Kan Sinah A Ummi Pathian

March 9, 2008

Nihin ni tiang nunnak a kan petu, amah thangtthatnak caan a kan petu kan Pathian a min kan thangtthat. Kan umnak hmun cio ah amah Pathian he i pehtlaihnak tuah daithlang hna hlah usih. Pathian he kan i pehthlaih deuhdeuh tikah thinlung a nuam i hna a ngam.

Thawngttha i hrawmnak lei ah kal colh ko hna usih.

Kan Sinah A Ummi Pathian

Atu ka sianginn kainak ah ka cawn cuahmahmi pakhat cu “Pathian le Intuarnak” (God and Suffering) a si. Minung intuarnak le Pathian kong hi biatak tein kan ceih. Hi vawleicung ah, zei ruangah dah harnak, thihnak le lohnak a um? Minung nih harnak, lungretheihnak, zawtfahnak, le thihlohnak kan ton tikah Pathian hi khoika ah dah a um? Zei ruang setset ah dah ti cu minung caah theih le hngalh a harmi an si. Minung nih kan ruah khawhmi le tuaktan khawhmi pinlei thil an si. Pathian lawng nih a theih! Minung nih harnak le nganfahnak kan ton tikah Pathian nih a kan umpi maw, Pathian hi tah zei tin dah a rak um ve tihi Biakam Hlun cauk nih a kan cawnpiakmi tampi lakah, pathum in ka hun langhter lai:

1. Pathian hi a mi hna nih an philh i zumhtlak loin an nun tikah a ing tuar ve (God suffers when people reject Him). Minung nih pakhat le pakhat cungah fahnak an in pek tikah Pathian nih a tuar ve ti kha kan Baibal nih fiang tein a langhter. Pathian nih “Sihmanhsehlaw annih nih an ka doh i ka ngaih an ka chiatter” a ti (Isaiah 63:10). A dawtmi minung hna nih, a nawl an ngaih lo tikah, an doh tikah a lung a fak. Jeremiah 2:31-32 ahcun “Israel mi cungah hin tlun inn donh hmang maw ka si? Ram car le ti um lonak hmun bantuk maw ka si? A si kun ahcun zei cah dah ka mi hna nih, ‘Kan i tthen cang, na sinah kan ra lai lo,’ an ti? Ngaknu nih a hlawn kha a philh khawh lai maw? Mo nih a thuam kha a philh khawh lai maw? Sihmanhselaw ka mi hna nih cun atu le atu an ka philh ko” tiah Pathian nih a ti. A dawtmi a fale nih kan theih lo tikah, kan pehtlaih lo tikah a ngaih a chia, a ing tuar ve. Pathian a ngan kan fah ter.

2. Pathian hi a mi hna an intuar tikah a ing tuar ve (God suffers when His people are suffering). Phundang in kan chim ahcun, a mi hna an ngan a fah tikah cucu aa hrawm vemi Pathian a si. Tahchunhnak ah, Exodus 3:7 ahcun Pathian nih “Zei tluk in dah ka mihna nih Izipt ram ah temh innak an huah ti kha fiangte in ka hmuh cang; a hremtu hna nih an cung i rian fak an khinh hna ruang i bawmhnak hal in an ainak kha ka theih. An nganfahnak cu ka hngalh dih cikcek” a ti. Salm catialtu nih harhnak kan ton tikah Pathian nih a kan umpi hrim ko ti kha hmun tampi ah a chim: “BAWIPA ka sinah a um cu ka hngalh zungzal, amah cu keimah he naihte ah a umi zeihmanh nih an ka hnin kho lo” (Salm 16:8). “Cu lam cu a thuk bikmi muihnak chungin kal hmanhselaw, BAWIPA, zeihmanh ka ttih lai lo, zeicahtiah nangmah nih na ka umpi ko” (Salm 23:4). “Lung a dongmi kha BAWIPA nih a umpi hna i ruahchannak a ngei lomi kha a khamh hna” (Salm 34:18). “Ka pum le ka ruahnak cu zorchuk hna hmanhselaw Pathian kha ka thazaang a si; amah lawnglawng kha ka herhmi cu a si ko” (Salm 73:26). Bawipa nih “An ka auh tikah ka leh hna lai i harnak an in tikah ka umpi na lai” a ti (Salm 91:15). “Zeicahtiah sifak mi a chanhtu hna cu amah a si i thah awk in an bia a ceihtu hna kut chungin a chuahtu hna cu amah a si” (Salm 109:31). A tawinak in chim ahcun, harnak a tongmi hna sinah Pathian a um. Harnak kan ton tikah Pathian nih a kan kal tak lo, a kan umpi ko tihi Salm catialtu nih a kan chimhmi a si.

3. Pathian nih minung hna harnak aa hrawmnak lawng si loin minung hna caah harnak a ing (God suffers for His people). “Pathian nih aa thawh i, ‘Can saupi daite in ka um i ka mi kha ka let hna lo. Sihmanhselaw atu cu cawlcangh a cu cang; nau ngan a fakmi nu bantuk in ka ai’” (Isa 42:14). “Annih khamhtu cu vancungmi a si lo, BAWIPA hrimhrim kha ka si. Ka dawt hna i an zawn ka ruah hna caah ka khamh hna” (Isa 63:9). Isa 53 kan rel ahcun BAWIPA sal nih minung kan tuar hnga dingmi kha a kan tuarpiak nak kan hmuh. Cucu Biakam Thar ahcun Jesuh nih minung kan caah nganfahnak a innak ah a lang. Theology lei ah a thiam ngaingami German pa Jurgen Moltmann nih cun, “Vailam tahmi Jesuh Khrih cu Pathian muisam keng a si tiah kan ti tikah, a sullam cu amah hrimhrim kha Pathian a si i, Pathian cu mah bantuk in a tuar ing ti kha chim duhmi a si. Minung hna kan caah nganfahnak a ingmi Pathian si,” a ti. A rauh hlan ah Bawipa Thih Ni (Good Friday) le Bawipa Thawhtthan Ni (Easter Sunday) kan phan than cang lai. Cu nih an langhter mi cu: minung kan caah Jesuh Khrih nih harnak le nganfahnak kha aa thim. Thihnak nih a tei lo i, a tho tthan. Zumtu paoh cu hi vawlei kan nunnak ah harnak le nganfahnak kan ing tawn ko. Sihmanhselaw, Pathian nih a kan umpi, cu pinah ruahchannak a ngeimi kan si tihi a si.

Ka dawtmi ka u le ka nau hna, kan biakmi Pathian hi minung nih harnak kan in tikah, zawtfah kan tuar tikah, retheih kan ton tikah a kan kal tak bal lo, a kan umpi ko tihi kan Baibal nih a kan cawnpiakmi a si. Kan biakmi Pathian cu kan thilrit aa hrawm vemi Pathian a si. Minung nih harnak kan in tikah Pathian khoika ah dah a um? Kanmah sinah a um ko. Kan thil rit aa hrawm i, ruahchannak a kan pek. Lawmhnak kan ton caah ah siseh, harnak kan ton caan ah siseh, zei bantuk kan ton caan paoh ah Pathian nih a kan umpi ko tihi thei peng hna usih.

Thla kan cam lai: Dawtu Pathian, nangmah an hngalmi le ruahchannak a ngeimi na kan siter caah kan i lawm. Kan sual kan palhnak kan ngaithiam ko. Tukforhnak chungah kan tluk sual nakhnga lo, nangmah nih tthawnnak kan pe. Nihin kan theihmi thawngttha zong hi pumpak cio kan caah thluachuahnak kan pekpiak ko. Khuami chungin a dam lomi hna caah thla kan cam. Nangmah nih a rauh hlan ah damnak hmuhter than ko hna. A hlei khun in, kan pa Sangpui pa caah thla kan cam. Kan umnak cio le kan tuahmi cio ah na thluachuahnak he kan umpi ko. Jesuh Khrih min in thla kan cam. Amen.

Beaulah Ram (the Land of Beaulah)

March 2, 2008

Ni ceu dawh a thar in kan phanh lawng siloin thawngttha bia i hrawmttinak caan kan hmuh tthan caah Pathian kan thangtthat. Thinlung timhtuahnak ngei buin thawngttha ngaihnak lei ah kal dingin kan sawm hna.

Thlacam cahnak: Kan pa Rev. Dr. Sang Awr caah fakpiin thlacam hna usih.

Nihin thawngttha a kan chimtu cu Rev. Dr. C. Duh Kam a si. Caan a kan hman piak khawh caah a cungah tampi kan i lawm. Atu cu amah nih caan a hmannak a si cang lai.

Bible Relnak: Jerusalem cu lungtthawnnak pek awk ah bia ka chimh lai, khamhnak a hmuh hlan tiang ka dai bal lai lo, a teinak meifar zan i a ceu bantuk in a ceu hlan tiang ka dai bal lai lo. Jerusalem, miphun hna nih, teitu na si kha an hmuh lai! An siangpahrang vialte nih na sunparnak kha an hmuh lai. Min thar in auh na si lai i cu min cu Bawipa hrimhrim nih an pek lai. Aa dawh mi bawiluchin bantuk Bawipa caah na si lai. “Hlawtmi” ti na si ti lai lo i na ram zong “Kaltak mi Nupi” ti a si ti lai lo. Na min thar cu “Hefzibah” ti a si lai i na ram cu “Beulah” ti a si lai. (Is. 62:1-4).

Sermon: Beaulah Ram (the Land of Beaulah)

Hefzibah cu “Pathian a cungah a lung aa lawm” tinak a si.
Beaulah cu “Tthit i lunglawm in khuasak tti” tinak a si.

Pathian he minung kan rak len ttinak:
Pathian he lunglawm tein kan rak len ttinak cu Eden dum kha a rak si ko. Kan Bible chungah Pathian nih minung a sernak le Eden dum ah an umnak in sualnak an tuah ruangah chiatserh an sinak le Eden dum in dawi an sinak kha kan hmuh colh caah Eve le Adam hi Pathian he sau leng tti lo mi an lo ngai. Asinain, Adam nih kum zeizat a si ah dah Kain le Abel a ngeih hna ti cu Bible ah a um lo nain kum 130 a si ah Seth a ngeihnak cu kan hmuh. Adam hi kum 930 tiang a nung. Seth hi kum 130 a si lio ah a ngeih ahcun Kain le Abel a ngeih hna hlan ah hin Pathian he Eve le Adam hna cu Eden dum ah nuam tein kum caan saupi an um tti ko lai ti hi zumh ding a si. Zanlei sang ninem ah an leng tti tawn ti cu Genesis 3:8 ah Pathian nih a lennak hna nih a fianter ko. Eden an len lio cu vanram bantuk a si. Pathian he nunnak an i hrawm. Thingthei phun zakip ei ding in Pathian nih a chiah piak hna. Pathian rocotu kan si. Nu le va, le ngaknu le tlangval karlak ah a zam mi dawtnak hri bantuk nih Pathian le minung cu an rak i kawm, an rak i daw. Pathian le minung cu aa tthen siang ding in an rak um lo.

Pathian he kan i tthennak.
Pathian bia kan ngaih lo ruang ah le Pathian tluk si kan duh ruangah minung cu sualnak ah kan tlu. Pathian sin in kan i tthen. Nu le va aa tthen mi bantuk in Pathian le minung cu kan i chawn kho ti lo. Sihmanhsehlaw zunngaih in mitthli he khua a sa mi nu maw, pasal bantuk in maw, dawtnak Pathian nih cun a kan ngai zungzal. Jesuh Khrih nih cun pa le fa aa tthen mi hna bantuk in “fapa tlau pa” kong kha a kan chimh. Dawtu le cawmkengtu a pa nih cun a tlau mi a fapa cu a mitthlirh zungzal. Tawn tthan nak ding caan kha a hngak zungzal.

