnak kan ton caan zong ah thil ttha lei ah na kan sersiam piak tawn bantuk in kan nunnak kan zeizong te nangmah kut cak in lam kan hruai zungzal ko tiah kan sualnak vialte a kan ngaithiamtu na fapa Jesuh Khrih min in thla kan cam, kan Pathian. Amen.

Sang Uk Lian
New Bern

"2007 Khrismas Nih Ai Putmi Thluachuah Thawngin"

December 30, 2007

Kan umnak cio ah Khrismas nuam tein kan hmang kho cio i, Pathian kan thangthat. Nihin cu kum 2007 i a donghnak bik thawngtha bia kan i hrawm ni a si. Kum khat chung kan nunnak ah Pathian nih zei dah a kan tuahpiak, zei tin dah a kan hruai timi kha ruat than buin, nihin thawngtha bia zong i hrawm hna usih tiah kan sawm hna.

Ka nolh rih ko lai, Thau Internet Ministry caantlai tu si a nuamhnak cu, caan thiahmi nih lunglawm tein an cohlan i, caan an kan hman piak lengmang caah hin a si. 2007 chungah caan a kan hman piaktu nan zapi cungah kan i lawm tuk, ti kha hun langhter ka duh.

Nihin zong U Sun (Lg. Sun Par Chin) phung na kan chim lai, ka ti tikah, lunglawm tein a cohlan i, caan a kan hmanpiak khawh caah a cungah tampi kan i lawm. Atu cu amah nih caan a hmannak a si cang lai.

Bibik nih December 30 khi na phungchim a si te lai tiah thawng a ka thanh lio ah ka thinlung ah a hung chuakmi cu atu bantuk caan te ah hin Rev. Hme Iap kha Thantlang Baptist Church ah phungchim an rak thiah le a biahmaithi ah a chimmi cu, "Atu hi Krisamas le a dih cang kumthar le a phan deuh lo chimding kai laklawh ngai a laimalak khuaisengbenh in ka um," a rak ti le puak phungmang in kan rak nii hna. Keimah ca tu ah cun cawhhruup chim hi kai duh ngai le a tha ngai ko ka ti.

Bible ca kan rel hna lai :
Bawipa nih Profet ka in,"Ngaknu cu fa a pawi lai i a min cu Emmanuel a si lai" tiah a chimmi a tlinnak hnga caah hi thil vialte an hung um hi a si. Emmanuel ti cu Pathian kan sinah a um tinak a si. (Matthai 1:22-23)

Tuzing caah ruah ti ka duhmi tlangtar cu

"2007 Khrismas Nih Ai Putmi Thluachuah Thawngin"

2001 Krisamas lio ah khan India ram Serampore sianginn ka um lio a si i hlaremhbu ah kan rak i tel le si rua ka ti nuamtuk in kan rak thei. A hlun zong a rak hlunghlai ngai. Cu lio ah phungchim an rak sawmmi cu R.C Father a si i a chimmi cu "Van Bawi Fapa vawlei a ratnak chan cu vawlei misual hna nih khamhnak le thluahchuah kan hmuh khawh nak lai a si caah, Krisamas thla cu vawleicung mi kan thluachuah hmuh caan a si. Pathian nih kumkhat chung kan nunnak caah a za dingin Krisamas thla theng te ah an kan pek. 2001 Krisamas nih ai kenmi thluachuah hi 2002 caah kan nunnak ding a si. Thluachuah a halmi nih tamdeuh in an hmuh lai i a hal lo nih tlawm deuh in an hmuh lai" a rak ti. Hihi Krisamas a sunlawinak a langhtermi a si ko lai nain ka thinlung in ka philh kho lo i Sweet December ri khin ka duhmi paoh hi Pathian sinah fak khun in hal ka hmang ve.

2007 Krisamas tiang kan hmuhmi thluachuah hi Pathian sinah lawmhnak bia kan chim cang maw? Cun a ralai mi kan nunnak caah teh thluachuah kan hal maw? Pathian sin i thla kan cam tikah upat tihzahnak he kan kupbil in thla kan cam maw? A caan ah cun kan khuasik ti in puanbu chung kan luhhnu hna ah thla kan cam, kan ih lai ah siseh kan thawh ka ah siseh ihkhun cungin si loin kan ihkhun hram ah maw a rem kan tinak tuangah khup i bil i tha kan cam a hau. 2007 Krisamas nih ai putmi thluachuah hal hrimhrim usih.

Thluachuah a rak haltu pa William Carey kong tlawmte van chim chih ka duh.

William Carey nih a nunnak ah ai seh chih mi (motto) cu,
"Expect great thing from God,
Attempt great thing for God"
(Pathian sin in a lianngan mi thil ka hmuh lai ti kha zum law
Pathian caah a lianngan mi thil tuah i zuam) ti hi a rak si.

Hi pa hi England rammi a si. A tung zong a niam nawn, a cal a ngau i a ke a bei pahmi kedan thit in a paw a rak i cawm i mi sifak fate a rak si ve ko. Sihmanhsehlaw raltha tak in India ram ah a ra i harnak phunzakip a tuar bu in Pathian ram kauhnak caah ai zuam. Pathian sinah bawmhnak a hal. Pathian ai bochantuk caah Pathian nih a bawmh taktak. A luanciami kum 200 lio i sianginn a dirh tami cu nihin ni ah Serampore University ti in auh a si cang i vawleicung singinn minthang pakhat ah a hung cang.

2008 chung i kan nunnak ca ding ah Wiliam Carrey nih Pathian ai bochan ning le Pathian ca i rian ai zuam ning hi zohchun ding ah ka duh ngai. Pathian sinah thluachuah hi a hmuh lawng duh lo in kan hal lai i cu thluachuah cun Pathian caah thathnemnak zeital ka chuahpi kho lai maw ti hi kan i zuam dingah ka duh. 2008 ah Pathian caah a tlawm bik in cheuhra cheukhat pek tal hman te in pek khawh kai zuam lai kan ti kho ve cang hnga lo maw? A si lo ah chungkhar unau le khuami zawnruahnak tal hi kan i zuam deuh ve hnga lo maw? Thanchonak ah a kan dawntu lungput bel cu Pathian tih lo, ralchiat, micung i i khinpeng, le thathut hna hi an si.

2007 nih ai putmi thluachuah thawng in a ralaimi 2008 ah cun Pathian nih a kan cawisan deuh hrimhrim ko lai ti hi zum hna usih. Kan caah a chuakmi Jesuh Emmanuel, Pathian kan sinah a um ahcun mi hnu i ai thlaimi kan si zongah hmai suangah a kan chia kho tu Pathian sinah bawmh hal in thlacam usih.

Ka bia donghnak ah,

Salm 106:4-5 hi kan thlacamnak si hram seh,
Na mi hna na bawmh hna tikah ka philh hlah maw Bawipa, na khamh hna tikah kei zong ka telh ve. Na mi hna an thancho cu ka hmuhter law na miphun an i lawmhnak ahcun ka tel ter ve, nangmah ta a simi hna an hmaihngalnak ahcun ka hmai ka hngalter ve.

Pathian nih thlua kan chuah piak ko seh!

Kai lawmtuk

Sunte
Washington, DC
America

Thlacam ta hna usih: Kum khat chung damnak le thluachuahnak a phunphun a kan petu kan Pathian na cungah kan i lawm. Kum khat chung kan nunnak ah kan tuah awk a si nain, kan tuah lomi, le kan tuah lo awk a si nain, kan tuah mi cungah kan ngaithiam. Hmailei ahcun nangmah duhning in a nungmi kan si cang khawh nakhnga kan umpi ko. Na pennak kauhnak le kan hawidang caah thathnem santlaimi kan si khawh ve nakhnga, lam kan hruai law, thluachuah kan pe ko. Nihin ah kan Kawlram le Lairam ah a ummi kan chungkhat, sahlawh rualchan, kan hawikom hna caah thla kan cam. Nangmah nih umpi hna law, an herhmi thluahchuahnak pe cio ko sawh hna. Ramkip i a ummi khuami hna zong, kan riantuannak le kan tuahmi cio ah hlawhtlinnak kan zaangfah ko. Pakhat le pakhat aa dawmi, miphun a dawmi le nangmah an dawmi kan siter ko. A dam lomi kan hawi hna damnak pe ko hna. Thonginn ah a um rihmi zong a rauh hlan ah luatnak hmuhter ko hna. Nihin ah, ti ah a paammi kan miphun hawi hna, an chungkhar nangmah nih hnem ko hna. Hi bantuk hi kan miphun nih kan ton ti hraw nakhnga lo, kan huhpheng cio ko. Nihin na fanu hmang in kan theihmi thawngtha zong hi kan zapi caah, nangmah he thukchin in a kan pehtlaih tertu ah thlua kan chuahpiak ko. Hmailei zong ah atu bantuk in caan sunglawi kan pe rih ko sawh tiah kan caah a chuakmi Jesuh Khrih min in thla kan cam. Amen.

KUM THAR LAWMHNAK le HLAWHTLINAK
nan zapi cungah
kan biakmi Khuazing Pathian nih tlunter ko seh!

Kan khamhnak caah Vancungmi hna cawlcanghnak

December 25, 2007

Khrismas Lawmhnak le Daihnak Nan cungah um ko seh!

Kan Bawipa Jesuh Khrih chuah camtuak dam tein a kan phakter tu Pathian kan thangthat.

Thlacam hna usih: Fapa ngeihchun pek tiangin a kan dawtu Pathian, na cungah kan i lawm. Na chuah camtuak kan hmannak ah, kan umpi rih law, kan thinlung chungah hung chuak ko. Kan sinah a zungzal in a ummi Pathian na si nak, harnak kan ton tikah a kan chuah tawn tu na si nak, ka herhmi a kan pe i, lam a kan hruai zungzal tu na si nak kha a thar in kan hngalhter than ko. Tukum Khrismas kan hmanmi hi sullam a ngeimi le na sinah do tlami a si nakhnga pumpak pakhat cio kan umpi law, kan thinlung dihlak in nangmah kan in lawmh khawh nakhnga, na thiang thlarau in kan umpi ko. Nihin kan i hrawmtti dingmi thawngtha zong pumpak pakhat cio kan caah thazaang petu hun si ter ko. Hmailei zong ah atu bantuk in nangmah an thangthat kho lengmangtu kan sinak lai zong lam kan hruai ko sawh tiah, Jesuh Khrih min in thla kan cam.

Kan khamhnak caah Vancungmi hna cawlcanghnak

Bible reading: Matthew 1:20-21
Hi kong a ruah lengmang lio ahkhan, a mang ah Bawipa vancungmi pakhat a sinah a lang i, “David tefa Joseph, Mari hi na nupi ca i lak awk ah ttih hlah. Zeicatiah fa a pawi mi hi Thiang Thlarau thawng in a si. Fapa a hrin lai i a min ah Jesuh na sak lai – zeicatiah a mi kha an sualnak chung in a khamh hna lai,” tiah a ti.

Vanmi kong:
Vanmi cu Pathian nih a sermi hna an si. Van le vawlei chung um mi thil zeizong vialte a ser hna ahhin a ser hna tiin ruah a si. Minung ser hlan deuh ah ser dawh an si. A bible cang ngai cu a um lo nain. Pathian thilserning in cu minung nak in vanmi an sang deuh. Ps. 8:5.

Nain, Khrih khamhnak a cotu, hrintthan mi hna cu vancungmi nak in kan sang deuh. Pawl nih cun “vancung mi khi kanmah nih an bia kan ceih te hna lai ti hi nan hngal lo dahra” tiah a ti (I Kor. 6:3).

Vancungmi a tlau mi cu Sehtan kha a si. Eve le Adam a tukforhtu kha. Genesis 1:1 ah Pathian nih van le vawlei kha a ser hna tiah a ttial. Pathian thilsernak a dih in vanmi hi an tlu ttheu lai tiah Bible thiamsang cheu khat nih an ruah. A ruang cu, Genesis 1:2 ah hin “vawlei cu mui zong a ngei lo, pungsan zong a ngei lo. Rilipi cu muihnak nih a khuh i ti cung ahcun thlipi a hrang” a ti caah a si. Pathian thilser cang mi muisam a ngei lo ti cu Sehtan rianttuannak a si hnga maw an tinak a si. A fiang mi cu minung hi Adam le Eve a tukforhtu Sehtan nih a kan tukforh peng i Pathian muisam in ser kan sinak zong hi a rawk lengmang. Duh ning paoh in kan nunnak hi kan hman tawn.

Hi bantuk in sermi thil vialte le minung hna ser tthan ding ah Khrih cu Bethlehem caw inn ah nihin a chuak tthan. “Khrih cu hmuh khawh lo mi Pathian mui a si. Khrih cu Pathian fater, sermi thil vialte hna nak in a cungnung deuh mi a si. Pathian nih Khrih thawng cun van le vawlei i a ummi thil vilate kha a ser hna, hmuh khawh lo mi thil si hna seh, hmuh khawh mi thil si hna seh, amah thawng cun a ser hna; cun nawlngeitu thlarau hna le uknak thlarau hna le tthawnnak thlarau hna zong kha amah thawng cun a ser hna. Pathian nih van le vawlei hi a dihlak in Khrih thawng cu na ser hna i Khrih caah cun a ser hna (Kolose 1:15-16)

Jesuh Khrih a chuahnak kan zoh tikah vancungmi hna an cawicangh ning hmuh khawh a si.
1. A chuahnak kong kha an chim.
2. Joseph sin ah a lang i, tho law, ngakchia le a nu kha i kalpi hna law Izip ram ah va zam u a ti.
3. Herod a thih tik ah Joseph sin ah a lang tthan i “tho law, ngakchia le a nu kha Israel ram ah hun kirpi tthan cang hna, zeicatiah ngakchia thah a tiim mi kha an ti cang,” tiah a ti.
4. Bawipa vancung mi cu tukhal hna sin ah a lang. “Nan thin phang hlah u, nan sin i ka ratnak cu nan caah thawngttha he a si, cu thawngttha nih cun mi vialte sinah lunglawmhnak a tlun ter lai. Tu zan hrimhrim ahhin David khua ah nan Khamhtu cu a chuak cang – Khrih Bawipa cu! Cun hihi nan caah hmelchunhnak cu a si lai; ngakchia te pakhat kha puan in an zual i cawrawl einak kuang chung ah an thlim kha va hmuh lai,” tiah a ti (Luka 2:8-12)
5. Cu cangka cun vancung ralkap bu nganpi cu vancungmi sinah khan an rung lang i Pathian kha hla in an thangtthat; A sangbik van ahkhin Pathian cu thangtthat si ko seh, Cun a dawt mi hna umnak vawlei ah hin remnak um ko seh,” tiah an ti (Luka 2:13-14).

Vancungmi nih Jesuh Khrih in khamh kan sinak ding cu an chim. Khrih Jesuh kong kha an chim. Kan khamhnak kong kan chim lengmang mi hi zeitluk in dah kan fian ti hi ruah tthan kan hau.

Vancungmi kong hi Biakam Hlun le Thar ah voitam ngai an chim. Jesuh Khrih zong nih a rak chim ve.

