Sunday, January 30, 2011

Rev. Dr. Sang Awr Upat Peknak le Philhlonak

Rev. Dr. Sang Awr Upat Peknak le Philhlonak
(Memorial Service)

Caan tlaitu: Thomas Cung Bik

Nihin cu a kan dawtu le kan dawtmi kan pa Rev. Dr. Sang Awr upat peknak le philhlonak in caan kan hmang lai. Cucaah, kan caan hi a sau pah lai nain lungsau tein nan rel naklai kan sawm hna.

Thla kan cam lai: Dawtu Pathian nihin na salpa Rev. Dr. Sang Awr upat peknak le philhlonak caan hmannak kan ngeih khawh caah na cungah kan i lawm. Tuni kan tuahsermi hi, thlua kan chuahpiak law, chungkhar hna caah thazaang petu le khuami vialte nih kan pa bantuk in na caah le kan miphun caah zumhtlak tein kan nun cio khawh nakhnga fim a kan chimtu le kan mit a auter tu ah thlua kan chuahpiak ko. Kan Bawipa Jesuh Khrih min in thla kan cam, kan Pathian.

Rev. Dr. Sang Awr, Khrih Caah Zumhtlak Sal Tha

(1941-2011)

Dr. Hai Vung Lian:
Rev. Dr. Sang Awr cu, July 23, 1941 ah, Thau Khua, Thantlang Peng ah a chuak. Pu That Vung le Pi Chiah Zing nih an ngeihmi hna fapa panga le fanu pahnih lak ah upa bik a si. An phun cu Cinzah a si i, a pa hi Thau khua khuabawi a rak tuanmi a si.

Sianginn Kainak
Asianginn kainak hi hlan chan deuh asi caah a rak harsa ngai. Hi lio caan hi, mi tampi nih sianginn kai duhlo lio caan, fial le hnek chawm in sianginn kai chan a si. Teiman tlu taktakmi le zuamnak a ngeimi taktak lawng sianginn kai khawh a rak si lio caan a si. Thau Primary sianginn ah a kai i, 1953 ah tangli a awng. Thau khua ah kum khat Kawlca a cawn hnu ah, 1954-55 kum ah Tikir Middle School ah tangli a kai than. 1955 ah Thau khua ah private in middle school an dirh i, 1958 tiang a kai.

Cu hnu 1958-59 kuakap ah Gangaw High School ah a rak kai than. Motor a rak um rih lo i, Thau in Gangaw tiang ke in sianginn kai ah rak kal a si. 1960 ah Hakha High School ah a rak kai. Hi lio caan ah, tangriat awn hnu ah, tangkua le tanghra kawmh a rak si. Hakha in high school final a rak awng. Hi lio caan sianginn kaining le tuchan kaining hi aa dan caah an kaining phundang deuh a rak si.

Thau khua ah a tlung than i, Private Middle School ah saya rian a rak tuan. PAT a tuan pah bu in middle ah ca a rak chim pah. 1963 ah Falam High School ah Matric cawn ah Pu Hre Lian Kio le Robert Siang Lian an rak kai i, an rak awngti hna. Hi hna hi Thau khua ah tanghra awng hmasat cemmi an si i, Thau tuanbia tialtu an si.

1963 ah Yangon University ah sianginn a rak kai. Bio-chemical science lei a rak lak. Ram a buai caah sianginn an khar dih i Laitlang ah a rak tlung than. Hakha khuathar ah PAT rian a rak tuan i, ahnu ah Surkhua ah PAT a rak tuan than. Sianginn an hun than caah 1964-69 tiang Rangoon University ah a rak kai than i BA (law), LL.B a rak lak.

Riantuannak
Pathian dawtnak in a nun chung ah rian phun tampi a tlai. 1969-71 ah Sihni rian cawnnak chamber kai pah in BRE kum 2 a rak kai pah. Hi lio caan ah hin, Gen. Ne Win hruaimi Tawhlanzi Council nih ram uknak phunghrampi suai an timh lio a rak si i, Kawlram Uknak Phunghrampi (constitution) suaitu Yangoon Committee ah secretary a rak tuan. Ram uknak upadi an suai dih hnu ah, cozah sin ah an rak chuahpi. Hi lio ah, Lairam caah nawlngeihnak sang deuh hmuh khawhnak ding a si mi, Federal uknak phung deuh in an suai tik ah, cozah nih an duh lo i upadi suaitu upa tampi he an rak tlaih hna. Swebo le Mandalay Thawng ah kum 2 a rak tla. 1974 ah thawnginn in a rak chuak.

