Rumnak Taktak Na Ngei Ve Cang Maw?

May 18, 2008

A hmasa bik ah nihin ni tiang lam a kan hruaitu kan Pathian a min kan thangthat. Khuami hmun khat te ah thawngtha hrawmtinak kan ngeih khawhmi hi a sung tuk hringhran. Kan i lawmhnak a si ah, kan thilrit a si ah Bawipa Pathian hmai ah thum hna usih. Thlacamnak he thawngtha i hrawmti ding in kan sawm hna.

Nihin thawngtha a kan chimtu cu Pu That Bik (Germany) a si. Caan a kan hmanpiak khawh caah a cungah kan i lawm. Atu cu amah nih caan a hmannak a si cang lai.

Dawtmi khuami hna he thawngtha iruah ti ding in caan tha ka hmuh ca-ah caan tha a kan petu kan Pathian a min ka thangthat. Caan a ka petu Bibik cung zong ah lunglawmhnak tampi ka ngei ko.

Bible rel hna u sih: 1 Timote 6:6-10

“Biaknak nih hin rumnak a chuah pi taktak, sihmanhsehlaw cu rumnak a ngeimi cu mah tinvo i a lung hna a ngammi kha an si. Zeidah vawlei ah hin kan hun i chuah pi? Zeihmanh kan i chuahpi loh. Cu bantuk in hi vawlei in kan kal tik zong ah zeihmanh kan i kal pi kho lai lo. Cu ca-ah cun rawl le fenhaih kan ngeih ah cun cucu kan i zat awk a si ko. Sihmanhsehlaw rum a duhmi hna cu tukforhnak chungah khan an tla i tih a nungmi le thatlonak a chuah ter kho tu duhnak nih khan rap foih in a foih hna i cu nih cun rawhralnak ah khan a kal pi hna. Tangka duhnak hi thatlonak phunkip chuahnak hram a si. Mi a cheu cu tangka ngeih an duh tuk ca-ah zumhnak kha an kal tak i ngaihchiatnak a phunphun an tong.”

TLANGTAR: RUMNAK TAKTAK NA NGEI VE CANG MAW?

Biahmaithi

Thantlang khua kan rak um lio, inn le lo, dawr le mawtawka le TV le video he khua kan raksak ve lio a tur bak in kan rak tur lio ah, Even Pu Hram Tlai nih a rak kan leng i cu ah a rak chimmi cu, Thantlang khua ah cun mirum tling bak nan si ko. A si na belte in nan umtu le nan thutdir kan zoh hna ah hin ka lungre nan thei i ka zaang zong nan fak tuk fawn, hi tluk in rumnak an petu hna hi Pathian a si i, Pathian sinah lunglawmhnak chim loin nan um ko hi cu tih a nung tuk, cu ca-ah zaangfahnak in home-crusaih zarhkhat chung in tuah piak hna ning law a si kho hnga maw a rak ti. Cu lio ah cun kai manh lo tuk i caan kan pe kho hnga maw aw ti ah ka rak duh lem loh. A si nain a hmai khah lo ah kan tuah piak ko kan rak ti i a rak kan tuah piak. Cu zong ah cun zei pi khi ka lung ai fiang kho rih loh. A hnu pi 1995 kum thong ka hung tlak hnu lawng ah thonginn chungin ka lung a hung fiang kho ve. Haleluiah!

1. Vawlei cung kan nun chung ah hin chawle va le innle lo kawlhawl hi a herh i Pathian zong nih a kan fialmi a si. Matthai 25:14-30, Phungthlukbia 6:6-11, le Phungthlukbia 10:4-5 kan zoh tik ah riantuan hi le rum hi a kan fial ve ko. Kum 8 chung ah kan khuami hna zong ram kip ah kan rak phan hna i US le Europe hna le Australia hna ah INN le lo thatha hna kan van cawk i mawtawka he a tur bak in kan hung tur hna i zei tluk in dah lunglawmh awk a si. Cu tik ah khualei kan rak um lio kan si kha kan i philh riangmang hna i mirang pawl nawl kan cawng hna. Kan nu kan pa hna le khuami hawikom hna kan philh hna. Thawngpang hal le cakuat le phone chawnh zong kan daithlang chin lengmang. Van chonh caan hmanh ah kai manh lo tuk le a hnu ah rak ka chawnthan te mu ti hna a tam ngai cang. Riantuan ruang ah maw, nuamhhnaih duh ruang ah maw Pathian ni ah Biakinn pumhnak le thlacamnak le hlacawnnak ah a chuak ti lomi kan tam ngai cang hna. Rawlei lai thlacam le ih lai thlacam rumro hmanh a hmang ti lomi mawng chupchap i a ummi kan tamtuk cang hna.

2. Vawlei cung chawleva hna hi kan i za cang kan i duhtawk ko cang ti hi zei tik hmanh ah a um kho bal lai loh. Na rum deuh lai na duhmi a tam chin lai i na lungre theih kha a chap in a chap chin ko lai. Unau na si ning kha tha te in van i chek hmanh. Thaukhua i nan um lio nan harsat lio le atu mawtawka le inn le lo he a tur bak in na hung tur i na hung rum hnu ah hin lungdai hnangam in na um bal hme maw? Na duh a fak chin lai i na hak a kau chin lai i Pathian biaknak caan le nulepa le hawile kom chawnhnak caan zong na ngei kho lo chin lengmang ko lo maw? Kha ti bu khan na caan cu nikhat khat ah a dong ve te ko lai.

3. Philipi 4:11-13 - “Zeicah ti-ah ka ngeihmi paoh ah lungsi te in um dingkha ka thiam cang. Herhbau in um kha zei dah a lawh ti zong kha ka hngalh. Cun a hlei a hluat in ngeih kha zeidah a lawh ti zong kha ka hngalh. Cu ca-ah khua zeika hmanh ah, zei tik caan paoh ah, ka paw a khim ah siseh ka rawl a tam ah siseh tam tuk ka ngeih ah siseh, tlawmtuk ka ngeih ah siseh lungsi hnangam te um kha ka thiam cang. Thawnnak a ka petu khrih thawng in thil zei paoh ka tuah khawh ko hna.” Pawl nih Filipi khua mi hna kha hi bantuk in ca a hei kuat hna bantuk in dawtmi khuami vialte hna nan sinah hi thawngtha hi theih ve i kan nunnak ah cawnpiaktu a si nak hnga ka sa duh thah a si.

4. Pawl nih a hawi pa Timote kha ca a kuat tikah hi vawlei cung rumnak hna hi cu rumnak tling an si lo ning, tangka duh tukmi hna le chaw le va a duh tukmi hna nih an lungput le an sining, hmailei an nunnak ah a donghnak ah ngaihchiatnak an ton lai nak kong a chimhmi a si. Kan nih cio zong vawlei chawleva hna le inn le lo kan kawl hawlnak ah hin Bawipa he kan um ti hna maw? Chungkhar hna he daw te le lawmte in kan um hna maw? Vawlei caan hi a chia tuk cang, ruah lo pi in chungkhar dihlak le khua dihlak in thih lohnak hna kan tong cang hna. Cu ca-ah cu hlan kan nunning kha si ti lo in Bawipa he um ti peng i kan har ah siseh, kan i nuamh ah siseh Bawipa ah aa lawm kho mi kan si a herh. Mizo hla phuah thiam nih cun, “Hei khawvel hi ral hahse la, Lal Isua ka ngei tawh si,” a ti bang in a ti ve kho mi kan si a herh.

Pathian thawng in khua mi hi vawlei rumnak cun a RUM mi kan tam ngai cang hna na in RUMNAK TAKTAK Bawipa ah a ngeimi belte cu kan tlawmte kho men. Hngar khawh lomi le a tha bikmi rumnak tling taktak kan ngeih khawh dih nakhnga kan chim kan relmi hi khuami hna kan dihlak ca-ah thluachuah kan pe hram seh. Amen.


Thla kan cam hna lai:
Dawtu Pathian, nihin ni tiang lam na kan hruai i, kan umnak cio ah, mualpho lo tein na kan chiah caah kan i lawm. Kan sual kan palhnak rel cawk lo si ko hmanh sehlaw, kan ngaithiam ko tiah kan in nawl. Na fapa hmangin kan theihmi thawngtha bia hi pumpak pakhat cio kan caah thlua kan chuah piak law, nangmah ah rumnak taktak a ngeimi kan si cio nakhnga lam kan hruai ko. A dam lomi caah thla kan cam. Damnak zaangfah ko hna. A hleice in, Van Tha Bor nu le kan pa Sangpui pa caah thla kan cam. Van Tha Bor nu zong a rauh hlan ah a kal rian a tuan lomi thlen piak ding a si. Nangmah nih sibawi te le a zohkhenhtu hna sinah i phuang in hi na fanu nih damnak tling a hmuh than nakhnga, bawmhhal in thla kan cam. Kan pa Sangpui pa zong aa thlopnak ah thanchonak lam na panh ter i kan i lawm. Nangmah nih umpi chin rih law, tha tein a dam than nakhnga bawm hram ko. Bawipa Pathian, Kawlram ah cyclone ruangah harnak a tongmi vialte ca zong ah thla kan cam. Nangmah nih bawm ko hna. Cun , Malaysia thong ah a ummi hna tuan ah luatnak pe ko hna law, umpi ko hna. Ram kipah a ummi khuami hna, damnak le an tuanmi kip ah hlawhtlinnak pe cio ko hna. Thau ah Telifon a kan bunhpiaktu Malaysia ummi khuami hna caah thla kan cam. Thluachuah pe chin ko hna. An i tinhmi hlawhtlinter chin law, hmailei ah atu nak hmanh in khua le ram caah thazaang a chuah khotu siter ko hna. Fimcawnnak a biapit zia le a that zia zong kan theih ter chin law, fimcawnnak thazaang a petu kan siter ko. Nihin ni tiang lam na kan hruai bantuk in hmailei zong ah lam kan hruai rih ko sawh . Na kan dawt caah kan i lawm, kan Bawipa Jesuh Khrih min in thla kan cam. Amen.

Khrih Vel Thawngin A Luatmi Lainu

May 11, 2008

Atu hrawng cu, Cyclone Nargis nih tlanglei Kawlram a den ruangah mi tam tuk an thihmi, mi tam tuk umnak ngei lo ah an canmi, ei din ngei lo in an ummi, thil man a kaimi thawngpang nih lung nuam loin a kan chiah. Kawlram kong ruah ah thaw a pit, lungre a thei hringhran ko. Kan umnak cio in harnak a tongmi hna caah thlacam cio usih.

A zei bantuk hmanh va siseh law, nihin cu Hringtu Nu le ni a si. A hmasa bikah Hringtu nule a kan petu kan biakmi Pathian kan thangthat. Hringtu nu a simi le hringtu nu dirhmun in tuanvo a latu nan zapi upatnak kan in pek hna. Pathian nih thluachuah vanluhnak in pe ko hna seh law, nun saunak in chap ko hna seh.

Nihin thawngtha a kan chimtu cu U Sun (Sun Par Chin) a si. Caan a kan hmanpiak khawh caah a cungah kan i lawm. Atu cu amah nih caan a hmannak a si cang lai.

Bible ca awi rel lai: I Korin 11:11-12
"Bawipa chung i kan nunning tu ah hin cun, nu hi pa caah a herh bantuk in pa zong cu nu caah a herh ve ko. Nu cu pa chungin ser a si bantuk in pa zong cu nu chungin a chuakmi an si ve ko; zeizong vialte hram cu Pathian a si.”

Tuzing kan Bible cacang thimmi a tawinak in van fianter ka duh. Paul nih Korin kuat khat daal 11 nak a tialmi a hramthawk in a dongh tiang kan zoh tik ah nu hi pa nakin a niam deuhmi khi a lawhter. Nu nih zapi hmai i thla nan cam tikah a lu i khuh seh ti te hna, a va tangah i dor seh ti te hna an si. Hi cakuat a tial lio caan ah hin Korin khua minung hna hi nu le pa ai tluk in fimthiamnak le chaw le va ah an rak sang i, nu nih an va le zong zei ah an rel hna lo i, an rak upat hna lo caah Paul nih a Khrihfabu sin ah a cawnpiak mi hna cu Pathian a zumlo tu nu hna nih an nunning bantuk in zumtu a simi nu hna nih an nun ve sualnak hnga lo a cawnpiak duhnak hna a si.

Tuzing ah ka tlangtar duhmi cu

Khrih Vel Thawngin A Luatmi Lainu

Tuchun cu Mother's Day (Nule Ni) a si ko nain Hringtu nu le kong chim kai tim lem lo. Lainu Pathian nih an kan luatter nak kong tu hi chim ka duh. A luatmi Lainu kong kan chim hlan ah a luat lomi nu hna kong a tawinak in van chim ka duh.