Tuu tlau bianabi a chim tikah “Hi ngakchia tete hi pakhat hmanh zomhtaih hna hlah u. Annih a vengtu hna an vancungmi kha vancung khua ah ka Pa hmaika ah an um zungzal ko. Mi Fapa cu a tlaumi khamh awk ah ka ra” tiah a ti (Matthew 18:10).

A rat tthannak ding kong a chim tikah “cu ni le caan cu ahohmanh nih an hngal lo, vancung i a um mi vancungmi zong nih a hngal lo, Fapa zong nih a hngal lo. Pa lawnglawng nih a hngalh” tiah a ti (Mark 13:32).

“Mi pakhat nih vawlei hi a ningpi in co sehlaw, a nunnak sung ttung sehlaw zeital a miak hnga maw” Miak hlah. Cu a nunnak cu zeital in a caw tthan kho hnga maw, caw tthan kho hlah. A tu chan, Pathian zeiah a rel lo mi chan ttha lo a si mi chan ah hin, keimah le ka cawnpiaknak a ka zahpi mi cu, Mi Fapa hi ka Pa sunparnak in vancung mithiang mi hna he ka rat tikah ka zahpi ve hna lai” a ti (Mark 8:36-38).

“Mi Fapa nih hin vancungmi kha a thlah hna lai i, a Pennak chung i tthatlonak a tuahtu vialte hna le mi a sualtertu vialte hna kha an pumh hna lai i meiphu chungah an paih hna lai, cu ka ahcun an ttap lai I an hacang an rial lai. Cun Pathian mi hna cu Pa Pennak chungah ni bang in an ceu lai. Cucaah hna nan ngeih ahcun, thei ko u,” tiah a ti (Mattheu 13:41-43). 26:53.

Vancungmi hna cu Pathian nih a hmanmi hna a biaphurtu an si. Kannih Bawi Khrih zumtu hna zong “Vancung rammi kan si” tiah Paul nih a ti (Filipi 3:20). Pathiang thawngttha chim ding ah fialmi kan si ve.

Cu caah nihin ah a chuak mi Bawi Khrih nih kanmah hi a vancungmi hna can ai ah a rianttuantu ding ah fial mi kan si. Vawlei ah a ratnak cu kanmah kha rian fial ding ah a ra a si. Vancungmi hna nih Khrih kong cu manh lo ngai in an chim bantuk in kannih zong nih Khrih kong cu khawika kan umnak paoh ah chim cio hna usih. Pathian rian ttuan cio hna usih. I pumpe deuh hna usih. Christmas lawmhnak nan cungah um ko seh!

Van Bawi Lian pa

Cu Caan Theng Te Ah

December 16, 2007

Khrismas lawmhnak le daihnak nan zapi cungah um ko seh! Khrismas thla dam tein a kan phanhtertu Pathian kan thangthat. Khrismas ni ngaingai cu kan phan rih lo nain, Khrismas thla kan phanh cang caah Khrismas kong hi ruat ko hna usih ti ka duh.

Kan hnu zarh ahkhan Isaiah 9 chung hi kan caah ngakchia a chuak, fapa pakhat pek kan si timi kan i ruahti hna. Hihin ah i ruahti hna usih ti ka duhmi pahnih a um.

Cu Caan Theng Te Ah . . .

Khrismas kan tuah tik paoh ah kan Bawipa Jesuh Khrih hi zei bantuk caan lio ah dah a rak chuah, tihi ruah chih ve a hau. Kan Bawipa Jesuh Khrih a chuah lio hi Matthai le Luka nih an kan chimh ning a si ahcun:

1. Emperor Augustus a bawi lio
Augustus nih ngunkhuai kholhnak ding caah milu relnak a rak tuahter hna. Hi lio caan ah mipi cu ngunkhuai an rak peknak ah an re a rak thei hringhran ti a si. Mi tampi cu ei awk hmanh an rak ngei tawn lo. Zei tikah dah, hi sining in kan luat khawh te hnga ti hi a orh in an rak orh.

2. Quirinius cu Syria ah a bawi lio (governor a si)
Hi pa kong hi tam kan thei lo. Nain, Rom uktu pakhat a si. Rom uknak tangah Judahmi an rak um lio a si. Mi phungdang kut tangah har ngaiin an rak um i, an duhmi hmanh an rak i tuah khawh lo caan kha a si.

3. Herod cu Judea ram uktu a si lio
Phungthluk bantukin an chimmi cu “Herod fapa sinak nakin Herod vok si kha nun himnak ah a ttha deuh,” an ti tawn. Herod a kong an chim nak ah, amah uknak hna hnawhtu dingah a ruahmi cu amah a chungle hmanh thah hna kha a poi ah a chia lomi pa a si. Cu caah, a vok nakin a fapa si hi tih a nung deuh an tinak a si. Cu tluk in a tha lomi pa a si. Cu nih cun a rak uk hna.

4. Tukhaal hna an tu an congh lio
Tukhal pawl hi cu an pawcawmnak caah tuu a khaltu kha an si i, hawi sin hmanh ah um kho loin khua leng ah an rak riak. Tuu an rak cawng. Khua sik lakah ramlak ah rethei ngai in an rak um. Cu lio caan cu a si.

5. Mifim hna arfi an zulh lio
Mifim pawl nih arfi an rak hmuh i, vawleicung uktu ding siangpahrang a chuah hmelchunhnak a si ti an hngalh caah, cu arfi zulh in khual an tlawn lio caan a rak si.

Hi bantuk in uktu tha lo nih an uk lio caan, mipi thawpit ngaiin an um lio caan, lungrethei ngai in le thaizing ah zei tin dah kan nun lai tiin awlok vansang in an um lio caah ah kan Bawipa Jesuh Khrih cu a rak chuak.

Mitha lo an rak um bantuk in toidornak lungput a rak ngei i Khrih a chuah kha sullam a ngeihter tu tukhal zong an rak um ve thiamthiam. Mifim hna zong nih lamhlat piin Jesuh Khrih biak ah an ra. Cu lio caan ahcun Jesuh Khrih kan khamhtu cu a rak chuak.

Cu bantuk caan (daihnak a um lo lio/retheih tuk lio) ah cun Jesuh Khrih ngakchia te cu a rak chuak. Cu ngakchia cu profet Isaiah nih cun “fimchimtu, a thawngmi Pathian, daihnak bawi a si lai” (Isa 9:6) tiah a rak phuan. Cun Immanuel tiah kawh a si fawn (Matt. 1:22-23). Immanuel ti a sullam cu “Pathian kan sinah a um” tinak a si. Vanmi nih kan Bawipa a chuah lio caan ah tukhal hna sinah an lang i “nan thinphang hlah u, . . . nan khamhtu kha a chuak cang” (Luka 2:10-11) tiah an rak thanh hna.

Paul nih cun, “Sihmanhsehlaw a hmaanmi caan cu a hung phak tikah, Pathian nih A Fapa kha a run thlah. Nu chung khan a hung chuak i Judahmi Nawlbia tangah khan a um, cucu Nawlbia tang i a ummi hna kha luatter awk le kannih kha Pathian fa i canter awk caah asi” a ti (Gal 4:4-5).

Kan Bawipa Jesuh Khrih a chuah caan hi a hmanmi caan ah a si. Mipi nih an herh tuk lio caan thengte ah a rak si. Kan Bawipa Jesuh cu Amah kha kan herh i, kan nunnak ah umhmun kan pek tik paoh ah kan sinah a chuak. Tukum Khrismas zong ah Amah kan herh taktak a si ahcun, kan caah a chuak than ko lai.

Bawipa nih thluachuahnak kan pek piak ko seh. Amen

Thlacam hna usih: Fapa pek tiang in a kan dawtu Pathian, na cungah kan i lawm. Tukum Khrismas sullam ngei tein kan hman cio khawh nakhnga kan umpi cio ko. A dam lomi, damnak pe ko hna. Re a theimi a thil rit chawng ko hna. Thong chung i a ummi zong luatnak an hmuhnak hnga bawm ko hna. Kan Bawipi Jesuh Khrih a herh taktakmi kan si i, kan nunnak thinlung innka a onhtu kan si cio nak lai zong na thiang thlarau in ka umpi ko. Hmaizarh atu bantuk caan zong ah na thawngtha i hrawmtinak caan kan pe than rih ko. Na kan dawt caah kan i lawm. Jesuh Khrih min in thla kan cam. Amen.

Thawngthanhnak: Hmaizarh December 23 ni cu Thau Internet Ministry minin Khrismas kan hmang ti hna lai. Thawngtha a kan chimtu cu Rev. Dr. C. Duh Kam a si lai.

Ngakchia Pakhat A Chuak

December 9, 2007

Khrismas lawmhnak le daihnak nan zapi cungah um ko seh! Tuzarh cu khual ka tlawnnak ah thawngtha i hrawmtinak nizan ah thlah dingmi ka thlah kho lo. Atu lawng ah ka hun thlah khawh.

Thlacam hna usih: Nihin ni tiang lam a kan hruaitu kan biakmi Pathian, na cungah kan i lawm. Kan sual kan palhnak kan ngaithiam ko. Nangmah duhning tein a nung khomi kan si cio naklai nangmah nih na thiang thlarau in kan umpi ko. A dam lomi ca le thong chungah a ummi caah thla kan cam. A rauh hlan ah damnak le luatnak hmuhter ko hna. Tukum na chuah camtuak kan hman tik zongah sullam ngei te in kan hman khawh nakhnga kan umpi ko. Pumpak pakhat cio kan umpi law, kan tuahmi cio ah hlawhtlinnak a hmumi kan si ter ko. Na kan dawt caah kan i lawm. Jesuh Khrih min in thla kan cam. Amen.

Nihin ah i ruahti dingin rel ka hun duhmi cu Isaiah 9:6 a si:

Kan caah ngakchia pakhat a chuak! Fapa pakhat pek kan si! Amah cu kan uktu bawi a si lai. Amah cu Fim Chimtu, A Thawngmi Pathian, Zungzal Hmunmi Pa, Daihnak Bawi, ti a si lai.

Hi cacang hi, a bikin, Khrismas caan ah kan theih lengmangmi a si. Profet Isaiah nih Israelmi nih, an retheihnak le harnak in a chuahtu ding hna ngakchia a chuak, fapa pakhat pek kan si, tiah a tinak cacang a si. Hi cacang nih in, Khrihfami kan caah cun, Jesuh Khrih a sawh duh tiah kan i chimh tawnning a si. Atu tanah a chuakmi fapa cu zei bantuk dah a si, ti hi ruahthan dingah chim ka duh.

Amah cu kan uktu bawi a si lai.
Uktu bawi a si lai. Jesuh Khrih nih kan cungah uktu, nawlngeitu a si nakding ahcun, kanmah nih cu nawlngeihnak cu kan pek ve a hau. Phundang in kan chim ahcun, Jesuh Khrih cu kan cungah nawlngeitu a si ti kha kan i fian i, a nawl kan zulh a hau. Cu lawngah Isaiah nih a chimmi, kan uktu bawi a si lai, timi hi a tling ding a si.

Amah cu fimchimtu a si lai.
Fimchimtu tiah lehmi hi mirang ahcun counselor tiah a hman. Counselor hi phun tampi ah hman a si ko nain, hi ka zawn ahcun, pumsa thlarau ngandamnak lei ah ruahnak petu, fimchimtu khi a sawh duh bik ko rua tiah ka ruah. Atu cu Pathian zaangfahnak thawngin Laimi zong ramkip ah kan phan hna. Kan phanhnak cio ah, kan hmuh kan ton tawnmi cu, lungretheihnak le lungdonghnak ti bantuk pawl hi an si. Mirang hrim zong a phunphun in lungdonghnak an tong ve. Cu tikah, cu thilrit in an luat khawh nakhnga, fimchimtu kan ti lai maw, thazaaang petu kan ti lai dik cu sinah cun an va kal. Cu counselor cu an tonmi le an thil rit paohpaoh kha an chimh i, bawmh khawh a zuam tawn hna. Mi tampi cu, counselor an ton dih tikah an thilrit a zaang ngangai tawn. Hi ahhin counselor nih amah nih kal riangmang in bawmh dingah a har, mizaw tu nih an ton tawn hna.

Kan Bawipa Jesuh Khrih cu finchimtu kan ti tikah, kanmah nih kan fuh i fim kan i chimhter ding a biapi hringhrang. Phundang in kan chim ahcun, a sinah kan thilrit kan thumh i, nangmah nih lam kan hmuhsak ko, thazaang kan pe tiah amah sinah i ap kha a biapi. Cu ti kan tuah ahcun, kan caah fimchimtu a si nak sullam a ngei ding khi a si.

A Thawngmi Pathian
Isaiah nih Israelmi kha kan caah pek a simi hi mi sawhsawh a si lo. A der thawmmi a si lo. San tlai lo zong a si lo. I bochan awk a tlakmi, midang nih tei khawh lomi, a thawngmi Pathian a si ti hi a langhter duhmi cu a si ko. Isaiah chan ahcun ram khat le ram khat an ra i do, an rak i tu. Cu lio caan ah, a thawngmi siangpahrang ngeih hi a rak biapi tuk. Siangpahrang santlai lo aa ngeihmi ram cu van chia tuk ah ruah an si. Cu lio ah, Isaiah nih cun a mi hna cu, kan biakmi Pathian cu a thawngmi a si tiah a rak chimh hna.

Jesuh Khrih kan caah a chuakmi hi, bochan awk a tlak lomi, a law a dormi, san a tlai lomi a si lo. A thawngmi a si. Bochan tlak a si. Bochan tlak a si nak le a thawngmi a si nak cu, amah kan i bochan tikah sullam a ngei ding le a fiang chinchin ding khi a si. Zei hmanh kan tih awk a si lo, zei cah tiah, kan biakmi cu a thawngmi Pathian a si.

Zungzal hmunmi pa.
Hi vawlei ah uktu tampi an chuak. A thawngmi tampi an um. Cu bantuk in santlai lo zong tampi an um ve. Zei bantuk an si hmanh, a hmunmi cu an um lo. A rak thawngtuk timi zong a hnuah cun, a hmun hlei lo. Vawlei cung tuanbia zoh tikah voikhat caan khat ahcun ram pakhat kha a rak thawng tuk i, vawleicung ram tampi kha a rak uk ko. Nain, cu ram le uktu cu an hmun hlei lo. A dang amah nakin a thawng deuhmi a chuak, nain, sau a hmun ve thiam lo, a dang pakhat a chuak than. Chim duhmi cu, hi vawlei ah a hmunmi, bochan awk tlak a simi aho hmanh an um lo. A hmunmi cu, Pathian lawnglawng a si. A dawtnak a hmun. A uknak a hmun. A thawnnak a hmu. Amah hrimhrim a hmunmi Pa a si. Cu caah, kannih kan i bochanmi cu, a hmunmi a si caah, mi thluachuak kan si.