Thawng a rak tlak lio ah hin, a muihnak vawlei chung ah an chiah hna ti a rak si. An rau dih i an nung bal lai lo; an thi ko lai tiah an rak ti hna. Thawnginn in a rak chuah tik ah, a nulepa an i lawm tuk i, sia le vok in an rak thlathloh. Khuapi tein kan rak kal hna. Biahalnak le biaruahnak an rak ngei; thlacamnak le nuamhnak an rak tuah i, ngakchia upa an inn pawng kan rak khat dih. Cucu a voikhatnak bik Rev. Sang Awr ka hmuh a si. Amuisam, pumrua a rak i lek tuk i, kan rak uar tuk hringhran. Ngakchiat lio kan ti cu, pakhat le khat bia kan van i el ah, "Nang a ho dah na rawih lai?" ti a rak si i, "Kei Sang Awr kai roih lai" kan rak ti tawn. Ai ham hmasatmi si hi kan rak i cuh tawn.

Thawnginn in a chuah hnu ah 1979 tiang sihni rian a tuan. 1974 thawk in Supreme Court Advocate lehhmah a hmu i, Thantlang, Hakha, Falam, Mandalay le Yangon ah sihni rian a rak tuan. Sihni a rak tuan lio zong ah, biacaih a thiam ngaingaimi asi caah, tayazi zung i bia an i alnak kong le Sang Awr fim ning cu tiah, an rak chim lengmang.

Vawleilei ah heh tiah rian a tuan pah bu in, 1979 ah TABC Literature Board Secretary a tuan pah. Hi lio caan ah TABC Authawng an rak chuah i, hihi nihin ni tiang a nung rih. 1980-86 tiang TABC General Secretary rian atuan. Hi lio caan ah MCC-TICPIND an timi ram hunchonak lei rian Regional director le ZBC President rian a rak tuan.

TABC GS a tuan lio ah, TABC zungpi cu a rak kang i, atu TABC zung khi tlakrawh in a rak sakpi hna. Hi lio caan ah hin, Thantlang ah tlakrawh in a rak tlawm tuk rih i, TABC zung van hmuh ahcun, lung a rak i hmuih tuk. Khuate leimi kan ca le bang ahcun, ropui tuk khin kan rak ruah. A luh hmat ah kan tuk a rak sum nawn. TABC GS a tuan lio ah, Thantlang khua caah thanchonak phun tampi a tuahpi hna. Culak ah apuitlinh ngaimi cu sizung le timerh hi an si. Hi lio caan ah, Thantlang hi tii a rak har tuk caah, kan rak buai taktak. Timerh an van tuah hnu cun, tii ah a rak zia ngaingai.

1986 BD kai ding in Yangon ah an chungkhar ning tein an rak zuang. BD kum thum a kai. BD a kai pah ah MIT ah ca a chim pah. Ca a thiam; ca aa zuam caah MIT ah upat hmazahmi pakhat a rak si (BD degree a lak ni hi, Rangoon ka tlawn lio asi caah, ka rak i tel kho ve. Kan rak i nuam tuk hringhran). Sianginn a dih hlan in MIT ah professor tuan ding in an hal caah, BD a dih cangka in atuan colh.

B.D. Graduation Dinner (1989)

Ramdang Sianginn Kainak
1990 kum in vawleicung ah a min a thangmi Princeston Theological Seminary ah akai i, Th.M (Systematic Theology) a lak. A dih in MIT ah a rak tlung than i, ca a chim than. Amah nih a ka chimh tawnmi cu, "Sianginn hi Ph.D tiang peh le cawn ka duh tuk ko nain, MIT nih a herh tuk an ti caah tlun ding in an ka cah caah ka tlunmi a si. Cupin ah ka nupi le fale ka sia an herh tuk caah, ka tlunmi asi" tiah a rak ti. 1993 ah Singapore Trinity Theological College ah M.Th (Pastoral Theology) a va cawng than i, 1994 ah degree a lak. Sianginn a dih hnu ah MIT ah professor rian a tuan than. MIT ah Vice-Principal caan sau ngai a tuan piak hna.