I. India ram ah Hindu biaknak phung nih a nenhmi nu hna an rak pamhmai ning

1. Child Marriage System (Kum tlinglo mi nu hngakchia va ngeih ternak)

Biaknak lei in phunsang ka si ai timi hna nih kum 80 tarpa a si hnu zong ah kum tlinglo nu hngakchia kha an duh na loin an umpi hna i nupi ah an i tuah hna. Caan rau lo ah an thihtak hna i nuhmei ah an hung cang. Kum note a si mi nuhmei cu vadang ngeihnak nawl an pe ti hna lo i lam kam ah hlawhhlangnu i ai cangmi mi tampi an rak um.

2. Sati System (A vaa a thih tikah a ruak sinah a nung nain khangh chih ding)

Nu hi a va thih ngaihchiat langhnak ah a va ruak khangh ah a nung na in khangh chih siseh, cun an vale an thih hnu zong ah hna an hnok an ti hna i an vale an thih i an ruak khangh ni ah an khangh chih hna. Hi phung hi 19th century a hramthok hrawng ah khan a rak si. Nikhat cu minu a va ruak sin khangh chih ding in mi zapi nih a ban in an rawt i aicukmak in an kal pi kha William Carey nih a hmuh i chanh dingin a hei dawi nain midang nih an tlaih i a chanh kho lo. William Carey cu a tap ruangmang. Hi thil tihnung a simi phunglam a lohnak lai W Carey cu Pathian sinah thla a cam lengmang. Cu lio siangpahrang a tuanmi Raja Ram Mahon Roy sinah William Carey nih Sati hi a lohnak lai a va nawl lengmang i Roy nih a tha ko a ti nain a hrawk hlei lo. Caan rau lo te ah Siangpahrang Roy a upa a thi i a nupi an rawt chih i an khangh a hmuh tikah a lautuk i Sati system cu a rawk. India tuanbia nih Sati system cu William Carey thlacamnak thawng in a rawk tiah a tial.

3. Dowry system (Nu nih vaa an cawk)

Hi phunglam hi cu Hindu biaknak lawng si loin Khrihfa pawl zong nih biapi ngai in an ruah. India ram thlanglei bik Tamil le Kerila state ah hin dowry cu an hman bik i cu ka state pahnih ah hin mah le mah i thahnak (suicide) a tam bik ve. Nu pakhat nih va a ngei i a va a cawknak phaisa a tling lo nain a renh te ding in a vat. A cham thlu hlan lo a va nih siseh a va nu le pa nih siseh an vuak i a cheu cu an vale inn in an zam i nu le pa sin panh ngam ti lo in lamkam ah an um i uifa hrin le ar fahrin hin rawl lo le ti lo he fa an hring. A cheu nu cu an va le nu le pa nih zinan an toih hna i mei in innchung ah an khangh hna. Va ngei lo zong va cawknak a ngeih lo ruang ah duhmi tlangval co khawh lo le va ngeih lo lungfah in anmah le anmah an i that hna.

4. Muslm Biaknak zong ah nu hna cu an pamhhmeih hna. Pa pakhat nih nupi pa li le pa nga an thit hna le innchungkhar ah buainak lawng pi in a khat.

India nu pawl cu Khrihfa a simi zong nih an va le nawl loin leng zong an chuak ngam lo.

II. Pathian nih Lai mi Kan Phung A Thlen

Hlanlio ah Lainu zong serhsatnak ah phungthluk tampi an rak tuah. Sihmanh sehlaw kha vialte kha Pathian nih Lainu kan luatnak ding caah a khel a leh dih cang. Nu bia tikhur ral pet hlah, nu bia in biatlu hlah, timi zong atu ah cun nu bia lo cun ti a si cang. Kan bia lawng si loin kan pum hrimhrim rili ral khua zakip kan phan hna. Darkhuang cumh phung nu cumh phung timi zong vale nih nupi le kutpar hmah in vuak a ngah lo nak ramthatnak zong kan phan hna.

Nu le va ai tluk in kan kawl hawl kho, fimnak in siseh chawva in siseh, hi lio ah Lai nu nih zeibantuk in dah thinlung kan put ve. This is America ti hi Bible ca nak in kan duh deuh sual maw. Paul nih Korin nu pawl a cawnpiak hna bang khan Pathian vel thawng in a luatmi Lainu nih Pathian a zumlo mi hna lungput kal tak in toidornak thinlung le Pathian tih bu te in nung hna u sih. Cu ti cun nu le pa hi Pathian hmai ah kan i khat dih i thleidannak um lo in kan hrampi tu Pathian si zungzal ko seh.

Maw Lainu, a luat lomi nu mi tampi lakah nang cu Khrih vel nih an luatter cang i na zalonnak tu nih Bawipa sunparnak langhter ko seh.

Lunglomhnak he,

Sunte

Thla kan cam hna lai: Kan nunnak a ngeitu kan biakmi Pathian, hringtu nu ni na kan phanhter than caah kan i lawm. Hringtu nu le dawtnak a theimi le upat hna zia a thiammi kan si ter cio ko. Kan nule viate thluachuah pe hna law lunun ngandamnak le nun saunak pe ko hna tiah an caah thla kan cam. Nihin ah na fanu hmangin kan theihmi thawngtha zong kan caah thlua kan chuahpiak ko. Cyclone Nargis ruangah Kawlram ah mi tampi an nunnak a liam. Inn ngei loin a ummi, din ei awk a ngei lomi tampi an um. Thil man a kai i, mipi cu vansang au in an um. Kan Kawlram caah thla kan cam. Harnak a tongmi hna umpi ko hna. Ramleng nih bawmhnak pek dingin an i zuammi zong ah tlamtlinnak a um khawh nakhnga, kan cozah cung zongah riantuan law, ram leng bawmhnak zong a luh tuan khawh nakhnga thla kan cam. Cun, Malaysia ah a ummi Laimi hna caah, a bikin khuami hna caah thla kan cam. Thong ah a ummi hna tuan ah luatnak pe ko hna law, umpi ko hna. Ram kipah a ummi khuami hna, damnak le an tuanmi kip ah hlawhtlinnak pe cio ko hna. A harsa mi kan miphun hawi caah santlaimi kan si ter ko. Nihin ni tiang lam na kan hruaimi cungah kan i lawm. Nangmah lo cun, hi vawlei nun hi sullam a ngeih lo zia, kan theih ter chin law, nangmah he a thukmi pehtlaihnak a ngeimi kan si khawh nakhnga, na thiang thlarau in kan umpi cio ko. Kan Bawipa Jesuh Khrih min in thla kan cam. Amen.

Khrih Dawhnak le Minung Dawhnak

May 4, 2008

Ram kip hmun kip ah kan um nain, hmun khat te ah Pathian kan thangthat ti khawhmi hi a sunglawi taktak. Pathian min kan thangthat. Kan nunnak kha Pathian sinah kan ap tikah hna a ngam bik. Kan i lawmhnak siseh, kan lungre theihnak siseh amah Pathian sinah kan rat pi a si ahcun, kan nunnak ah daihnak a um ko lai.

Nihin thawngtha bia a kan chimtu cu kan pa Rev. Dr. C. Duh Kam a si. Caan a kan hmanpiak khawh caah a cungah tampi kan i lawm. Atu cu amah nih caan a hmannak a si cang lai.

Khrih Dawhnak le Minung Dawhnak

Bible relnak: Vawlei car i a keu mi thingkung bantuk in a sal cu a tthang, cucu Bawipa duhning a rak si. Zoh kan duhnak hnga ding ah i dawhnak le rumra zeihmanh a ngei lo. Iang zeihmanh a ngei lo i a pumrua zong a chuakthiammi a si lo (Isaih 53:2).

Biahmai tthi:
Texas sizung ah Spanish nu cu dawhte in aa thuam. Housekeeping a ttuan. Nurse he tahchunh tikah a muisam aa dawh deuh. Nain, thiamnak a ngeih lo caah a rianttuanmi cu aa dawh lo. Ka thinlung ah a chuak hmasa mi cu ramdang ah kan um tikah kan za ngai, kan i dawh ngai ve hna nain, thiamnak kan ngeih lo caah kan rianttuanmi cu a har; rian dawh lo deuh zong a si ko lai. Nain, hi ka ram ah a phanmi nih caanttha kan ngeih mi hi hman thiam kan hau. Kan sining zong hi kan hngalh lo ruang ah kan i palh khawh mi a tam ngai.

Thahchunhnak: Kan ram sining in le kan i capo tawn ning le kan thinhun tawn ning in hun ding a si lo. Phung nih a kan uk cang. Phung nih a duh lo mi tuah sual ahcun ngaihthiamnak a um kho lo.

Cu nu kong ka theih hnu ah ka ruah tthan mi cu Khrih dawhnak a si. Kawlram ah High School kan kai lio ah kan cawnmi cu “Ahlah ku si” ti mi a si. Paul nih dawhnak kong a chim tikah “Van pum le vawlei pum an um. Van pum hna nih dawhnak phunkhat an ngei i vawlei pum hna nih dawhnak phun dang an ngei ve. Ni nih amah dawhnak te a ngei i thlapa zong nih amah dawhnak te a ngei ve; cun arfi nih khin dawhnak dang tete an ngei i arfi lak hmanh ahcun dawhnak a phunphun an um” (I Korin 15:40-41).

Dawhnak (Beauty): Dawhnak cu minung, hmun le thilri hna nih kan ngei. Minung in kan chim ahcun aa dawhtu nih kaa dawh tiah aa hmuhmi kha midang kan thinlung ah aa dawh tiin hmuh lo; kan lung a tlin ve lo ahcun dawhnak a tling lo. Cu caah, dawhnak hi pakhat ta long si lo in, midang he i hrawmmi thil a si.

Philosopher Immanuel Kant: Dawhnak nih subjective and objective qualities a ngei tiah a ti. Chim duhmi cu lenglei dawhnak le chunglei dawhnak a si. Dawhnak cu mah ca long ah si lo in, mi tampi caah khiah mi a si a ti.

Lenglei dawhnak: Zeitluk in dah a tivun nonal, ngandam, le pumrua le tungtai tthat tiin an lang.

Chunglei dawhnak: Minung sinak (personality), fimnak (intelligence), velngeihnak (grace), duhnunnak (charm) le rumra (elegance) ngei ti mi hna khi an si. Chunglei dawhnak nih hin lenglei in dawhnak a ngei lo mi zong kha duh a nun ter. Hi hi Pathian laksawng a si kan ti lai.

Pathian dawhnak:
Psalm catialtu nih Pathian kong a chim tikah “Sunparnak le rumra cu a velchum ah an um i lianhngannak le dawhnak cu a biakinn chungah an um” (Ps. 96:6).

Khrih Dawhnak:
Vawlei car i a keu mi thingkung bantuk in a sal cu a tthang, cucu Bawipa duhning a rak si. Zoh kan duhnak hnga ding ah i dawhnak le rumra zeihmanh a ngei lo. Iang zeihmanh a ngei lo i a pumrua zong a chuakthiammi a si lo (Isaiah 53:2).

Khrih cu minung in a langh caah a pumrua le muisam in aa dawhnak a um lai. Dawhlonak zong a um ve lai. A bikin, Vailam cungah hliamhma he an thlai lio hna cu dawhnak a ngei lo. Ttih tu a nung. Nain, chunglei dawhnak in a khat.

Rev. Dr. Cuai Sang nih hla a phuahmi ah:
“Lianhngannak he Jerusalem a luh lio ah aa dawh an ti. Sihmanhsehlaw, Vailam cungah an sualnak ngaithiam hna na ti kha kei caah cun naa dawhkhun, ka Bawipa” tiah a ti. Hi hi chunglei in dawhnak a si.

I Peter 3:3 – 5: Lenglei ttamhnak, nan sam phiarning te hna, an tthi nan hlawn te hna, nan thil nan thuam te hna ah khan nan i dawhnak cu a um a si lo. Nan i dawhnak cu nan chung muru ah a um awk a si i cu i dawhnak cu a tar kho lomi nemnak le daihnak lungthin, Pathian mithmuh i a sungbikmi thil a si kha a si. Pathian a rak i bochanmi nu hna cu, cu bantuk in an i dawhnak simi an si – an va le nawl ngaihnak ah khan an i dawhnak cu a si.

Hi Khrih dawhnak cu vawlei khuazakip ah kan aupi mi cu a si. Khrih ah aa dawhmi si ding ah i zuam hna usih.