Pathian he i pehtlaihnak:
Zei dang in minung he i pehtlaih khawh tthannak a um ti lo caah Pathian cu amah pumpak kha minung ah cang in vawlei ah a ra. Kan Bawipa Jesuh Khrih in Kalvary tlang ah minung cu a rak kan tthit tthan. Jesuh Khrih a zum mi paoh cu Pathian he nu le va bantuk in kan leng tti tthan. Hi Pathian dawtnak a hngal mi hna nih Pathian dawtnak le umpinak kha an thinlung in an tem tthan. A dawtnak a thlum zia kha an ngalh tikah Pathian sinah lawmhnak biachim kha an duh peng. Sihmanhsehlaw Pathian dawtnak a thei lo mi thong tam pi kan um rih.

Pathian le Laimi:
Laimi zong American Baptist siangbawi hna hmang in Pathian nih a miphun ah a kan tthit ve. Chaklei Lairam cu Khrihfa zumtu lawngte kan si cang. Thlanglei Lairam ahcun zumtu an tlawm ngaingai rih. Pathian nih thluachuahnak tampi a kan pek tikah Pathian kha philh in kal taak kan timh ve tthan tawn. Kan ruah awk cu: kan pumpak in Pathian thluachuah zeizatdah kan don? Pathian he pehtlaihnak zeitindah kan ngeih? Pathian bia cu kan chim tawn i a bia hna hi zei rel lo in kan um sual maw?

Nihin kan miphun dirhmun:
Pathian thluachuah tampi kan dong. Phun dangdang in lam a kan sial piak i vawlei cung ram ttha bik zong ah kan tthudir kho cang. Thaumi zong USA, Denmark, Norway, Australia, Germany, New Zealand le Malaysia ah tampi kan um hna. Ramttha nih an chuahpi mi thluachuah kan dong. Laimi thong tampi ramdang ah kan phan. Nain, ngaihchiat awk tampi a um. Thluachuah a kan petu Pathian hi philh in kan miphun lakah dinlonak a leng cang. Zudin kan bang kho lo. Nu le pa zong dawh te in kan um ti lo. Ram dang kan um tikah remlonak le huatnak cu Laimi lakah a um kha nan theih cio lai. Mah pumpak zawn lawng kan ruah tuk ahcun kan miphun caah sunghnak nganpi a chuak kho. Thluachuah petu Pathian hna thei lo in dinlonak a tam tuk ahcun kan miphun cungah Pathian hi a lung a sau zungzal kho lai maw? Thaumi zong hi Pathian kan theih lo ahcun zeidah kan lawh te lai? Bible nih a kan cawnpiak mi zoh hna usih.

Zohchunh awk tlakbik cu Israel miphun tuanbia hi a si bik. Profet Isaih nih cu a tanglei bantuk in a rak chim:

Isaiah dal 1-39: Assiria cozah tthawngpi nih Judah ram kha a tuk hnik lio a si. Assiria cozah tthawngpi lawng si lo in, Judah mi an sualnak le Pathian nawl an ngaih lo nak le Pathian an bochan lo nak kha Isaiah nih a chim mi a si. Dinnak le biatak ziaza nan ngeih awk a si tiah a ti hna. Cu ti tuah lo ahcun rawhnak le lohtlaunak nan tong lai tiah ralrinnak a pek hna. Pathian bia a ngai lo mi Israel mi hna cu Pathian nih dan a tat hna. Assiria cozah nih 722 BC ah chaklei pennak kha a rawk. 701 BC ah Jerusalem khua cu an kulh tthan.

Pathian an auh tikah a zang an fak tthan. An ram kha a hngah ter tthan hna.

Isaiah 40-55: Israel mi nih Pathian an philh tthan. Babilon sal ah 586 BC ah an taang tthan. Thlanglei pennak Judah ram cu hrawh a si. Jerusalem khuapi cu a rawk cang. Israel mi cu khuaruahhar vansangau in an um. Pathian sinah ngaihchihnak he an kir tthan tikah Persia siangpahrang Cyrus cu Pathian nih a hman tthan i saltannak in a chanhchuah tthan hna.

Isaiah 56-66: Nihin ah kan rel mi Bible bia hi Babilon ram in an kir hnu ah Jerusalem khua ah a um cang mi sinah a chim mi a si bik. Jerusalem cu teitu a si cang lai; siangpahrang dang nih a sunparnak kha hmuh khawh ding a si lai a ti. A dawhbik mi Bawiluchin bantuk in Bawipa caah hman ding a si cang lai tiah Isaiah nih a ti. “Hlawtmi” ti si ti lo in Pathian a cungah a lung aa lawm mi “Hefzibah” ti a si cang lai; an ram zong “Kaltak mi Nupi” ti si ti lo in Pathian he aa tthi i lunglawm tein khua a sa tti kho mi Beulah tiah kawh a si cang lai tiah Pathian bia cu profet Isaiah sinah a lang.

Tahchunh awk ttha mi bia dang cu:
Deuteronomy 33:28 hi a si.
Cu caah rawl le mitsurhang a tamnak ram ahcun Israel cu himte in a um, Jakob cerhti cu amah tein a um, A si, a van hna zong in dap an tla.

Nihin ah kan chim duh mi cu Beaulah ram ti a si. Pathian he aa tthi-um mi ram tinak a si. Kan Lairam hna hi Pathian he a tthi-um mi ram kan ti kho ti lai maw? Thau khua hna hi Pathian he a tthi-um mi khua kan ti kho ti lai maw? Pumpak in, kannih hi teh Pathian he nu le va bang a um tti taktak mi kan si maw? Kan i ngai kho maw?

Bawipa Zanriah nan hman cio tikah theih ve cio ding ah kan duh mi hna cu: Pathian he aa tthi-um mi kan sinak kha a langhnak a si. Jesuh nih “nunnak changreu (living bread) cu keimah hi ka si. Ka tit le ka sa a ei ding mi cu an thi ti lai lo; zungzal in an nung lai tiah a ti. Jacob tikhur ah ti a than mi Samaria nu sin ah “keimah nih ka pek mi hna ti a ding mi cu zeitik hmanh ah an ti a hal tthan ti lai lo” a ti (John 4:13). A ti a hal mi paoh cu ka sinah ra ulaw ra ding u. Keimah a ka zum mi paoh cu a lung chungin tiva nung an put lai. A chim duh mi cu Amah a zum mi paoh nih Thlarau nan hmuh lai” ti kha a chim duh mi a si (John 7:37-39).

Dawtmi Thaumi fanau le vialte hna, Pathian he zei zong te aa hrawm ti mi nu le va, le pa le fa bantuk kan si philh hlah usih. Pathian nih hlawt mi le kaltakmi nupi cu si hlah usih. Pathian tel lo in thluachuah kan hmuh mi vialte hna hi kanmah lawng nih hmang sual hlah usih. Pathian he a hrawmtti mi pumsa a ngeitu kan si hi philh hlah usih. Kan nunnak hi thianghlim tein hmang usih. Pathian lo in nun cu ttih a nung tuk. Pathian he aa tthi-um mi miphun le ram si zungzal usih. Dinnak hi kan miphun le khuami lak ah len ter usih. Kannih cu Beaulah ram ah a lengmi kan si. Thaukhua zong Beaulah ram bantuk ser i zuam usih. Pathian nih thluachuah in pe cio hna seh!

Van Bawi Lian pa

Thla kan cam lai: A kan dawtu kan Pathian, kan nunnak ah na dawtnak na hmunh ter caah kan i lawm. Mi sual mi palh kan si. Kan sualnak kan ngai thiam. Nangmah he a thukmi pehtlaihnak a ngeitu kan siter ko. Nihin kan theihmi thawngttha zong hi pumpak cio kan caah thluachuahnak kan pekpiak. Khuami chungin a dam lomi hna caah thla kan cam. Nangmah nih a rauh hlan ah damnak hmuhter than ko hna. A hlei khun in, kan pa Sangpui pa caah thla kan cam. Sibawi te zohkhenhnak ah nangmah i phuang law, nikhat hnu nikhat in damnak lei ah a panh chin khawh nakhnga umpi ko. Malaysia ah a ummi hna, nangmah nih umpi hna. Thong chung ummi zong a rauh hlan ah luatnak pe ko sawh hna. An i tinhmi cio ah hlawhtlinnak hmuhter ko hna. Cun ram kip a phanmi khuami vialte nih an umnak cio ah, damnak an hmuh, riantuan khawhnak zong an hmuh i, na thluachuahnak an rel cio khawh nakhnga zong thla kan cam. Cun, mah caah lawng siloin midang ca tiangin a tthahnemmi siter ko hna. Kan tuahnak kip ah nangmah mithmai zohin a nung khomi kan si ter law, na sungparnak zong a langter kho tu kan si ter ko. Hmailei zong ah atu bantuk in hmunkhat te ah, na thawngttha i hrawmttinak le na sinah thlacam ttinak kan hmuh rih nakhnga thla kan cam. Kan nunnak cu nangmah ta a si. Na kut thiang ah kan in ap i, nangmah nih a ttha bik na ti ning in lam kan hruai ko sawh tiah, kan Bawipa Jesuh Khrih min in thla kan cam, kan Pathian. Amen.

Innchungkhar Nuam

February 24, 2008

Kan biakmi Pathian hi thangtthat awk a tlakmi Pathian a si. Kan nunnak ah thil ttha tampi a kan pek. Ngandamnak a kan pek, ttuan kawl khawhnak zong a kan pek. Khua le ram caah thazaang chuah khawh nak zong a kan pek fawn. Hi vialte pinah amah a zumtu hna cu Vanram va co ding kan ngei rih. Thawngtthat awk a tlakmi Pathian hi thangtthat peng ko hna usih.

Thlacamnak: Hmaizarh chung (Feb 25 – March 2) hi kan zapi nih Kawlram ah a ummi khuami caah thla kan cam hna lai.

Nihin thawngttha a kan chimtu ding cu Rev. Dr. Cung Lian Hup a si. Atu hi Bangkok, Thailand i a ummi Lutheran Seminary ah ka u Nancy nu he an um lio a si. Khuami siaherhnak he caan a kan hmanpiak khawh caah kan i lawm. Amah kut ah caan kan pek cang lai.

Innchungkhar Nuam

Bible: Efesa 5:21–6:4

Biadomhnak
USA in Jan. 12 ah khan Rangoon ka phan than. Ka tlun ni cu zarhte ni a si i, zaan suimilam 8:00 ah ka phan. Ka ba ngai te. A thaizing zarhpini a si i, ka ba ngai ko na in, ka vai pum. Rev. Dr. Cuai Sang fapa Saya Thawng Za Lian nih phung a chim i a chimmi cu i nunpi phu taktak in a chim. Kan i lunghmuih ngaingai.

Bullettin ka zoh i, January 27 zarh cu keimah phungchim ding in an thanh ai. A tlangpi an tarmi cu Khrih ah Innchungkhar Nuam ti a si. An Bible thimmi lak ah phungchim ding in ka thimmi cu, Efesa 5:21 – 6:4 tiang hi a si. Nu le va kong le Fale Nu le Pa kong a si. Innchungkhar kan timi cu nu le va le fale hi an si ko tiah ka ruah caah, Efesa cu kai thimnak a si.