Daihnak Bawi a si lai.
Khrismas thla kan hun phanh cun, pakhat le pakhat, Khrismas lawmhnak le daihnak na cungah um ko seh, kan i ti. Cu nih a langhter komi cu lawmhnak hmuh le daihnak hmuh kan duh ti hi a si ko. Cu lawmhnak le daihnak a ngeitu cu vawlei mi kan si lo. Kan caah a chuakmi Khrih tu a si. Vawlei cungah, mi tampi nih (kanmah cio zong kan si lengmang ko) lawmhnak kan kawl. Chawva in a ngah lai tiah kan zumh tawn caah, heh tiah chawva cu kan kawl. Nain, kan kawlmi ngaingai cu kan hmu kho hlei lo. Hihi ka ngeih ahcun, hihi ka tuah khawh ahcun ka thinlung ah daihnak a um lai tiah kan ruahmi an um len. Nain, kan ngeih taktak tikah, zei te dik a bau ko ee, tiah kan ti than thiam ko. Cu nih a langhter ko mi cu, vawlei nih daihnak ngaingai hi cu a pe kho lo tihi a si. Sihmanh sehlaw, Khrihfami kan caah cun daihnak hmuh khawhnak lam a um. Cucu daihnak a ngei i daihnak bawi a simi kha, kan nunnak ah sawm kha a si. Daihnak bawi kha kan nunnak ah hmun hma kan pek i tlun in kan onh a si ahcun, vawlei nih a pek khawh lomi, chawva nih a cawk khawh lomi daihnak kan hmuh ko lai. Cu nih cun, phundang lei in, Khrih cu daihnak bawi a si zia kha fiang chin in a langhter lai.

Cu caah, dawtmi u le nau hna, Khrismas caan kan phanh i, kan ca ah a chuakmi Khrih kong kan ruah paoh ah, Bawipa, nangmah nih hun kan uk ko, fim kan chim law thazaang kan pe ko, a thawngmi nangmah nih lam kan hruai ko, hi vawlei thil a hmunh lo lio ah a hmunmi Pathian na si nak zong kan nunnak ah kan theihter than ko, cun pakhat cio kan thinlung ah nangmah hun chuak law, daihnak bawi hung si ko tiah, Amah Jesuh Khrih kha sawm hna usih. Cu ti kan tuah ahcun, kan hmanmi Khrismas hi sullam a ngeimi a si lai i, cu nih cun, lawmhnak le daihnak a kan pek lai.

Nan umnak cio ah kan biakmi Khuazing Pathian nih in umpi cio ko hna seh. Amen

Samaria Mitha Pa Kong

December 2, 2007

Khuami nan zapi cungah Sweet December lawmhnak le daihnak um ko seh!

Kan Bawipa Jesuh Khrih a chuah thla kan phan than cang hna. Nihin zongah Pathian biak tinak le thawngtha bia i hrawmtinak caan kan hmuh than caah Pathian kan thangthat i, thawngtha aa hrawm khomi nan zapi cungah kan i lawm.

Nihin thawngtha bia a kan chimtu cu Rev. Dr. Cung Lian Hup a si. Caan a kan hmanpiak khawh caah a cungah tampi kan i lawm. Atu cu amah nih caan a hman cang lai.

Baibal Cang: Luke 10: 25-37
Atlang Pi: Samaria Mitha Pa Kong

Bawi Jesuh Khrih nih khamhnak kong he pehtlai in bia a chimmi lak ah Khrihfami nih kan hngalh bikmi Baibal cang cu Johan 3:3 a si. Hika ahhin, Nikadimu nih a chimmi le Bawi Jesuh nih a chimmi hi bia ralkah pi a si i, theih a har ngaimi a si. Nikadimu nih, "Khamhnak hmuh khawhnak ding ah zeidah ka tuah lai," ti biahalnak um lo. "Pathian na sin i a um lo ah cun, hi khuaruah harnak hi na tuah kho lai lo," tiah a timi kha Jesuh nih "Na hrinthan lo ah cun Pathian pennak na hmu lai lo," tiah a lehnak a si. Sihmanhsehlaw, Luka 10:37 hi Jesuh nih a chimmi cu, phungthiam saya pa nih "zungzal nunnak hmuhnak ah zeidah ka tuah lai," tiah a halmi kha Jesuh nih Samaria mithapa bianabia a chim i, a donghnak ah "va kal law, cupa bantuk cun va tuah ve," tiah a timi a si.

Samaria Mithapa bianabia hi Khrihfa a si lomi zong nih an uar ngaingai mi a si i, an uarnak sullam cu biaknak lei in upa kan ti tawnmi hna khi midang sin ah dawtnak an ngeih khawh lonak kha Jesuh nih a langhter ruangah a si theu. Cunak in an hei uar deuhmi cu, midang bawmh timi hi kan bawmhmi hna sin in zeihmanh hmuhthan ding a um lomi kan bawmh khi bawmh taktak a si ti kha a langhter ruang ah a si. Samaria mitha pa hi, damiah nih an vuakmi pa a va bawmh kha a bawmhmi pa sin in hmuh than ding zeihmanh a um na lo in, a neihchiah he a chawva he, a caan dih in a va bawmh mi hi khuaruah har ngai cu a si taktak.

Samaria mitha pa nih hin a hma a va tawl piak. Bendaih in a tuam. Si a thuh. Rang cung ah a khin. Hotel ah a va chiah. Hotel man vialte a liam piak pin ah, an zohkhenh man vialte zong a liam rih. Asinain, a vuakmi pa sin in cun hmuh than ding zeihmanh aa ruahchan lo.

Thantlang Pastor ka tuan lio ah, Vanzang pawl nih khuai kua kha Dr. Hmuh Thang an phurh. Capo in ka timi hna cu, ziah keimah nan ka thenh ko lo ka ti hna na in, an ka sianh lo. Lianlian pa cu an va pek. Hmailei sizung kan kal tik ah kan daw deuh seh ti a si men lai. Samaria mithapa he an i dang tiah ka ruah.

Midang kan herh te hna lai tiah kan ruah tik hna ah kan dawt deuh hna. Kan herh lo dingmi pa dawt cu thil har ngai a si. Phundang i chim ah cun kan si a fah tikah i zawnruah le i dawt hi a fawi deuh i, kan rum tik ah midang va dawt cu a har ngaingai. Kan sifah lio kan i dawt bantuk in kan rum tik zong ah i daw kho u sih law, cucu a tha dingmi khi a si.

Vawikhat ah Rangoon LBC nih Hmawbi ah training pakhat an tuah. Cuka ah cun, training kai lo caan ah bia sawng kan tlorh tawn hna. Malaysia i Laimi umtuning cang khi pakhat pa nih a van chim i, Laimi an i dawt lo ning le zei i an i rel loning kha kan van thawk. Malay ah Pu Hastaw le Pu Tluang Hnin kha rian a rak tuan balmi an si tikah anmah nih Malay umtuning cu an theih ngaingai. Kan caih mi cu a tam lengluang na in, kan caihmi a thlurpi kha a tawinak in van fianter ka duh.

Malay ah cun kan lahkhah kha aa khat nawn cio, thil ti khawhnak kan ngeihmi zong aa khat cio i, a hohmanh i upat le i hmaizah a um kho ti lo an ti. Laitlang ah cun kan thil tikhawhnak kha i khat hlah kaw, kan i daw, kan i hmaizah, kan i zawnruat tiah kan rak ruahmi kha, Laimi kan sining taktak cu Malay ah a va lang an ti. Kan ratnak ah ting hnih cio kan dih, kan lahkhah aa khat, kan theihmi aa khat, kan tuankhawhmi aa khat ciammam i kan i upat ti lo, kan i hmaizah ti lo, kan i daw ti lo i, heh tiah i thuat kha a si ko cang an ti. Cucaah, upa deuh le bang hi cu holh lo deuh in kan um i, tlangval nonal nih an kan uk ko ti a si. Laitlang lei an lungtling lomi vialte le, an thin a hungmi vialte an chuah i, an kan thah deng ko an ti.

Laimi kan i daw kan rak timi kha, kan si a fah ruangtu ah kan rak i daw i, kan sining ai khah tik, phaisa kan ngeih cio tik ah cun, upatnak zong a um kho lo, i dawtnak zong a um kho lo; i zawnruahnak zong a um kho ti lo i, nang maw kei tibak in i tongh a si ko ti kha an kan chimh. Samaria mitha pa nih hmuhding zeihmanh ngei lo in, damiah nih an vuakmi pa a bawmh ning bantuk cu kan si ne lo hi teh ka ti ve.

Thau khuami hi, minih cun nan i daw ngai tiah an kan ti theu. Nan zawn nan i ruat ngai an kan ti theu. Asianain, kan i dawtmi hi kan si a fah ruangah kan i dawt a si sual hnga maw? Hei rum viar u sih law kan i daw taktak hnga maw ti hi ka ruat peng ko. Cun atu cu minung tampi Amerika kan phan hna, Europe kan phan hna, Australia kan phan hna i, ramdang a ummi Thau khuami hi, kan rum viar lo hmanh ah kan thil ti khawhnak a khat pah cang hna. Hi bantuk dirhmun kan dir ah hin teh, kan i daw maw ti hi ruah a hau ngai te.

Lai forum a la minih nan theih ko lai. Kan mui kan i hmuh lo tik ah zeitluk in dah kan ral a that i, kan bia a fah ti hi theih a si ko. Kan sining ai khah tikah zeitluk in dah kan i upat lo ti zong Khrihfabu a cheukhat ah cun a lang thiamthiam ko. Cu ruangah a si theu lai ka ti; USA a ummi Laimi pawl bu tam nawn i an i then zong hi, Samaria mitha kan um khawh lo ruangah a si rua tiah ka ruah.

Atu ah Ohio le bang ah cun, Thau khuami minung 40 hrawng khua an sa an ti i, hmailei ah Ohio Thau kha bu hnih ah an i then hei ti thawng hna kan thei sual lai maw ti ka phang ngai. Thil i cuhmi a um ah cun i dawt khawh a si ti lo. Tikir A le B khi an i cuhmi cu Min a si i, min nih zeihmanh a pe hna na lo in, an i dawt thannak ding cu a har ngaingai ko. Thau Khuathar le Khuahlun zong min kan i cuh ve i, kan har ngaingai. Min hna kan i cuh sual lai ti ka phang ngai te. Min kan i cuh sual ah cun, a sin in min hmuh ding a um ti lo ti kan theih tik ah kha kan dawtmi pa he kan i hua than tawn. Cucu politics lawng ah a um i, dawtnak taktak ah a um kho lomi a si. Thau khuami nih ramdang ah politics (min) kan i cuh sual lai ti zong hi phan a um pah ve.

Zungzal nunnak ro conak ding ah Samaria mitha pa bantuk in, kan innpa kan dawt hna a herh i, a thangchomi khua, a dawmi khua, a zawnruatmi khua sinak zong ah Samaria mi tha pa bantuk kan si awk a herh. A kan bawm kho te lai, ka herh te lai timi pa lawng kan dawt ah cun, hihi cu Pathian a zum lomi hna zong nih an tuah zungzalmi a si ko tiah, Jesuh nih a ti. Pathian a zum taktak mi nih cun, Samaria mitha pa bantuk in zeihmanh a sin in hmuh ding kan ngeih lo hmanh ah dawt thlorh in hei dawt ding a si ko tiah kei ka zumhnak a si.

Nancy Pa

Thla kan cam hna lai: Fapa ngeih chung pek tiangin a kan dawtu Pathian, na cungah kan i lawm. Kan Bawipa a chuah camtuak dam tein na kan phak ter i kan i lawm. Kan thinlung innka a ong i Jesuh naute chuahnak hmun a petu pakhat cio kan si naklai, kan umpi cio ko. Khrismas kan hmannak cio zong ah sullam ngei tein kan hman khawh cio nakhnga na thiang thlarau in kan umpi ko. Samaria mitha pa bantuk in zawnruahnak le dawtnak a ngei khomi kan si cio nak lai zong, kan theihmi thawngtha bia hi thluah kan chuahpiak ko. Khuami zapi, an umnak cio ah, damnak pe hna law, na thluachuahnak he umpi cio ko hna. Malay i thonginn ah a um rihmi hna zong, tuan ah luatnak an hmuh than khawh nakhnga le, atu an tonmi hi thiltha in na thlenpiak hna nakhnga, na caah thla kan cam. Atu ah thawng kan theih bantuk in, an pa nih a thih takmi hna Pi Tial Vang le a fale pathum caah thla kan cam. Nangmah nih an mitthli hnawhpiak hna law, hnem ko sawh hna. Miphun dang lakah, mah chungkhar umlonak hmun ah a si caah, an tuar a har khun ko lai. Nangmah nih umpi hna law, inkhawhnak thazaang zong pe ko hna tiah an caah thla kan cam. Nihin ni tiang na kan umpi bantuk in hmailei zong ah kan umpi rih law lam kan hruai rih ko tiah, kan Bawipa Jesuh Khrih min in thla kan cam. Amen.

Pathian Hmual

November 25, 2007

Khua caan a hung kik deuh cang. Khrismas kan naih chinchin. Lungthin phungdang piin a um. Nizan nai te a si rua kan timi kha kum khat a tling manh. Kan ram in kan chuah zong kha nizan nai a lo nain, kum zeizat dik a si manh cang. A kar lakah thil tampi aa thlengmi a um. Kum khat a tling i, a tlawm bik ah, kan kum kum khat a upa chap. Kan i thleng. Nain, cu caan vialte chung aa thleng lomi cu, Pathian i a kan dawtnak a si. Nihin zong ah Amah thangtthat tti kho dingin caan kan hmuh than tikah Pathian kan thangtthat. Amah Pathian ttihzahnak le thlacamnak te he thawngttha i hrawng tti hna usih.

Nihin thawngttha a kan chimtu cu Rev. Dr. C. Duh Kam a si. Caan a kan hmanpiak khawh caah a cungah tampi kan i lawm. Atu cu amah nih caan a hmannak caan a si cang lai.

Bible relnak: Vailam tahnak cung i Khrih a thihnak kong cu a tlau lio lengmang mi hna caah cun pakpalawng bia a si ko, sihmanhsehlaw khamh lio lengmang mi hna kannih caah cun Pathian hmual a si (I Korin 1:18).

Pathian Hmual

Biahram domhnak:
Vawlei cung ram kip ah kan khuami kan phan hna. USA & Canada long hmanh ahhin minung 200 dengmang kan um cang lai. Europe, Asia le Australia ram ah a ummi dihlak he cun kan tam ngai cang. Ram kip ummi hna nih Pathian bia i hrawm ttinak caan kan ngeih mi hi a sunglawi tuk. A kan tawlrelpiaktu Saya Thomas Cung Bik (Bibik) cungah lunglawmhnak tampi ka ngei. Ramkip um mi kan fa nau le nan dihlak cungah lunglawmhnak ka ngei.