Van Bawi Lian pa

Thla kan cam lai: Dawtu Pathian, nihin ni tiang lam na kan hruai caah kan i lawm. A hmasa bik ah pumpak pakhat cio i kan sualnak kan ngaithiam ko tiah kan in nawl. Kan tuah awk a simi kan tuah khawh lomi tampi a um; kan tuah lo awk kan tuahmi tampi zong a um. Kan ngaithiam. Kan tuah lo awk thil kha kan hrial khawh i, kan tuah awk a simi kha tlamtling tein kan tuah khawh nakhnga thazaang kan pe ko. Na thawngtha kan theih bantuk in nangmah ah aa dawhmi kan si cio nakhnga, thluachuah kan pe ko. A dam lomi hna caah thla kan cam. Sibawi ngan bik na si nak le zei zong a tuah kho tu na si nak an sin ah na phuang ko. A rauh hlan ah damnak hmuhter ko hna. Thong chungah a ummi kan u nau hna ca zong ah thla kan cam. Nangmah nih umpi hna law, a rauh hlan ah luatnak hmuhter ko hna. Khuami vialte an umnak cio ah nangmah nih umpi hna law, damnak an hmuh cio pinah, an riantuannak cio ah hlawhtlinnak a hmumi si ter ko hna. Anmah ca pinah midang ca tiangin a nung khomi siter ko hna. Kan Kawlram ah thlichia a hran ruangah harnak a tongmi le lungre thei vansang in aummi hna caah thla kan cam. Cun, khua lei ah tirawl an har ti thawng kan theih tikah kan lung re a thei. Bawipa, nangmah nih umpi ko hna. An herhmi ti rawl an i hmuh khawh nakhnga, nangmah nih bawm hram hna. Na fale pakhat cio zong, khuami lungre thei ngai in a ummi caah tha hnem santlai kan si ve nakhnga nangmah nih thazaang kan pe, thlua kan chuah ko. Midang caah nun hi nangmah nih na kan duh piakmi nun a si kha a thar in kan hngalh ter than ko. Hmun kip ram kip ah um hmanh usih law, nangmah hmun khat te ah kan in thangthat ti khawh caah kan i lawm. Atu bantuk in hmailei zong ah pehzul tein thawngtha bia kan hrawmti khawh nakhnga lam kan hruai ko. Na kan dawt caah kan i lawm. Kan Bawipa Jesuh Khrih min in thla kan cam, kan biakmi Pathian. Amen

Nawlngaihnak

April 27, 2008

Zarhkhat chung lam a kan hruaitu kan biakmi Pathian a min kan thangthat. Salm catialtu nih, “Maw ka nunnak, Bawipa cu thangthat tuah! Ka sining vialte a min thiang cu thangthat tuah u!” a ti bantuk in a kan dawtu Pathian thangthat ti hna usih.

Nihin thawngtha a kan chimtu cu Pu Sang Uk Lian a si. Caan a kan hmanpiak khawh caah a cungah tampi kan i lawm. Atu cu amah nih caan a kan hmanpiaknak a si cang lai:

A hmasa bik ah tuzing tiang caan ttha a kan petu kan Pathian a min thangtthat si ko seh. Thawngttha bia chim ding in caan a ka petu Bibik cung le Pathian cungah lawmhnak chim cawk lo ka ngei.

Bible ca ka rel ding mi cu 1 Samuel 15:22-23:
Cun Samuel nih a thawh i, “Bawipa nih hin Bawipa aw zulhnak i lawmhnak ngan a ngeih tluk hin maw, khangh thawinak le raithawinak ah hin lawmhnak a ngeih ve? Zohhmanh, nawlngaihnak hi raithawinak nak in a ttha deuh i Amah bia ngaih hi tuukawng hna thau nakin a ttha deuh. Zeitintiah ralchanh hman hi litin bantuk in sual a si ve i, lungkhon hi tthat lo le siasal biak he an i tluk. Nangmah nih Bawipa bia na al cang caah amah zong nih nangmah cu siangpahrang si nak khan an hlawt cang,” tiah a ti.

Tlangtaar mi: Nawlngaihnak

Saul cu Isarel siangpahrang si ding in Bawipa nih chiti thuhmi a si. Bawipa nih rian a fial. Amalekmi nih Isarelmi cungah an tuahmi, Izipt ram in an chuah i lampi i annih an rak doh hna kha dan ka tat lai. Atu cu va kal law Amalek kha va tu. An ngeihmi vialte kha hrawkdik, zuah hna hlah. Sihmanhselaw pa thlu lo, nu thlu lo, hngakchia thlu lo, bawhte thlu lo, tuu thlulo, kala uk thlulo, laa thlu lo, va that hna, a ti. Saul nih cun Amalek mi cu a tuk hna i a tei hna. Zeidang vialte cu a thah dih hna nain an siangpahrang Agag le tuu lak i a ttha bik le caw tum lak i a ttha bik hna cu a nung in a zuah hna. Saul nih ai ruahnak ah cun hi thil ka tuahmi hi Bawipa nih a ka lawmh lai tiah a ruah. Tuu ttha le caw tum thauthau hna hi raithawinak caah tiin a zuahmi an si. Hi thil a tuahmi ruangah hin Bawipa cu a lung a tling lo i Samuel sin ah Bawipa bia a lang mi cu: Nangmah nih Bawipa bia na al cang caah amah zong nih nangmah cu siangpahrang si nak khan an hlawt cang, tiah ati. Zoh hmanh, nawlngaihnak hi raithawinak nak in a ttha deuh i, amah bia ngaih hi tuukawng hna thau nak in a ttha deuh a ti nak a si. Mi tampi cu thil ttha lo kan thei ko nain kan tuah chih tawn. Tuahlo ding timi hna hi a tuah kan i zuam tawn.

Zawngte tuanbia hi kan theih cio ttheu lai ka ti. Zawngte cu a bawipa nih banhla pum khat a pawng ah a chiah piak. Zawngte, mah hi banhla hi na ei hrimhrim lai lo tiah a ti i, a bawipa nih cun a kal taak. Zawngte nih cun banhla cu a zoh lengmang i ka bawipa nih tawng hlah a ka ti lo, ei hlah a ka ti ko kha a ti i, banhla cu a vanbanh i, a kut cun aa put. Ka bawipa nih a hawng cu khek hlah a ka ti lo, eihlah a ka ti ko cu a ti i, a hawng cu a van kheh tthan. Zawngte nih banhla cu a zoh lengmang i a celh ti lo i, a ei ti a si. Chim duhmi cu hite tham cu, hraikhat te tham cu a poi lo, a voikhat tham cu a poi lo cuh kan ti tawnmi hi a donghnak ah cun a buu chung ah luh sual a si ko. Mi tampi i chuah sualnak cu thil hmete ruangah a si. Thil hmete in ai thawkmi a si.

Saul siangpahrang cu Bawipa nih a hlawt cang i Isarel siangpahrang caah cun David kha Bawipa nih chiti a thuh. A tawinak in kan chim lai. David cu Saul nih a hnah chuah i thah ding in a timh lengmang caah ramlak ah a zaam i ram lak lungkua chungah a hawile he an um. Cu lio caan te ah cun Saul cu zun awk ah a va lut. Cun David cu a tho i, a thli te in Saul puan kipar kha a va hleh. David nih hin Saul hi thah duh selaw mah hi lungkua ah hin a thah ko lai. Sihmanhselaw David cu Bawipa kha a ttihmi asi. Bawipa chiti thuhmi a si a ti. A voi hnih nak, David nih zifah a zuah tthan. Ramlak i an riahnak hmun ah Saul le a ralkap hna cu thu hluahmah in an i hngilh. Cu lio te ah cun Saul lu hram i fei le hranthawl kha a laak i an kal tak. Bawipa chiti thuhmi a si, Bawipa nih a cungah biacaih te ko seh a ti.

Saul le David nunnak hi a cuai thlai tti hna law aho hi dah nai thim lai? David nunnak cu duh a nungtuk. Mah hi ka zawn te hi ka uar tukmi a si. Chiti thuhmi David nih cun Saul cu Bawipa nih chiti a thuhmi a si a ti i a ttihzah. A upat. Hlan chan ah cun profet hna nih Pathian bia an chim i, an chimning in an nung. Nawl an ngaih lo tik ah fahnak an ing. Atu chan ah cun pastor te hi Pathian nih chiti a thuhmi hna cu an si. Kan nih khua cu Pathian nih mifim thiam sang Dr. kan pale khua le ram hruaitu ah a kan pek ko nain Thau khua tlangmi nih an chimmi bia kan cohlang kho hna lo. Chan a kal lengmang. Atu cu Internet chan hna kan phan cang va si kaw, kan mifim hna kan pale hna nih hmailei caan an zoh i thil a um te lai mi an mit in an hmuh cia caah a si. An chimmi bia hi tuah le ttuan lawng hi a herhmi a si. Upat hna u sih. Ttih zah hna u sih. Bawipa nih chiti a thuhmi hna bia kan ngaih lo Pathian kan ttih lo ah cun hawi hnu kan khar peng ko lai. A cunglei ah kan chim cang bantuk in nawlngaih lo lungkhon hi siasal biak he aa tluk.

A donghnak ah chim ka duhmi cu ramleng a phanmi kan fa nau le hna kut cungah Thau khua tlang tthanchonak cu a um. David bantuk in Pathian ttih mi si i zuam u sih law, kan umnak hmun cio ah nawlngaimi si i zuam u sih.

“Bawipa kha na lung chung dihlak in i bochan law, nangmah fimnak kha i rinh hlah. Na kalnak lam kip ah amah kha hngal law, amah nih na lam kha a tluanter hna lai. Mah mithmuh ah a fimmi va si hlah. Bawipa kha ttih law tthatlo nak kha mer tak ko. Na taksa caah damnak asi lai i na ruh caah si a si lai” (Phungthluk bia 3:5-7).

A bia kan chimmi kan dihlak caah Pathian nih thluachuahnak kan pek piak ko seh.

Thla kan cam lai:
A kan daw zungzal tu kan Pathian, nihin ni tiang damnak na kan pek caah kan lung ai lawm tuk. Na min thangtthatnak um ko seh. Tuni ah na bia kan theih bantuk in lungkhong mi Saul cu na hlawt i, nangmah nawl a ngai i nangmah an tihmi David cu siangpahrang ah na thim bantuk in na fale kannih zong nangmah nawl a ngaimi kan si nakhnga na bia hi pumpak kan thinlung cio ah thluahchuahnak kan pe ko. Sual forhnak ah tel ve lo in tthat lonak vialte chungin kan khamh ko. Nangmah an zum kho lomi hna zong nih nangmah kan in zumh khawh nakhnga zumhnak lungthin kan pe ko. A dam lomi hna caah thla kan cam. Kan pa Sangpui pa zong damnak na pek caah kan i lawm tuk. Na sin ah lawmhnak bia kan chim. Ram kip i a ummi Thaumi hna kan umnak hmun cio ah damnak kan pe law mit hmuhmi ral siseh, kan hmuh khawh lo mi ral chungin kan veng law himnak kan pe ko sawh. Malaysia ah a ummi Laimi vialte caah le a bikin Thau kan naule caah thla kan cam. Tlaihkhihnak chungin luatter hna law, Bawipa nangmah nih umpi zungzal ko hna. Thongtlami vialte hna zong thongchung ah damnak pe ko hna. Anmah le an herhnak zawn cio ah bawm hna law umpi ko hna. Thau kan fa naule rian ngei lomi hna zong a rauh hlan ah rian ttha an hmuh nakhnga lam ttha hruai ko hna. Na sinah thla kan cammi vialte nangmah nih thluachuahnak na kan pekpiak lai caah kan i lawm tuk. Kan sualnak a kan ngaithiam tu na fa Jesuh Khrih min in zaangfah kan hal Pathian. Amen

Kan Raal Kan Tei A Herh

April 20, 2008

Bawipa cu a tha, a dawtnak cu a hmun. Nihin zongah thawngtha i ruahti kho dingin caan a kan pek than. Bawipa Pathian a min kan thangthat. Thawngtha i hrawmti dingin a chuak khomi nan dihlak cungah kan i lawm. Kan biakmi Pathian nih a daihnak he in umpi cio ko hna seh.

Nihin thawngtha a kan chimtu cu Pu Tuan Hmung a si. Caan a ka hman piak khawh caah a cungah lawmhnak tampi kan ngei. Atu cu amah nih caan a hmannak a si cang lai.

EXODUS 33:14. Bawipa nih cun a thawh i, "Na sinah keimah ka kal lai i, teinak kan pek lai,” a ti.
JOHAN 16:33b. “Vawlei nih hin harnak an pek hna lai, sihmanhseh law tih hlah u. Vawlei cu ka tei cang,” tiah a ti.

KAN RAAL KAN TEI A HERH.

1. Minung a simi vialte nih raal kan ngei dih hna i, cu kan raal cu kan doh i kan tei a herh tuk hringhran. Sihmanhsehlaw, cu kan raal cu mi tampi nih kan hngal lo i kan raaltu nih an kan tei tawnnak a si. Nihin ni ah cun vawleipi nih teitu sinak lawngte an tuaktaan cio i, kannih zong a kan teitu sifah raal doh ah hi ti hin vawleicung hmunkip ramkip ah kan vahvaihnak a si. Mi tlawmpaalte lawng fimnak duh ah cacawng dingin ramleeng a phanmi an si hna. Mitam u cu nunnak kawl ruangah ram dang kan phanhnak a si bik ko.