Kanmah cio zong innchungkhar a ngeimi kan si tikah, innchungkhar nuam kong phungchimnak i chim hi ka ngaih lah ngaingai. Kanmah cio zong innchungkhar nuam kan si maw si lo ti kha ruahchih peng a hau. Sihmanhsehlaw, Khrihfabu nih kumkhat chung chimding tlangtar i an ti cangmi cu keimah duh in thlen awk a that lo caah, January 27 zarh cu innchungkhar nuam kong chim cu kai tim.

Nu le Pa le Fa le Kongkau
A pakhatnak ah ka lung ah a chuakmi cu atu Baltimore, MD i a ummi Pu Chan Tlung (Ni Sui Tial Pa) kong a si. Hakha ah inntha pi a ngei ko nain, vawikhat cu Rangoon ah a hong pem i, ar a zua ve. Ar zuat zong cu ai harh ngai ve ko. "Ziah Rangoon ah cun na hong pem. Hakha ah inn thapi na ngeih ko i, Rangoon pem cu nai harh tuk lo maw," tiah ka hal. "Hakha ah cun, ka fapa he kan i hmu kho lo. Kei zinglei 7:00 in rian tuan ah ka kal. Anih le 8:00 ah a tho. Kei zaan 9:00 ah ka it. Ka ih ah a lawi rih lo le, Rangoon ah cun a hmuh tal kan i hmu deuh lai ka ti," tiah a ka leh. Hihi innchungkhar nuamhnak ah pakhat ai tel ve. Kan fale zei an si ti thei lo tiang in, rian tuan le ca cawn hi a rak hman rua lo. Upat hnuah i ngaichih a si theu. Innchungkhar nuamhnak ah fale ca i, caan pek hi a rak biapi tukmi a si. Caan a pe kho lomi kannih pawl hi, kan upat tikah kan i ngaichih ruangmang te lai. An hngakchiat lio ah cun, kanmah lo in a um kho lomi an lo nain, tlawmpal an cutzat cun, kanmah tu hi anmah lo in kan um kho ve lo. Chawva le ngeihchiah kong ka chim bia a si lo. Fale cu kan ngai tuk hna lai i, anmah lo in kan um khawh lo caan a chuak te lai ti hi theih cia a hau.

Nupi le Kongkau
Rangoon LBC phung ka chim ah hin, Vale kong ka chim manh lo. Nupi le kong lawng ka chim manh i, nu pawl an lung a tling lo. Vale nih hin nupi le sualnak le tlamtlinlonak hi hmuh a har hringhran. An hman dih tiah kan ruah ko. Vawikhat ah siangpahrangpa pakhat cu a nupi a ttih tuk i, zeitindah nupi ttih loning hi a si hnga ti theih duh ah, nupi a ttih lomi pa a kawl ti a si. Alan (flag) a rangmi le a senmi a thlai i ka nupi ka ttih loh a timi paohpaoh alan sen lei ah dir uh, ka ttihpah ko a timi paoh a rang lei ah dir uh a ti hna an ti. Alan sen tang ah cun pa tiatum lo te pakhat te lawng a dir i, siangpahrangpa cu a khuaruah a har tuk an ti. Zeitindah na nupi hi na ttih loning a si? Alan sen lei ah cun na dir ngamning a si tiah siangpahrangpa nih cun a hal i, ka nupi nih va dir a ka ti le ka dir le a si tiah a leh an ti. Nupi ttih lo hi a har ngai ko rua.

Asinain, nupi le nih mah lei hoih lawng a ttangmi an um ve i, cucu a poi ngaimi a si. Laipa pakhat Japan a tlawng i a tlun tikah, Japan kong chim hi a nupi nih a tinh lo le, amah nak in a nupi tu hi Japan a tlawngmi a lo deuh ti hi an chim lengmang mi, a hmanmi Laimi kong pakhat a si. Nupi le hi biachim zong an i cuh tuk. Mah chunglei ttanh lawng an hmang fawn. Rangoon ah Lai innchungkhar pakhat cu pa lei chung pakhat hmanh an um kho lo i, nu lei chungkhat lawng an um kho le, zapi te nih a poi tuk kan ti lengmang nain, ahohmanh nih kan chim ngam hna loh. Ramdang a ummi Thau pawl zong hi, nu lei chung lawng ttanh i, pa lei chung dawt lo a hmangmi hna nan um sual dek maw? Nu lei chung lawng phaisa kuat i, pa lei chung thinhan ter a hmangmi nupi hna nan um dek maw? Hihi va le nih theih a har ngai te. Ka far le Cintawi techung khi ka ti tawnmi hna cu, kanmah chung lawng nan kan daw lai lo; nan pa le chung Locom (Falam) leikap zong nan dawt ve hrimhrim hna lai ka ti peng hna. Kannih Laimi cu kan va le nih an kan dawt ai pat tiin, nu lei chung lawng khat rui in kan inn umter hna kan hmang tawn le, hihi a tha lo ngaimi zia pakhat a si. Innchungkhar nuamhnak ah pa lei chung zong dawt ve a herh hringhran ko.

Innchungkhar Le Khrih Jesuh
Minung kan nunnak ah Pathian tel lo in innchungkhar a nuam kho ko ti in, vawleicung mi tampi an ti men ko lai. Sihmanhsehlaw, Khrihfami nih kan hmuhning phun dang a si ve. Khrihfa kan si i, Khrih khamhnak a zummi kan caah cun, Khrih lo cun zeihmanh a si kho lo. Kan innchungkhar ah Khrih ai tel lo ahcun, a nuam hrim lo. Ni fatin kan nunnak ah tuah khawh ah cun, zaan fatin in nan innchungkhar tling in thlacamnak (pumhnak) tuah hmanh uh. Nan innchungkhar cu a nuam deuh hrimhrim ko lai. Ramdang a ummi pawl hi kan i manh lo tuk i, thlacamnak kan tuah kho lo ti nan hmang. A si tak men ko lai nain, caan kawl u law innchungkhar tling i thlacamnak hi tuah hmanh uh, nan innchungkhar a nuam deuh hrimhrim lai ti hi ka chim ngam.

Nancy Pa

Thla kan cam hna lai. Dawtu Pathian, na thawngttha bia i hrawmttinak caan na kan pek tthan caah kan i lawm. Nihin kan theihmi hi kan nunnak ah fim a kan chimtu le chungkhar nuam kan sernak ah bawmtu ah thlua kan chuahpiak ko. Kan phu kan tawk lo tiangin thluachuahnak tampi na kan pekmi cungah kan i lawm. Kanmah bantuk in, damnak a hmu ve lomi, eidin awk a hmuh ve lomi, mi tampi an um. Cu hna zong cu umpi hna law, damnak le eidin awk pe ko hna. Khuami lak ah a dam lomi caah thla kan cam. Damnak a rauh hlan ah hmuhter ko hna. A bikin, kan pa Rev. Dr. Sang Awr caah thla kan cam. Sibawi te nih an zohkhenhnak ah nangmah i phuang in ttha tein a dam tthan nakhnga a caah thla kan cam. Cun, Malay ah thong chungah a ummi hna, tuan ah an luat than khawh nak hnga bawm ko hna. Malay ummi hna an i tinh bantuk in hlawhtlinnak an hmuh nakhnga zong thla kan cam. Kan ram an a ummi kan nu kan pa, kan u kan nau, le khuami vialte umpi ko hna. Thlachuah pe ko hna. Ram kip a phanmi zong kan umnak cio ah, midang caah thil rit kan si sual nakhnga lo, midang caah thathnemmi tu kan si nakhnga, lam kan hruai ko. Rian a hmu rih lomi nih tuan ah an hmuh nakhnga, rian a tuan cangmi nih tlamtlin chinnak an hmuh nakhnga, thla kan cam. A hleikhun in, khuami lakin rosung fapa pahnih na kan pek caah kan i lawm. Kan fapa le pahnih hi lunun ngandamnak pe hna law, hmailei ah nangmah hmai le mipi hmai ah mithmai tha a hmumi an sinak lai thluachuahnak pe ko hna. Kan sual palhnak tampi a um. Kan ngaithiam ko. Nanmah an ttihzahmi le na duhning in a nungmi na fale kan si nakhnga, na thiang thlarau in kan umpi ko sawh tiah, kan Bawipa Jesuh Khrih min in thla kan cam. Amen.

Thlacam Hna Usih

February 17, 2007

Zarhkhat chung lam a kan hruaitu kan biakmi Pathian a min kan thangthat i, thawngtha bia aa hrawm khomi nan dih lak cung zong ah lawmhnak tampi kan ngei.

Hmaizarh (Feb 18-24) cu Malaysia a ummi nih khuami caah a hlei khun in thlacamnak nan kan ngeih piak lai. Kan zapi in kan pa Rev. Dr. Sang Awr caah thla kan cam hna lai.

Thlacam Hna Usih

Khrihfami kan caah cun, thlacamnak hi a biapi tukmi a si. Kan retheih tikah, kan ngaihchiat tikah, kan van san tikah, kan i lawmh tikah, kan hlawhtlin tikah, a zei bantuk thil kan ton hmanh ah thla kan cam tawn. Thlacamnak hi hmual a ngei tukmi a si. Pakhat le pakhat caah zei kan i tuah piak khawh lo hmanh ah, thla kan i campiak khawh. Cucu, thil tha bik kan i tuah piak khawhmi a si. Thlacamnak kong ah, Bawipa Jesuh Khrih nih zei tin dah a kan cawnpiak?

Caan tampi ahcun, thla kan cam tikah, a thiam in thiam kan i zuam. Sau pi cam khawh kan i zuam. Bia dawhdawh hman khawh kan i zuam. Mi lung ton i, an lung i hmuih hna seh ti kan i zuam. Cu ti thlacam cu a tha maw, ti ruah tikah, an tha ko. A si nain, a biapi deuhmi a um. Cucu, thinlung in thlacam asiloah lung tak tein thlacam kha a si. Thlacam hi thiam a hau lem lo. A sau pi zong a hau lem lo. Bia dawhdawh kawl i hman zong a hau lem lo. Kan herh deuhmi cu thinlung in cam, i biatak kha a si. Kan Bawipa Jesuh Khrih cawnpiakmi zong a si fawn.

Kan Bawipa Jesuh Khrih nih a zultu hna thlacam a cawnpiak hnami hi zoh hmanh hna usih (Matthai 6:9-13). Cucu Bawipa Thlacamnak tiin kan cam tawnmi khi a si:

Vancung khua i a ummi kan Pa,
Na min upatnak um ko seh,
Na pennak tlung cang ko seh.
Vancung bantuk in leicung ah na duhnak tling cang ko seh.
Pawcawmnak khim in nifa rawl kan pe ko sawh.
Mi nih kan cung i an sual tikah kan ngaihthiam hna bangin kan sualnak kha kan ngaithiam ve tuah.
Sualforhnak ah tel ve lo in, thatlonak vialte chungin kan khamh tuah.
Pennak nawl le lianngannak le upatnak kha a zungzal na cungah um ko seh.
Amen.

A tawite nain, a tling tuk. Sullam a ngei tuk fawn. Bawipa Thlacamnak cu, Pathian thangthatnak in aa thawk, cun Pathian duhnak hi leicung ah tuah a si nakhnga nih a zulh. Cu hnu cio ah, pumpak caah cam a si. Kannih tah zei tin dah thla kan cam tawn?