Princeton Seminary Hodge Hall hmai ah

Hi MIT a kai lio ah, MIT sianginn hi siangngakchia kan rak tam ngai. BD le B.Th kaimi siangngakchia hi umnak inn kan rak har; a khan zong ah kan rak i tlum lo. Hi lio caan ah MIT Building caah zeitindah kan tuah lai ti arak si. Culioah tampi ruahnak a rak chuahpitu hna le tan a rak lakpitu hna a rak si. MIT building caah ting 1000 plan arak suaipitu hna asi i, MIT sayama te cheukhat le bang nih cun, "Asi kho hrimhrim lai lo" tiah an rak ti ti a si. Asinain cucu an tlamtlinh i, building zong cu a dir taktak ko. Hi lio ah MIT siangngakchia pakhat caah kum khat a dihmi hi 25,000 kuakap khan asi i, hi lio i ting 1,000 cu a dintuai lomi fund a rak si.

A Khual Tlawnnak Ram Hna
Rev. Dr. Sang Awr hi TABC, ZBC, MBC level le vawleicung Baptist hruainak leikap tiang zong ah tuanvo tamngai an pekmi asi caah, biaknaklei rian he pehtlai in ram tam ngai ah meeting le conference zong a kai. Hi lio caan hi atu lio bantuk in ramdang kal hna a fawi lio caan a rak si lo. A kalnak kua le ram hna cu 1982 ah Colombo (Sri Lanka) ah CCA meeting; 1996 March ah Haggai Leadership Management Cawnnak (Singapore); 1996 August ah WCC tuahmi Church Management Semin-ar ah MCC aiawh in Nairobi (Kenya) ah a kal; 1999 ah Preaching Seminar, London (UK) ah a kal; 1999 October ah Food for the Hungry (Asia region) meeting-Thailand ah a kal; 2000 February thla ah CCA Biaknak le cozah uknak ceihhmainak meeting-Hongkong ah MCC aiawh in a kal.

Green Lake kam ah

Japan le Europe ram dangdang zong a phan. USA zong ah voihnih a rak tlawng. 2001 kum ah, a rak kan tlawng i, kan fanu Hanna Lian a chuahka a si; laibuhernak kan tuah i, thla a kan campiaktu le thluachuah a kan halpiaktu a si. A fanu fangkhat Liky Rem Hlei Sung degree a lak tan ah, Sangpui nu he USA an rak phan than i, hi tan ah hin, vur a tla tuk; ni hnih kan sin ah an cam i, nuam taktak in caan kan rak hmang ti hna. Vawlei ram tam ngai khual a tlawng. Khuaram miphun ca le a Bawipa caah a ti khawhtawk tein rian a rak tuan. Nihin cu a khualtlawnnak in aa din ve cang!

Tuanvo Lakmi Te
Rev. Dr. Sang Awr hi ram le miphun caah riantuan a duhmi pa; a caan, a thazaang le a fimthiamnak a herhnak in aa hmangmi pa le aa pumpemi pa pakhat a si. Cucaah a herhnak kip ah riantuan ah aa tel. Aa manh lo tuk nain, aa tel kho peng rih. A chiatthian ah, Saisihchuaklam cawhnak le Thau Makazine chuahnak tiang hmanh ah hruaitu a si i, amah aa tel lo ahcun a tlam a tling kho bak tawn lo. Cutluk cun a fate in a lianpi tiang zong ah a kan kuri tu asi.

MIT ah rian a tuan bu in, MBC tuahmi Higher Theological Education Department Director rian kum 7 a tuan; caan tling director an ngeih hnu ah MBC Theological Department chairman a si. MCC ah EC chungtel asi; MCC ah Association of Theological Education Publication Chairman asi rih; Asia Baptist Theological Committee ah member pakhat (1995-97) asi; Baptist World Alliance Central Committee (Ethic Committee) ah chungtel (2000-2001) pakhat asi; MBC-EC member a si i, MCC le MBC committee dangdang hna zong ah chungtel a si rih. LBC aa thawkka in pastor a tuanpiak hna i, athih tiang honorary Pastor in aum. Hi bantuk in ati khawhtawk tein pumpek in riantuanmi asi caah hin, MIT nih Doctor of Divinity (D.D) zong 2003 ah an rak peknak asi.