2. PUMPAAK RAAL - Kan ngan zong a dam ko, hawi phaaknak zong kan pha ve ko. Kan hawile nih sifah raal cu an doh i an teinak hmun ah kan um ve ko nain, mi cheukhat hna cu kan raal nih an kan tei peng. Zei ruangah dah a si ti hi a ruat huammi nih cun ruah awk tlak ngaingai a si ve. Israelmi hna cu Pathian nih a chuahpi hna nain an nunning ruangah Pathian a lung a dong. Exodus 33:3, “A ram a rum i a vawlei a tthami ramah nan kal lai. Asinain keimah nihcun kan kalpi hna lai lo, zeicatiah mi lungtthawng nan si i lampi ah kan thah dih sual hna hnga a ti.” Moses cu Pathian nih a thim i a fialmi sihmanhsehlaw a hruaimi hna nih a bia an ngaih lo tikah awlawkchong in voi zeizat dah an tuah.

3. Faraoh le a raalkapnih an dawihna liao i an vaan a saantuk ning chimpit an si. Moses Izip ramah thlanmual a um lo maw tiah an au khuan ning thi dih dingin an i ruah liaoah cun, Faraoh le a raalkap pawl teitu an herh taktak.hnabeidonghnak lawngte an caah a si.an hmaiah Rili sen, an hnuah Raaltuknak rangleeng aw thawngle thihnak hriamnam lawngte kar lak ah an um. U le nau hna ramttha kan phak hlan i kan thinlung, kan ruahnak, luatnak pe khotu an um hnga maw tiah vaansang au in kan hraam ciaohna liao kha.hnulei her in hei cuan law a liamciami caan hna kha.Israelmi hnanih an luat le caangka rili raal an phak le caangka i Miriam le a hawi le hna nih khuangte i tum in an laam caan kha a tawi taktak ti u.sau a nguh hrimhrimhna lo btk kha kan si sual lai ti hi kan phaantuk awk a si.

4. Nikum i Dr. Vaal Thang a rat lio i a chimmi cu Rev. Thawng Ling Khrihfabu cu voi sarih pumhnak inn in an tthawl cang hna tiah a chim. Kan hnulei te ah khan kan naupa nih a hawipa US ah cun a hei chonh i, Chawdawr hmunkhat ahcun Laimi luh a ngah loh tiah ca an taar tiah a van kan chimh. Kan khuaruah a har ko. Rili sen lonh ka i SIASAL an rak biak bantuk kha kan lo ngaingai ko lo hme maw tiah kan ruat. Kan thazaang tello kan fimnak tello in Pathian nih luatnak lam kan sialpiak hmanhsehlaw, Pathian lung a tonglo mi hna caah cun saantlailo a si thiamthiam ko. Pathian nih kalpi lo a timh hna lioah hin, a lung a tongmi Moses nih Pathian cu a hneek khawh caah, na sinah keimah ka kal lai i teinak kan peek lai a ti. Pathian min thangthat si ko seh! Kan sualnak le kan palhnak chimcawk lo lakah Pathian a kan hneekpiak khotu hruaitu ttha THAU khuami i kan ngeih hi cu mi vaanttha taktak kan si hna.

5. Hruaitu hna nih zei lam in dah kan raal kan tei lai i, zei lam in dah kan luat lai i teinak kan hmuh khawh lai ti ah, an kan chimhmi reel cawk lo man a simi hi zulh ah cun hriamnaam dang a herh ti lo. Jerikoh lungrual a cimh tertu cu muko awthawng pei a si ko cu. THAU groups ah raal teinak muko aw thawng an tummi hi raal hau a cimh tertu muko aw kha a si ko. Vawlei i an sermi hriamnam nih teinak tling a hmu kho lo. Nihin ni i kan hmanmi hriamnaam cu vawlei cungah teinak hriamnaam ttha bik a si pinah, tei hmanung bik kan raal cu thihnak a si tiah Paul nih a chimmi teinak tiang a kan phaak pitu ding cu a si ko dawkaw.

6. Jesuh nih hin vawlei nih harnak a kan peek lai dingmi kong cu a rak chim cia cang. Thihnak le nunnak, vaanchiatnak le thuachuahnak, nihnak le ttahnak, zawtnak le damnak, thangchiatnak le thangtthatnak tiah a phunphun kan ton dingmi thil vialte hna cu, ttih hlah u ka tei cang tiah a ti. A kan dawi pengtu kan raal tei khawhnak hriamnaam ttha bik ZUMHNAK BIATAK chungah a nun ai phummi vialte nih TEINAK tlaamtling cu kan hmuh lai. Pathian nih thluachuahnak pe hraam ko seh.

Thla kan cam hna lai: Sertu kan Pathian, vawleicung hmun kip ram kipah Thaukhua mi hna na kan phakter i, Maivan hna in Thawngttha na kan hrawmternak na kutneh kan hmuh tikah na cungah ka lung ai lawmtuk hringhran i na min kan thangtthat. Vawleicung miphun a lianngan mi hna rumnak na kan hrawmh i, kan kaltaakmi kan khua le kan ram Mangttam an tuar lio caan zongah bawm khotu dirhmun ah na kan dirter ca zongah kan thangtthat fawn. Hi mangttam a tuarmi hna caah a rum i a liannganmi hna thinlung chungah rian na ttuan i,ti lo le rawl lo i a thi dingmi hna bawmh duhnak thinlung an ngeih khawh nakhnga ca zongah na sinah thla kan cam.

Singapure sizung ah nganfahnak tuarmi kan pa Sang Awr ca zongah thla kam cam. Siangpahrang Hezekiah zawtfahnak le thihnak kong cu, na Profet Isaiah hmurka in phuan si cang hmanhsehlaw, a thlacamnak nih na lung an ton i kum 15 a nunnak na rak sauh piak. Kan Pathian kan pa Sangpui pa damlonak kong ah na sinah thla kan cammi cu Hezekiah aw na rak ngaih bantuk in na kan ngaih piak lai ti kan zumh. Na kan kamhmi bia kan zumh caah THLA kan cam. Damnak tlamtling pe tthan law nun saunak chap ko tiah zaangfah kan nawl ko.

Kan umnak hmunkip le ramkip cio ah, Thaumi vialte hna hi thluachuah na kan peek ko. Zeitik hmanhah kan philh sawh hlah. Kan tthatlonak nih sual kan phaw hmanhseh law, maw Bawipa na min ruangah kan bawm ko sawh tiah Jeremiah nih na sinah thla a rak cam bantuk khan thla kan cam ve. David nih Maw Bawipa kan cungah na thluachuahnak cu um seh law, kan thil timi kipah khua awng kan pemhter ko tiah zaangfah an nawl bantuk in kannih zongnih, zaangfah kan in nawl. Na sinah kan aunak aw na kan ngaih piak lai ti kan zumh, na fa Jesuh Khrih min in thla kan cam. Amen.

Siang Siang pa
Norway

Midang Cu

April 13, 2008

Zarhkhat chung lam a kan hruai i nunnak a kan petu Pathian a min kan thangthat. Pathian dawtnak le lamhruainak hi ruah setset lawng ah a fiang. Kan nunnak ah zei tin dah Pathian nih lam a ka hruai, a liamcia ka harnak chungin zei tin dah a ka chuah tiin pakhat hnu pakhat in Pathian thluachuahnak kan rel tikah Pathian a that zia a fiang chin lengmang.

Nihin kan vawlei hi a hlan bantuk a si ti lo. A rawk tuk cang. Kan vawlei zong a rawk i minung lungput zong a rawk tuk cang. Kan theihmi thawng hi thawngtha an tlawm ngaingai. Lungre a thei. Van a sang. Pathian he i pehtlaih tik ceo ah hna a ngam.

Nihin zong ah Pathian nih lam a kan hruai i, thawngtha i hrawm kho dingin caan kan hmuh thannak a si. Pathian thangthat le a sinah lawmhnak chim daithlang hrim hna hlah usih.

Baibal Relnak: Gen 12:1-3
Bawipa nih Abram cu a thawh i, “Na ram le na rualchan le na pa inn kha chuahtak hna law kan hmuhsak lai mi ram ah kal tuah. Tefe tampi kan pek lai i miphun nganpi ah an cang lai. Nangmah cu thluachuah kan pek lai i na min kan than ter lai, cucaah na min cu thluachuah peknak ah an hman lai. Nangmah thluachuah an petu kha thluachuah ka pek ve hna lai i chiat an serhtu kha chiat ka serh ve hna lai. Vawlei cung miphun vialte nih hin, nangmah thluachuah kan pek bantuk hin thluachuah kan pe ve, tiah an ka hal lai,” a ti.

Kan relmi cacang hi, Haran khua ah a um lioah Pathian nih Abraham cu a kawh i, Kanaan ram ah kal a fial lio ah a chimhmi asiloah bia a kamhmi a si. Abraham nih a tonmi hi kanmah Laimi nih atu ah kan ton cuahmahmi le hmailei zong ah kan ton rih laimi kong he aa lo. Abraham tuanbia in thazaang i lak ti dingah thil pathum langhter ka hun duh.

Pakhatnak, midang cu laksawng an si (outsider as gift). Abraham cu amah ram a si lomi ram a phanh tikah, cu rammi sin cun thil tha tampi a tinco. Mi phundang cu a caah laksawng hmuhnak, phungdang in chim ahcun, thluachuahnak an si.

Laimi zong kan ram a si lomi ramdang ah kan phan ve hna. Atu kan phanhnak cio i a cozah nih khua a hngalh caah hika hmun le hma kan phanh khawh nak a si. Laimi a si lomi tampi nih an kan bawmh i, cu caah ram tha ah hmunhma kan khuar kho i, khua kan sa kho. Midang nih an eimi kan ei kho, an dinmi kan ding kho i, an tuahmi tam deuh cu kan tuah khawh manh cang. Kan phanhnak ram minung hna sinin thil tha tampi kan i cawn. Fimnak kan i lak. Phaisa kan hmuh. A phunphun miaknak kan hmuh. Midang hi kan caah laksawng an si.

Phundang in kan chim ahcun, midang thawngin kan nung. Midang sinin miaknak tampi kan hmuh. Cu caah, midang hi kan caah thluachuah an si, Pathian nih a kan pekmi laksawng an si ti hi kan philh lo ding a si.

Pahnihnak, midang cu thinphan awk an si (outsider as threat). Abraham cu miphun dang ram a phanh tikah harnak tampi a tong ve. Tukforhnak zong tampi a tong. Tahchunhnak, atu pa Lot le a chungkhar cu Sodom khua ah an um. Mi tha lo tuk tiah ruahmi hna lak ah an phan. An caah ral a tam. Abraham nih voikhat cu Igipt an phanh lio ah, Igiptmi ral kha a tih i, a nupi hmanh kha ka far a si tiah a ti phah.

Laimi zong miphun dang sin kan phanh tikah an sinin thil tha tampi kan ngah. Miaknak tampi kan hmuh. Sihmanhselaw, thil tha lo zong tampi i cawn khawh a si ve. Tahchunhnak ah, miphun dang nih cun, nu le pa upat an hmang tuk ti lo. Nu le pa zei ah a rel lomi hmanh an tampi. Mah bing tein um lawng an duh. Tazacuai zong a poi ah an chia lo. Nulepa le fale hmanh taza an i cuai men ko. Ngaihthiam timi a tlawm. Biaknak ah pum i pek ding hmanh a man hmuh lo ding cu, ti phun in an um. U le nau pehtlaihnak tha a der. Mino nih biakinn an panh tuk ti lo. Kuak le zuu an ding peng. Zalonnak kha mah hrawktu ah a hmangmi an tam. Hi pawl hi kan caah ral an si.

Kan hnulei te ahkhan ka sam a buat tuk cang caah sammehnak dawr ah ka va kal. Sammettu cu zoh ah a tar tuk a lo lo. Nain, bia kan hei i ruah i, bia le lam phan ah tiah, sam na mehnak kum zeizat hrawng dah a si cang tiah ka hal. Kum 65 a si cang tiah a ka leh. Ka biahalmi a fiang deuh lo i a si rua tiah, sam na meh kum a zat kan hal tiah ka ti than. A ni i, kum 85 ka si cang. Sam ka meh nak hi tukum in kum 65 a tling cang tiah a ka ti. Cu i a pehmi cu, zu le kuak ka zuk lo caah hin ka dam ngai nak a si. Cun, khoika ka phanh hmanh ah nuam tein umpeng kaa zuam, hawi sin ah chuah khawh peng zong kaa zuam, a ti.