Cun, Luka 22:40-46 rel tikah, an rawi zan ah Jesuh nih a zultu pathum sinah a chimmi ruah tikah, zeiruangah thla kan cam a hauh ti fiang ngaingai in a lang. A zultu cu a thawh hna i, "Tukforhnak chungah nan tlaknak hnga lo, thlacam uh" a ti hna. Kan Bawipa Jesuh Khrih nih, thlacam u law, tukforhnak nan tong lai lo, a ti bal lo. Thlacam u law, harnak nan ing lai lo, a ti bal fawn lo. Thlacam u law, nan duhmi vialte pek nan si dih lai, a ti bal lo. Thlacam u law, nan hlawh a tling dih cikcek lai a ti lo. A timi cu, thlacam u law, zei thil nan ton hmanh ah, tukforhnak chungah nan tla lai lo, nan tei khawh lai ti tu a si. Hi zawn hi Khrihfa tampi nih kan thei tawn lo. Vawleicung a si caah, harnak, zawtfahnak, le lungretheihnak, tiin a phunphun kan tong. Hmailei zong ah kan ton rih ko lai. Zei cah tiah, vawleicung pei a fam cu. A si nain, zei bantuk thil kan ton hmanh ah, in khawhnak, a ton zia thiamnak, tei khawhnak, le a lawmhzia thiamnak kan ngeih khawh nakhnga, thlacam a biapi. Thla kan cam tikah, kan thinlung a nuam. Thinlung daihnak kan hmu kho.

Thla kan cam tikah, pakhatnak ah, Pathian sinah cam ding a si. Cucu, nunnak a kan pek caah, kan cungah thiltha a tuahmi ruangah, a fale a kan si ter caah, Pathian sinah lawmhnak chim i Pathian cu thangthat ding a si. Pahnihnak ah, midang caah kan cam ding a si. Midang ahcun kan u le kan nau, kan nu le kan pa, kan chungkhat, sahlawh rualchan, kan hawile, kan minung hawi a simi paoh, cu hna nih damnak le thluachuahnak an hmuh khawh nakhnga thla kan cam ding a si. Pathumnak ah, kanmah caah kan cam ding a si. Kan sualnak kan ngaithiam tiah Pathian kan nawl a hau. Cun, kan tuahmi thil paoh ah Amah nih a kan umpi i lam a kan hruai dingah thla kan cam ding a si.

Zingka kan thawhka ah, Pathian sinah, nihin chun ni tlak kan nunnak ah nangmah nih ka umpi ko, daihnak ka pek ko tiah kan nunnak kan ap ahcun cu ni cu, ni dang nakin kan i nuam deuh hrim ko. Cu caah, zei bantuk caan hmanh ah Pathian sinah thla a cammi si i zuam hna usih. Phundang in chim ahcun, turforhnak chungah kan tlak sual nakhnga lo, thlacam hi daitlang hna hlah usih.

Thla kan cam ta hna lai: A kan dawtu kan Pathian, na cungah kan i lawm. Pawcawm khim in nafa tirawl na kan pek ca zong ah kan i lawm. A dam lomi nih damnak an hmuh than i, thongtlami nih luatnak an hmuh than nakhna thla kan cam. Ramkip a ummi khuami hna, an umnak cio ah damnak, riantuan khawhnak le hlawhtlinnak pe ko hna. Rian a hmu rih lomi zong a rauh hlanah an hmuh khawh nakhnga bawm ko hna. Kan sualpalhnak kan ngai thiam tiah kan in nawl. Nangmah he a thukmi pehtlaihnak a ngei khotu kan si ter law, zei thil kan ton hmanh ah, nangmah sinah thlacammi kan si khawh nakhnga na thiang thlarau in kan umpi ko. Nihin bantuk in hmaizarh zongah caan tha kan hmuh than naklai zaangfah kan in hal. Kan nunnak cu nangmah ta a si. Nangmah kut ah kan nunnak le kan sining vialte kan hun in chanh than. A tha bik na tining in lam kan hruai ko sawh tiah kan Bawipa Jesuh Khrih min in thla kan cam, kan Pathian. Amen.

Bibik
Philadelphia

Thau Khuami Nih Pathian Sinah Kan Zumhnak Fonh Hna Usih

February 10, 2008

Nihin ni tiang lam a kan hruaitu kan Pathian min kan thangthat. Zei bantuk thil kan ton hmanh ah kan biakmi Pathian nih cun a kan umpi ko. Cu caah, A hmaika ah kan retheihnak le kan thilrit thum hna usih. Cun, kan donmi A thluachuahnak zong rel than in, A sinah lunglawmhnak chim hna usih.

Thawngthanhnak: Hmaizarh (Feb 11-17) cu USA ummi nih khuami caah a hlei khun in thlacamnak an kan ngeih piak lai. Cun kan zapi in kan pa Rev. Dr. Sang Awr caah thla kan cam hna lai.

Thlacam thiahnak:
Feb 18-24. . . . . . . . . . . . Malaysia ummi

Nihin thawngtha a kan chimtu cu U Sun a si. Caan a kan hman piak khawh caah a cungah tampi kan i lawm. Atu cu amah nih caan a hmannak a si cang lai.

Hi bantuk in Thau khuami chungkhar pumhnak ah lam a kan hruaitu Pathian cungah lunglawmhnak tampi ka ngei.

Bible ca kan rel lai:
John 11:21, 25, 43-44:- 21Martha nih khan Jesuh cu, "Bawipa hika ah hin rak um law cu ka ta hi a thi hnga lo." 25 Jesuh nih Martha cu,"Keimah hi thawhthannak le nunnak cu ka si. Keimah a ka zummi paoh cu a thih hmanh thi seh law a nung than lai." 43-44 Cu bia a chim dih in aw thangpi in a vun khawh i, "Lazaruh, ra chuak tuah" tiah a ti. Mithipa cu a kut le a ke ruak puan zual bu le a hmai khuh puan he khan a hung chuak. Jesuh nih "Phoih u law kal seh " a ti hna.

Tuzing ah kan relmi Bible cacang nih a langhter mi cu zumhnak nih Pathian thawnnak a langhter. Biadang in kan chim a si ahcun, a zummi hna sinah Pathian thawnnak khuaruahhar riantuannak a lang tinak a si. Martha zumhnak thawngin Jesuh nih A pa Pathian thawnnak kha a langhter i nili vui cangmi Lazaruh cu a tho than.

Tuzing kan tlangtar ah ka duhmi cu:

Thau Khuami Nih Pathian Sinah Kan Zumhnak Fonh Hna Usih

Tuchun Thau khua (chungkhar) nih kan tonmi thil kong cu phungchimtu le thlacamtu zong nih tampi nan van chim cang nain tuzing zong ah van peh rih ning ti ka duh.

Chungkhar nih thil thalo maw, zawtfahnak maw, pakhat khat a ton ah cun chungkhar ning in thildang tuak khawh a si ti lo. Kan thin a phang, kan lungre a thei, kan mithmai ah ni a tlang kho lo.

Cu ve bantuk in nihin ni ah Thau khua kan pa lawng si loin miphun pa a simi kan pa Rev. Dr. Sang Awr ruahlopi in a hung dam lo tikah kan thin a phang, thil dang kan tuak kho ti lo. Hi lio caan ahhin teh kan zumhnak Pathian sinah kan hngat maw? Kan pa Rev. Dr. Sang Awr a damnak caah voi zeizat dah thinlung kuai in thla kan cam? Thau khuami fale nau vialte nih kan pa Sangpui pa kan dawtnak hi atu ah kan langhter ding caah atu hi caan kan ngeih lio a si. Martha bantuk in zumnak nganpi he thla kan cam a hau i, kan si khawh tawk in chaw le va zong in kan dawtnak kha kan langhter hnu lawngah kan Pathian nih a kan cohlan lai i a kuaruahhar riantuannak he kan pa Sangpui pa hi a dam ko lai ti hi ka van chim duh.

Thau a dawtu Thaumi a cepkengtu kan pa Pu Siang Hu Thang cu thlopbul manh lo in le a caah thlacam piak manh lo in a kan liam tak i zeitluk in dah kan sia a herh. Zei hmanh kan dawtnak kan langhter kho ti lo. Sihmanh sehlaw nihin ni ah Thau kan pa le a dam rih mi hna caah saupi an kan nunpinak lai le kan fale cacawng mi hna nih pa can dirhmun ah an kan dir piaknak lai thla cam hna usih.

Martha pakhat zumhnak kha Pathian nih a theihpiak i a tta Lazaruh cu thihnak thlankhur chungin a hun thawh ter than. Cu bantuk in kan Pathian nih Thau khuami kan zumnak hi a kan hngah ko. Thau khuami kan dihlak kan zumhnak nih Pathian lianhngannak kan pa Rev. Dr. Sang Awr cung i a langh khawh nakding caah Pathian sinah kan zumhnak fonh hna usih.

Pathian sin thlazacam pah in,

Sunte
Frederick, MD
USA

Thla kan cam hna lai: Fapa ngeihchun pek tiangin a kan dawtu, kan biakmi Pathian, misual, mipalh kan si ko nain, na kan ngaihthiam i, nihin ah, na thawngtha bia i hrawmti than kho dingin caan na kan pek caah kan i lawm. Thawngtha bia kan theihmi hi, zumhnak ah kan thawn chinchin nakhnga thluachuah kan pek piak ko. Nangmah an bochanmi le midang cungah dawtnak le zawnruahnak a ngeimi kan siter ko. Kan umnak cio ah nangmah nih kan umpi law, damnak, riantuan khawhnak, le hlawhtlinnak kan zaangfah ko, tiah thla kan cam. Khua le ram, miphun ca tiangin santlaimi kan si khawh nakhnga zong thla kan cam. Norway a ummi Pu Mang Lian Sang te chungkhar inn caw kho dingin thluachuah na pek hna i kan i lawm. Hmailei zong ah thluachuah pe chin rih ko hna. Cun, Tangtang le an pa zong fanu thluachuah rosung na pek hna caah kan i lawm. Fanu te Alexandria cu nangmah nih lunun ngandamnak pe law, na thluachuahnak he umpi ko. Vawleicung a si bantuk in, lunglawmhnak kan tong kan ti lio ah, khat lei ah lungretheihnak, ngaihchiatnak le zawtfahnak nih a kan phak tikah, Pathian, nanmah dah ti lo kan thilrit a kan chawng khotu an um lo. Kan nu Run Hre nu nih a kan liam taknak thawng kan theih tikah kan ngaih a chia hringhran. Bawipa, nangmah nih taantakmi chungkhar hnem hna law, na daihnak he umpi ko hna, tiah thla kan cam. Cun, kan pa Rev. Dr. Sang Awr ca ah thla kan cam. A caah zei hmanh tuah piak kho hlah hmanh usih law, damnak a pe than khotu nangmah na si ti kha fiang tein kan zumh i a caah bawmh kan in hal. Kan thlacamnak hi kan ngaih piak law, damthannak pe hram ko. Na fapa a nunnak nangmah kut ah kan ap i, nanmah nih a thilrit, a inmi fahnak vialte kan chawn piak ko. Hmaizarh zong ah atu bantuk in caan sunglawi kan hmuh than nakhnga zong thla kan cam. Pumpak pakhat cio zarh khat chung kan umkal, kan riantuannak le kan tuahmi kipah na thiang thlarau in kan umpi le na daihnak he lam kan hruai ko. Kan nunnak, kan sining, kan zeizong te na kut thiang ah ap than buin, kan Bawipa Jesuh Khrih min in thla kan cam. Amen.

Nangmah Thengte Kha An Herh

February 3, 2008

A hmasa bik ah Pathian kan thangthat. Cun, thawngtha aa hrawmtimi nan dihlak cungah lawmh nak tampi a um.

Thawngthanhnak: Hmaizarh (Feb 4-10) cu Singapore ummi nih khuami caah a hlei khun in thlacamnak an kan ngeih piak lai. Cun kan zapi in kan pa Rev. Dr. Sang Awr caah thla kan cam hna lai.