Thau, 2003

Riantuan a huam taktakmi le fak taktak in thil tuah a duhmi asi caah, a thih tiang bak in rian a tuanmi pa asi. A thih lai ah a cat kho zawkzawk lo ti a si. Ka ruat i, zeidah a sia a herh hnga? A thih lai tiang in rian planning tampi a suai ta i, rian hmaban a siaherh tuk mi maw a um hnga? Ati khawh tawk in rian tampi a lim ta ko? Zeidah a sia a herh hnga? timi ka ruah ah ka ngaihchiat ka celh lo. A siaherhmi rian hmaban hi rotal a vui ta hnga maw ti ka ruat.

Cauk A Tialmi hna
Rev. Dr. Sang Awr hi ca a thiam ngaingaimi, ca a duh ngaingai, catial le carel a zuam taktakmi asi. Mah tluk riankhai tambu le manh lo bu ah cauk tam ngai a tial hna i chuah cangmi hna cu: (1) WCC tuanbia; Mifim Hna Roling Bia; Minung; Tukhal Tha; Baptist Zumhnak Hrampi; Pastor Fimchimtu; A Lamkip in Thannak; Hruaitu Hna Dirhmun; Krifabu Tuanbia; Pastor le Krifaupa rian; Krifabu Thithruai Thiamnak an si. Hi Krifabu tuanbia hi volume in chuah ding tiah saduh a rak thahmi asi (Volume zeizat tiang dah a chuak hnga timi ka thei lo). Mirang ca in cauk pakhat a chuahmi a um i a min ka van thei kho ri lo.


Cauk ropui taktak a chuahtami cu Baibal Hrilhfiah cauk an si i, Genesis in Biathlam tiang chuah ding asi. Hihi Laimi kan tuanbia ahcun a dintuailomi tuanbiatung pakhat a si. Cauk zeimawzat cu a chuak cang i, aza tein a chuak manh dih hnga maw ti bel atu ca ka tial lio ah ka fiang ve lo. Hihi Lai Krihfa Catialtu Phu nih an chuahmi a si i, Laimi tuanbia ah a um bal rih lo mi asi. Kawlram MBC level zong in hibantuk hi a chuak rih lo men lai tiah ka ruah caah, Laimi caah rorah tha taktak a kan chiahpiak asi caah, lunglawmh awk ngaingai a si. Hi bantuk in a nunchung ah, cauk tam ngai a kan tialpiaktu pakhat asi caah, "Laimi Augustine" asi tiah ka ti tawn (Augustine cu Church Father pakhat asi i, cauk tam taktak a tialmi mi pa asi i, micheu nih cun vawleicung ah cauk tambik a tialmi asi an ti).

Chungkhar
1975 ah Rev. Hai Mang le Pi Sui Hliang an fanu Nu Mah Cin he an i ngei. Fapa pali le fanu pakhat an nge i, upabik in Ram Lian Sang (USA); Van Biak Hmung; Cung Bawi Thawng (Singapore); Liky Rem Hlei Sung (USA); Za Uk Sang hna an si. A tefale Pathian nih thluachuah vanluh a pek hna i, pali cu degee hmuhmi an si. A fale an fel an thawng ngaingai i, an pa zawt thlawpnak ah ting tam tuk an dih ko nain, a thih tiang ten an thlawp i, hi bantuk in nulepa a dawmi ngeih hi, Bawipa thluachuah lianpi a si. A thih sia herh lo in, thih sia a rem tuk lai tiah ka ruat.