Kan phanhnak ram cu ram tha timi an si caah, duhmi paoh din le ei khawh a si. Cu tikah kan pum caah siseh, kan thlarau caah siseh ral a simi an tam tuk. Cucu kan i ralrin lo ahcun kan nunnak caah tihnung tuk ding an si. Cu lawng hlah, nai ah US i Atlanta khua ah kan miphun hawi a simi nih a tonmi cu kan theih dihmi a si. Kan phanhnak ram ahhin mi tha an um len bantuk in, mi tha lo zong an tampi ti zong kan philh lo awk a si. Cu caah, kan riantuannak ah siseh, a dangdang hmun ah siseh, midang hrim he i sik lo kan hau. Ralring tein umkal kan hau. Midang cungah hnahnawhnak kan chuahpi lo, kanmah tein kan um ko bu hmanh ah nai te ah kan tonmi cu theih dih cio a si.

Midang hi kan caah ral an si kho ti hi philh hna hlah usih. Ralrin te le fimhring deuh tein um i zuam hna usih. Midang sin hrim in aa dawh lomi ziaza le nunphung kan i cawn lo ding ah kan i ralrin a hau.

Pathumnak, midang cu zuamcawhnak an si (outsider as challenge). Abraham nih Pathian biakamh a co khawh nakhnga, a phanhnak kip ah biak theng a tuah i Pathian a biak. Cun, miphun dang kut tang ah tla lo dingin aa zuam. Abraham cu midang hmanh nih i zohchunmi ah aa cang.

Laimi nih midang lakah kan phanh tikah, kannih cu Pathian a biami miphun kan si hi kan philh lo ding a biapi ngaingai. Laimi kan si zong kan philh lo ding a si. Abraham nih cun khua zei a phanh hmanh ah a miphun sinak a thlau lo. Harnak a ton zong ah, zei bantuk thil a ton hmanh ah, a Pathian a theih peng. Hika hmun le hma a kan phanhter tu hi Pathian a si ti zong kan philh lo ding a biapi. Lairam kan um lio ahcun biakinn i kal i Pathian va thangthat cu a fawi ngai ko. Laimi hawi sin i va tel zong a fawi ko. Nain, Laimi a si lomi, biakinn zong a phan tuk ti lomi lakah kan um tikah Pathian a biami, Khrihfami kan sinak langther khawh kha a biapi ngai. Midang tiang nih zohchun tlak kan si dingah zuam kan hau. Abraham nih cun khua zei hmun a phanh hmanhah a miphun sinak le Pathian zumtu a sinak a thlau lo. Zei tluk in dah Khrihfa kan sinak, Laimi kan sinak hi kan dirpi khawh lai? Cucu nihin ah fak deuh kan ruah a hau.

Abraham nih cun a phanhnak hmun kipah fak piin rian a tuan, aa zuam i midang tluk khawh a zuam. Midang zohchunh tlak dirhmun tiang a phan kho. Laimi, a bikah kan khuami, kong ka ruah tawn ve tikah, hmailei kum hra kum kul ah hawi kan tluk te lai lo i, hawi hnu ah kan khar lai ti ka phang ngaingai. Hawi kan lawh khawh hna i, hawi nak hmanh in kan san deuh ve khawh nak dingah cun, kan riantuan ah kan i biatak a hau. Kan dinfel a hau. Sianginn a kai khomi nih sianginn tha tein kai i, hawi tei hna i zuam a hau. Kan fale lawng si loin, upa deuh zong certificate pakhat tal ngah kho dingin, pakhat khat cawng kho ulaw, ti ka duh ngai. Kan va duh khom duh lo khom ah, atu kan phanhnak cio ram hi kan um lannak a si cang ko lai. Cu caah, khual lungput in kan nun lo ding a biapi. Cawn ding paoh cawn khawh i zuam i, hawi tluk kho ve ding kan si ko tihi philh hna hlah usih. A kong tam ka thei lo nain, ka uar ngaimi cu Arnold Schwarzenegger khi a si. Video in kan hmuh lengmangmi pa kha a si. US ram chuak a si lo. Austria chuak a si. Kum 21 a si ceo ah US ah a pemmi a si. Nain, nihin ah cun Califonia i governor tiang a phan. Hmailei ah Laimi (nanmah zong) nih kan phanhnak ram cio ah hruaitu kan si kho ve, ti hi chim ka duh.

Cu caah, ka dawtmi ka u le ka nau hna, Pathian thawngin ram tha ah kan phan cang hna. Kan phanhnak ram i a ummi hna sinin thil tha tampi kan hmuh khawh. Miaknak tampi zong kan hmuh cang. Cu caah, a kan dawtu hna cungah lawmh zia thiam a biapi ngai. Midang thawngin hi dirhmun ka dir ti kan philh lo ding ah chim ka duh. Kan phanhnak ram cu kan caah thluachuah hmuhnak a si ko nain, kan caah thil tihnung tampi a umnak a si zong philh hna hlah usih. Fim khur te in nun i zuam kan hau. Thil tha lo kan i cawn sual lo dingah kan i ralring a hau. Cun, kanmah hmang in midang zong thluachuah a hmu kho an si ve tihi philh hlah usih. Kan umnak cio ah, zohchunh awk tlakmi, Pathian fek tein aa tlaihmi si i zuam hna usih.

Thla kan cam hna lai: Kan sual a kan ngaithiam i dawtnak in lam a kan hruai zungzal tu kan Pathian, na min kan in thangthat. Nihin tiang kan phu kan tawk lo nain, thluachuah tampi na kan pek i kan i lawm. Hmailei zong ah lam kan hruai rih ko. Nangmah duhning tein a nungmi kan si cio nakhnga kan umpi cio ko. Mit hmuh in le mit hmuh loin kan ton khawhmi ral chungin kan khamh ko sawh. Miphun dang lakah kan um tikah nangmh zumtu kan sinak kan langhter khawh nakhnga, zumtlak tein a nungmi kan si nakhnga, thla kan cam. Midang ca tiang ah zohchunh awk tlakmi kan si ter ko. A zawmi hna caah thla kan cam. A bikin, kan pale a simi Rev. Dr. Sang Awr le Rev. Dr. Chum Awi an caah thla kan cam. Sibawi ngan bik na sinak, damnak ngeitu na sinak an nunnak ah i phuang hram ko. Thonginn chungah a ummi hna zong a rauh hlan ah luatnak hmuh ter ko hna. Malaysia ah tlaih khihnak le tihnung kar ah a um komi khuami hna le kan Laimi hawi hna, nangmah nih umpi hram hna. Ngaihchiatnak a tongmi hna mitthli a hnawhpiaktu nangmah si ko. Kawlram ah kan kal takmi kan chungkhat sahlawh rualchan hna, an umnak cio ah damnak pe hna law, thawngtha kan i theih peng khawh nakhnga huppheng ko hna. Kan umnak cio ah, a liamcia ah tha tein na kan zohkhenh bantuk in hmailei zong ah kan umpi rih ko. Zarhkhat chung kan tuahmi cio ah lam kan hruai law, hmaizarh zongah atu bantuk in thawngtha bia aa hrawm khomi kan si than nakhnga kan umpi cio ko sawh tiah kan Bawipa Jesuh Khrih min in thla kan cam. Amen.

D Pathum

April 6, 2008

Salm catialtu nih cun “Maw ka nunnak, Bawipa cu thangthat tuah! Ka sining vialte, amah cu thangthat tuah u!” (Salm 103:1) a ti bantuk, kan nunnak le kan sining dihlak in Pathian thangthat hna usih. Nihin zong ah Pathian bia thiang i ruahtinak caan kan hmuh than i Pathian kan thangthat. Kan thinlung timhtuahnak ngei hna usih law, thlacamnak he thawngtha hi ngai hna usih.

Nihin thawngtha a kan chimtu cu ka pa Hre (Pu Nun Hre) a si. Caan a kan hmanpiak khawh caah a cungah tampi kan i lawm. Atu cu amah kut ah kan caan kan pek cang lai:

D Pathum

Bible relnak:
1. Matthai 17:1-5 Jesuh muihmai thlennak
2. Johan 21:16 Johan fapa Simon na ka daw maw?

Kan mui in kan i hmu hna lo na-in Internet chung in a biathiang i ruahnak caan tha a kan pe tu kan Pathian a hmasabik ah a min thangthat si ko seh. Cun caan tha a ka petu Bibik le hi Internet chungin thawngtha a rak i hrawmmi nan zapi cungah kai lomhnak bia ka chim hmasa. Zei cah tiah cawngthiam deuh kan saza te nih hin zarh chiar hung kan chim hna sehlaw ti cu keimah saduh thah a si ko nain Bibik nih caan a van ka pek tikah ka el siang fawn lo. Kan tlamtlinlonak kha i zohpiak lo in a thawngtha lei tu khan hrawmti dingah kan sawm lila than hna.

1. A tlangpi i D pathum ka timi kha a saunak in kan van fianter hmasa a hau.
(a) Dawhnak
(b) Duhnak
(c) Dawtnak hna hi an si.

Upa biachim in van chim ta ko ning law, kan no deuh lio i ka rak ruahmi cu, zei kan tuahnak hmanh ah hin minung sinak in i ngaichih te hlah ning ti te khin ka rak i zuam. Khua kong kau, Khrihfabu le Mino kong kau ti bantuk tiang ah khin. Civui zawh belte hi ka rak zawh lo ngai. Bible conference kai hi ka rak huam ci ngai fawn. Ka hrelh tuk lai loh dah ka ti. A kum kai chinchiah tilo. Cawnpiak tu Saza Van Bik, Baibal cathar a leh ka hrawngah a rak si. A rak chimmi pakhat cu, Baibal caleh hi kai karh tuk. Kan Laiholh hi a tling lo tuk i ka let kho te hnga maw tiah a lung donghnak kong a hawipa ka chimh a ti. A hawipa nih cun ziah nan Laiholh a tlin lo ah, nungak tlangval ai duhmi nih midang hloh in maw duhnak bia nan i ruah a ka ti ati i mahthok cun Baibal ca leh kha ngaihlahnak ka ngei ti lo tiah a rak chim.

Kan Laiholh hi a rak tling taktak ko. Dawhnak kan ti. Duhnak kan ti. Dawtnak kan ti. Pakhat cio an kong cu ruat cio hnik hna usih.

(a). Dawhnak. Kan Baibal cangthim pakhat nak Jesuh muihmai thlennak kha nan rel cio tawnmi asi ko. Jesuh a mui ai thleng. A ceu bang a cer bang, ai dawh tuk in an hmuh. Cu caah Peter le bang nih cun thlam pathum in sak i cu ka i um colh ding hmanh kha saduh a that. Bawipa tu a hna a tla lo ti kha Baibal ah kan hmuh. Nihin ah hin NANG TEH JESUH AI DAWHNAK HI NA HMU VE TAWN MAW ti hi kan mui chon caah ka duhchan nak cu a si.

(b). Duhnak. Atu i kan thawngtha ai hrawmmi hna hi cu minung sinak in mum tling, nutling pa tling, a tlawm bik ah nungak tlangval tal cu kan si dih lai tiah ka ruah. Nungak tlang val kan rak si lio caan kha hei kir hnawh ta cio hmanh u. Midang nih ai dawh an ti lo hmanh ah kanmah nih cun kan nungak le cu ai dawh in kan hmuh hna caah kan rak i thim hna i, phundang in kan chin ahcun kan duh hna i cu hnu ah cun kan helh hna. Atu holh cun kan sah hna. A rak kan duh ziar ve ahcun vawlei pumpi co tluk ah kan i ruah. Cu hnu cun zeizong bia vialte kan i ruah. Saduh kan that i, i thit umh tiang kan phaknak hi kan si hna. (Atu chan in mui i hmu lo pi i Parcel in i kuat mi kong belte ka chim bak lo . . . capo bia :) :)

(c). Dawtnak. Cu ti cun mile mi a simi cu kan i dawhnak kan i hmuh hnuah kan i duh i cu hnu ah dawtnak cu a hung i sem ve than i zeizong te i ruah thiamnak, i nawl thiam nak, i el sianlo nak le, i sianh lo mi a um lo tiang in i sianhnak a chuah tertu khi cu dawtnak cu a si. Hihi minung mit in duhnak le dawtnak a fiannak ca ding ah ka van lak mi an si.

2. Atu ah hin nifa kan nunnak ah kan Bawipa Jesuh Khrih nih hin a caan ah ka fa na ka daw maw? A kan ti lengmang. A caan ah fak deuh in Thau pa na ka daw maw? Thau nu na ka daw maw an kan ti leng mang na thei maw? Peter nih cun Bawipa kan dawt cu na hngalh a ti khah, Nang teh Bawipa kan dawt cu na hngalh na ti kho ve maw? Hi ka zawn te cu hung si, kan van duhnak ka te cu, Jesuh ai DAWHNAK na hmuh khawh lo paoh ah cun Bawipa kan dawt na ti kho lai lo. Bawi Jesuh kan caah ai dawhnak kan hmuhnak zawn cio van ruat than cio ta hna usih. Jesuh dawhnak a hmutu hna lomhnak cu holh in an chim kho lo. Cu hnu lawngah Jesuh dawtnak khuaruah har cu fak pi in hla an sak khawh lai.