Thlacam thiahnak:
Feb 4-10 . . . . . . . . . . . . Singapore ummi
Feb 11-17. . . . . . . . . . . . USA ummi
Feb 18-24. . . . . . . . . . . . Malaysia ummi

Nihin thawngtha a kan chimtu cu Pu That Bik (Germany) a si. Caan a kan hman piak khawh caah a cungah tampi kan i lawm. Atu cu amah nih caan a hmannak a si cang lai.

Kan hmuh ballo mi tuzing ni ceu dawh a kan phaktertu kan Pathian a hmasa ah thangthat si ko seh. Cun thawngtha chim ding in caan a ka petu Bibik cung zong ah lunglawmhnak tampi ka ngei ko.

Bible kan rel lai, Salm 133:1-3 le 1 Korin 12:12-26

Biahmaithi
Thantlang khua kan rak um lio ah Pu Caih Kio (Pu Hre Lian Kio pa) Sakta khua in Thantlang ah a fale a rak tlawng hna i cu lio ah cun Thaumi nih thlacam piaknak vok in kan rak tuah piak i Thau lei he Haka lei he minung kan rak tling ngaingai hna. Cu lioah cun thawngtha a rak kan chimtu Pi Sung Hluan (Sui Mawi nu)nih Salm 133 hi a rak chim i tuchun ni tiang ah khua lei kong le khuami kong ka ruah paoh ah cun ka lung chungah hi Bible cang hi a chuak theu tawn.

“Unau rual i rem te in khuasak ti hi zei tluk in dah a that i a nuamh, Aaron luthlung in a khabe ah a khabe in a angki hngawng ah a vung luangmi oliv chiti bantuk a si. Hermon tlangdap Zion tlang cung i a tlami bantuk a si.” Hermon tlang hi tlang sang ngaimi a si i a zungzal in chum le minmei zaam nih a khuh i a zelh pengmi hmun a si caah dapti a tla peng an ti. Cu dapti te cun tiva hme tete an i sem i a hnu bik ah cun Jordan tiva pi ah a hung chuak i cu Jordan tiva pi cu mi tampi hna nih pawcawmnak le khualtlawnnak ah a phunphun ah an hman ti kan hmuh. Kan khua pawngah a ummi Tipi le Tio zong khi an i semnak cu Zinghmuh tlang cung i cerhti bual te in an i sem ti cu kan dihlak nih kan hmuhmi le kan theihmi a si.

Hi Bible ca nih a kan cawnpiak duhmi cu a tawinak tein kan chim ah cun, fung cu pakhat te lawng a si ahcun duhduh in kan khiah khawh nain, pahnih pathum le tampi an van kawmh ah cun khiah khawh a si lo bantuk in unau rual, khua khatmi, sangkhat, biaknak bu ah lungrual tein, i daw tein kan tan ti ahcun zeithil paoh tuah khawh a si i a nuamh zong a nuam, Vawlei chaw le va le inn le lo kan kawl hawlnak ah siseh, Pathian kan biaknak ah siseh kan umnak paoh ah fel tein daw tein kan tanti a herh. Pupa bia ah, “Chungkhar thurual tlulo pamnak,khua khat thurual tlu lo tionak” an timi hi a si taktak ko.

Pumkhat nge tampi,(1 Korin 12:12-26) chung kan zoh tik zongah pum chung ah kut, ke, lu, mit, hnar, ka timi kan pum cungah a um lo ahcun pumtling lomi an si i zeihmanh tuah khawh a si lo i pum tlamtling tein a ummi lawng nih zei paoh an tuah khawh. Cu caah kan pum chung i a ummi hna kha then awk a that lo bantuk in kan nu, kan pa, kan unau, khua khat, bu khat a simi hna he then loin lungrual tein tanti kan herh. Hla phuahtu nih cun,

1. Kan ram pi ceuter nak ah mifim mi lawng in a za lo, kan dihlak in kan tan a herh.
2. Kan Khrihfabu thanchonak ah pastor hna lawngin a za lo kan dihlak in kan tuan a herh.
3. Kan khua kan ram kan Khrihfabu thanchonak ah upa hna lawngin a za lo kan dihlak in kan tuan a herh, tiah an ti bantuk in kan khua kan ram caah le kan Khrihfabu cio ah ngakchia bik in upa bik tiang, santlai lo bik in san tlai bik tiang, a hrut bik in a fim bik tiang, cathiam lo bik in ca thiamsang bik tiang, kan dihlak in fel te le lungrual te le dawtnak te in kan tuan a herh.
   

Kan donghnak bik ah Hermon tlang dapti te in Jordan tiva pi a chuah bantuk in le hla phuahtu nih an phuah bantuk in kan innchungkhar, kan khua kan ram, kan Khrihfabu le kan fellowship thanchonnak caah pumpak pakhat cio, nangmah theng te kha an herh i cu caah kan dihlak lungrual tein thlacam bu in tuan hna u sih.

Kan chim kan relmi kan Pathian nih khuami vialte caah thluachuah pe hram ko seh. A mem.

Nan dawt

Pu That Bik
Germany

Thla kan cam hna lai: Zungzal a nungmi kan Pathian, nihin zong ah thawngtha i hrawm kho dingin caan na kan pek i kan i lawm. Thawngtha bia kan theihmi hi kan nunnak lamhruaitu dingah thlua kan chuah piak ko. Hmailei kan kalnak ah nangmah an tihzahmi le dinfelnak he a nungmi, midang caah a tha hnemmi kan si ter ko. Kan nunnak ah nangmah a biapi bik ah kan in chiah khawh nakhnga, na thiang thlarau in kan umpi ko. Kan umnak cio ah kan umpi law, hlawhtlinnak le damnak kan pe cio ko. Malaysia i thong a tlami hna, a ruah hlan ah luatnak an hmuh than nakhnga an caah thla kan cam. Nihin ah a bikin, kan pa Rev. Dr. Sang Awr caah thlacam kan duh. Nangmah nih zeizong te na tuah khawh ti kan zumh i, damnak na pek than nakhnga, a ca ah thla kan cam. Singapore zong ah tha tein aa piah i, sibawi te zong nih damnak a hmuh than nakhnga tha tein an bawmh khawh nak dingah thla kan cam fawn. A nganfahnak le a thil rit na hmaika ah kan hun thumh i, nangmah nih zaanter hram ko. Cun, nihin bantuk in hmailei zong an thawngtha bia i hrawmtinak caan pehzul tein kan ngeih khawh nakhnga lam kan hruai ko. Kan sualnak le kan palhnak kan ngaithiam law, kan sining te in kan cohlang hram ko sawh tiah kan Bawipa Jesuh Khrih min in thla kan campiak, kan biakmi Pathian. Amen.

Bawmtu, Thiang Thlarau

January 27, 2008

Ni le zarh thar kan phan than. Pathian serpiakmi ni a si philh hlah usih law, kan thinlung tak tein Amah Pathian thangthat ti hna usih.

Thawngthanhnak: Hmaizarh (Jan 28-Feb3) cu Canada ummi nih khuami caah a hlei khun in thlacamnak an kan ngeih piak lai. Cun kan zapi in kan pa Rev. Dr. Sang Awr caah thla kan cam hna lai.

Thlacam thiahnak:
Jan 28- Feb 3 . . . . . . . . . Canada ummi
Feb 4-10 . . . . . . . . . . . . Singapore ummi
Feb 11-17. . . . . . . . . . . . USA ummi

Nihin thawngtha a kan chimtu cu Pu Sang Uk Lian a si. Caan a kan hman piak khawh caah a cungah tampi kan i lawm. Atu cu amah nih caan a hmannak a si cang lai.

A hmasa bik ah caan ttha a kan petu kan Pathian a min thangtthat si ko seh. A bik in phungchimnak caan a ka petu Bibik le Pathian cungah lunglawmhnak chim cawk lo ka ngei ti kha ka van chim hmasa.

Bible ca kan rel lai.
John 14: 25-26 - Hi vialte hi nan sin ka um lioah hin kan chimh hna, sihmanhselaw ka pa nih ka min in a run thlah laimi Bawmtu, Thiang Thlarau nih cun zeizong vialte kha an cawnpiak hna lai i kan chimhmi vialte hna kha nan lung an pemter hna lai.

Kan cangtar duhmi cu: Bawmtu, Thiang Thlarau

Minung kan sining ahhin kan dam lio caan le mahte in a nung kho kan si lio caan ah cun ahohmanh Bawmtu kan herh lem hna lo. Keimah te lawngin ka nung kho ko an ti tawn. An hna a ngam.Sihmanhselaw mirum le milian ngan hna zong nih bawmtu lo taktak cun an nung kho lo. Thinphan thlalaunak an van ton ceo in an lung a fim tawn. Harnak caan ahhin micheu cu kan lung a lo i zei ruah awk kan thei tawn lo. Cu ah cun mah hi lio caan te ah hin zeidah kan tuah awk a si timi hi atu i, ka chim duhmi a si.

Bible ca chungah kan hmuhmi, 2 Chanrelnak 20:1-4 chung bia hi zoh hmanh hna u sih.

1Hi hnu ahhin Moabmi hna le Ammonmi hna cu Meunim mi a cheu khat hna he Jehoshafat tuk awk ah an i thawh. 2Mi zei maw kha an ra i Jehoshafat kha an chim i, “Nangmah doh awk ah mibu nganpi Edom ram, rili leng in an ra lio i zohhmanh, Hazazontamar ah an um” ti ah an ti (mah cucu Engedi kha a si). 3Khi tikah Jehoshafat cu a thin a phang i

1. Bawipa kawl awk kha aa tim i
2. Judah ram chung vialte ah khan rawlulhnak a thanh.
3. 4 Cun Judah ram mi cu Bawipa sinin bawmhnak kawl awk ah an i pum;
4. Judah ram chung khua dihlak khan Bawipa kawl awl awk ah cun an ra.
5. A hme 13, Cu lio ah cun Judahmi vialte hna cu an hngakchia hna le an nupile an fale hna he, Bawipa hmaiah khan an dir.
   

A cunglei ah kan rel cang bantukin thinphannak, ngaihchiatnak, lungretheihnak le lungdonghnak kan ton caan ah mah Judah Siangpahrang Jehoshafat nih a tuahmi bantukin tuah cio dingin mah hi bia nih hin a kan cawnpiakmi a si. Innchungkhar in khuami dih lak in kan tuah ve ding ah ka duh. Jehoshafat Siangpahrang pa nih a tuah hmasa mi cu Bawipa kha an kawl hmasa caah Pathian nih a lehnak hna cu, a hme 14 ah, Cun Bawipa thlarau cu aa pummi lak i a ummi Jahaziel cungah khan a tlung. Amah cu Zekhariah fapa a si. Mah ka zawn ahhin Pathian Thlarau nih a umpi nak hna kan hmuh. Nan thin phang hlah u nan lung zong dong hlah u keimah nih nan ral cu kan tei piak hna lai a ti nak a si. A tanglei zawn ah kan khmuhmi cu Pathian nih an ral Moabmi le Ammonmi kha a tei piak hna. Hihi Pathian aa bochanmi hna an nunning a si.

Chim duhmi cu, zei bantuk caan le zei thil kan ton paohah Bawipa kha sawm u sih law kan herhnak le kan harnak kip ah amah nih a kan bawmh lai. Bawipa Thlarau nih a kan umpi ko lai. Kan ral vialte zong amah nih a kan tei piak ko lai.

