Remnak le Dawtnak

Thau Internet Ministry Caan Hmannak
March 8, 2009

Nihin ni tiang nunnak le damnak a kan petu kan Pathian a min kan thangthat. Thawngtha bia hrawmti dingin timhtuahnak a ngeimi nan zapi cung zong ah kan i lawm. Ram kip, hmun kip ah kan phan nain hmun khat te ah Pathian kan biak ti khawhmi hi a sung tuk, Pathian dawtnak thawngin a si. Pathian dawtnak hi philh hrim hlah usih.

Kan zapi ZBC 400 “Chungkhar Dawtnak Um Tikah” hi kan sa hna lai.

Chungkhar Dawtnak Um Tikah
Chungkhar dawtnak um tikah zeizong te aa dawh
Chungkhar dawtnak um tikah lunglawmhnak a tam.
Daihnak tampi a um i kaa kip ah nihnak a um
Dai tein caan nih a dih dawtnak umnak ah

Nolhnak:
Dawtnak sung
Dawtnak thiang
Dai tein caan nih a dih
Dawtnak umnak ah

Chungkhar dawtnak um tikah thlam chung hmanh a nuam
Huatnak le nahchuahnak nih zei an tuah kho lo.
Kan nunnak nuamhter awkah kan lamhmi kip vawlei cu
Dawtnak umnak hmun ahcun pangpar an cang dih.

Chungkhar dawtnak um tikah zeizong te aa rem
Dawtnak umnak hmun ahcun zeizong te a thaw.
Innpa he remnak a si rualchan he dawtnak a si.
Khualtlung nih an i lawm i thangthatnak a tam.

Bawi Jesuh Khrih nangmah nih kan sinah um tuah,
Kan innchungkhar lakah hin nang Bawi si ko.
Nang kan sin na um ahcun zeihmanh kan tih lai lo.
Nangmah nih kannih inn cu thluachuahnak pe ko.

Nihin thawngtha a kan chimtu cu Pu That Bik (Germany) a si. Caan a kan hmanpiak khawh caah a cungah lawmhnak tampi kan ngei. Atu cu amah nih caan a hmannak a si cang lai:

Tuzing Bawipa thawhthan ni ah phungchim kho dingin caan tha a kan petu kan Pathian a min thangthat in um ko seh. Caan a ka petu Bibik cungah le khuami nan zate cungah lunglawmhnak chim cawk lo ka ngei ko.

1. Bible ca kan rel hna lai, Filipi 2:2-5 tiang:- Kan fial duhmi hna cu hihi asi: lungthin ah i khat uh, pakhat le pakhat i daw uh, lungrual tein um ulaw kaa lawmhnak hi tlinter uh. Pakhat le pakhat entainak le mah pumpak thangthat kawlnak kha nan lakah umter hlah u, toidawrnak lungthin tukha ngei cio ulaw, midang nakin ka tha deuh ti-ah zei tik hmanh ah va ruat hlah uh. Cun midang duh ningkha hmuhthiam i zuam ulaw nanmah duhnak lawng kha ruat hlah u. Nan lungput ning cu Khrih nih a rak ngeihmi lungput ning kha si seh.

2. Cun Efesa 5:15-20 tiang:- Zeitindah kan nuncan a si ti kha tha tein i zoh u, mihrut bantuk in um hlah u, mifim bantuk in um u. Atu kan nikhua hi caan chia a si caah caan tha na hmuhmi pohpoh kha thate in hman i zuam u. Mihrut si ti hlah u, Bawipa nih tuah hna seh ti an duhmi hna tu kha tuah i zuam u. Zu ri hlah u, zu cu nanmah hrawktu lawnglawng a si ko. Thlarau tu khan khat deuh u. Hla dawh le bia dawh in pakhat le pakhat i chawn u. Bawipa cu hla le aw dawh in nan lung taktak in thangthat. Kan Bawipa Jesuh Khrih min in zeizong kip caah Pathian cu lawm u.