3. Keimah kong tehte khannak. 2005 March thla ni 10 ni chun suimilam pakhat le a cheu ah a si. Sushi dawr pahnih keimah lawng in ka kemh lio. Zinglei 3 ah ka tho. Chun ni tlak ka tuan. Zaan 8 ah inn ka pha. Ka re a theih pah ngai lio, dawr pakhat in pakhat ah ka van i thial. Highway in meng 60 reng lo in ka tlik lio, mi pa nih ka vorh lei kam in din te in a hung ka en, ka keh lei ah ka vai thawn diam. Ka keh lei pa motor ka va en ve. Kan pahnih in a nih lam thlang ah kei lam chak ah pe 30 hlat nak ka vai hlonh. Ka lung a hung fim cu palik le mitatka an tor. Mi cu meng 2 chung an kham hna. Ka motor inn ka a kuai. Cu ka in ka hung chuak. Mipa cu a motor an khuai i an chuah. A thi cu thi cu zohngam ding a si lo. Kei ka van i zoh. Kai tong viar. Kai khawngbak lo. Ka samfa fa khat hmanh a pong lai lo dah. Burbuuk phen ah ka vung kal. Thla ka cam. Haleluijah ka ti. Bawipa Jesuh cu ka sih ah a ra. Ka fa nai khawng rua lo tih. Kan um pi ko a ka ti. A aw a nem tuk. A thlum tuk. Ai dawh tuk. Duh a nung tuk. Jesuh DAWHNAK ka humh than. Haleluijah! Harnak chung zong in a si. Lungre theihnak chung zong in a si. Lomhnak chung zong in a si. Jesuh hi kan sin ah a ra lengmang i aw nem te in ka fa na ka daw maw a kan ti lengmang ko.

4. Nan nunnak cio kha van i ruat cio uh. Jesuh aw cu na thei bal maw? Ai dawhnak cu na hmu bal maw? Voi zeizat dah? Sifak santlai lo ngaingai mi Thau khua in a kan cawi riangmang i ram tha bik a kan phak tertu kan Bawipa Jesuh, na dawt khawh nakding ah ai dawhnak na hmuhnak zawn tete kha ruat than hna law, reel than hna law, philh hna hlah. Cu hnu lawng ah Peter bantuk in Bawipa kan dawt ko kan ti khawh cio lai.

Bawipa nih a Bia thiang thlua kan chuah piak ko seh. Amen.

Thlacam hna usih. A kan dawtu Pathian, misual mi tlamtling lo a simi na fale na kan dawt i, nihin tiang a tha bikin lam na kan hruai caah kan i lawm. Kan sualnak kan ngai thiam ko. Piter bantuk in Bawipa kan dawt ko tiah kan thinlung tak in an ti kho tu kan si cio nakhnga, nihin kan theihmi thawngtha hi thlua kan chuah piak. A dam lomi hna nih damnak an hmuhnak hnga, thla kan cam. A hlei ce in kan pale Rev. Dr. Sang Awr le Rev. Dr. Chum Awi nangmah nih damnak pe ko hna. Malaysia i thonginn ah a um rihmi kan Laimi phun hawi hna, a bikin kan khuami hna, tuan ah luatnak hmuh ter ko hna. Malaysia ah thinphang ngai in, a ummi hna, nangmah nih huhpheng kho hna. Pu Tial Thawng Ceu nih mi tha lo kut in a kan liam tak tikah kan ngaih a chia. Tantakmi a innchung nu caah le chungkhar caah thla kan cam. Nangmah nih hnem ko hna. Thazaang pe ko hna. Hi bantuk hi Laimi nih kan ton hraw ti nak hnga lo, nangmah nih kan huhpheng cio ko. Kan umnak cio ah, nangmah he a thukmi pehtlaihnak a ngei tu kan si cio nakhnga le, kan tuahmi thil cio ah hlawhtlinnak kan hmuh nakhnga thla kan cam. Midang cungah a tha i zawnruahnak a ngeimi kan si cio khawh nakhnga zong, nangmah nih lam kan hruai. Hmaizarh zong ah atu bantuk in thawngtha bia aa hrawmti than kho tu na fale kan si ter ko. Kan nunnak cu nangmah ta a si. Na kut thiang ah kan in ap i nangmah nih a tha bik in lam kan hruai ko sawh tiah kan Bawipa Jesuh Khrih min in thla kan cam, kan biakmi Pathian. Amen.

Lungsaunak

March 30, 2008

A tho thanmi kan Bawipa Jesuh Khrih min in nan kut kan tlaih hna. Kan nunnak caan caan khat hmanh a uk kho kan um lo. Nain, Pathian nih a kan zaangfah ruangah nihin ni tiang kan phanh khawh nak a si. A hlei khun in thawngtha bia i hrawmti dingin caan kan hmuh than i Pathian kan thangthat, cun thawngtha aa hrawmmi nan dih lak cungah kan i lawm.

Nihin thawngtha a kan chimtu cu ka u Hanna pa (Dr. Hai Vung Lian) a si. Caan a kan hman piak khawh caah a cungah tampi kan i lawm. Atu cu amah nih caan a hmannak caan a si cang lai.

Tlangpi Tarmi: "Lungsaunak"

Baibal cang: Galati 5:22

Biahmaithi: Thau Group ah thawngtha chimnak caan tha ka hmuh caah tampi kai lawm. A tawinak in chim ko u sih law. Gal 5:22 nak ah hin, Paul nih, "Thlarau theipar" pakua a kan chimh. Cu lak ahcun, thlarau theipar pakhat a si mi, "lungsaunak" kong hi tawite in von tial ka duh. Lungsau timi a sullam cu kan theih dih. A thatnak zong kan theih dih. Lungsau timi i biaralkah cu, lungtawi a si. Lungtawi a thatlonak le lungtawinak nih zei bantuk rawhralnak dah a chuahpi khawh timi zong kan theih dih cikcek.

Minung kan sinak ah, lungsau hi a rak herh; a tha ti cu kan theih cio ko nain, lungsau taktak cu a rak har taktak. Baibal zoh tik zong ah, prophet tampi cu an lung a rak tawinak aum ve. Moses te hna zong an mipi nih sualnak an tuah a hmuh tik ah, Nawlbia 10 lungtlap hna a rak tengh viar; Tihal in mipi an vuivai tuk tik ah Bawipa sin ah hal hmasat lo hna in, lungpi hna a rak tuk. Jesuh Kri zong a rawltam tuk lio ah theipi thei tlai lo a hmuh tik ah, chiat a serh ve ko. Cun biakinn chung ah a chawva a zuarmi hna a hmuh tik hna ah, cabuai zong a rak leh dih; a dawi dih hna. Movie le bang ahcun, Jesuh a cianh ning cu chim awk a tha lo. Paul te hna zong nih Krifabu ca an kuat tik hna ah, an i hrocer len. "Fungfek he ka ra lai?" ti te hna, "cuarpar tan nan duh tuk ko ahcun, a hram in cik lawlaw u" ti te hna in biafak a rak chim.

Cuticun, vawleicung minung titsa sinak ah hin, Jesuh te hna hmanh an lung a rak tawi caan a um taktak ko. Misual tuk ah ruahmi Hitler zong a thin a rak tawi ngaingai i, vawlei ralpi zong a chuahpi i, minung million tampi a rak thihter hna. Nihin ni hruaitu minthang Pre. Bush te hna zong "compassionate Christian" (zaangfahnak angeimi, dawtnak a ngeimi Krifa) tiah aa ti ko nain, raltuk caan a phak ahcun, a lung a sau kho ve lo. Bin Laden le bang cu, "Athi in asilole a nung in ka duh" a ti bak ko i, hi cu, "milulaknak bia" tluk khi a si. Hruaitu thatha zong an lung a tawi caan tampi aum ve ko. Pastor lianlian zong biachia an chimsual caan aum ve ko. Cucu vawleicung minung siningpi khi a si.

Zapi zaran caahcun chimhau lo a si. Kei le bang cu, midang cu chim lo in, nupi fate cung lungsau hmanh hi a fawi lo ka ti. Nupi fate awnem in ka chonh khawh hna lo caan a tam tuk tawn. Kan buai tuk lio hna i, kan fale nih heh tiah kan computer hna an von dehdai le kan catialmi hna a van kan hrawh piak ko ahcun, lung a dongh pin ah lung a sau kho bak lo. Fale hmanh hi van vuakden lennak khin a um. Krifabu cung ah siseh, hawi le kawm cung ah siseh, midang cung ah siseh, hruaitu cung ah siseh, hruaimi cung ah siseh, rian kan tuanpiakmi hna cung ah siseh, riantuantu hna cung ah siseh, lungsau hi a har caan tampi a rak um. Cu caan ah ka ruah tawnmi cu, "Atu ka sining hi, Pathian thlarau theipar a si lo sual maw?" ti hi a si. Ka fale cung ah ka hohak a von chiat caan paoh ah, hihi zei thlarau theipar dah a si ti hi ka ruat than tawn.

America le ram rumthawng kan timi hna hi an rak buai tuk. Abik in, America ti bantuk, riantuannak ram, thadit zaangbaatnak le buaibai tuknak ram le bang ahcun, ingpuan le vuakden hi a fawi taktak. Thintawi a rak fawi taktak. Nupi fate cung lungsau zong a fawi lo. Khua sau ruat kho lo in, bulbul tantan in khuasak le biachim hi a rak fawi taktak. Vuakden le mithah lainawn zong a rak fawi taktak. Depression zong a rak tam taktaknak ram a si. Zei khua hme ka ruah tiin, mah le mah harnak pek le ithahnawnnak zong a fawi taktakmi ram a si. Cucaah ramtha bik le Krifa ram kan ti ko nain, USA hna hi vawleicung ah mah le mah thah a tamnak bik ram, pa le nih nupi fate thah a tamnak bik ram, motor accident a tambiknak ram pakhat ah a tla ve. Tha a dit hnu ahcun, lung a sau kho ti lo. Motor mawngh hmanh ah lung a tawi cang. Thin a hung cang. Minung kan si caah kan mawhlonak a tampi lai.

Hi bantuk in kan tha a dit lio, kan buaibai lio le lungre a theih tuk lio caan ah, lungsau a rak hau khun. Lung a tawi sual ahcun, khuacimuihnak a chuak kho mi a si. Cucaah Thau mi, hi thawngtha aa ruahmi vialte nih fakpi in ruat hna u sih law ti ka duhmi cu, "Kan lung a tawi tuk caan paoh ah, hihi Satan thlarau theipar a si ti kha philh lo ding asi. Cu Satan thlarau theipar cu a donghnak ah rawhralnak a si ti kha theih zungzal kan herh. Cu bantuk lungtawi lio caan ah, thlacam le ziah "Pathian thlarau theipar cu lungsau pei a si kha" ti kha, philh hna hlah u sih.

Sianginn kai tik ah siseh, zawtnak kan thlawp tik ah siseh, rian kan ngeih lo tik zong ah siseh, tangka kan har tik zong ah siseh, Krifabu buaibainak ngeih tik zong ah siseh, mi sin kan um tik ah siseh, midang kan sin an um tik ah siseh, mi nih thinhunnak in akan ti tik zong ah siseh, mi sawiselnak kan ton tik zong ah siseh, zei bantuk harsatnak le lungretheihnak nih, a kan tlun hnawh zong ah, lungtawinak kha kaltak in, hi lungsaunak thlarau theipar hi kan thih tiang tlaih kan herh. Cucu Krifa nunzia dawh a si.

Adonghnak ah, "Lungsaunak theipar cu, teinak a si; awngminnak a si; thluachuah hmuhnak a si. Nuamhnak a si. Lawmhnak a si. Duhdim nunnak asi" ti kha kan nun chung philh hna hlah u sih law, lungsaunak kha taisawm bang kan tai ah i sawmh peng khawh ding in izuam cio hna u sih tiah, kan sawm hna.

Bawipa nih thluachuah kan pek ko seh. Amen.

Hai Vung Lian


Kan zapi thlacam hna usih: A kan daw zungzal tu kan Pathian, nihin ni tiang kan sual kan palh ko nain, na kan ngaihthiam i, lam na kan hruai caah kan i lawm. Nihin na fapa hmang in kan theihmi thawngtha zong ah kan zapi caah thuachuahnak kan pekpiak ko. Lungsaunak a ngei i aa nunpimi kan siter. Khuami an umnak cio ah, damnak le hlawhtlinnak pe cio ko hna. Riantuan awk aa hmuh rih lomi zong a rauh hlan ah an i hmuh khawh nakhnga, a tuan ciami nih atu an tuanmi nak hmanh in a tha deuhmi hmailei ah an hmuh nakhnga, Malaysia ah a ummi hna zong an saduh thahnak ram an phanh khawh nakhnga, thonginn ah a um rihmi zong tuan ah an luat i, ram thatnak zong an phanh khawh nakhnga, an caah thla kan cam. Kawlram ah kan kal takmi kan chungkhat, sahlawh rualchan, hawikom hna umpi ko hna law, an herhmi nangmah nih damh piak ko hna. A dam lomi caah thla kan cam. Kan pa Sangpui pa zong nikhat hnu nikhat in thancho lei na panh ter caah kan i lawm. Tha tein a dam than nakhnga thla kan cam. Cun, nai ah motor accident a tongmi kan pa Rev. Dr. Chum Awi caah thla kan cam. Nangmah nih a nunnak zuah law, damnak a hmuh than nakhnga umpi ko. Nihin bantuk in hmailei zong ah thawngtha i hrawmtinak caan pehzulh tein kan ngeih khawh nakhnga, na sinah thla kan cam. Nangmah an biami, le na caah le kan miphun caah zumhtlak tein a dir khomi pakhat cio kan si ter ko, tiah kan Bawipa Jesuh Khrih min in thla kan cam. Amen.