A donghnak ah chim ka duhmi cu Thau khuami zong Pathian nih ram kip le hmun kip ah a kan chiah ve i, mah chungkhar te lawng khua sa kan um lai. Lai hawi lakah khua a sami zong kan um ko lai. Kan lung retheih caan ah minung hawi bawmtu kan herh bantuk in bawmtu Thlarau sawm u sih law Pathian nih minung hmang lila in bawmtu an pek tthan lai.

Bawmtu Thiang Thlarau nih cun zeizong vialte kha an cawnpiak hna lai. Sermi thil vialte hna zong hi Pathian lamkaltu an si timi hi kan umnak cio in philh hna hlah usih.

A bia kan chimmi Pathian nih thluachuah kan pek piak ko seh. Amen

Thla kan cam hna lai: A zungzal a kan dawtu Kan Pathian. Tuni caan tiang nangmah nih damnak na kan pek, caan ttha na kan phak ter caah kan lung ai lawm tuk. Na min thangtthatnak um ko seh. Lai lei ah kan kal taakmi chungkhar vialte caah thla kan cam. Ei le din an kawl hawlnak ah nangmah nih bawm hna law kawl hawl khawhnak damnak zong pe ko hna. An herhmi vialte a hngaltu na si. An herh bantuk in nangmah nih bawmko hna. Ramleng ummi hna zong kan umnak cio ah na Thiang Thlarau in kan umpi law lam ttha, lam ding, kan zulhter ko. Kan pialnak hnga lo nangmah nih kan cawnpiak law, lungfimnak kan pe. A dam lomi caah zong ah thla kan cam. A bikin, kan pa Rev. Dr. Sang Awr caah thla kan cam. Nangmah nih damnak na pek than khawh ti kan zumh i, a caah thla kan cam. Cun, Malaysia ah thong tlami kan hawile ca zongah thla kan campiak hna. Thong chungah damnak pe hna law, rau lo te in thong in an luat khawh nakhnga, UN ah luh a duh na in a lut kho rih lomi hna zong an luh khawh nakding caah caan ttha pe ko hna. Rian nei lomi zong raulo te in rian ttha an hmuhnak lai thla kan campiak hna. Lung retheihnak le, ngaihchiatnak, kan ton caan ah nangmah nih na Thiang Thlarau in kan hmem law bawmtu Thlarau kan pe ko. Daihnak kan pek hna, na timi daihnak hi pumpak cio in kan tin coter law a hmang thiammi kan siter ko tiah hi bia vial te,kan sualnak a kan ngaithiamtu na fapa Jesuh Khrih min in thla kan cam kan Pathian. Amen

Pu Sang Uk Lian
New Bern
North Carolina, USA

Mi Vialte Nih Kan Zulhmi Lamthluan "Pali"

January 20, 2008

Bawipa cu a tha, a dawtnak cu a hmun. Nihin zong ah Amah bia i hrawmti kho dingin caan kan hmuh than. Zei bantuk thil kan ton hmanh ah, Pathian thangthat le a sinah thlacam philh hlah usih.

Lunglawmhnak: Zarhpi zarhkhat chung, khuami caah thlacamnak a kan ngeih piaktu Denmark ummi nan cungah kan i lawm.

Thawngthanhnak: Hmaizarh (Jan 21-27) cu Germany ummi nih khuami caah a hlei khun in thlacamnak an kan ngeih piak lai.

Thlacam thiahnak:
Jan 21-27 (Hmaizarh) . . . Germany ummi
Jan 28- Feb 3 . . . . . . . . . Canada ummi
Feb 4-10 . . . . . . . . . . . . Singapore ummi
Feb 11-17. . . . . . . . . . . . USA ummi

Nanmah ram caan a phanh tikah zarhkhat chung khuami caah thlacamnak nan kan ngeih piak nak lai kan in sawm hna. Thlacam cah nan duhmi tete a um ahcun, email ah hun tial ulaw, thlacam tu nih zarhkhat chung an thlacamnak ah an in telh hna lai.

Nihin thawngtha a kan chimtu cu Pu Tuan Hmung (Norway) a si. Atu bantuk in caan a kan hmanpiak khawh caah a cungah tampi kan i lawm. Atu cu amah kut ah caan kan ap cang lai.

Bible ca kan rel hna lai.

Johan 14:5 - Thomas nih cun a thawh i, “Bawipa, khuazei i na kal lai kha kan hngalh ttunglo, Zeitindah cu ka phaknak lam cu kan hngalh khawh lai?" tiah a ti.

Mi Vialte Nih Kan Zulhmi Lamthluan "Pali"

1. Muihnak chungin mui lak ah a kalmi lam
2. Muihnak chungin ceunak ah a kalmi lam
3. Ceunak chungin ceunak ah a kalmi lam
4. Ceunak chungin muihnak ah a kirmi lam

1. Muihnak in muilak ah a kalmi hna hi nihin ni tiangah mi tampi umrih a si ko. Hi hna pawl nih hin atu tiang vawleimi khamhtu cu an co hlang lo i zungzal nunnak lam a hngalh in an hngal duh lo. Zungzal nunnak thawngtthabia cu an caah thihnak rimchia bantuk asi. Thing le lung khuahrum vaangtaam le ser chommi milem cu an i lawmhnak saangbik ah an chiah. Buddhist pawl nih, "Bawipa na Pathian hleiin Pathian dang nan bia lai lo" ti cu an huat bikmi a si. Muslim pawl nih, "thihnak in thawh tthannak" cu an duh lo bikmi a si ve. Jesuh nih zungzal nunnak lam a chimmi vialte cu a zulh in an zul duh hna lo, hi hna hi muihnak in mui lak ah a kalmi hna cu an si.

2. Muihnak chungin ceunak lei i a kalmi hna lam a zulmi cu, a luancia mi caan chungah zumhnak lam hngallo in an rak nung nain, Jesuh Khrih thawngtthabia cu zungzal nunnak lam a si tiah an theih i an zumh. Bible cawnpiakmi bia cu an i lawmhnak saangbik ah an chiah, ngaihchiat lungretheihnak a phunphun an ton caan zongah, Bawipa bia ah khan an i lawm i cu nawlbia cu, chun zaan in an ruat tawn. Kannih Thau khua zong zumhnak hram dirhnak kum 100 tlinnak ding cu, kan phak laimi kum 2010, khi a si. Khuahrum vaangtaam biaknak cu chuahtaak in, zungzaal nunnak cu keimah hi ka si a timi Jesuh Khrih lamsialmi zulh in a kalmi vialte cu, muihnak chungin ceunak ah a kalmi cu kan si.

3. Ceunak chungin ceunak ah a kalmi hna cu, nu le pa nih Pathian an zumh hnuah a kan hrin i, kan chuahka in biakinn ah thlacam piak kan si. Kan nu le kan pa zumtu an si caah an fale cu ceunak chungah kan lut colh hna. Cu zumhnak cu fek tein an i tleh i, lam dang pial an duh ti lo. An nunning cu tlaangcung tlaakmi khua bantuk an si, zeihmanh phentu an ngeilo. Maw retheimi caah Jesuh kan lungpi tiin an retheihnak le an i lawmhnak vialte cu Pathian kut chungah an chiah khawh hna. Vawlei an nunchung ah ngaihchiat lungretheihnak a phunphun nih a dawi hna caan zongah, Pathian cu chanhtu ah an i ser i a luatter tawn hna. Minung thazaang nih tei khawhlo ding raal vialte zong Pathian bia in an tei, nihin ni i kannih vialte zong muihnak chungin ceunak ah a kalmi kan si hna i Pathian nih chanh peng le ven peng a kan duh, Amah lei i ai beek tthiptthep mi paoh cu a kan chanh peng ko. Ceunak leiah kal cuahmah ko hna u sih.

4. Ceunak chungin muihnak chung i a kirmi lam a zulmi hna nih hin, kan ram Khrihfa zumhnak a hrawk biktu an si. Pathian bia hi pakpalawng ah an canter i Biatak lam kha an pialtaak hna. Pumsa duhnak lam a phunphun kha an zul, ka pial cang ti kha an i fahsak. Pawl nih kai tinhmi cu fiangte in ka hngalh i pumsa duhnak tuah kha kai sum a ti. Ceunak in muihnak i a kirmi hna nih hin sumnak an ngei ti lo. Thawngttha chim hi an rak thiamciami kha an chap i an thiam deuh deuh fawn. Nun ah um hleng ttunglo an ka cun nunnak thawngttha cu a chuak. 2 Piter 2:21 “Dinnak lam kha hngalh ttung i nawlbia thiang kha mertak tthan nak cha cun, dinnak lam kha hngallo lawlaw in rak um ah an caah a ttha deuh suaumau hnga,” a ti. 2 Timote 2:19b “Bawipa ta ka si a timi paoh nih cun palhnak a tuahmi kha a ngol awk a si” a ti tthan. Titas 1:16 “Pathian kan hngalh ti cu an ti, sihmanhsehlaw an tuahser nak nih an chimmi cu a si lo ti kha a langhter” a ti. Hi zumhnak i a kirmi hna nunzia nih hin mi tam u a kan hruai cang i ttih a nung tukmi lam ah kal cuahmah a si cang. Taksa duhnak phuntling he an caan an hman mi nih zapi ko cu an kan hruai dihcang.

Zei lam dah na zulh, khuazei ah dah na kal lai Thomas nih a ti. Lam le Biatak le Nunnak cu keimah hi ka si. Kan zulhmi lam kan i fian cio nakhnga Pathian nih thluachuahnak pe hraam ko seh. A men.

Siang Siang pa
Norway

Thla kan cam lai: Kan biakmi Khuazing Pathian, nunnak le damnak na kan pek pinah nihin ni tiang lam na kan hruai i, na kan zohkhenh caah kan i lawm. Kan sualnak tampi a um. Kan ngaithiam. Nangmah an hngalmi miphun kan siter ko. Zei bantuk thil kan tuah hmanhah, nangmah mithmai zohin a tuahtu kan si nakhnga, fim kan chim ko. A zawmi le thongchung i aummi kan unau hna caah thla kan cam. Nangmah nih umpi ko hna. Nihin kan theihmi thawngtha bia zong pumpak cio kan caah thlua kan chuahpiak ko. Hmailei zong ah atu bantuk in na bia thiang aa ruahti kho lengmangmi kan si khawh nakhnga zong thla kan cam. Pumpak pakhat cio nih kan herhmi, kan saduhthahmi vialte na theih dih ko. Nangmah nih a tha bik na tining tuin lam kan hruai in kan umpi ko sawh tiah, kan Bawipa Jesuh Khrih min in thla kan cam. Amen.

Khuazei Ah Dah Na Um?

January 13, 2008

Kan biakmi Khuazing Pathian min in, nan kut kan tlaih hna. Nihin zong Pathian bia i hrawmti kho dirhmun ah kan um than i, kan i lawm. Pathian min kan thangthat.

Thawngtha chimtu sinah caan kan pek hlan ah, thawngthanhnak tuah ta ka vun duh.

1. Tukum 2008 Thau Internet Ministry caan tlaitu cu U Sun (Lg. Sun Par Chin) le keimah kan si lai.

2. Tukum chungah tuah kho usih law, tiah kan saduhthahmi ka vun in thanh hmasa hna lai. Tukum cu, "Thla kan i campiak kum" siseh ti hi a si. Cu caah, kan hnu zarh in Norway a ummi nih khuami vialte caah zarhkhat chung thla kan campiak u, tiah caan kan in thiah hna nak kha a si. Hi ruahnak a hun chuahpitu U Sun cung zong ah kan i lawm.

A tanglei bantuk in zarhli ca in, caan kan in thiah hna. Caan thiahmi nih, zarh khat chung, nan thawhka, nan ih lai, na um kal pah, nan siarem caan paoh ah, khuami caah a hlei khun in thla nan kan campiak lai. Cu caah, pakhat le pakhat thanh khawh cio i zuam hna usih. Email a rel kho lomi zong thanh khawh i zuam hna usih.