1. Nihin Laimi kan dirhmun:
Ka khuaruah a har cem mi cu Laimi nih hi tluk zohchia in zu kan din khawh mi hi a si. Laimi kan caah zu hi kan ral nganbik a si cang. Kawl ralkap cozahnak in a kan rawk kho deuh mi ral a si. Hmunlipi kan pastor Rev. Sang Heih nih ca a rak ka kuat bal. A chimmi cu “na um lio bantuk in a si ti lo, tlangval long si lo in, nungak zong nih zu an ding cang. Pakanh lei in a ra mi zu kha an i cawk hna i nu he pa he an ding dih ko e” a rak ti. Malaysia ah Thau tlangval hna zu an din i an i vuak tawn ning hna ka theih tikah ka khuaruahhar caan a tam. Pathian ah mifel le hrintthan ah ruah mi zong nih zu din hna an hmang ttheu. Zu long si lo in kan pum a hrawk kho tu cakuat zuk le khaini hmom hna kan hmang fawn. Kan pum caah fahnak le thihnak tiang a chuah ter kho tu ral an si. A kan hrawktu kan ral nganbik zu le kuak le khaini hna hi zeitindah kan tei khawh lai?

2. Teinak caah Pathian Hmual:
Bible nih kan pumsa cu Pathian biakinn a si tiah a ti (II Korin 6:16). Kan pumsa cu thianghlim tein um ding a si. Zu kan din i kuak hna kan zuk tikah kan pumsa a rawk kho. Kuak zuk ruangah cuap khensar hna ngah in a thi mi an tam ngai. Cu caah kan nuncan le ziaza ttha lo mi vialte cu hlawt i zuam cio ding kan si. Kanmah tein kan tei khawh lo ahcun Pathian sinah thlacamnak in tei khawh nak tthawnnak kha hal kan hau.

Thla kan cam ahcun Pathian nih a tthawnnak in lam a kan hruai hrimhrim lai. Vailamtahnak hmual kan ngei lai. Kan ral hna hi kan tei khawh hna lai.

3. Zeitindah Vailamtahnak Hmual cu kan hmuh khawh lai?
Nu le pa hna khrihfa innchungkhar in a tthangmi kan si caah khrihfa cu kan si ve nain, Khrih tthawnnak kan ngei lo. Bible zong hi thaw lak in a rel kho lo mi kan tam ngai. Ruat tthan usih. Vailam cungah Khrih a thihnak kong kha ruat tthan usih. Misual mi nangmah le keimah caah a thi, Harnak a tuar. An hrem. Pathian nih khamhnak pek awk ah a vun thlah. Kannih nih cun hi tluk in a ka dawtu Khrih hi lunglawm ngai in dong ding kan si. Lawmhnak chim ding lei kan ba. Khrih dawtnak hi ruat tthan usih. A dawtnak kan tem ko lai. Kan nu le pa dawtnak hna khi an fa le nih kan tem tawn bantuk in Khrih dawtnak zong hi tem khawh a si. A dawtnak ruangah Pathian sinah lawmhnak chim lengmang ding kan si. Hi bantuk in thla kan cam i Pathian sinah lawmhnak kan chim khawh lengmang ahcun Khrih vailamtahnak cu hmual ngei ngai in kan sin ah a lang te ko lai. Vailam cung i Khrih a thihnak kong cu kan caah hmual lianngan a si te lai.

Zu le sa, kuakzuk le khaini hmom hna zong hi kan tei khawh lai. Thianghlim tein kan um kho lai. Bible kan rel tik zong ah thazang ah an cang lai. Ti le rawl ah kan canh khawh lai. Hi bantuk in si ding ah kan nunnak hi ttha tein ruat tthan hna usih. Lei cung kan nunnak hi a tawi tuk. Bawipa rianttuannak ah i hmang hna usih. Pathian ah i lawm hna usih. Kan nunnak hi thanuam tein hman khawh zuam hna usih, Pathian dawtnak thawngin.

Pathian nih thluachuah in pe ko hna seh!

Van Bawi Lian pa

Kan zapi thlacam hna usih. A bikin Malaysia i thonginn chungah a ummi khuami hna caah, nan umnak cio thlacam cio dingin kan sawm hna:

Dawtu Pathian, na kan dawtnak caah kan i lawm. Kan phuttawk lo tiang in thluachuahnak na kan pek ca zong ah kan i lawm. Nihin zong ah thawngttha bia i ruahtti kho dingin caan na kan pek caah kan i lawm. Na fapa hmang in kan theihmi thawngttha hi, pumpak pakhat cio kan nunnak ah thlaici tha bantuk in hun khoh ter ko. A dam lomi hna nih damnak an hmuhnak hnga zong thla kan cam. A hlei khun in, Malaysia ah an tlaihmi hna, kan khuami hna caah thla kan cam. Nangmah nih umpi ko hna. Lungtthawnnak zong pe ko hna. An hrengkhenh chungin an luat nakhnga, kannih nih kan bawm kho hna lo. Bawmhnak a pekhotu hna nangmah kan in zumh i, nangmah sinah bawmh kan in hal. A rauh hlan ah luatnak hmuhter ko hna. Khuami dangdang zong an umnak cio ah umpi hna law thluachuah pe ko hna. Hmailei zong ah atu bantuk caan sunglawi kan hmuhter rih ko. Na kan dawt caah kan i lawm. Jesuh Khrih min in thla kan cam. Amen.

Khrih Biakinn A Simi Kan Pum

November 18, 2007

Nihin Bawipa thangthat dingin a chuak khomi nan dihlak cungah kan i lawm. Pathian ttihzah bu tein thawngtha i hrawm ti hna usih.

Nihin thawngtha a kan chimtu cu Lg. Sun Par (Sunte) a si. A riantam pi lakah caan a kan tenhpiak khawh caah a cungah kan i lawm. Atu cu amah nih caan a hmannak a si cang lai.

Tuzing Bawipa thawhthan ni ah khuami nan sin ah thawngtha chim ding in caan a ka petu Bibik cung le careltu nan dihlak cungah lunglomhnak ka ngei i kan Pathian a min ka thangthat hringhran.

Nan nih he ruahti ding in kai thimmi Bible cacang cu 1 Korin 6:19-20 a si lai.

Nan pum cu Thiangthlarau Biakinn a si kha nan hngal lo maw? Cu Thlarau cu nan chungah a um i Pathian nih an pek mi hna a si kha nan hngal lo maw? Nannih cu nanmah ta nan si lo Pathian ta nan si a man in cawkmi nan si. Cu caah nan pum cu Pathian sunparnak caah hmang ko u.

Tuzing kan Bible cacang ka thimmi hi a tawinak in van langhter ka duh mi cu Korin khuami hna an sualning, nu le pa pehtlaihnak ah an thurhhnomh ning le siasal biakinn chung hna i hlawhhlang nu hna an cawlcangh ning vialte kha Paul nih a theih tikah a dirh ta mi Khrihfabu hna sinah pum thian hlim a herh ning, kan pum cu Khrih biakinn a si zia, mah duhpaoh in hman lo ding kong kha ca a kuatmi hna a si.

Tuzing kan tlangtar ah ka duhmi cu Khrih Biakinn A Simi Kan Pum ti a si lai.

Khrihfami hna nih biakinn timi min kan van theih ah cun kaa chim hau lo in kan thinlung chungah amah tein a hung chuakmi cu, biakinn cu mithmuh lo Pathian a umnak a si caah tihzah bu tein luh i daite in um ding. biakinn chung cu ai dawh bikmi pangpar in tamh ding. Cun biakinn cu a leng in kan zoh tik zongah huham a ngeimi a si awk a si ti khi biakinn sining nih a langhtermi a si. Cu caah cun biakinn zohkhenhtu nih felte in a zohkhenh kha a rian ngan bik a si. Kanmah Khrihfa mi lawng si loin biaknak dangdang hna zong nih an pathian biaknak inn cu thiangte in an chiah i a hmuimi an khangh, pangpar phunphun in an tamh ve. Cucu kan biakmi kan pathian cio kan upatnak a langhnak a si.

Nihin Khrihfa mi hna kan pum cu Paul nih Pathian Thiangthlarau Biakinn a si a timi kan pum a ngeitu hna nih zeitluk in dah kan thurhhnomh ter. Kan thinlung chung thurhhnomh ning cio cu Pathian a kan hmu tu a si I, kan pum a leng a hnomh ning cu minung le minung kan i hmu kho.

Kan pum a rim a chiatter tu, a hnomhtertu pawngkam mi zong nih celh lo ding tiang in dong hngal lo in cakuak kan zu, sahdah, khaini kan hmawm, tikor kan hmawm, kuanza kan khai, zuu kan ding. Cu bantuk pum cu Khrih biakinn kan ti kho hnga maw? Ti kho nemmam hlah. Khrih a dotu ngan bik kan si ti in ka ruah.

Tuchun ah Laimi Pathian thawngin ramdang kan phan hna I, kan va phanhnak miphun hawi nih maw sahlawh rualchan le kan case worker cio nih an kan tawlrel. An motor tha bik in an kan phurh i a herhmi ah an kan kal pi. Kannih nih kan i thawh i khaini, sahdah kan hmawm hnawh hna, kuanza kan khai hnawh hna, an mottor rim chia lak in kan tuah. Kan umnak inn chungah hnompung kip ah kuanza hang le khai ni kan chak, cakuak kan zuk hnawh hna I, kan rim cu celh lo ding in inn chungah kan khah ter. A kan zohkhenh tu an ing kan ponh hna. Cu bantuk mi hna nih kan pum cu Pathian sunparnak caah siseh kan ti ngam hna maw?

Tuchun Laimi kan sin ah Paul hi ra ve seh law, hi tin a ti theu lai dah ka ti. Maw Laimi mi hrut rual hna, zeidang nan sual le nan palh pin ah hin maw, hi tiin nan zuk, nan hmawm, nan khai, nan din, nan ei, fihnung nan va si dah nan zia thin uh. Pathian dawtmi fanu le fapa nan si caah pum thurhhnomhnak in Pathian ralchan ti hlah uh, pum thianhlimnak in Pathian tihzah uh a ti theu lai dah ka ti.

Ka dawtmi ka khuami hna tuchun thawngtha kan i chimh mi cu a cheu caah cun thlarau bia zong a lo lem lai lo na in kan zapi caah ka duhmi cu, kan pum hi Pathian biakinn thiang sinak ding caah Pathian nih zohkhenh a kan fialmi a si i, dawhte in zohkhenh hna u sih.

Kai lawm tuk

Sunte

Thlacam ta hna usih: Bawipa Pathian, a kan dawtu, na cungah kan i lawm. Kan sual palhnak kan ngai thiam. Kan pum hi thlarau biakinn a si ti a thei peng i, a thianghlimmi nun kan ngeih cio khawh nakhnga, lam kan hruai ko. Kan pawngkam ummi caah thilrit kan si sual nakhnga lo le, midang a lawmhter tu kan si khawh nakhnga, kan bawm ko. Pumpak nih kan herhbau mi aa dang cio. Nangmah nih kan umpi cio law, thluachuahnak kan pe cio ko. Thau Internet Ministry zong nihin tiang nangmah lamhruainak thawngin kan kal khawh caah kan i lawm. Hmailei zong ah caan saupi a nguhmi hun siter ko. Thawngtha chimtu le caantlaitu vialte, thawngtha aa hrawmmi viate nih na kong kan i ruahnak le thazaang kan i peknak hmun hun si ter ko. Hmaizarh zong ah atu bantuk in caan tha kan hmuh ter law, pehzul tein nangmah an thangthat kho tu kan si nakhnga lam kan hruai rih ko. Jesuh Khrih min in thla kan cam. Amen.

I Lawm Ko Usih

November 11, 2007

Ni thar le zarh thar kan phan kho than hna. Pathian thawngin a si. Thawngtha i hrawm tti dingin a chuak khomi nan kuat kan tlaih hna. Bawipa nih in umpi cio ko hna seh. Nihin kan zapi i ruah ti dingah chim ka duhmi cu “I Lawm Ko Usih” ti a si.

Thla kan cam ta lai: Dawtu Pathian, na kan dawt caah kan i lawm. Pumpak pakhat cio, kan sining tein kan cohlang ko. Nihin ni tiang na dawtnak in na kan hum zual caah kan i lawm. Nunnak na kan pek caah le pawcawmnak khim in thlua na kan chuah caah kan i lawm. Hmailei zong ah kan um pi rih ko. Jesuh Khrih min in thla kan cam. Amen.

I Lawm Ko Usih

Cathiang: Bawipa chung i nan nunnak ah khan i lawm zungzal ko u ti kan duh hna. I lawm ko u, tiah ka nolh than rih ko lai (Fil 4:4).

Pathian Thawngin A Si:
Nihin ah hi bantuk in kan i ton khawh hna i Amah kan biak ti khawhmi hi Pathian zaangfahnak thawngin a si. Salm catialtu nih cun, “Bawipa kha kan lei ah rak tang hlah sehlaw zei huah dah kan huah hnga tiah a rak ti” (Salm 124:1). A liamcia kan nunnak ah, Bawipa nih a kan umpi caah nihin tiang rian kan tuah khawhnak le ngandamnak kan hmuhnak hi a si. Pathiang thawngin a si.

A Tam Deuh Ko:
Ruat than hmanh u sih. Kan nunnak ah thil pahnih a tlangpi in an kal ti lengmang. Cu hna cu, damnak le zawtnak, lungnuamhnak le lungretheihnak, pawtamnak le pawkhimnak, retheihnak le zaangdamnak, lawmhnak le ngaihchiatnak, nunnak le thihnak tiin tampi an um. Hi pahnih in a ummi pawl hi tha tein ruat hmanh hna usih. Kan nunnak ah zei khi dah tam deuh kan ton. Kan i lawmh caan maw a tam deuh kan ngaihchiat caan, kan dam caan maw a tam deuh kan zawt caan, kan pawtam caan maw a tam deuh, kan khim caan? Vawleicung a si caah, dam lonak nih a kan phanh caan, ngaihchiatnak nih a kan phanh caan, thihnak nih kan chungkhar ah a kan phanh caan, pawtam in kan um caan, lungrethei ngai in kan um caan an um taktak ko. Hmailei zong ah kan ton rih ko hna lai. Asinain, khat lei kapah, lawmh awk a simi cu, kan dam caan, kan khim caan, kan i lawmh caan, kan tha dam caan, hawi nih an kan dawt caan, le nunnak kan hmuh caan pawl hi a tam deuh. Hihi kan theih cio mi a si ko. A thar in ruah than dingah ka hun chim duhmi a si. Thatnak kan cungah a tlun caan a tam deuh ti hi philh hna hlah usih.

Pathian Sinah Lawmhnak Chim Ding:
Paul nih Philipi Khrihfabu kha, Bawipa ah i lawm ko u, a ti hna. I lawm ko u tiah ka nolh rih lai, a ti rih. Paul nih Philipi Khrihfabu sinah ca a tial hi thongin chungin a si. Hrengkhenh chung i a ummi pa nih Bawipa ah i lawm ko uh tiah a ti khawh. A si hrim ko. Bawipa ah i lawmh ding a si hrimhrim. Kan nunnak ah thil tha tampi a kan pek. Kan phut kan tawk loin thluachuahnak a phunphun a kan coter. Bawipa sinah a tanglei hna ruangah kan i lawmh ding a si:
1. Nunnak a kan pek caah
2. Pawcawmnak khim in thluachuahnak a kan pek caah
3. Vawleicung ah mi tampi nih kal an duhnak ram a kan phanhter caah
4. Dawtu, chungkhat le hawikom a kan pek caah
5. Amah zumtu a kan si ter caah
6. Amah thangthatnak ngei kho dingin damnak a kan pek caah
Tampi a um rih. Pathian nih kan nunnak ah a tuahmi thil tha ruang lawngah si loin zumhtlak a si caah le lawmh tlak a si caah Pathian cu lawm ko hna u sih.