Khrih Thawhthannak cu Khrihfa Nun Chimtu

March 23, 2008

Thawhtthan Ni (Easter Sunday)

Donnak:
Pathian nih Thawhtthan caan zong dam tein, a kan phak ter tthan caah Amin thiang kan thangtthat. Khuami dam le lawm tein nan um cio nak ding ah thla kan in cam piak cio hna. Thau Internet Ministry a kan hruaitu Saya Thomas Cung Bik cu Chin Baptist Church, Dallas, Texas nih Thawhtthan hmanpi ding in an sawm i khual a tlawn lio a si. Tuan ah a kal i Mino sinah phung a chim cang. Thawhtthanni ah phung a chim tthan lai.

Nihin ah thawngttha a kan chimtu hi keimah Van Bawi Lian pa ka si. Kei nih cun Thau pastor ka si tiin ka ti peng ko. Khua dang mi nih an ka kawh ning ahcun Rev. Dr. C. Duh Kam an ka ti tawn. Khuami tampi kan sinah an phanh tikah ka nu le ka pa, ka ni le ka tang, ka pi le ka pu a kan ti mi an tam ngai cang i Nu Ci le kei cu kan i lawm ngai. Nan theih cia pah ko cang nain, ka rianttuan mi kong hi a thei fiang lo um sual ah keimah le keimah theihternak kaa tuah tthan lai. Phun dang in ka ruat hlah u. Nan pa le nih kan ttuanmi rian hi kan fa nau le nih pehzulh i zuam u ti kan duh hna caah a si. Keimah cu Chin Baptist Mission Church, Washington, DC ah kum thum chung pastor ka ttuan cang. Pathian nih rian tampi a ka pek. American Baptist Churches of USA (ABC USA) ah General Board Member a si. A fian deuhnak ah, American Baptist Churches kong a tawlreltu upa pakhat ka si ve. Kawlram mi lak in a ttuan hmasa bik ka si. ABC USA nih a tuahmi refugee bawmhnak "Burmese Refugee Task Force" ah member ka si. Chin Baptist Fellowship of America (CBFA) timi USA le Canada ram Laimi khrihfabu pariat hawikomhnak ah an hruaitu Executive Minister ka si. Lairam tthanchonak timi Chin Relief and Development Program ah Coordinator a si. Hi vialte ttuannak ah ka re a thei ngai. Nain, Lairam le Thau khua tthanchonak kong ka ruah ahhin thazang thar ka hmu tthan lengmang i ka retheih zong hi kan thanuamnak nih a tei ko. Ka tthawng chin lengmang in kaa ruat. Pathian thawng in kaa lawm kho peng. Thla ka cam piak ve u.

Phungchimnak:

Bible relnak: Cu pa nih cun “Nan thin phang hlah u. Vailam ah an tah mi Jesuh, Nazareth khua mi kha nan kawl ti ka hngalh. Sihmanhsehlaw hi ka ahhin a um ti lo – a tho cang! An vuinak hmun hi zoh hmanh u (Marka 16:6)

Sermon: Khrih Thawhtthannak cu Khrihfa Nun Chimtu

Khrih thawhtthannak kong cu Matthai, Marka, Luka le Johan thawngttha chung ah kan hmuh hna. Marka 16:6 chung ah hin Khrih cu thlan ah a um ti lo, a tho cang tiah a ti. Bible ttailtu hna nih Khrih hi AD 30 kum ah hin Vailam cungah an thah tiah an ttial caah Thawhtthan hi voi 1978 tluk kan hmang cang tinak a si. Zumtu kan caah Khrih a tho tthan cang tiah chim ahhin lungawttawm ding kan ngei ti rua lo tiah ka ruah.

Nihin ah kan i ruah ding mi cu Khrih Thawhtthannak hi kan caah zeitluk in dah sullam a ngeih ti hi a si. Kannih cu misual kan si. Khrih nih vailam cung ah a thihnak in khamh mi kan si. A thisen in kan sualnak cu a thian ter. Khrih cu thihnak nih a tei lo. Ni thum hnu ah a tho tthan. Hi Khrih Thawhtthannak in kannih zong kan thih hnu ah a tho tthan ve ding kan si. Keimah caah khuaruahhar bik in ka ruahmi cu “Zeizong vialte a tuah kho tu Pathian nih zeiruang ah dah hi tluk har in minung kan khamhnak hi a ser hnga?” ti hi a si.

Jesuh nih Lazaruh kha thihnak in a thawh ter lio ah, “Keimah hi thawhtthannak le nunnak cu ka si. Keimah a ka zum mi paoh cu a thih hmanh thi sehlaw a nung tthan lai” tiah a rak ti (Johan 11:25). Hi ah hin Jesuh Khrih cu thawhtthannak le nunnak a sinak kan hmuh cang. Jesuh nih Martha kha “Na tta cu a tho tthan lai” a ti. Martha nih cun ni hmanung bik thawhtthannak ah a tho tthan ding in aa ruah. Mari le Judah mi dang an ttah kha a hmuh hna tikah a hnarno a ttam i a lung a hno. Jesuh cu a ttap (Johan 11:35). Jesuh nih thlan khar lungpher pi kha an tthial piak hnu ah thlan chung ah a it mi Lazaruh cu aw thangpi in, “Lazaruh, ra chuak tuah” tiah a ti. Lazaruh cu a ruak puan zual le a kut le ke ttemnak he cun a hung chuak. Lazaruh cu thihnak in a tho tthan. Jesuh nih Lazaruh cu a hngilhmi tthangh in a tthangh ko.

Pathian cu zeizong thil ti kho tu a si. Khrih cu Pathian Fapa a si. Amah in zeizong vialte ser a sinak kan hmuh (Johan 1:3). Thihnak in Lazaruh zong a thawh ter ko ahcun kannih zong Vailamtahnak cung ah harnak ttuar lo tein a kan khamh kho hnga lo maw? Jesuh nih Thawhtthannak le Nunnak ka si a ti ko ttung. Good Friday le Thawhtthannak (Easter) cu kan herh ti hme maw? ti ding a si ko. Khrih nih Gethsemane Dum ah thla a cam lio ah, “Ka Pa, a si khawh ahcun hi hrai hi ka tthial piak ko,” tiah voithum tiang a ti (Matthai 26:39). A ttih tuk. Ton ding a ngamh lo. A thlan cu thisen in a luang. “Sihmanhsehlaw keimah duh mi cu si hlah seh, nangmah duh mi tu si ko seh,” tiah thla a cam. Thawhtthannak le nunnak a si mi Jesuh Khrih nih hi hrai hi hrial in kan nunnak le khamhnak cu a ser khawh ko ttung hnga, tiin ruah a fawi te.

Nain, Pathian nih aa tinhmi cu a tlolh bal lo. Vawlei ser hlan in Pathian thinlung ah cawkuang le vailamtah le thlan cu a cuang in aa ttial cang. Kan khamhnak caah a nunnak pek ding hrim in aa tiim. Pathian cu a chim long in a chim mi Pathian a si lo. A tuah hrimhrim in a tuah taktak mi Pathian a si. Israel mi hna zong Izip ram in Kanaan ram tiang ah an kalnak hi ni hleikhat lamkal long a si ko. Nain, “Minung hi rawl long in nun a si lo, Pathian ka in a chuak mi bia tu hi nunnak a si deuh” (Deuteronomi 8:3-4) ti hi an hngalh khawhnak hnga, kum 40 chung a hruai hna. Harnak phun kip a tuar ter hna.

Pathian nih a ka in zeizong vialte ser hmanh sehlaw, misual le nangmah khamhnak caah cun vailamtahnak le thawhtthannak tiang a phak lo ahcun aa din kho lo. A hlan in a ruah chih cang mi Pathian fapa a thihnak ding kong cu:

(1) Biathlam 13:8 chungah “vawlei ser hlan ah thah cia mi Tufa” tiin a ti.

(2) I Peter 1:18-20 chung ah “Santlai lo nan pupa nunphung in an luat ter tu hna cu zeidah a si kha nan hngalh. A rawk kho mi sui le ngun bantuk si lo in, nanmah luatnak man cu a sungmi thi, dotlak lo nak zeihmanh a ngei lo mi tufa thi bantuk, Khrih thi kha a si. Amah cu Pathian nih vawlei a ser hlan khan a thim cang i nangmah caah hi hmahnung bik caan ahhin a van langhter” tiah a ti.

Eve le Adam nih tukforhnak ah an tluk tik ah, Pathian nih rul (Sehtan) kha “Nangmah le nu cu nan i hua lai. Mi nih na lu kha rial an in zuam lai i nang nih an kedil kha cuk na zuam ve hna lai,” a ti (Genesis 3:15). Sehtan lu a rialtu ding cu minu chung in a chuak lai ti cu chim a si cang. A taktak in Khrih thihnak in Sehtan lu cu rial a si cang.

Vawlei sualnak a kalpitu, Pathian Tufa bel cu Pathian nih profet Isaiah ka in phuan a si bantuk in kan damnak caah vuak a tuar. Thihnak a tuar. An vuaknak vual in kan dam (Isaiah 53:4-5).

Kannih caah Thawhtthan hi zeitindah sullam kan ngeih ter?

Khrih cu thihnak in ni thum hnu ah teinak he a tho tthan. A kalnak lam cu a harbik mi lam a si. Thawhtthannak kong he pehtlai in kan hngalh khawh mi cu teitu si ding ah a awl mi lam kha zulh kan timh ding le kan i thim ding a si lo. Pathian hmanh nih a awl mi lam cu aa thim lo. Hrinthar mi ka si tiin awl zang tuk in um kha Pathian duhmi a si lo. Pawl nih cun “Khrih caah rianttuan thiah nan si tikah hin, a zumh lei long hi si lo in a ca i temh in ding zong a si chih” tiah a ti (Filipi 1:29).

Khrih caah temh in cu chim lo, Pathian thluachuahnak long hal lengmang i thawhlawm hna pek a hmang lo mi kan tam tuk. Mirang Bible ning in cun, “Nan cheuhra cheukhat in nan ka fir (you rob me), Minung nih Pathian hi fir awk a si maw?” tiah a ti (Malachi 3:8). Cheuhra cheukhat te hna kan pek lo mi hi Pathian tangka kuang hna hranhram lo in a bauh i a fir mi nan si tiin a kan ti. Khrihfabu a ngei mi nih thawhlawm kan pek khawh ning hi khuaruahhar a si. Kan khrihfabu CBMC hna hi 2007 kum ah Pathian sinah $183,000 kan pek. Pathian thluachuah zong tampi kan dong chin lengmang lai tiah ka zumh. Kan khuami hi Khrihfabu ngei lo in a ummi kan tamtuk caah Pathian chaw pek nak ding hmun kan ngei lo. Kan hngal lo. Pathian kha a fir (rob) mi kan tam. Hi ruangah Thaumi kan tthancho lo nak ding pakhat a si. Biatak in ruah kan cu cang.

Vawlei cungah harnak a tuar ngam mi hna hi hruaitu minthang an si tawn. USA president lakah minthangbik President Abraham Lincolh hna hi sifak tein a tthang mi, inn chia te chungah a um in a tthang ve mi a si. Harnak a tuar ngam ruangah hi tluk minthang ah aa chuah. South Africa ah President Nelson Mandela nih harnak a tuar ngam ruang ah Minak a si nain, Mirang lakah president tiang a cang kho. Noble Prize tiang a hmu kho mi pa asi. Harnak tuar bu in teitu le thluachuah hmuh hi Pathian nih a kal mi lam a si.

Thawhthan ni ah kan theih cio ding ah chim ka duh bik mi cu Pathian nih awl tein kan khamhnak caah rian a ttuan lo bantuk in, khrihfa kan si hnu ah ka hrinthar cang ti men in um sawh ding kan si lo. A thotthan i teinak a hmu kho mi thlarau ngeih kan hau ve. Bawipa ram caah dir hna usih. Thlarau in tho usih. Pumsa zong in thluachuah tampi kan dong lai. Thawhtthan lunglawmhnak nan cungah um ko seh! Amen.