Jan 14-20 (hmaizarh) . . . . Denmark ummi
Jan 21-27 . . . . . . . . . . . . Germany ummi
Jan 28- Feb 3 . . . . . . . . . Canada ummi
Feb 4-10 . . . . . . . . . . . . Singapore ummi

Nanmah ram caan a phanh tikah zarhkhat chung khuami caah thlacamnak nan kan ngeih piak nak lai kan in sawm hna.

3. Hiti deuh in kal usih, asiloah, hi bantuk hi telh chih khawh ahcun a tha deuh lai ti bantuk in nan ruahmi a um ahcun, zaangfahnak tein keimah sin asiloah, U Sun sinah hun kan thanh u law, kan i lawm tuk ko hnga.

Atu cu thawngtha i hrawmnak lei ah lut cang hna usih. Nihin caan a kan hman piaktu cu Dr. Hai Vung Lian (Hanna pa) a si. Caan a kan hman piak khawh caah kan i lawm. Atu cu amah nih caan a hmannak a si cang lai.

Baibal: Gen. 2: 8-9 Bawipa nih mipa (Adam) cu a von auh i, "Khuazei ah dah na um?" tiah a von hal.

Biahmaithi:
Caan tha a kan petu Pathian cung ah lunglawmhnak tampi ka ngei. Ca reltu nan zapite cung ah le a kan hruaitu Bik Bik cung zong tampi kai lawm. Caan hi nan ka pek pah lengmang nain, ka tlolh lengmang. Tuzarh zong hi ka tlolh dengmang. A ruang cu kan chungkhar in kan zawtnak zarh khat leng a si cang caah a si. Atu hi caan tlolh than ka duh lo caah ka von i hne i ka tial khawh tawk ka von tialmi a si.

Phungchimnak:
A tuanbia tlingte in kan chim ti lai lo. Pathian nih Adam le Eve cu a ser hna. A dawt tuk hna caah hninghno taktak i duhdim eidin ding tling cikcek te in a ummi Eden dum ah a chiah hna. Hi tluk hmunhma tha cu, ka dang ram ah a um ti lo. A tawinak in chim ahcun, Adam te nupa cu, "Pathian thluachuah an hmu" taktak tinak a si.

Sihmanhsehlaw, Satan aa hman caah maw a si hnga? Pathian nih ei hlah u tiah a timi hna thei an von einak in, Pathian nawlbia cu an buar. An nih ruahnak ahcun, "Pathian nih ei a thlohmi hna thei ei kha, a thaw tuk ding in an ruah; a theipar cu Pathian bantuk in fimnak ding a hung si fawn ding in, rulpi nih a von chimh tik hna ahcun, ei lo ding cu a fawi lo. Adam le Eve hi kan mawhchiat ngai men hna lai. Asinain, an mah dirhmuh ah khin va um cio u sihlaw zeidek kan va lawh ve cio hnga?

Thei an von ei bak in, pup tiah an von fianmi cu, "taklawng in kan um" ti kha a si. Sual le ningzahnak an thei cawlh. A tawinak in chim ahcun an si ning pup tiah an von i hmu. An sining taktak an von i fiang. Thei an ei taktak hlan ah an thinlung in ei duhnak thinlung an ngeihmi kha sual an i thawknak a si. Cucu an thinlung in an sual cia cang tinak a si.

Cu an sualpalhnak zamtak awk ah, "burbuk chung ah an ithup"than. Pathian nih cun Adam sin ah rulpi a kal lio; thei ei a forh lio hna, an ei lio in an i thuh tiang a hmuh cikcek ko hna. A theih cikcek ko hna. An umnak hmunhma zong a theih cikcek ko. Zeidah an tuah? An i thup maw ti zong a theih cikcek ko. Asinain, Pathian nih Adam te cu a von kawh hna i, "Maw Adam khawidah na um?" tiah a von auh hna. A ruang cu, Adam te hi zeidah kan tuah ti kha i fiang hna seh ti a duh caah a si. Cu tik ah, Adam te nupa nih an i fian thanmi cu, "Zeidah kan tuah? Khawika dah kan um? Sualnak hi zamtak khawh a si lo; Bawipa hmai ah kan i thup kho lo" ti kha an von fiang. Cucu a voihnihnak an i fianmi a si.

Adam te nupa sining nih, minung kan lungput le sining hi a ningpi in a langhter. Minung nih hin, kan nunphung le zatlang nih sual a si a timi, sualnak tuah hi sual a si ti cu kan theih cio dih. Asinain sualnak kan tuah hlan ahcun misual ka si ti hi fian a har ngai. Abik in "mit le lungthin in tuahmi sualnak" hi sum a har cemmi a si. Jesuh nih "Sual duhnak thinlung he ngaknu zoh hmanh kha lungchung in cu ngaknu cu na sual a si cang" a ti tikah, thinlung sualnak hmanh sual a si ko cang ahcun, minung hi cu sualnak ngei lo kan um lo men lai.

Cucaah Adam le Eve tuanbia nih a kan chimhmi thil pathum cu: (1) Sualnak kan timi hi thinlung in sual hmasat a si. Thinlung in sualnak aa thawk; (2) Adam le Eve nih thei an einak in sualnak a taktak an tuah bantuk in minung vialte nih lungchung in kan ruahmi thil kha a taktak ah kan canter tik ah sualnak cu titsa ah a hung cang; muihmuh le kut tongh in a hung langh tik ah, sualnak tuah taktak ah kan tla; (3) Adam te nupa nih Pathian hmai in an i thuh khawh lo bantuk in, kan nih vialte zong hi Pathian hmai ah kan sualnak kan thup kho lo; kan nunnak kan thuhpi kho lo.

Cucaah, Krifa zumtu dihlak hi kan sualnak pi he kan um ko lio ah, Pathian nih "Adam khawi dah na um?" a ti bantuk in, kan nih zong hi a kan auh peng ve ko. Kan umnak sualnak le kan umnak hmunhma i fian ding kha Pathian nih theihter peng a kan duh ve. Asi ahcun hihin ni ah kan nih nih lungchung in kan tuah lengmangmi sualnak kan ngei maw? Cu lungchung sualnak cu a taktak ah muihmuh le kut tongh awk tlak in kan umter maw? Bawipa hmai in kan zam ve sual maw?" timi biahalnak hna hi ruah peng a hau.

Naite ah Reuter Thadinca ah hitin ca an tial. Netherlands ram khua pakhat a um i, cuka khua ahcun nupa hna an um ti a si. A nupi cu zanchiar te inn ah a um bal lo. A vapa nih khawi dah na kal a ti tik ah, zan ah rian ka tuan a ti i, tangka cu a va kawl lengmang. A nih zeidang rian si lo in, an khuapawng ummi khua pakhat ah, hlawhhlangnu inn ah hlawhhlan rian a vong tuan ti a si. A vapa zong cu hlawhhlangnu sin ah a kal ve tawn. Voikhat cu a vapa cu, hlawhhlangnu pawl umnak ah a va kal, A nupi cu amah he riantuanti a hawi pa le pawl he nuam taktak in an rak i kuhreh len le an i hnamh len ko kha a hmuh hna. An nuva in duak tiah an itong. An pahnih in, "Ka hin zeidah na tuah?" tiah an i hal veve. Mirang holh cun, "What are you doing here?" tiah an i ti veve ti a si. Cuti "Hika ah zeidah na tuah?" tiah an von i hal veve bak khan, "Zei bantuk minung le nuva dah kan si?" Kan umnak hmunhma hi, "hlawhhlang inn" a si ti kha an von fiang. Sualnak kan timi hi, Pathian hmai cu chim lo; minung hmai in zamtak awk a tha lo. Nupi le sualnak zong va le hmai in thuh khawh a si lo. Va le sualnak zong nupi le hmai ah thuh khawh a si lo.

Laimi tampi ramdang kan phan. Pathian thluachuah a si kan ti. Ramdang a phanmi Laimi nih Pathian thluachuah timi hi, kan ka leng in kan hman hi a tam tuk rua hlah maw ti hi ruah awk ngai a um. Laimi mi tampi he bia kan i ruah. Biaknak hruaitu in, Politician aa timi in, college sianginn kaimi in, saya riantuanmi in, an biachimmi tampi ka theih tawnmi cu, Thailand (Bangkok) ah, Malay ah, Guam ah, US ah, "Cu bantuk night club ah kan kal? Cu bantuk nungak tlangval sualnak Video kan zoh; cu ticun zu kan ding; cu tluk cun kan ri" ti khi tam tuk ka theih. Zeidah kan tuah? Khawidah kan um? Ti khi theih a rak har ko rua. Cu thil cu Pathian duhmi an si hnga maw? Pathian duhmi an si lo ahcun, zeitindah ramdang kan phakmi kha, Pathian thluachuah kan ti ngam ne hnga?" ti khi ruah awk ngai in an um hawi.

A tawinak in chim ahcun, atu kan umnak ram cio hi, kan Kawlram ralkap cozah ukmi ram dirhmun in chim ahcun, Eden dum ah kan um ti tluk a si. Hi kan umnak kan Eden dum cio ah hin, sualnak tuah ding a tam in a tam tuk. Minung mitthit ding le duh dingmi a tam in a tam tuk. Kan freedom tuk fawn. Mah duhpaoh tuah khawh a si. Asina in, hihi ruah an hau. Night club kan um lio ah maw? Zudawr kan kal lio ah maw? TV/Video thalo zoh lio ah maw? Sualnak dangdang tuah lio ah maw? Firtlei, lihchim, biaduh, hmursau in um lio caan ah maw?" a phunphun sualnak tuah lio caan ah, Bawi pa nih, "Adam khawi dah na um?" tiah a ti bantuk in, kan nih cio zong, "Khawi dah na um?" ti in, Bawipa nih a kan auh zungzal ve ko. Cu Bawipa aw cu kan ngai tawn maw?

Hanna Lian pa

Thla kan cam lai: Dawtu Pathian, na cungah kan i lawm. Kan umnak cio ah, nunzia dawh in kan nun khawh nakhnga le, nangmah an theimi kan si nakhnga, lam kan hruai ko. A dam lomi hna caah thla kan cam. Damnak pe ko sawh hna. Lungrethei in a ummi hna, nangmah nih thazaang pe hna law, an thilrit chawng ko hna. Malaysia i thong chungah a um rih komi kan khuami hna le, kan Laimi phun hawi hna zong, a rauh hlah ah luatnak hmuh ter ko hna. Laitlang lei ah kan kaltakmi kan chungkhat, sahlawh rualchan, le hawikom hna zong nangmah nih zohkhenh cio ko hna. Ram kip kan phan i, miphun dang sinah kan tlawnlen ve tikah, nangmah nih kan umpi law mithmai tha a hmumi kan si ter ko. Kan tuahmi cio ah hlawhtlinnak kan pe law, nangmah dawtnak a hngal pengtu kan si nakhnga thla kan cam. Nihin ah ngaihchiatnak a tongmi hna caah thla kan cam. Kan nu Ro Sin nu le Nu Ngen a va nih an kan laim tak ti thawng kan theih tikah kan ngaih a chia. Taantakmi chungkhar hna nangmah nih hnem ko hna law, inkhawhnak thazaang zong pe ko hna. Nihin kan theihmi thawngtha bia zong pumpak pakhat cio kan caah thlua kan chuah piak ko. Kan sual palhnak rel cawk lo a si. Kan ngaithiam law, kan sining tein kan cohlang ko sawh. Jesuh Khrih min in thla kan cam. Amen.