Bawipa Thlacamnak cam ti hna usih:

Vancung khua i a ummi kan pa,
Na min upatnak um ko seh.
Na pennak tlung cang ko seh.
Vancung bantuk in lei cungah na duhnak tling cang ko seh.
Pawcawmnak khim in nifa rawl kan pe ko sawh.
Mi nih kan cung i an sual tikah kan ngaihthiam hna bang in
Kan sualnak kha kan ngaithiam ve tuah.
Sualforhnak ah telve loin that lonak vialte cungin kan khamh tuah.
Pennak nawl le lianngaknak le upatnak kha a zungzal na cungah um ko seh. Amen.

Midang Cungah

November 4, 2007

Nihin thawngtha bia i hrawm ti dingin caan a petu nan dihlak cungah lawmhnak kan ngei. Kan nunnak ah kan biakmi Pathian nih thil tha tampi a kan pek. Damnak a kan pek i riantuan khawh nak zong a kan pek. Pathian sinah lawmhnak chim lengmang hna u sih.

Nihin ah kan zapi ruahti dingin chim ka duhmi cu “Midang Cungah” ti a si. Cathiang rel ta hna usih:

Matthai 7:12: “Mi nih kan cungah tuah hna seh ti nan duh bantuk khan mi dang cung zong ah va tuah ve u.”

Johan 2:1-10: Ni hnih hnu ah khin Galili ram Kana khua ah nupi thitnak a um. Jesuh nu kha cuka ahcun a um i Jesuh le a zultu hna zong kha nupi thitnak puai ah khan an sawm hna. Mitsur zu kha a dih tikah Jesuh cu a nu nih khan, “Mitsur zu an ngei ti lo,” tiah a chimh. Jesuh nih cun, “Ka nu, cucu tuah, kha kha tuah, tiah na ka ti awk a si tung lo, ka caan hen pei a phan rih lo cu,” tiah a si. Jesuh nu nih cun sinum pawl cu, “An chimhmi hna paoh kha tuah te u,” tiah a ti hna. Judah mi nih kut tawlnak kong ah phung an ngei i cu bantuk in kut i tawlnak caah cun lung ralca pasarih an chiah; ralca pakhat nih cun ti galan pakul le sawm thum karlak cio an tlum. Jesuh nih sinum pawl cu a thawh hna i, “Hi ralca ah hin ti rawn hna u,” tiah a ti. Liam thluahmah in an rawn hna i annih cu, “Ti kha tlawmpal in hei than u law rlawdanghnak tlangtlatu kha hei pe u,” tiah a ti hna. An hei pek i mitsur zu ah aa cang mi ti cu a rak the. Hi mitsur zu hi khuazei in dah a chuah ti kha a hngal lo. (Ti a thantu sinum nih khan cun a hngalh ko). Cucaah nupi thitupa kha a auh i, “Mi dang nih cun an sawm mi hna kha mitsur zu a tha bik cu a hmasa ah an dinh tawn hna, cun an i zaat hnu ah cun a sawsawh kha an pek hna. Sihmanhsehlaw nang nih cun a tha bik kha atu tiangin naa chiah rih,” tiah a ti.

Midang Cungah

Matt 7: 12 ah kan rel bantuk in Jesuh nih a kan cawmpiakmi cu, “Mi nih kan cungah tuah hna seh tin nan duh bantuk khan midang cung zong ah va tuah ve u” tihi a si. Hihi a chim cu a fawi ngai nain, a tuah le i nunpi cu a har ngaingai. Mi nih kan cungah tuah hna seh ti kan duhmi cu zei dah a si bik? Cu pawl cu tah midang cungah kan tuah kho ve taktak maw? Tuah ding ah tah kan i tim maw? Hi kong hi a thar in ruat ti hna usih ti kan sawm hna. Cu kan ruahnak a kan bawmtu dingah Kana khua i thitumhnak puai kong chim ka duh.

Kana khua ah thitumhnak puai a um. Cu ahcun, Jesuh nu zong a um ve. Jesuh le a zultu zong an sawm ve hna. Johan 2:1-10 ah kan rel cang bantuk in hi puai ah Jesuh nih ti kha mitsur zu ah a canter. Khuaruah harmi thil a tuah ti kha kan hmuh. Hi puai ah a cangmi chungin thil pahnih langhter ka hun duh:

1. Jesuh nu nih aa thium mi hna mualpho ding a duh lo. Hi lungput hi a makmi, i cawn awk tlak a si. Puai ah mitsur zu a dih tikah, Jesuh nu nih Jesuh a chimh. Zei dah a chimhmi cu a si? Fiang tein cathiang ah aa tial lo. A chimh ti tiang lawng a um. Puai tuahmi hna, thangchiatnak kong si dawh cu a si hrim lo. Hi puai ahhin hei kal cio ve usih law, an rawl le meh hei dih sehlaw, kan hawile sinah kan ti khawh men mi cu: Mi an kawhmi hna tha tein tuak lo in an kawh hna. A si loah, rawlchuang pawl le tlangtlatu pawl san an tlai lo tuk, a phunphun in mawhchiat an si men lai. Kan hawi le sin zong ah thli te in cucu dakaw a si cu tiah kan hei chim ko hnga. Nain, Jesuh a nu nih cun Jesuh a va chimh tikah, a chimh nak a ruang aa dang ti kha kan hmuh. Cucu, Jesuh nu nih sinum pawl kha, an chimhmi hna paoh tuah te u, a ti hna nak ah a lang. Mary nih Jesuh hi mitsur zu a dih hi zei ruangah dah a chimh hnga? Thil pahnih ruangah si bik dawh a si:

Pakhatnak, nupi thitu pa a mual pho sual lai ti a phan caah a si. Hihi Mary nih a tuah lo khawhmi a si. Hi thil a tuah lo zongah Mary hi sualphawt khawhnak lam a um lo. Amah bantuk in mitsur zu a dih a theimi an um len ko lai. Dai tein um ziar khawh a si ko. A siloah, dai tein inn ah tlun ziar khawh a si. Nain, Mary nih cun dai tein a um kho lo. Um ding zong ah a ruat lo. Nupi thitnak puai a tlamtling lai lo ti a phang. Phundang in kan chim ahcun, an zawn a ruah hna. Cu tikah, bawmh khawhnak lam a kawl. Aho dah ka chimh lai i, aho nih dah a bawmh khawh hna lai ti kha a ruat.
Pahnihnak, a nu Mary nih Jesuh nih zei maw cu a tuah khawh ti zumhnak a ngei. Hi ka ahhin a nu caah Jesuh nih bochan tlak a si nak a lang. Hi hlan ahhin Jesuh nih khuaruahharnak thil a tuah bal rih lo. Nain, a nu nih sinum pawl kha an fialmi hna paoh tuah te u, tiah a ti hna.

Mary lungput hi i cawn awk a tlakmi, mi nih kan cungah tuah hna seh ti na duh bantuk in mi dang cungah va tuah ve timi cu a si ko. Aho hmanh nih, kan mualpho ding cu kan duh lo. Cu bantuk te cun, Mary nih nupi thitumh puai ah mualphonak a chuah ding kha a duh ve lo. A duh lo lawng si loin, bawmh khawh hna nak lam a kawl.

Caan tampi ah ruah sual a fawimi cu, midang cu fahnak ka pe lem hna lo. Keimah um te in ka um ko. An mah um te in um cio ko hna seh ti hi a si. Hihi a palh ti khawh cu a si lo. Nain, hi pin ah, tuah chap awk an um len rih ti kha langhter ka duh. Cucu mi ca thatnak tuah duhnak lungput ngeih kha a si. Phundang in kan chim ahcun, mi pakhat harnak a ton tikah ah, kan zoh sawhsawh lo ding kha chim duhmi a si. Kanmah nih cu harnak a tongmi pa cu kan bawmh khawh lo hmanh ah, a dang a bawm kho tu ding tal chimh piak khawh ahcun a tha. Asiloah, thla zong kan campiak khawhmi a si. Pakhat tal cu kan tuah awk a si. Mary nih Jesuh a chimh tikah a dang chimh ding hlei a theih hna lo ca zong ah a si kho. A zei a va si hmanh ah, pakhat tal cu a chimh. Phundang in chim ahcun, thil pakhat tal cu a tuah. Cu lungput cu aa dawh tukmi lungput a si.

2. Jesuh nih midang caah a si ruangah khuaruah har thil a tuah. Hi Kana khua i khuaruahhar thil a tuahmi hi Jesuh nih a hmasa bik khuaruahhar thil a tuahmi a si. Hi pin zongah Jesuh nih khuaruahhar thil tampi a tuah ti kha Baibal chungah kan hmuh khawhmi a si. Thil mak tuk a simi cu, Jesuh nih khuaruah har thil a tuah tikah amah caah a si bal lo. Amah ca a si tik paoh ah, khuaruahhar thil a tuah lo. Tahchunhnak, tipil a in dih hnuah, Satan nih a tukforh. A paw a tam tuk lio ah, lung kha changreu ah canter ko ngat, a ti. Jesuh nih a can ter khawh tak ko. Nain, a can ter duh lo. Vailamcung i an tah lio ah, nangmah kha i khamh law, kannih zong kan khamh ve tuah, an ti lio ah, Jesuh nih amah le amah aa khamh lo. Phundang in chim ahcun, khuaruahhar thil a tuah lo. A tuah kho lo i maw a si? Si hlah, a tuah khawh ko. A thi mi hmanh pei a thawhter ko hna cu. Cu caah, Kana khua ah Jesuh nih a tuahmi hi thil sawhsawh men a si lo. Midang caah a ngeihmi zawnruahnak le zaangfahnak ruangah a si bik. “Midang caah” timi a lungput nih khuaruahhar thil tiang a tuah ter. Aa dawhtukmi a si. Caan tampi ah, Jesuh tuahmi he aa ralkahmi kan tuah theo. Mi nih zei tin dah an kan thangthat lai, an kan bawmh lai i, kan zawn an kan ruah lai ti tu kan kawl. Nain, midang caah thil tuah cu kan tlolh diam tawn. Jesuh nih a tuahmi hi thitumhnak puai a tuahmi chungkhar nih an thei lo. Puai a zawhmi zong nih an thei lo. Ziah an theih lo? Jesuh Khrih nih keimah nih tuahmi a si hi va chim hna uh a ti hna lo caah a si. Jesuh nih aa hmaithlak pimi cu midang caah nun kha a si.

Cu caah, ka dawtmi ka u le ka nau hna, Jesuh le a nu nih an tuahmi zoh tikah, midang caah thinlung an ngei, zawnruahnak an ngei, ti kha fiang tuk in a lang. Mi nih kan cungah tuah hna seh ti kan duhmi thil kha, annih nih cun midang cungah an tuah. Jesuh le a nu nih an ngeihmi lungput hi i cawn cio hna usih.

A tanglei thlacamnak hi na um hmun tein cam ve dingin kan sawm.

Thlacamnak: Zungzal in a nungmi Khuazing Pathian, na cungah kan i lawm. Ni ceu dawh na kan phanhter. Damnak na kan pek. Riantuan khawhnak thazaang zong na kan pek. Kan nunnak hi thil tha in na khah ter ko. Kan i lawm tuk. Na kan dawt tluk in kan in dawt khawh lo caah le, pakhat le pakhat kan i dawt khawh lo caah kan ngaithiam. Na dawtnak a thei chin i, na kan duh piak bantuk in midang cungah, dawtnak le zawnruahnak a ngeimi kan siter ko. Kan tei khawh lomi tukforhnak kan in ter sawh hlah. Kan tuahmi thil kip ah dinfelnak a tanhmi kan si khawh nakhnga kan umpi ko. Nihin ni tiang kan umnak cio ah na kan umpi i lam na kan hruai caah kan i lawm. Hmailei zong ah, nangmah nih kan umpi rih ko. A dam lomi nih damnak an hmuh than nakhnga thla kan cam. Ramdang a phan cang nain, rian a tuan kho rih lomi zong nih, a rauh hlan ah rian an tuan khawh nakhnga thla kan cam. Malaysia lei ah lungrethei ngai in a ummi khuami hna nangmah nih umpi ko hna. Malaysia in ram that deuh nak ah an lanh khawh nakhnga zong thla kan cam. Khua lei ah kal takmi kan nu le kan pale, kan chungkhat, sahlawh rualchan hna, khuami hna ca zongah thla kan cam. Nangmah nih pumpak pakhat cio umpi ko hna. Damnak pe hna in na daihnak pe cio ko hna. Hihin kan i hrawmmi thawngtha zong hi kan nunnak lamhruaitu a si khawh ve nakhnga thlua kan chuah piak ko. Na kan dawt caah kan i lawm. Kan Bawipa Jesuh Khrih min in thla kan cam. Amen.

Thlacamnak Hmual

October 28, 2007

Nan dam cio hna maw? Kan nunnak ah Pathian nih a kan hruainak ruah deuhdeuh tikah Pathian hi thangthat loin um khawh a si hrim lo. Harnak, damlonak, lungretheihnak le thil phunphun kan ton caan a um ko. Sihmanh sehlaw, kan biakmi Pathian cu kan sinah a um pengtu Immanuel a si. Immanuel ti cu Pathian kan sinah a um tinak a si. Cucu philh hna hlah usih.

Nihin thawngtha a kan chimtu cu Pu Van Luai a si. Atu bantuk in caan a kan hman piak khawh caah a cungah kan i lawm. Atu cu amah nih caan a hmannak a si cang lai:

Tuzan lei caan ah Pathian le khuami hna sin ah thawngtha bia phuannak caan tha ka ngeih khawh ve caah kai lawm tuk i, pakhat cio nan cungah a thar in lunglawmhnak bia ka van chim. A bik in a kan tawlreltu Bibik le, careltu mipi pakhat cio nan cungah lunglawmhnak chim cawk lo ka ngei ti kha ka van nawlh duh than.

Kan dihlak i hrawm ding i Bible ca ka van i thim mi cu Salm 23:1,2,6 hi le, 2 The. 5:16-18 hna hi an si:

"Bawipa cu tukhal bantuk in a ka vengtu asi, ka herh mi vialte kha a ka pek dih. Ram hring lak ah aka bawh ter, dinh hmun tipawng ah aka hruai. Na thatnak le na dawtnak nih ka nun chung vialte an ka umpi lai i, na inn cu a zungzal in ka inn asi lai" (Salm 23:1, 2, 6)

"A zungzal in i lawm u, a zungzal in thlacam u, zeibantuk thil nan tawn hmanh ah lunglawm in um u" (2 The. 5:16-18).