Thlacamnak:
Cungnungbik kan Pa le kan Pathian, kan khamhnak caah thihnak fakbik tuar in teinak he na thawhtthannak ni le caan hna dam tein na kan phak ter caah kan lung aa lawm. Na min kan thangtthat. Bawipa, na bia thiang kan theih bantuk in, nang nih cun kan khamhnak caah lam awl naa thim lo. A har bik mi Vailamtah lam kha na zulh hnu long ah teinak he a tho tthan mi Pathian na si. Kannih ve zong nih kan nun chungah harnak a tuar ngammi, nangmah caah ngeihchiah chawva he aa pumpe ngam mi kan si ter law, na thiang thlarau in lam kan hruai.

Dawtu Pathian, kan u le kan pa a si mi na fapa Sangpuipa caah thla kan cam. Na rianttuan ding ah tamtuk aa nganh rih. Khuaruahharnak damnak cu a cung ah tlunter ko sawh. Na tthawnnak kut in tawng law, thazang thar pe ko.

Malaysia ah a ummi thawng ah siseh, ramdang kal awk ah aa tiim lio mi hna caah thla kan cam. Bawipa, nang nih thawng chung in luatnak pe hram kho hna. Palik le ralkap kut chung in veng hna law, luatnak pe hna. Ram khat khat ah dornak hmun ruahpiak ko hna. Ram kip ah aum mi kan fanau le caah thla kan cam. Sehtan kut chung in luatnak pe hna. Zudin le rithainak vialte chung in khamh hna. Na dawtnak hngalh ter hna law, nangmah caah a nung ngam mi seino zumtu ttha si ter ko hna.

Kan sualnak kan ngaih thiam. Thihnak in a thotthan mi kan Bawipa Jesuh Khrih min in, thla kan cam. Amen.

Van Bawi Lian pa

Ngaihchihnak Nun

March 16, 2008

Nihin zong Pathian a tthat ruangah thawngttha i hrawmtti kho ding dirhmun kan phan tthan. Kan umnak cio ah Pathian sinah lawmhnak chim hna usih. Kan Bawipa Jesuh Khrih cu misual kan caah vailamcung ah thihnak a huahnak i, thihnak nih a tlai kho lo caah, nithum hnu ah a tho tthan. Cu camtuak cu kan phan cang lai. Nang zei tin dah hi camtuak Good Friday le Easter Sunday hi na hman ve lai?

Nihin thawngttha a kan chimtu cu u Van (Van Luai) a si. Caan na kan hman piak ko lai tiah ka ti tikah lungtho tein a cohlan pinah caan zong a kan hmanpiak khawh caah a cungah kan i lawm. Atu cu amah nih caan a hmannak a si cang lai.

Tutan ah kan caan tlaitu Bibik nih caan rak kan hman piak ve law, a van ka ti tikah ka lungchuak hmasa bik mi cu Bawi Jesuh tlangcung cawnpiaknak kong hi a si. Tlangcung cawnpiaknak kan hmuhnak zawn atam pi lai nain, Matthai 5ff zawn in kan chim ahcun, a chim duh cemmi cu, "LUNGLAWMHNAK TAKTAK" kong hi a si. Hi Bible ca ka rel paoh ah hin kai lawm, ka hna a ngam, ka tha a dam khun. Asinain atu lio cu Good Friday le Thawhthan caan a si cang. Mi vialte nih khamhnak kan hmuh khawhnak ding caah vailamtah tung pu in, Golgotha luruh hmun, misual mi hna ruumhraamnak le, sarthlam tualleennak panh ding i lungthli i ai timhlamh cuahmah lio a si.

Cucaahcun,tlangcung cawnpiaknak hi cu Good Friday le Thawhthan he hin ai rem khun i, kan pastorte tu nih an chim te lai, kei tu cu chim lo ko ning, ka ti i, caangdang ka pernak a si.

Tutan ah chim ka van duhmi cu, "NGAIHCHIHNAK NUN" hi a si. Kan tlangtaar bawmtu ah Bible nan rak rel cio ding ah ka van duhmi hna cu: 2 Samuel 12:20ff(David siangpahrang ngaihchih kong); Job 42:5-6 (Pathian hmai i Job ngaihchih kong); Luke 14:27(Zultu si sullam, mah sining chiahtak); Matt 18:21(Ngaihthiam cu voikhat, voi sarih ca si lo i zungzal ca a si zia); Phungthlukbia 16:6(Ngaihthiamnak hmuh ning ding).

Zaangfahnak te in hi Bible caang hna hi pakhat hnu pakhat tling te in rak rel cio u, tiah kan nawl hna.

Kan Bible chirhchan bik cu, PHUNGTHLUKBIA 16:6 hi a si lai.
"PATHIAN LEI AH FELTE LE ZUMH AWK TLAK TE IN UM KO LAW, NA SUALNAK CU AN NGAIHTHIAM KO LAI. BAWIPA KHA TIH LAW, TTHATLONAK NIH AN TLUN HNAWH LAI LO"

Kan hnu kum hnih thum khan cun Pathian sin i lunglawmhnak ka ngeih zong ahhin zapi hngan i va phuan le chim le ttial kher hi a herh lo, mah lawmh le hnangam hi a za ko, ti phun in ka um. Mah ca cun testimony va chim le mipi hmai va dir te hna hi ka ti hrimhrim lai loh, i phorhlawt le sual tthan sual ah ningzak a si ti khin ka rak ruat. Khai law, hi ti hin kan si si, Pathian nih kan dihdongh nak lai rel te ko seh, ka ti. Na in a rak si thlu lo. Hmailei ah karhlan rih a hau. Kan sining um-ek le kan sualnak kha Pathian le Khrihfa mipi hmai ah kan i phuang lai i, ngaihthiam kan hal lai i, khingzaangte in Pathian kan thangtthat lai, ti hi ka ruah ning a si cang.

Mizoram Lawngtlai khua ahhin cozah riantuan in 1991 le a hnu hrawng ah khan ka rak um tawn. Khrihfabu lei ah Aizawl in Presbyterian a si cang mi kan si caah, Lawngtlai zongah cun presbyterian ka va si colh i, Youth Wing Secretary hna tlingtlaak lo bu in ka hei ttuan ve. Mah lio ah cun voikhat phung ka rak chim ah hin Job tuanbia hi saupi ka rak chim bal. A nun a sunlawi ning, tlak a van i zalh i, nikhat hnu nikhat a tlak thluahmah ning, a sin-um le a fapa le a sattil arva vialte nikhat hnu nikhat an van loh thluahmah; amah pumpak hrimhrim zong minung ti awk tlak lo tiang i a van um i, a nupi i, na Pathian cu serhsat law hlaw ko hme ti tiang in a van ti. Cu tikah, ai tuar ti lo i Pathian sin a van phunzai i,a nunram cu thinhun lungawi lo nak i a van khat. Zeikip chiat a van serh i, a donghnak ah minung i a rak siam hmanh cu vanchia ai ti ning le, a chuah ni tiang chiat a van serh tikah Pathian thin a hung cang. Bia pakhat hnu pakhat a hal, leh awk a hngal ti lo. Pathian sunlawi zia le, thil ti khawh ning le, Amah hmai ah minung zei kan rak si lo ning kha fiang tuk in a van hmuh than. Cu tikah thlalang bih bantuk in aa hmufiang tthan; a nun cu ai fih, ai ngaichih i, a nun cu nunnem toidornak in a van khat tthan. Pathian ngaihthiamnak a van hmu tthan i, cu hnu i a rumning, a damsau ning le a fanule muidawh ning chim awk a ttha lo tiang i thluachuah a hmuh tthan kong kha kan hmuh.

Khatte lei ah David Siangpahrang tu cu Uriah ralbawi nupi Bathsheba sin i fa a ngeih ruangah khan dantatnak a ing ve. A fapa te cu a zaw i, a ril ko. Ni sarih chung a dam nakhnga ttah-awh in Pathian zaangfah a hal. Nain, Profet Nathan chimbang naute cu a thi thiamthiam ko. Khi tikah David siangpahrang pi nih cun, aw, "Bawipa sin ah ka sual cang" (2 Sam 12:13) a ti. A tho, ai kholh,a hnipuan aithleng sathau ai thuh i, BAWIPA INNCHUNG AH A LUT I, PATHIAN KHA A BIAK!!! A mi tthi pawl an khuaruah a har; ziah, naute suun lo in hi ti na um ne an ti tikah, David siangpahrang nih cun,"Kha hlan ah khan cun naute damnak Bawipa zaangfah ka hal taktak ko; nain atu cu a thi cang. Ka sinah a ra ti lai lo, keimah tu a sinah ka kal te lai," tiah a leh hna. David siangpahrang nih misual ka si ti ai hngalh colh tikah Pathian zong nih a ngaihthiam. Bathsheba sin in fapa fim le minthang Solomon a pek tthan.

Cucaahcun, misual ka si, ka tlingtlak ti lo, puanchia bantuk men ka si ti i hngalh hi a sunglawi tuk hringhran ko. Tahchunhnak hi Job le David siangpahrang kong lawng hin kan chim ko lai i, "NGAIHCHIH" a sullam le, a kauhning le a dirhmun hi tlawmte van zoh tti hna usih. "NGAIHCHIH" a sullam cu cu hlan kan nun tthing kha za ah za her tak bak i, a dang in nun hram bunh a si ko. A kauhning ah cun, ngaihchihnak chungril ahkhin dawtnak ai tel, zaangfah hramh kauhnak ai tel i, toidor te nun duh cang nak zuunzaam ai tel i, mi va tundin duhnak lungthin a ngei peng. Nain Pathian hmaiah misual mi tling lo ka si, ti nak te kha a ngei peng ko. A dirhmun tu ah cun mi dang va uh, soisel, nihsawh kha a lung ah a um lo i, a lung a thiang, aa lawm, a hna a ngam i, mi vialte kha i rual tein a ruah, zoh peng khawh hna. Tlangcung mei bang a ruahnak a ceu a kau kho i, thlemnak ti let buanchukcho nih a phan kho tawn lo i, Zion tlang kan phak hlan cu a phan ti fawn lai lo. Kai lawm, kai lawm taktak. Pathian kan dih donghnak tiang a rak um le, zeizong kip ah kan hlam khawh hi kan van a ttha taktak. Sual ngaihthiam kho tu kan rak ngei hi kan van a ttha tuk, mi nih an kan ngaihthiam lo tik ah ngaithiam kho Pathian kan ngeih hi kan van a ttha tuk, lawmh lo awk a ttha lo.

Tu kar hrawng cu Pastor Joel Osteen ministry pawl email ka rel, ka kong ka hei chimh tawn hna i, an bialehnak cem cu, “LIVE like a champion" ti hi a si tawn ko. Lungtthawn i pek peng a si ko. Kan Khrihfabu nih hin, kan hnu Rev. Pa Hrang Camping hnu kha cu, "Na bia chungah um a nuam" ti hla le, "Jehova Jire" hla kan ngei. Kan sak ahhin mitthli hi a hai, aw hi a tawr lengmang tawn, a(h) mi hngan ah zohchia in, ti in kai khawmh lo a um tawn. Nain ka zumhmi ka hngalh (Hlabu No.185), felte le zumhawk tlak te i kan um ko ahcun, NGAIHTHIAM KAN SI KO LAI I,THLUACHUAH KAN DONG LAI I, KHAMH ZONG KAN SI KO LAI.

Kai lawm.

Van Luai
12706 Flack Street
Silver Spring,MD 20906

Thla kan cam lai: Dawtnak in a kan zohkhenh zungzal tu kan Pathian, na cungah kan i lawm. Nunnak na kan pekmi le nihin tiang pawcawmnak khim in thluachuahnak na kan pek ca zong ah kan i lawm. Pumpak pakhat cio nih kan ngeihmi kan sualnak le kan tlamtlinlonak kan ngaithiam. Ngaihchihnak nun a ngeimi kan si khawh nakhnga le nangmah bia le hla ah aa lawmmi kan si nakhnga nihin kan theihmi thawngttha hi thlua kan chuahpiak ko. Kawlram ah kan kaltakmi kan chungkhat sahlawh rualchan, hawikom vialte an umnak cio ah umpi ko hna. A dam lomi hna caah thla kan cam. Damnak pe khotu nangmah na si nak, an nunnak ah i phuang ko. Malay thong ah a um rihmi hna zong a rauh hlan ah luatnak hmuh ter ko hna. Khuami pakhat cio nih kan umnak cio in, nangmah caah a nung khomi kan si i, midang ca zong san a tlai khomi kan si nakhnga lam kan hruai cio ko. Kan nunnak ah nangmah hi pakhat nak ah an chia kho tu, nangmah ttihzah buin a nungmi kan si peng khawh nakhnga na thiang thlarau in kan umpi ko sawh tiah kan Bawipa Jesuh Khrih min in thla kan cam. Amen.