3. Kum 2009 kum thawk ka te ah khan USA Washington DC khua ah kan Lai tlangval thatha pathum hna nih zarhkhat chung bak te ah zu dinnak ruangah an nunnak kal tak in ruak thum bak an rak i tong i nu le pa le Laimi kan za te lungfak ngai in kan um hna. Cu lio ah cun kan pastor hna, kan nu kan pa, kan ule hna le ram upa kan ngeihmi hna zong lungre thei ngai in khua an rak ruat hna i kan pa Mang Cung Nung (Sailo pa) nih tukum hi cu Laimi dihlak nih ZU DOH KUM tiah ti hna usih law, phungchim mi paoh nih zu din thatlonak kong hi chim hna usih tiah biatlang a rak van. Cu lio ah cun kei zong ka lung a tling tuk ve i ca zong tam nawn te ka rak thlah phah ve. Cun tlawmpal kan van um i kan tlang Hmunlipi khua pa nih a hawile pathum hna cu nam in a chunh hna i, thi lo nunglo in an um ko ti kha thawng kan van theih than hoi. Hringtu a nu le a pa le khuami vialte mi hmaikhap lo ngai in ningzak le mitthli he an um thawng kan theih dihmi asi.

Kan Laimi umnak paoh ah zu le sa Eidin ruangah, lainawnnak le thisen chuahnak, zawtnak thalo an i lak i mino tete nungak le tlangval hna tampi an thi cang. Isiknak le huatnak le remlonak a chuak i u le nau le nule pa, sang le zawl le bukhat chungah buainak in a khat. Cu caah khuami kan zate nih tukum thawk in cun Zu hi doh hna usih law kan pawngkam ah a ummi kan hawikom hna le miphun dang hna tiang in cawnpiaktu tha si i zuam hna usih ti hi a hmasa bik ah van chim ka duh.

4. Pawl hi thong a tlak lio ah a dawtmi hna Filipi khuami Khrihfabu hna kha ca a kuat hna i, Filipi 2:2-5 ah kan hmuh bantuk in khua pakhat chungah, sangle zawl ah, bu pakhat chungah i remlonak le huatnak, buaibainak phuntling a chuahter khotu cu, Bawipa dawtnak a thei kho ve lomi, Pathian a zum kho taktak lomi hna nih an i ngeihmi lungput, phundang in kan chim ahcun, piantharnak a ngei rih lomi hna lungput cu, keimah ti nak, midang nakin a fim khun le a thiam khun le a hngal khun i ruah, mi zawnruahnak le dawtnak ngeih lonak, thlachiat ruat loin tlabelbul in nun, duhfah hakkauhnak le zangennak ngeih te hna nihhin, remlonak le buainak a chuahter caah fakpi in rak i ralring uh, zumtu a simi hna nih cun kha vialte thiltha lo kha hlawt in Khrih nih a rak ngeihmi lungput tu kha ngei hna uh tiah hi ca hi a rak kuat duhmi hna a si.

5. Cu bantuk thiamthiam in Pawl nih a dawtmi hna Efesa khuami Khrihfabu hna zong kha hi tin ca a kuat ve hna. Efesa 5:15-20 chungah kan hmuh bantuk in, atu lio kan ni khua hi caan thalo le caan parpihling ah kan um hna i, vulei cungah a um bal lomi le kan theih bal lomi harnak a phunphun kan tong hna. Ramkhat le ramkhat raltuknak le i kahnak, Sunami, mangtam le Narkis thlichia le tilet hna ruangah minung rel cawk lo an thi an lo i, harsatnak a phunphun an tong. Hi bantuk caan tha lo i kan um ca-ah caantha na ngeihmi te hi ralring tein hmang law, thiltha lo hna kha kal tak hna ulaw, zu le sa ei din ti hlah law, Pathian tu kha zum law, thiang thlarau tu in khat uh. Bawipa cu hla le awdawh in nan lung taktak in thangthat uh, ti ah ca a kuat hna.