Tuzan lei kan bia tlangtar ding i ka van i thimmi cu, "THLACAMNAK HMUAL" ti hi a si. Kan Bible ca van relmi hna he hin a rem lo deuh in a lang men lai, asi na in, Jesuh Khrih zumtu hna kan hrampi cu zumhnak fek nun ngeih hi a si i, cu nun ngei kho ding cun, nifa zanfa Pathian hmai ah kun bu in khamhmi kan si caah lawmhnak bia chim , le Amah Pathian ca ah zumh tlak i nun pek hi a si ko rua, ti in ka ruah ve caah a si.

(1) THLACAM SULLAM: Thlacam a sullam cu, Pathian sin i raithawinak hlanh a si. Lunglawmhnak chim a si lo ah duhherh thil hal kha si. Pathian he i chawnh a si caah, ralring te le, bia sullam ngei tete chim/ hman ding a si. Zum lomi hna nih saupi thla an cam le, ring pipi i an au an khuan bantuk in auding a si lo. Uanthlar nak le, capo nak ah hmang lo in, innkhan chung te ah va lut in a thli te in kan duhherh kha kan va chimh ding a si. Cuti kan thil tuahmi a hmu tu Pathian nih khan kan thil duh a hlawhtlin ter lai.

(2) ZUMHNAK THAWN HI THLACAM THAWN A SI: Zumtu nun ah hin mi cheukhat nih pekchanh lei ah an tthawng, mi cheu chimrel lei ah, mi cheu bel thlacam lei ah an cak ve. Thlacam i Pathian riantuan hna cu um hmun i Pathian riantuan a si.Cu bantuk hna cu a zingzan in thla an cam, mi zawfak mi hna le, Pathian riantuan mi hna le, ram le mi phun caah ti in a phunphun in thla an cam ve tawn. Thla an cam tik ah an lungthin ah lung ttengnge maw ziar ngeihnak maw a um lo i, a nih nu a nih pa tu khi cu chiat nih va tlunh ko seh, ti duhnak lungthin an ngei kho lo. An lungthin a thiang, an khuaruah a hman, an mit au le an holhrel zong a hmaan i, thla an cam dih hnu zong ah hawikawm pakhat le pakhat kar ah dawtnak hri a leeng. An karlak ah i tlaihchannak hri ai zam i, i hmuh than lai an i ngaih. Anih nu anih pa khi cu ti awk a tthat a ttha loh, va si ko seh, ti nak lungthin kha a um lo in; "anih khi, khiti asi ko ah zeitin thla kan cawnpiak ning a si hnga, ti zawnruahnak nak lungthin a um.

Mah ca cun, thlacam a tthawng mi cu an lung a thiang, dawtnak nun an ngei i mi ngaihthiamnak lianpi kha an ngei peng. A sunglawi tuk hringhran. Mi lungawinak ding a si ah cun nem an i thlaih i, mi bia hmaan set lo zawng kha, " a si tak hlah maw," an hei ti khawh tawn. Vawlei cung pumpi a thlum-al nak nih a cul i, van khi a phak. A dawtnak kuang cu a liam thluahmah i, vawleicung Golgotha tlang Bawi Jesuh temtuarnak tlang cu a van chilh. Mi vialte nih kutdawng an sawh i sual an puhmi Bawi Jesuh nih cun kan sualnak vialte a phawih i, a kan ngaihthiam dih cikcek i, dawtnak sunglawi bik rocotu ah an kan siam tthan. Kai lawm tuk hringhran.

Pathian dawtnak le ngaithiamnak sunlawi ning van chim thluahmah hi ka duh, nain, caan nih an kan daih lo!!! Pathian mi fel hna cu Pathian dawtnak theihfian, thildang in ti khawh lo hmanh ah Pathian sinah lunglawmhnak thlacamnak tal i chim peng hi a si ko.

(3) KEI LE THLACAMNAK: A cung i kan Bible tlangtar mi hna khi kan Bible ca chung ah hin ka duh bik mi hna an si. Chan thar nun i kan chim ah cun,"ngaknu aw-thlum" nak hmanh in ka lung a ka hlau deuh zungzal tu an si. Van rel tthan ve hmanh u. Bawipa nih cun American tlang maw, Europe tlangah, kanmah lawng hlah maw, kan um ko rua, kan ti lio le khawizei maw ka i ka um lio ko zong ah khin a ka zoh, an ka ngiatthlai peng i, tukhaltu bang a rak kan ven peng. Cu lawng lo, a ngaihthiamnak le a dawtnak van ruah ah thadam le lunglawm te in kan um i, ram hring lak bawk bantuk in kan tha a dam, kan hna a ngam. Mah ca cun a umnak vanram cu kan umnak si ve zungzal ding in lunglawm te in kan fuh peng.

Mah ca hin Pathian sin ah hin kai lawm i, Paul nih Thesalonika khuami hna ca a kuat hna bang khan lunglawmhnak thla ka cam kho peng ve tawn. Ka thlacam tlangpi van chim ta ning. Zingthawhka, zan ih lai, rawl ei lai, motor mawngh lai te hna an si bik. Manh caan ah a si tawn fawn. Ka cam ning tlangpi cu, 'A kan dawtu kan biakmi kan Pathian, damnak lawmhnak le caknak na ka pek caah kai lawm. Thinlung thiang ruahnak ttha ka pe law, ei-ding kho, ttuanhawl kho in ka siam. Na miphun le ram caah santlaihnak ka ngeih ve ah cun, kai lawm," ti hi a si deuh peng ko.

Atu bantuk in khuami ramleng ah tampi kan chuah tik hna ah mi tam deuh cu riantuan ruang ah i khawmh, hlacawn, Bible rel le, thlacam pumh le zapi thil ti nak i tel kha kan i manh kho ti hna lo. Na bel in thlacam hi philh hna hlah usih. Pathian sin ah lawmhnak chim usih, bawmh hal usih law, ngaihthiam zong hal peng ko hna usih, ti hi tutan kan sin i thawngtha i hrawm ka duh mi a si.

Pathian nih thlaw kan chuah piak ko seh. Amen.

Kai lawm.

Van luai
Silver spring

Thla cam hna usih : Khuazing Pathian, nihin ni tiang, harnak kan ton caan ah siseh, lawmhnak kan ton caan ah siseh, na kan umpi peng caah kan i lawm. Na fapa hmang in kan theihmi thawngtha hi pumpak pakhat cio kan caah thlua kan chuahpiak ko. Thlacam nun a ngeimi kan si khawh cio nakhnga nangmah nih kan bawm. Tukforhnak a tei khomi kan si i, nangmah lei ah kar a hlang chin khotu kan si nakhnga zong thla kan cam. Kan umnak aa dang cio nain, atu bantuk in nangmah biak ti nak caan na kan pek caah kan i lawm. Nangmah nih na kan dawt i kan zawn na kan ruah bantuk in, pakhat le pakhat aa dawmi, kan zawn aa ruatmi, le midang zawn zong a ruatmi kan siter ko. Midang ngaihchiat ter tu le thilrit kan si sual lo dingah kan bawm. Midang a lawmhtertu le a bawmchan khotu dirhmun ah kan dir khawh nakhnga lam kan hruai ko. Hmaizarh zong ah atu bantuk in nangmah kan in thangthat than khawh nakhnga kan umpi. Na kan dawt caah kan i lawm tuk. Kan bawipa Jesuh Khrih min in thla kan cam. Amen

Nan Aw Cawi Maw Thleng Sual Lai U Cih

October 21, 2007

“BAWIPA, kan BAWIPA, Na lianhngannak cu vawlei cung dihlak ah hin a lang ko! . . . Nangmah na sermi van le an hmun ciote ah na chiahmi hna thlapa le arfi hna khi ka zoh tikah, minung hi zeidah a si i na hnak kar ah na tenh? Minung menmen a si mi hi zei dah a si i a zawn na ruah? ti hi ka ruat. . . BAWIPA, kan BAWIPA, na lianhngannak cu vawlei cung dihlak ah hin a lang ko!” (Salm 8:1, 3-4, 9)

Thla kan cam ta hna lai: A kan dawtu kan Pathian, minung menmen a simi na fale na hnak kar ah na kan tenh i, kan zawn na kan ruah caah kan i lawm. Kan sual ko bu ah, na kan ngaihthiam i, nihin ni tiang lam na kan hruai caah na min kan in thangthat. Zei bantuk thil kan ton hmanh ah, kan har ah siseh, kan fawi ah si seh, nangmah he thuk piin aa pehtlai khomi kan siter ko. Lairam ah a ummi kan chungkhat le khuami hna caah thla kan cam. Nangmah nih umpi hna law, an herhmi thluachuahnak pe ko hna, tiah kan in nawl. A dam lomi nih damnak an hmuh i, retheimi nih nangmah sinin thilrit zaannak an hmuh than khawh nakhnga thla kan cam. Nihin na fapa hmang in kan theih laimi thawngtha zong hi kan zapi caah fim a kan chimtu le nangmah duhning in a nunzia kan thiam nakhnga lam a kan hmuhsaktu siter ko. Na kan dawt caah kan i lawm. Kan Bawipa Jesuh Khrih min in thla kan cam. Amen.

Nihin thawngtha a kan chimtu cu Pu Nun Hre a si. Atu bantuk in caan a kan hman piak khawh caah a cungah kan i lawm. Atu cu amah nih caan a hmannak a si cang lai:

Nan Aw Cawi Maw Thleng Sual Lai U Cih

Baibal ca rel hna u sih: “Cu hnu tlawmpal ah cuka i a dir mi hna nih khan Peter cu an hei fuh i ‘Phehthuh hau lo in nang cu an sin i a rak i tel ve mi na si hrimhrim ko, NA AW CAWI NIH AN PHUAN’ tiah an ti” (Matthai 26:73)

A ngan ca fang in ka van tial mi hi Baibal ah cun cafang ngan cun ai tial lo nain ka duh nak zawn asi cah a ngan cafang in ka tial nak asi.

1. Caan tha a kan pe tu kan Pathian a hmasa bik ah a min thangthat si ko seh. Ruah lo pi ah Bikbik nih caan a van ka thiah. Caan a ka petu le nan zapi cungah lomhnak bia ka van chim hmasa.

2. Voi khat cu Thantlang ah ka nu fawn ka chawn lai ka ti. Fawn ngeitu U Van Nawl he kan van i chawn hmasa. Amah he hin sangkhat innpa kan si hna i ai ngamhtlaak ngai khin kan um. Ka min in a van ka auh, Pa Hre, Amerikah phak hnu zong ah THAU AW cu a tlau loh tih a van ka ti. Tlau hlah thlau hlah ka thiam chin lengmang rua ka ti cu teh ka ti i fawn cun kan i nih sek. Thau aw cawi hi phun dang ngai asi ve. Kanmah cun kan i hngal lem lo. Khual nih a kan hgalh ngai. An van kan cawn ah cun a si ngai tak. Kan aw a dongh lei te ah khin hla kan sak i a-lar kan ti mi phun te hi kan chuah tak. Thau cio cio hmanh ah sangte khua taw lei ah a zual deuh an ti (capo bia).

3. Thlacam hmasa hna u sih: Vancung khua i a um kan pa, kan i hlawh ruang ah le kan tlintlak ruang ah a si lo. Na dawtnak na veel thawng in nunnak, damnak na kan peek lawng si lo in khuaza ramkip ah khua a sa mi kan khua mi hna, Thalrau ti rawl hrawmti nak caan, na kan peek caah na sin ah kan i lawm. Kan i ruah lai mi na Baibal thiang zong hi ka caah thahnem santlai ah van si ter ko tiah a kan khamhtu kan bawipa Jesuh Khrih min bochan in zaangfah kan nawl. Amen.

4. Kan Baibal relmi ah van kal colh ko hna usih. Kan bawipa Jesuh Khrih an tlaihzan, Pailat bawipa inn i a bia an caih lio ah, inn lengin tihdok ngamhdok in a hngakmi Amah a zultu Peter kha nangmah hi Jesuh zultu na si ve tiah nu hna nih voi hnih an van ti ah khan a van i phelh, a voi thum nak ah a dang nu pakhat nih i phelh duh hlah na si hrimhrim ko cuh. Bia na chim ah pei na aw cawi nih an phuan ko hi. Amah zultu hrimhrim na si ko tiah a van chim ah khan ar cu a hung khuang vuaimai. Peter cu an tlaih lai zan i Jesuh nih ar voi khat a khuan hlan ah voi thum tiang na ka hlawt lai a ti mi kha a lung in a van theih than i, a kikam deuh ah a vai i thawn i a tap ti kha kan Baibal ca i kan hmuhning cu a si.

5. Hi ka Baibal ca caang ah hin tlawmpal van ruah chap ka duhmi a um. Peter hi Galili mi a si. Galili mi hi an aw cawi phun dang te an si ve rua. Thau aw cawi phun cu an si ve hnga dek maw? Peter nih hin a aw cawi hi rak thleng seh law Jesuh zultu a si hi an thei hnga lo. Sihmanhseh law Jesuh a zultu a si an theih ruang ah fahnak an peek ti cu Baibal ah a um lem rua lo. Jesuh bia a tlinnak tu a rak si deuh. A aw cawi rak thleng seh law Jesuh zultu a si cu an hngal hnga lo. Sual puh cun a luat men hnga. Sihmanhseh law Jesuh bia a tling hnga lo. Peter nih a AW CAWI A THLEN LO mi cu Bawipa Jesuh bia a tlinnak caah a rak si. Laimi hla phuah thiam Thomas Tial Uk nih Jerusalem zaantim khuamawt i Peter thang tu ar . . . ti mi hla a phuah khawh nak ca h a rak si ve . . .)

6. Kannih khuami hi hawi khua he tahchunh ah cun mifim zong kan um lo. Cathiam zong kan um lo. Mirum zong kan um lo. Santlai lo sifak canfak te in khua a rak sa mi kan si hna. Kan hrik tam le kan thah tam zong ai hngal dih mi kan si ko hna. Pathian thawng in ramtha, ramnuam, sinuam ah (Khi ram tha chungah kannih kan um lai ti mi hla kha . . .) kan phak tik ah hin micheu khat cu holhtawn lo ning, chim tawn loning, ruahtawn loning hna zong khin holh le rin le, chim le reel le ruah sual hna kan hmang kho men. Cu
cu awcawi thlen phun khat a si ve. Cun kan khua kan ram ah kan kal tak i hna sifak canfak le harsa ngai in nifa pawcawmnak caah lungre theih in khua a sa mi kan innpa kan chak thlang, kan sahlawh kan rual chan, kan hawikom hna hngal ti lo in kan philh sual caan hna zong a um kho men. Kan khua kan ram kan fing kan tlang hna an i dawh ning le kan ca mi lung hnemtu an rak si lio hna kha kan philh el can zong a um kho men. Cu hna cu ka chim duh bik mi an si, cu cu AW CAWI THLEN ka timi cu an si.