Ukte Graduation


Singapore ah Cungboi le Mahly he (Kehlei)


Hmunghmung Graduation (Orhlei)


Sangpui le a fanu (Debbie)

Cungboi Degree a lak ah


Pumpak Pehtlaihnak
Rev. Dr. Sang Awr hi, keimah caahcun ka khuami a si. MIT ka kai lio ah ka saya a si. Thi le sa in kan i pehtlai lonain, unau chuahpi a nau le taktak bantuk in a ka dawtu a si. MIT ka kai lio ah, ka ngaihchiatnak ah aka hnemtu asi; ka lawmhnak ah a ka lawmhpitu a si; ka har caan ah a herhnak in a ka dirkamhpitu asi; ka herhnak kip ah a ka bawmtu le lungretheihpitu a si. BD degee ka lak khawhnak ding caah a herhnak kip in a ka bawmtu asi. Keimah lawng silo in MIT kaimi siangngakchia le midang tampi a bawmtu a si. Mitluangtlam, mi nih huam, capo le bianuam chim huammi, mi zaangfahnak a ngeimi, mi toi ah aa dawrmi, lungthin sau le thinfualnak a ngeimi; zeitikhmanh ah mi sin ah mitthmai chia in a um bal lo mi a si.

MIT kan kai lio ah, LBC nubu pumh, mithi topinak kal le zeidang LBC cawlcanghnak tete ah kan rak umkal ti lengmang. Ramdang a kal/tlun caan ah airport ah ka van thlah/dawn ve tawn. An inn i chunhthahnak le tuktak tuahnak paoh ah chung ka va tuan tawn. A riak in ka kal hi a tam. Hi bantuk caan ah bialung duh akan ruah; saduhthah bia tampi kan chim ti. Forhfialnak le lungthawnnak bia tampi a ka ruah.An inn i LBC X-mas kan rak tuah lio hna cu a nuam tuk hringhran. Zan kan rak dei; voklu kan hrem; Pu Lian Cin te hna he chung kan rak tuan ti; kan rak i nuamh tuk ning hi, a philh in philh khawh ding asi lo.

Singapore in M.Th a dih hnu ah, a rak tlung than. Sangpui Nu nih vok thau lian ngaingai a rak zuat donh i, a degree lawmhpinak le thlacampiaknak a rak tuah piak; cu ni cu kan rak i nuamh ning chim awk thalo asi. Kha bantuk in vaa le asunhsakmi nu Sang Pui tuahsermi tete kha chungkhar caah tuanbia dawh le philh awk tha lo tuanbia an si. Nuleva dawtnak timi zeipipa herh lo; kan i daw timi langhter a rak si ko. Kha nih bantuk dawtnak kha kan herh hringhran. Cu ni cu MIT ka hawi le-Pastor Fredy Ngun Iap; tleicia Saya Bawi Er le saya Za Hu tibantuk he hna hna--chun nitlak in chung kan rak tuan. Kan hawi le cheukhat cu a kan kaltak ve cang. Liamcia can ruah ah mitthli a luang than.

Cu ni cu a ropui tuk; zeicatiah Laimi upa an tling; MBC le MIT upa cheukhat an ra; Pu Van Kulh te nupa tiang an ra. A rak nuam tuk. Kha vialte hna kha, "Kan nunnak ah life celebration pakhat an rak si ko." Asunglawi tuk. Hi bantuk caan ah hin, keimah le kan nu hna zong chung kan rak tuanti i aa ngamhtlakmi ah kan cannak zong a rak si ve. Liamcia caan hna ruah ah ngaih a chia; lung a leng. Liam cia caan hna khirh than awk an tha ti tung lo. Nihin ni ahcun kha ni le caan hna cu, tuanbia bang an si ko cang. Sihmanhsehlaw, minung cu caan nih kalpi mi kan si caah, amah le caan te ah nuam takak in kan rak hmang hna i, kha bantuk caan a kan petu Pathian a min kan thangthat.

Kan umkalti caan a tam; naihniam tuk in kan rak umti hna caah hin, hi bantuk thil tete nih Sangpui pa cu ka saya bantuk nkin, ka u bantuk le ka hawi bantuk in ka hmuhter. USA ka phak tik ah, email a um hlan chung vialte cakuat in kan i pehtlai peng.