6. Dawtmi khuami vialte hna, kei zong nih khuami kan dihlak sinah ka chim duhmi cu, Pathian kan zumhnak ah i biatak hna usih. Kan taksa dihlak le kan nunnak dihlak le kan lungchung dihlak in Pathian cu bia hna usih. Cu hnu lawngah kan khua, kan ram, kan innchungkhar, kan sang, kan zawl le kan bu chung cu a dam lai i zeizong te duh a nungmi le a nuammi khua le ram le bu kan ser khawh lai. Tuchun ni ah thawng kan theihmi cu kan khua Thau cu Khuahlun he Khuathar he pastor zong an ngei ti lo i pumh zong a um ti loh an ti. Kan tlang pumpi nih lungre thei ngai in an tuaktan pi hna i atu Thlualam pastor Saya Tial Thawng cu Thau Khuahlun ah pastor tuan ding in an fial i a tuan lai. Kan khuami pastor tampi kan ngeih ko tung hna, zei ruangah dah hitin an um kun. Hi bantuk zia le za an thinh lo i Bawipa lei ah an i mer lo ahcun khuami zong hi an tio dih te ko lai. Phungthluk ah, “Innchungkhar thurual tlu lo pamnak, khuakhat thurual tlu lo tio nak” an ti.

A bik in ram leng ah khua a sami Thau khuami kan zate nih hi kong hi fakpi ruah a phu i lungfim tein tuaktan a za cang. USA, Europe, Australia, Newzeland, Malaysia le India ummi hna, nan umnak hmun ah nan Khrihfabu ah khuami i hruainak ah dawnkhantu hna kan um hna maw, kan hawile kan khuami hnahnawhnak le ningzah mualphonak kan pe sual hna maw, ti kha tha tein i chek hna usih law, Khrih nih a rak ngeihmi lungput tu kha ngeih i zuam hna usih. Bawipa nih khuami kan dihlak caah remnak dawtnak a len khawhnak lai thluachuahnak kan pe hram ko seh. Amen.

Thla kan cam hna lai: Haleluiah kan Pathian na biathiang i ruah tinak caan tha na kan pekmi cungah kan i lawm i, na min kan in thangthat. Ramchung ah le ramleng ah khua a sami hna Thau khuami kan dihlak cu tuchun ni tiang damnak he lam na kan hruai caah kan i lawm. Kan pa Do Heng (Nancy pu) zong a dam lo ti kan theih i kan lungre a thei. Pathian nangmah nih a damlonak ah le an i thlopbulnak ah huppheng domhtlai law damnak tling a hmuh than khawh naklai na sinah thla kan cam. Kan theih khawh lomi a dam lomi hna le a zaw fakmi hna an um ahcun Bawipa damnak pe hram ko hna. Abik in Thau khua na Khrihfa bu hna cu buaibai ngai le na duh lo ning in an umnak vialte cu ngaithiam hna law nunthar le ziaza thar he nangmah cu an i sawm i a thar in Thau khua caah thluachuah na pek thannak lai kan in nawl. Ramleng ah a ummi khuami kan zate kan rian tuannak le kan cacawnnak, kan khuasaknak ah damnak hnangamnak, tlamtlinnak kan ngeih khawh naklai na sinah thla kan cam. Rian loin a ummi hna le lungrethei in khua a sami hna pakhat cio an nunnak zong na kut cungah kan in pek i hlawhtlin nak, tlamtlinnak pe hram ko hna. Tuzing na thawngtha kan chimmi zong khuami kan dihlak cungah thluachuahnak pe hram ko. Pawl nih Filipi khuami le Efesa khuami hna sinah a rak chimmi kha, dawtmi khuami hna sinah saduhthahnak ngan pi he ka chim ve tikah ka chim palhnak a um ahcun ka ngaithiam law, a thami na bia cung ah thluachuahnak kan pe hram ko tiah, na sin ah lunglawm te in thla kan cam kan Pathian. A men.

Pu That Bik
Fabriciusstr-13
65933 Frankfurt
Germany