7. Cu caah nan aw cawi maw thleng lai u cih. (1) Kan chuahnak kan khua le kan ram le kan hawi dawt hna, (2) Kan fing le kan tlang hna, (3) Thlarau hnukthlum in a rak kan cawmtu kan Khrihfabu hna, (4) Fimnak hnukthlum a rak kan dinhtu kan sianginn hna, (5) Kan peeng le kan tlaang, kan ram le kan miphun hna maw philh citceet lai u cih. Ngeih le chiah chaw le va cun namber pakhat nak cu a si ko. Cunak in a biapi deuh mi cu NA THINLUNG IN LAIMI NA SINAK LE CU NAK IN THAUMI NA SINAK KHA, I PHILH SUAL LAI U CIH. Nan fale zong chim hna uh. Mah cucu mi nih Jesuh zultu nan si nak an in hngalh hna nak ding nan tette khan cu a si lai.

A bia thiang kan i ruahmi a tha chun a um ah cun pakhat cio kan caah Bawipa nih thlua kan chuah piak ko seh.

Pu Nun Hre

Nan aw cawi maw thleng sual lai u sih tiin thawngtha bia in thazaang a kan petu ka pa Hre cungah kan i lawm.

Thawngthanhnak: Hmaizarh (October 28) thawngtha a kan chimtu ding cu Pu Van Luai a si lai.

Teimak Nun le Teinak

October 14, 2007

Nan dam cio hna maw? Pathian nih lam a kan hruai i, thawngtha bia i hrawm than kho dingin caan kan hmuhmi hi a sung tuk hringhran. Pathian sinah lawmhnak chim daithlang hna hlah usih. Internet hmangin thawng kan i thanh khawh lawng hmanh si loin, Pathian kan biak ti khawhmi hi Pathian dawtnak a si. Tuzarh cu Kawlram lei in kan pa Rev. Dr. Sang Awr nih phung a kan chimh lai. A rian tampi lakah caan a kan pek khawh caah a cungah kan i lawm. Amah nih caan a hmannak a si cang lai:

TEIMAK NUN LE TEINAK

“Cucaah ka u le ka nau hna, fekte in dir u law zeihmanh nih in thial kho hna hlah seh. Bawipa rian teimak te in nan tuannak ah cun i manh lo ngai in um zungzal ko u, Bawipa rian nan tuanmi cu a lak a si bal lo ti kha nan hngalh” (1 Kor 15:58).

“Jesuh nih cun annih cu a thawh hna i, ‘Ka Pa cu rian a tuan zungzal i cucaah kei zong nih ka tuan ve awk a si,’ tiah a ti.” (Johan 5:17).

Kan Laiholh ah “Teimak Nun” kan timi chungah hmual innak, i hneeknak, zuamnak, tannak, biatak chuahnak, lungthin tak in tuannak, i hmaithlaknak, lungsaunak, ngaihthiam khawhnak, i thihchihnak, ruahchannak, lungdongh lonak, teinak tehna an i tel dih. Hi nunning hi Pathian riantuannak ah siseh, sipuazi kawlnak ah siseh, sianginn kai fim cawnnak ah siseh, lo thlawh cinthlaknak ah siseh, ram ca riantuannak ah siseh, zei thil kan tuahnak paoh ah bia a pi hringhran. Zeicahtiah teinak phaknak a si.

Nihin Laimi kan dirhmun in kan zoh tikah teimaknak a tlawm deuh chin lengmang. Kan pipu hna nih rian an tuan tikah hrokhrolnak aa tel lo. An hmaika ah tuan awk a simi rian kha lungthin takin an rak tuan. Ca cawnnak lei in fimthiamnak an rak ngei lo nain an lungput a ding i an thazang nih a zawh tawk teimak chuah in rian an rak tuan tawn. Duhsah tein kan pupa dirhmun kha kan chuahtak ziahmah. Retheih thabat kan ngaihlah kan zuam ti lo i a fawilannak le lamphawk in a miak hmuhnak, zuamnak um loin hlawhtlinnak, ca zuam loin firchom in ca awn duhnak, thabatnak um loin tlamtlinnak kan duh chin lengmang. Kan ram dirhmun ah pawcawmnak rian tha tuan awk kan hmuh khawh lo caah teimak thinlung kan ngeih khawh lonak zong a si kho. Asinain kan tuah khawh ding kan tuan lomi tampi a um.

1. Pawl Cawnpiaknak: Pawl nih “Teimak Nun” he pehtlai in Korin Khrihfabu sinah ca a kuat hna. Zeicadah Teimak Nun kong a chimh hna? Korin Khrihfabu hi Pawl nih a rak dirhmi a si. A hramthawk ah cun buainak a um tuk lo nain tlawmpal a rauh tikah Khrihfabu chungah buaibainak a phunphun a chuak. Cu buainak cheukhat hna cu:

1. Dawtnak a Tlawm: Korin Khrihfabu chungah holh theih lo tiang a hmang khomi an um nain pakhat le pakhat an i daw lo. Midang zawnruahnak a um lo. Mah le mah kha sang ngai in an i ruat. Holh theih lo zeitluk hmanh in thiam ulaw dawtnak nan ngeih lo ahcun pokpalawng a si a ti hna. Dawtnak a biapitnak kong kha a chimh hna. Bawipa zanriah an ei tikah mirum deuh nih sifak kha an ei kanh dih hna i sifak pawl cu an ting tawn lo. Thlachiat ruahnak a um lo. Hi tluk in thlarau in ka khat tiah holhtheih lo tiang an hmang nain dawtnak an ngeih lo caah zawnruahnak, thlachiat ruahnak le dawtnak kong a cawnpiak hna.
2. Lungkhah Lonak: Khrihfabu chungah lungkhah lonak, pumpak entainak, hruaitu i kalhnak a um. Pawl phu, Apolo phun, Piter phu ti bantuk tiang an phan. Cucaah remnak, pumkhat sinak kong le Bawipa rian ah lungkhat tein riantuan ti a herhnak kong kha a chimh hna.
3. Teimak Chuahnak: Zumhnak kong ah lungfehnak a um tuk lo. An thinlung a hmun lo. Jesuh Khrih an zumhnak a fek lo i, i thial lengmang an duh. Pawl cawnpiaknak ah khan an hmun kho lo. Ziaza le nunning zong a niam chin lengmang. Pawl nih an caah a re a theihnak le a teminnak zong a ruah awk an thei kho lo. Bawipa rian ah teimak tein riantuannak a tlawm. Cucaah fek tein dir ulaw zeihmanh nih in thial kho hna hlah seh. Bawipa rian ah teimak tein tuan ko u, nan tuanmi cu a lak a si lai lo a ti hna.
   

2. Pawl Nunnak: Pawl cu cathiam mifim a si caah Judah upa hruaitu pakhat a si. Mi raltha a si. Khrihfa cawnpiaknak kha Judah mi an zumhnak a hrawktu a si tiah an hmuh caah hrawh an duh. Cucaah Pawl cu Khrihfa hremtu ah tuanvo an pek. Asinain Damaskas hauka ah Khrih thlarau he an i tong i Jesuh Khrih cu Pathian fapa khamhtu Messiah a si kha fiangte in a theih caah Khrihfa hremtu si ti loin Khrih lamkaltu le cawnpiaktu a hung si. A nunning cheukhat kan hun langhter lai

1. Inkhawhnak a ngei: Khrih thawngtha a chim ruangah thong ah an thlak. Fung in voi 39 tiang an tuk. Lung in an cheh, tilawng rawhnak voi thum a tong. Tilian nih a tlun hnawh, mifir tihnung a ton hna, a hawikom nih an hlawt, tihal le rawltam in a um, zan it loin a um caan voi tampi a um (1 Kor. 11:22-29). Hi tluk thilrit le tihnung nih a nenh tikah a nunnak tiang a liam dengmang nain a lung a dong lo. Bawipa rian ah hmual a ing i tuar khawhnak a ngei. Amah fimnak le thawnnak thawng in a si lo. Thawnnak a ka petu Khrih thawngin zeibantuk harnak hmanh ka in khawh ko hna a ti (Fil. 4:13). Pawl in khawhnak hi khuaruahhar a si. Bawipa caah a temtuarnak le a innak cu ka in chim khawh lo tiangin a ngan.
2. A Teimaknak: Hi tlukin thih dengmang in harnak a tuar nain Bawipa rian ah a lung a dong bal lo. Kawltung leiah lung dong lo tein a tli. Rommi sin a phak tikah Rommi bantukin um zia a thiam. Krikmi sin a phak tikah Krik mi bantukin um zia a thiam. Judahmi sin a phak tikah Judahmi duh hoih in a um thiam. Khrih sunparnak caah a herhning in ka um i ka tuan a ti. Zumhnak thazaang a dermi hna zeitital in Khrih sinah ka phakpi kho hna hnga maw ti in an sining chungah lut in ka um a ti (I Kor. 9:20-22). Kawltung leiah felte le ding tein ka kal. A pingpang ka thong bal lo.Tinhmi kawltung ka phak tiang teimak tein ka tuan a ti. Bawi Khrih rian a tuannak ah teimak tein a tuan ruangah teinak dirhmun a phan. A rian kha tling khitkhet tein a tuan. Teimak nun kha a dongh tiangin a zulh i a riantuannak Bawipa nih thlua a chuah caah a thih hnuah Rom pennak ram pumpi tiang Khrihfa an can dihnak hi amah riantuannak thawngin a si.
3. Manh Ni A Ngei Lo: A riantuannak ah manh ni a ngei bal lo. Thawngtha a chim pah in a pawcawmnak ah rian a tuan chih. Ahohmanh nih lahkhah an pe lo. Puan deu a tuah pah, thawngtha a chim pah. Dinh caan a ngei lo. Harnak, retheihnak chimpit dirhmun a phak tik zongah lung dong loin a tuan peng. Hi bantukin, manh loin teimak nun a ngeih caah a dongnak ah cun teitu dirhmun a phan. Cucaah teimak nun hi teinak a si.
   

3. Jesuh Dirhmun: Kan Bawipa Jesuh dirhmun kan zoh tikah teimak nun a ngei. Vailamcung thihnak tiangin a tuan. Ka pa cu chunzan in rian a tuan caah kei zong nih ka tuan ve awk a si a ti (Johan 5:17). Zei bantuk rian hmanh pumpeknak nun he tuan lo ahcun hlawhtlinnak, teinak a um kho lo. Jesuh nunning le teimak nun kha mithiang Pawl nih aa cawn ve i Jesuh a thih bantukin thihnak tiang a tuar ve. Zumhnak ruangah raltha tein thihnak tiang a in ve tikah a riantuannak kha nihin tiang a hmun. Jesuh dirhmun ah thathutnak a um lo. Sawtphetnak, lamphawk in kalnak a um lo. Midang caah a nunnak pek in a kan khamh. Hlan lio lamkaltu hna le zumtu hmasa hna an dirhmun kan zoh tikah teimak nun nih teinak tiang a phakpi hna ti kha fiangte in kan hmuh.

4. Laimi nih kan ruah awk: Nihin Laimi kan dirhmun kan zoh tikah biaknak ah siseh vawlei fimnak le pawcawmnak rian kan tuannak hmun ah siseh teimaknak a tlawm chin lengmang. Tuan set loin a miak hmuh kan duh. Ca zuam lo in awn kan duh. Fir chom in mark thatha hmuh kan duh. A ruang tampi a um ko lai. Asinain kan sining chungah kan ti khawh tawk riantuan awk tampi a um. Siangngakchia a simi hna nih fakpi in ca i zuam le in ca zoh a herh. Laimi lakah Master le Ph.D. degree hmumi tampi kan herh. Cozah riantuannak ah minung tampi kan luh a herh. Kan miphun thanchonak caah fakpi in kan tuan a herh. Rian kan tuan tikah fel le ding le teimaknak lungthin he kan tuan awk a si. Sipuazi kan tuah tik zongah teimak tein kan tuan awk a si. Nihin kan dirhmun ah sifak bik le mi tlawmte kan si caah midang nak hmanh in fak deuh in kan tuan awk a si. Sifah raldohnak a phunphun kan tuah a herh. Hihi nihin kan liang cungah aa khingmi rian ngan a si. Zuamnak le teimaknak hi kan nunnak lamhruaitu ah kan hman khawh a herh ko.

Tlangkawmnak: Hlawhtlinnak le teinak hi amah tein a ra bal lo. Rian fakpi tuannak thawngin a si zungzal. Jesuh chimmi chungah mirum pa nih thong 5, thong 2. thong 1 tiin a pek cio hna i chaw a lehter hna. Thong nga a pekmipa nih thong hra a hmuh. Thong hnih a pekmi pa nih thong li a hmuh ve. Asinain thongkhat a pekmi pa nih a karhter lo. A miakmi 5000 pa le 2000 pa cu a thangthat hna i a karhter lomi 1000 pa cu a ngeih cia hmanh an chuh dih i a leng hacang rialnak hmun ah hlonh u a ti hna. Tuan lo cu Jesuh Khrih nih a duh lo. Jesuh nunnak ah thathutnak hmun a um lo. Riantuan loin hruaitu tha an chuak kho lo. Mi thathu nih miphun le Khrihfabu an ser kho lo. Khrihfabu zong an thanchopi kho lo. Biatak thinglung a dih umnak in tuan a herh. I zuam a herh. Tei man thluk a herh. Hihi Khrihfa kan nunning ding a si. Teimak nun cu teinak a si.

Sangpui pa

“Teimak Nun” ngeih cio dingin thawngtha bia in thazaang a kan petu kan pa Rev. Dr. Sang Awr cungah kan i lawm.

Kan zapi thlacam hna usih: Bawipa Pathian, thawngtha bia kan theih bantuk in tei man a thlumi, a ding a felmi kan si khawh nakhnga, bawmhnak kan in hal. Kan nunnak ah kan tuah awk a si nain, kan tuah khawh lomi le kan tuah lomi, kan tuah lo awk a si nain, kan tuah mi cungah kan ngai thiam. Hmailei ah nangmah duhning in kan nun chin khawh nakhnga lam kan hruai law, fim kan chim ko. Atu lio ah khuami nih kan tuan cuahmah mi Saisichuak lam zong tlamtling tein cawh a si khawh nakhnga, na sinah thla kan cam. Nihin ni tiang ruahnak le thazaang in siseh, chawva in siseh, a tangmi na fale an zapi thluachuahnak pe chin ko hna. A tang rihmi zong ah thazaang a chuah kho tu kan si nakhnga, thazaang kan pe rih ko. Thau biakinn caah seh thilri cawknak a hlutu an zapi in thluachuah pe chin ko hna. Cun, khua ah lai a hlummi hna Khrismas tuahpiak dingin aa timmi Pu Sang Hnin te unau pathum le an chungle cungah kan i lawm. Nangmah an in dawtnak le khuami an dawtnak hna hi hun theihpiak hna law, na thluachuahnak he umpi chin ko hna. A dam lomi caah thla kan cam. Damnak zaangfah ko hna. Retheihmi hna an thilrit kan chawn piak ko hna. Cun, na fale hna kan tuahmi kip cio ah khua awng kan pem ter ko. Nangmah zumhnak ah a fekmi le bochan awk thlakmi, midang caah tette tha kan si ter khawh nakhnga lam kan hruai ko. Na kan dawt tuk caah kan i lawm. Jesuh min in thla kan cam. Amen.