Ka upat cemnak cu ca ka kuat caan ah, tling tein a ka leh peng mi hi asi. Tangka fangkuahra kuatmi hnihkhat cazin fangkhat zong baulo in a ka ka kuat zungzal; mi pek ding ka timi tete hi chambau lo tein a ka pek piak khawh; Karen nu pakhat pek ding ka timi belte an umnak maw an i thial hna a hmu kho thai hna lo i, amah zong keimah zong kan lung a rak tha lo ngai. cakuat a tial tik ah kuttial dawhte in hmai hnih thum hna a vun tial. Ka upat taktak. Hi tluk a rian tambu ah cahmai pahnih thum khat tein ca ka kuat khawh lengmangmi ka ruah ah, ka khuaruah a har. Email a that hnu zong ah, X-mas lai le biapi deuh um caan ahcun cakuat in a van tial theu rih. Ka lawm tuk. Keimah hmanh nih ka kuat khawhlomi, amah tu nih X-mas thinlung a van ka hlauh tawn. USA kan um tik ah an thlarau aa lawm lo sual ti a phang rua ti khi ka ruat tawn.

Ka upat khunnak cu, a dam lo tuk bu zong ah, khuaram caah riantuan aa tim peng rih; saduhthah bia a kan chimh peng rih. Singapore a kal caan zong ah zeitluk ca a tial khawh lo zong ah email in thawng a kan thanh; abu in a kan thanh caan; pumpak in a kan thanh caan a si rih. A email kuatmi hna le cakuat hi atu tiang kai chiah rih ko hna. A zawtnak a zual hnu zong ah cakuat a van tial tawn i, amah ve lo bang, Laica tial hna cafang a palh ngai tawn. Cucu ka ruah ah ka ngaihchiat, lungfah le ka celh bak lo. Asinain a nuncan ziaza le lungput nih fim a kan chimh.

Pu Ro Thawng le nupi he

Singapore (2008)

Cawn awk tlak thil tampi a kan chiahta. A thih lai tiang taktak in a email kan hmuh khawh rih.

Mifim le poltics a duhmi pa a si. A ruahnak le sining hi ka zoh ve tik ah, Kawlram pumpi hruaitu hmanh ah a tla kho ve dingmi pa asi tiah ka ruat. Zeicatiah a nun a kau i, Kachin, Shan, Karen, Lai le Mizo tibantuk he zong aa tlak in a nung kho pengmi pa asi. Hi bantuk pa hi Laipa ahcun an har ngaingai lai tiah ka ruat. Aung San chan ahhin, Rev. Sang Awr bantuk pa hna hi, Laimi lak ah rak chuak hna sehlaw, Aung San nih hin duh paoh in a kan tuah hnga lo; Laimi le tlangcungmi sining tuanbia hi tampi aa thleng hnga" tiah ka ti tawn. Zeicatiah thil a hmuh ning a kau ngaingaimi pa asi caah asi. Cucu ka upat taktaknak a si.

A caancaan ah Tiddim ka hawile pawl he an inn High Park, Insein ah kan va leng tawn. Tiddim pawl nih an ti tawnmi cu, Rev. Sang Awr cu kan duh tuk; Kawlram hi democracy ram ah i thleng sehlaw, Rev. Sang Awr hi cu MP ah i pe sehlaw, Lairam vuancichoh siding in kan duh; Tiddim le Tonzang lei zong nih kan duh; kan dirpi bak lai" tiah voi tam hi an rak chim. Amah hi politics a duhmi asi lawng si lo in, a thiammi zong asi. Upadi theihngal asi tik ah, ram hruaitu si kho tuk ding asi. Kawlram cozah hruainak le uknak cung ah a lung a tling lo taktakmi le lungfahnak a ngei taktakmi asi.

Ka rak hal tawnmi cu, "Pu Awr, kan ram i thleng sehlaw, politics ah na pe than hnga maw?" tiah ka rak hal. A ka lehmi cu, "Kaa pe lai lo; zeicatiah Pathian rian i kan i pek cang hnu le ordain hna hmuh cang hnu i biaknak rian chuahtak in, politics kal than ding cu, ka tim ti lo. Laimi pakhat (amin ka philh) cu bang hna cu, biaknak a kal hnu ah politics ah a lut than i, cu hnu ah a zeng viar le minung kan si tik ah hi bantuk hi ruah awk ngai a um; tih zong a nung" tiah a rak ti. Politics a duhmi le auarmi pa asi nain, an chan le kan ram sining nih a pek lo tik ah, vawleilei ah riantuan lo in biaknak tu ah an rak kal i, hihi Pathian nih a rak ruahkhan piakmi "gift" deuh a rak si ko rua.