Mihrut Si Hlah Usih

January 6, 2008

KUM THAR LAWMNAK NAN ZAPI CUNGAH UM KO SEH!

Pathian dawtnak thawngin kum 2008 kan phan kho hna. Kan i lawm cio ko lai dah. Pathian hi a tha tuk hringhrang. Cu caah, a hmasa bikah, Pathian min kan thangthat. Nihin cu tukum ah a voikhat nak thawngtha kan i hrawmtinak a si i, a sungkhun.

Thlacam thiahnak: hmaizarh chung (Jan 7-13) khi khuami vialte caah Norway i a ummi khuami nih nan umnak cio in thla kan campiak u law ti kan in nawl duh hna. Hi email a rel lomi zong rak i thanh cio u law, khuami caah thla kan campiak u.

Mi tampi nih kum thar zingah aho nih dah an len hmasa bik, aho nih dah an chawnh hmasa bik, tihi kan i buaipi ngai tawn. Hihi ruahnak hi ka zum lo nain, ka min hi a tha maw tha lo ti cu ka ruat ve. Cu i ka lung a hung chuakmi cu ka min sullam pei Cung Bik ti a si hi, cu caah tukum cu keimah bak nih thawngtha a hmasa bik ah ka chim a hau tiah keimah le keimah caan ka hun i thiah :) :) :)

Nihin ka chim duhmi thawngtha hi, ka chim a thei bal cang zong nan um ko lai, nain ka nolh than. Aruang cu, hihi Laimi nih, a bikin khuami nih, kan philh sual lai ti ka phang tuk caah a si. Thawngtha lei ah lut colh ko hna usih.

Mihrut Si Hlah Usih

Kan Bawipa Jesuh nih bianabia a chimmi pakhat cu mirum pa kong a si (Luka 12:16-20). Mirum pa nih cun lo a tuah i, a vui tuk. Rawl lak caan a zat tikah, a ruahmi cu, hi ka rawl hi ka ngeih cia rawlruk ah aa tlum ding a si lo caah rawlruk a thar in sak an hau lai. Cun, ka sak dih in, keimah le keimah kha vantha pa, na duhduh khan ei law, ding law, i nuam ko kaa ti lai tiah a ruat. Cu tikah Pathian nih cu mirum pa cu “mihrut” tiah a ti.

Hi tuanbia zoh tikah kan khuaruah a har cio lai dah. Zei ruangah dah mirum pa hi mihrut tiah Pathian nih a ti hnga? Mirum pa nih zei sualnak dah a tuah? Mithil a fir lo. Mi cungah thatlonak zong a tuah fawn lo. Mi he an i si fawn lo. Mi zong a hleng fawn hna lo. Midang harnak a pek hna ti hrim zong kan hmu lo. A si kun ah, ziah mihrut tiah auh aa huah kun hnga?

A tuanbia zoh tikah, mirum pa hi thangthat tuk ding leh tu a si. Lo ngan pi a tuah khawh, a rawl an zat tikah, a vui a tha tuk i, zei tin dah ka rawlruk ah tha tein ka chiah i ka fim khawh hna lai ti tha tein a ruat khotu pa a si. A thluak a za, a fim ti nak a si. Cu tluk a simi cu, nihin ni ah kan uar ngaimi phun an si. Hi pa hi, kan Khrihfabu ah chungtel si sehlaw, a tlawmbik ah, Khrihfa upa ah cun kan thim bak lai. Khrihfa bu i phaisa lei a tlaitu, asiloah, Khrihfabu hmanh ah Church chairman kan tuan ter men hnga. Pa za a si.

Cu tluk a si ko mi pa cu, zei ruangah dah Pathian nih mihrut pa a ti hnga? Zei tin dah nan ruah cio? Hi tuanbia ka rel paoh ah ka buai ngai tawn. Mi cung zongah thatlonak a tuah lo, Pathian zong a doh lo. Cu bu ahcun, mihrut ti a si. Ka ruah ve tikah, a tanglei pahnih ruangah Pathian nih mihrut tiah a ti nak a si bik ko rua:

Pakhatnak, "midang thawngin" timi a hngalh lo caah a si. Hi pa hi, nupi a ngei maw, fa a ngei maw ti cu kan thei lo. Hi vawleicung ah a chuak vemi a si caah, chungkhar cu a ngei hna ti kha a fiangmi le zawndamh khawhmi a si. Cun, lo pakhat a tuah tikah, amah lawng nih a zapi in a thlawh dih khawh ding cu a si thiam fawn lo. A chungkhat nih asiloah midang nih an bawmh hrim lai. Cun, a rawlruk sak ding zongah cun midang thazaang a herh thiamthiam ding a si. Asi nain, hi pa nihhin a rawl ngeihmi le a dangdang a ngeihmi vialte hi midang thawngin a si ti a thei lo, a chim lo. Cucu a chambaunak bik a si.

Martin Luther King, Jr nih cun, kan thawh cangka in, kholhtawlnak ah kan kal i, hasi le hahnurnak kan hman, chaphiat kan hman i, tavel in kan hmai kan vun i hnawh tikah, cun coffee maw lakphak maw thaithawh caah kan din tikah, vawleicung mi tampi he pehtlaihnak kan ngei colh, a ti. A chim duhmi cu midang sermi thil kan hmang, midang he kan i then kho lo, midang thawngin kan nung ti kha a si.

Nihin ni tiang kan nunnak ah, a kan bawmtu tampi an um. Kan nule kan pale nih kan ngakchiat lio tein kan tlah tiang an kan cawm. Cun midang dang nih a phunphun in an kan zohkhenh. Nitin kan nunnak i kan hmanmi vialte hi ruah setset tikah midang sermi lawngte an si. Midang sermi le tuahmi tel loin kan rak nung kho hrim lo. Cucu minung a si vemi nih cun philh lo awk a si. Atu ah, ram kip kan phan hna. Laitlang in kan i thawh lio ah, aho nih dah Malaysia tiang phanhnak a rak kan tawlrel pi, ti ruat than hmanh usih. Malaysia kan umnak ah aho aho nih dah thazaang an ka pek i, an ka bawmh ti zong ruat hmanh usih. Atu kan dirhmun zoh tikah, mi tampi nih an kan bawmh ruangah a si.

Tahchunhnak, a cheu cu US ram ah kan phan. Kan phanh khawhnak cu US cozah nih an kan bawmh caah a si. Cun, midang zawnruattu bu nih, zaanghlei an cawi i an kan bawmh. Hika phanh hnuah mi tampi i bawmhnak kan herh. Laimi hawi nih an kan bawmh. Chungkhat le hawikom nih an kan bawmh. Kanmah te cun kan rak si kho hrim lo.

A zei bantuk dirhmun kan phanh hmanh ah midang thawngin kan nung kho ti hi philh bak lo ding a si. Nai Khrismas cu Washington DC i CBMC ah ka va hmang ve. Cu chungah ka lung a ka nuamhter ngaimi cu, Laurel sang timi ah a phanmi hna nih Khrihfabu sinah lawmhnak an chim, an lawmhnak langhter nak ah, guitar le soundbox an cawk i Khrihfabu caah an hlut. An timi cu, kan phanhka in Khrihfabu nih nan kan dawt, nan kan zohkhenh, kan herhnak paoh ah nan kan zuan hnawh colh. Nanmah thawngin kan si ko, an ti. Thil aa dawhtukmi an tuah. Kanmah cio zong, midang thawngin ti kan philh lo ding a biapi. A kan dawtu hna cungah lawmhnak chim zong a hau. Midawtnak le bawmhnak kan philh sual ahcun, cucu Laimi nih mah hngal lo, kan timi khi kan phan ko lai. Jesuh Khrih bia cun, "Mihrut" kan si ko lai.

Pahnihnak, "Pathian thawngin" timi a hngalh lo caah a si. Lo a tuah tikah, thaici cu a tuh ko. Lo zong cu tha tein a thlawh piak ko. Sihmanhsehlaw, cucu lawng cu a za lo. Ruahti a hau. Thli a hau. A dangdang an hau rih. Phundang in kan chim ahcun, thlaici a khoh tertu le a thantertu, theipar tha a ngeih tertu cu Pathian a si. Ruahti a herh caan ah Pathian nih ruah surter hlah sehlaw, a thlai kheu vialter an car lai i an thi dih ko lai. Cu pinah, lo a tuah khawh nak ding ah damnak le thazaang a petu cu Pathian a si. Zaw ko sehlaw lo cu a tuah kho lai lo. Lo tuah dingin ruahnak le fimnak a petu zong Pathian a si. Sihmanhsehlaw, mirum pa nih cun, cu thil cu a hngal ti ai lo. A tlolh diam. Cu tikah, rawl lak a zat tikah Pathian nih a ka bawmh caah, thluachuah a ka pek caah a si, ti a hngal ti lo. Cu caah, "mihrut" ti aa huah.

Minung nih kan nunnak hi second pakhat hmanh kan i uk kho lo. Pathian ta kan si. Pathian sermi kan si. Pathian thawngin ni ceu thar kan hmuh tawn hi a si. Rian kan tuan khawhmi zong Pathian nih damnak a kan pek, bawmtu minung hawi a kan pek ruangah a si. Nihin ah, atu bantuk dirhmun kan dir khawhnak hi aho thawngin ti hi ruah ngai a hau. Kanmah thawngin a si lo ti cu kan hngalh ciomi a si. Salm 124:1 ahcun Salm catialtu nih Pathian kan lei ah raktang hlah sehlaw zei huah dah kan rak huah hnga, a ti. Kan hnulei thil vun cuan than hmanh usih. Pathian thawngin a si ti cu fiang tein a lang ko. Cu caah, Pathian sinah lunglawmhnak chim kan philh lo awk a si. Pathian kan theih peng awk a si. Pathian thawng lawnglawng in ka nung ti kan theih awk a si. Cucu kan hngalh lo, kan tlolh ahcun, "Mihrut" ti kan si ko lai.

Cu caah, u le nau hna, kum thar chungah kan hun luh tikah nihin tiang dirhmun ka phanh khawh cu midang thawngin le Pathian thawngin a si ti theih than hna usih. Cun, khoika hmuh le hma kan phanh hmanh ah, keimah tein ka nung kho hrim lo ti hngal peng hna usih. Mirum pa bantuk in "Midang thawngin" le "Pathian thawngin" hi dirhmun ka phanh khawh nak a si ti kan philh sual ahcun, tih a nung tuk lai. A kan dawtu philh hna hlah usih. Lunglawmh chim ding kan bau ti kan philh lo ding a si. ”Mihrut" ti kan i huah ve sual nakhnga lo, midang thawngin le Pathian thawngin ka nung ti hi hngal peng hna usih tiah kan sawm duh hna.

Pathian nih thlua kan chuah piak ko seh! Amen

Thlacam hna usih: Dawtu Pathian, kum thar dam tein na kan phanhter caah kan i lawm. Tukum cu, nangmah he thuk deuh in kan i pehtlaih kum a si nakhnga le midang caah kan thathnem deuh kum a si nakhnga thla kan cam. Kan nunnak ah nangmah thawngin le midang thawngin kan nung ti a thei pengtu kan si nak hnga kan umpi ko. Tukum cu kan dam kum, kan hlawhtlin kum, dawtnak kan langhter kum, nangmah thinlung tak in kan in biak kum a si nak hnga thla kan cam. Nangmah na kan duh piakmi nunning in kan nun i na sunparnak kan langhter khawh nakhnga, lam kan hruai ko sawh. Jesuh Khrih min in thla kan cam. Amen