Pathian Naih Usih

October 7, 2007

Thawngtha bia i hrawm than kho dingin caan tha a kan petu kan biakmi Pathian kan thangthat. Cathiang relta hna usih:

“Bawipa cu tukhal bantuk in a ka vengtu a si, ka herhmi vialte kha a ka pek dih. Ram hring lakah a ka bawhter, dinh hmun ti pawng ah a ka hruai. Thazaang thar kha a ka pek i a rak ka kamh bantuk in a hmaan mi lam ah a ka hruai. Cu lam cu a thuk bikmi muihnak chungin kal hmanhselaw, Bawipa, zeihmanh ka tih lai lo, zeicahtiah nangmah nih na ka umpi ko. Na thiangthunh le na tanbo nih ka hna an ka ngam ter. Ka ral hna hmai ah rawl na ka dangh, ka lu ah chiti na ka toih i ka hrai cu a liam in a liam. Na thatnak le na dawtnak nih ka nun chung vialte an ka umpi lai i na inn cu a zungzal in ka inn a si lai” (Salm 23:1-6).

Thlacam hna usih: Tukhal bantuk in a kan vengtu Pathian, kan sualnak kan ngaithiam law, na dawtnak a hngal i, na duhning in a nungmi na fale kan si ter ko. A dam lomi hna damnak zaangfah ko hna. A hlei in, Pu Chan Lian caah thla kan cam. Sibawi lakah sibawi tha bik na si nak kha, na fapa a nunnak ah i langh law, damnak zaangfah hram ko. Ram kipah a um khuami ca zong ah thla kan cam. An umnak cio ah damnak an hmuh cio khawh nakhnga, cun an riantuannak cio ah hlawhtlinnak an hmuh cio khawh nakhnga le, zei thil an ton hmanh ah nangmah an bochanmi an si cio khawh nakhnga thla kan cam. Lailei ah a ummi kan chungle zong nangmah nih zohkhenh ko hna. Nihin na fapa hmang in kan theih dingmi na thawngtha zong hi nangmah he thuk chin in kan i pehtlaih khawh nakhnga thlua kan chuah piak ko. Jesuh Khrih min in thla kan cam. Amen.

Nihin thawngtha a kan chimtu cu Pu That Bik a si. Atu bantuk in caan a kan hman piak khawh caah a cungah tampi kan i lawm. Atu cu amah nih caan a hmannak a si cang lai.

PATHAIN NAIH U SIH (“Be Close to God”)

Jeim 4:8: Pathian cu naih u law an naih ve hna lai.

1. Fing le tlang sang hna le hawr thuk lak ah runn rep lo di inn te ah khua a rak sami, dawtmi khua mi vial te hna vulei cung ram tha bik le ram nuam bik asi mi US, Europe, le Australia ram hna ah khuasa kho le thu dir kho in a kan cawisang tu le thluachuah a kan petu kan Pathian a hmasa ah a min thangthat si ko seh.

2. Salm 23 chungah kan hmuh bantuk in cawhnuk le khuai tizu in a luannak ram tha ah a kan hruai i thluachuah a kan pekmi kan hrai cu a liam in a liam. Cu lio ah thluachuah a kan petu kan Pathian kha philh riangmang in kanmah thil ti khawhnak le thawnnak ah kan ruah sual tawn. Mi cheu khat cu kan hun ngeih le kan hun rum deuh tikah rum zia kan thiam tawn lo i kan biachim a puam hngal i kan lu lei kan lam kal le kan ban vawr ah kan langhter tawn. Pu Zo Tum Hmung nih a chimmi pakhat cu Laimi cu kan harsat lio ah cun zaangfah awk tlak te in kan i umter riangmang i kan tlam a tlin hnu le kan hung rum hnu cun mi zei ah kan rel hna lo i a rak bawmtu lila kha ral ah kan ser tawn hna a rak ti. Hi bantuk mi nung kan si sual nakhnga lo ralrin kan herh. Laimi hi rum zia a thiam lo bikmi phun kan si i kan mi rum hna an dir hmun kan zoh tikah anmah thil ti khawhnak le thawnnak ah an ruah sual tawn i zu le sa le nuamhnak phun he an um i an chan cheu hlan ah thihnak le sunghbau zatlaknak a phunphun kan tong tawn. Hi hi kan Lai ram ah 100 ah 80% tluk an si. Jeim 4:13: 15 chung kan zoh ah cun, rumnak a kawlmi hna nih Pathian bochan lo in anmah thil ti khawh nak ah an ruah tikah an nunnak cu pangpar le chum a zammi bantuk men a si zia kha kan hmuh.

3. Cun ram dang kan um tikah chunzan in riantuan a si i Susi dawr ngeimi le bang cu Pathian ni zong ah riantuan peng nan si hna i Pathian biaknak caan le i khawmhnak caan pek khawh a si ti loh. Khuacaan a van rauh deuh chin lengmang tikah kan Pathian zong philh a fawi ngaimi asi. Kei zong kum 5 chung keimah lawngte ka um i khawmhnak zong a um loh i tlau a fawi taktakmi dirhmun ah ka rak um ve. Cu lio ah khua ka ruahmi cu aho hmanh nih an ra in phung an ka chim kho tung lai lo i cu caah keimah te nih Pathian hi ka kawl a hau lai ka ti i thla fak pi in ka cam i Pathian hla thatha hi kai chuah peng. Cun VCD, DVD, CD ti bantuk kha kai chuah peng i a caan caan ah cun ka mit thli kai thlak i hnangamnak ka van ngei than. Cu caah caan kan ngeih lo lio ah khan kan umnak kip ah Pathian hla thatha kha ngai peng law Pathian kha ruat peng law cu nih cun Thiang Thlarau riantuannak cu thli tu bantuk in na sin ah a ra ko lai.

4. Dawtmi khuami vialte hna, hi vuleicung rumnak hna chaw le va le inn le lo le mawtawka thatha hna kha caan tawi te ca lawng an si i minmei zammi bantuk le pangpar bantuk in a rauh hlan ah a uai dingmi le a tlau dingmi lawng te an si. Cu caah kan caan tha ngeih chun te hi Bawipa caah hmang hna usih ( 1Korin 7:29-30).

Kan donghnak ah kan umnak hmun kip in Pathian hi a sang bik ah chia hna u si law kawl peng hna usih.

PATHIAN CU NAIH U LAW AN NAIH VE HNA LAI (“Be Close to God”)

Thla kan cam hna lai: Thau khua le Thau miphun a kan cawisangtu le a kan dawtu kan Pathian, caan tha le caan duh nung na kan pekmi cungah na min kan in thangthat. Tuzing na thawngtha phuang ding in santlailo mi hna na kan cawisan ca zong ah na min kan in thangthat fawn. Dawtmi khuami hna sinah nangmah nih na kan fialmi rak ka naih u law kei zong nih kan naih ve hna lai na timi na bia cu, tlamtling lo pi in ka phuanmi cungah nangmah nih ngaitu hna le chimtu hna sinah a thar in thluachuahnak kan pe hram ti ah thihnak in a tho thanmi kan Bawipa Jesuh na min in thla kan cam kan Pathian. Amen.

Pu That Bik
Germany

Zultu Si Man

September 30, 2007

Atu hrawng cu kan thinlung hi kan ram lei lawngte ah a um ko. Thaizing ah Kawlram ah zeidah a cang lai ti hi theih kan duh pah, kan ttih pah khin a um. Hi bantuk caan ah Khrihfami nih kan tuah khawh bikmi, a thazaang zong a thawng bikmi cu kan biakmi Khuazing Pathian sinah thlacam hi a si. Kan ram caah kan umnak cio in thlacam hna usih.

Ni ceu thar kan phan than. Thil zei maw cu an i thleng, i thil thar zong an hung chuak. Minung hna nih kan khua hmuh ning zong aa thleng, kan ruahning zong aa thleng. Nain, a zei tik hmanhah aa thleng bal lomi cu kan biakmi Pathian i a dawtnak hi a si. Nihin zong ah Amah thangthat kho dingin a kan zaangfah than. Pathian a min kan thangthat.

Thlacamnak in kan caan thawk hna usih: A kan dawtu Pathian, na kan dawt caah kan i lawm. Kan ram, Kawlram ah thil a cangmi ruangah kan lungre a thei. Kan ram i thleng seh ti kan duh hringhran. Mipi a daw i mipi zawn a ruatmi a cozah kan ngeih khawh nakhnga thla kan cam. Ram caah a nunnak a pemi hna, an thisen le an tuarnak hi a lak hun si ter sawh hlah. Kawlram ah a ummi kan chungkhar le kan miphun hna, nangmah nih thazaang pe ko hna. Hi pin in thisen dang a luan ti nakhnga lo, ram chung ah daihnak le dinnak a len khawh nakhnga, maw Bawipa, nangmah hun i thlak ko. Kan ram caah kan tuah khawhmi a um lo. Zeizong a tuah khotu nangmah kan in bochan i kan ram sining na kut cungah kan in ap. Nangmah nih kan umpi ko sawh. Cun, a dam lomi hna, damnak pe hna law, lungretheimi thilritmi hna an thilrit chawng ko hna. Pakhat cio nih kan herhmi na theih dih ko. Nangmah nih kan herh cio in na thluachuahnak he kan umpi ko. Nihin na fapa hmang in kan theih laimi thawngtha zong hi pakhat cio kan nunnak ah, kan nun a sersiam tu, na duhning in kan nun khawh nakhnga lam a kan chimtu a si nakhnga thlua kan chuah piak ko. Jesuh Khrih min in thla kan cam. Amen.

Hihin thawngtha a kan chimtu cu Pu Tuan Hmung a si. Atu bantuk in caan a kan hman piak khawh caah a cungah tampi kan i lawm. Atu cu amah nih caan a hmannak a si cang lai.

ZULTU SI MAN

Luka 14:33: Nan ngeihmi vialte kha nan hlawt dih lo ahcun, ka zultu nan si kho lai lo.

Thla kan cam hmasa hna lai: Sertu kan Pathian, vawlei khua zakip i a ummi Thau mihna sin ah kei santlai lo na bia nung phuang ding in fial ka si. Na bia nung chim ding ah ai tlaakmi zong ka si lo, vawlei fimnak le thiamnak nih a phak khawh lomi na biatak cu, kei hmurka in chim ding caan a phan cang, chimtu dingah nangmah kan sawm i ngaitu thinlung chungah, kei JESUH zultu ka si man zeidah a si ti i an thinlung ram luahtu le fiantertu si ding ah, na fa Jesuh min in thla kan cam kan Pathian. Amen.

1. Zultu si man kong hi nihin ni ah mi tampi nih i fiang u sih law, Jesuh hnu zul, Krifa kan si nak hi a tak deuh ko hnga tiah ka ruat tawn. 1999 ah khan Tahan ah kan pu Biak Ceu te inn ah kan leng hna. Biak Ceu le Hrang Bik cu a senci an tawng, an bia ruahmi cu hitihin a si: Hrang Bik nih ai thawh i U Biak nang le kei hi vanram cu kan kai teengteeng la va si kaw, zu dinglo sa ei lo pawl nih Hrang Bik le Biak Ceu hi zei hme an hong tuah ve hnga VANRAM ah hin an kan ti te la cuh tiah tui emem in an i ruah.

2. Jesuh nih a thawh hna i zulh a ka duhmi cu a nu, a pa, a unau, a ni, a far, mah le mah a huat a herh a ti (Matthai 8:19). Phungbia cawnpiaktu saya nih Saya na kalnak paoh ah kan zulh lai a ti. Jesuh nih hin ziah lunglawm tein e a ti ko hnga lo i,a duh hnga lo, a chunglei a hngalhfian ruangah a si hrimhrim ko lai ti a fiang. Kannih nih hin teh Jesuh na kalnak paoh ah kan zulh lai, hei ti ve hnik usih law zeitin dah a kan leh ve cio hna hnga.

3. Hitihin a kan lehmi kan um hna hnga maw, Refugee hmuh le ramdang phak khawhnak pei na duh deuh ko kha . . . tiin mi cheukhat a kan ti theo lai. Tlangval cheukhatcu na saakawng le, nungak sin ahcun kei cu ka tlaak lotuk . . . Nitlaak lei a phanmi pawl cu Tangka hlei ahcun zei khua nan thei lo hih, cun mah le mah nan i hlaw kho lo hih, nan i saihchiah dih ko hi the. Tlangvaal upa le pa thlawi cheukhat pawlcu nupi tthit khua nan ruahnak ah kei tham cu a kilken ah nan ka non ko hme hi a kan ti ttheo hna hnga. Phungbia cawnpiaktu saya cu cenghngia nih kua an ngei i, vate nih bu an ngei sihmanhsehlaw kei cu riahnak hmanh ka ngei loh tiin a leh diam ko.

4. Zei thil paoh si man a um, Thaumi kan si man zong a um a herh. Cucu khuanu khuapa le, kan chuah tlanghrawn kha kan dawt ko, na zawn kan in ruah ko kan hei ti cio, chimnak le hmur le kaa lawng i fian hi a fawi te, Thau hrin kan si caah Thau mi kan "si man" a um a herh hrimhrim ti hi hngalh fian a herh ngaingai. Khua tlang caah hawi thawh zat thawh khawh a herh, Hmei nu hmeipa caah ti i van chimrel tikah thawh buur a tam tbk pawl hna hi, si man kan fianlo ruangah a si tawn, kan i fian a si ahcun khua ca tthatnak dingle, lawmhnak kan chuahpi khawh ko hna lai.

5. Luka 5:11 ah, Piter le a hawile cu Jesuh nih a auh hna tikah, an nga tlaihmi le an thilri siaherhnak ngeilo tein an zulh ko. Minung sinak i ruah ahcun a har ngaingai, thluachuah a pek ttunghna, a peek mi hna nga vialte cu an kal taak dih tthan hoi. Kannih cu si usihlaw, thluachuahnak, hlawhtlinnak, van hmuh le cangka i kaltaak cu kan si khawh lai ka zum hrimhrim lo. Asianin zultu kan si ahcun kaltaak hrimhrim a herh tiah, Piter cu ai fiang tuk i siaherhnak ngei loin Jesuh cu a zulh.

6. Khuazei kan phaknak paoh ah, Khrih zultu kan si man i fiang u sih law a lianngan mi vawlei thil hna le, nun nuamhnak a ngeitu, zeizong tlamtling tein a kilkawi tu, Jesuh nih hlawtding i a kan fialmi vialte hlaw dih kho u sihlaw cu, Pathian duhnak a tlintertu kan si hnga i, hi hna khua hi Jesuh zultu taktak an si tiah, vawleicung i thangtthatnak kan co pin ah, vanram ah zultu kan si man cu, a donglomi hnangamnak tling, zungzal in zungzal tiang a hmunmi, a kan phaktertu a si ko hnga.

KAN ZAPI CAAH PATHIAN NIH THLUACUAH PE KO SEH.

Siang Siang pa
Norway

Thawngthanhnak: Hmaizarh (October 7) thawngtha a kan chimtu ding cu Pu That Bik a si lai.