Rev. Sang Awr ka upatnak adang pakhat cu a theology hi a si. Anih theology cu a laiva tein ruang tein a kalmi asi; Baptist hruainak a duhmi asi i, a phungchim le cawnpiaknak hna hi evangelical ngai in akalmi a si. A theology hi a laiva ngaingai in a kalmi a si caah mikip a cawnpiaknak le phungchimmi an ei khawh. Mi kip nih a thawngtha chimmi an eidin khawh. Phung a chim tik ah, Krifabu pakhat maw asiloah mi pakhatkhat maw, sawisel a duh lo; zei bantuk minung zong a pawm khomi si aa zuammi asi. Krifabu kip he rualrem te le dawte in um aa zuam caah buu hruaitu nih an upat i an tlaihchanmi a si. Zeitikhmanh ah "tuklehpek" in khuasami le phungchimmi asi loh. Cucaah nihin ni a nunnak a liam tik zong ah hin, a zuun an ngai theu lai tiah ka ruat.

LCF, Siangapore ah thawngtha a chim lio.

Rev. Dr. Sang Awr nunnak zoh tik ah, Jesuh Krih kha fekte in aa tlaihmi le Jesuh Krih ah a zumhnak fek tein a bunhmi pa a si. Zeitluk a dam lo le a zawt tuk zong ah a zumhnak a thlah bal lo i, cu a zumhnak nih intuar khawhnak a pek; teinak nun a pek; a thih tik zong ah hnangam tein a thi. A dam lio i, a phungchimmi hna hi nihin ni tiang in ka cinkenmi tampi an um rih i, ka thinlung ah a cam cemmi cu, MIT siangngakchia pumhnak ah, "Never Give UP" timi catlang tar in vesper service i phung a rak kan chimhmi a si. Cu aphungchimmi nih MIT ka kai lio in siseh, nihin ni ka nunnak tiang ah, thazaang tam takak a ka pek. Keimah bantuk in a nunnak a thlenmi hna le amah thawng in thatnak a hmumi tampi an um theu lai tiah ka ruat.

Rian tuan ding a tam; rian lim khawh a si lo; rian siaherhmi tampi a ngei ko lai. Asinain, Jesuh Krih nih vailamtah cung in, "Aa lim cang" ati bantuk in, Rev. Sang Awr ca'h cun rianpi aa lim cang. Hi vawleicung ah Pathian nih khualtlawnnak caan kum-70 a pek; a khualtlawnnak vawlei ah caan tawite lawng a um. Cucu baibal nih kan nun caan a timi a si ko (Salm 90:10); A nun chung caan tawite ah, fimthiamnak a za tawk in Pathian nih a pek; khuaram miphun caah ati khawhtawk in riantuannak caan tha a pek; Bawipa rian a ti khawh tawk tein a tuan; Pathian atihzah le a duh ruang ah, thiltha tuah kha aa zuam khawh chung in aa zuam. Cucu minung kan chuahchan asi ko. Nihin ni ah a nunnak cu liam ko cang hmanh sehlaw, Rev. Dr. Sang Awr nih a tialtami tuanbia vialte hna hi, mi tampi caah cawnpiaktu le lam hmuhsaktu an si lai i, kan nunnak le thinlung ah lungca bantuk in atu le zungzal aa tial camcin ko cang lai!

Donghnak
A rak ka dawtu ka saya, ka hawi le ka u bantuk in ka ruahmi nih, nihin ni i a kan kaltak tik, a ruak ka hum kho ti lo; a thlan cung ah ngaihchiatnak bia ka chim kho ti lo. Ka lung a fak tuk ve. Cucaah amah upatnak caah hi capar hi ka van tialmi a si. Atuanbia hna hi amah chuahmi cauk, LBC Kum 10 tlinak Makazine le Cauk dang hna chung in lakchimi an si timi kha van langhter ka duh.

A rak ka dawtu Sang Pui Pa, hi ca te hi, hi vawleicung na nunnak a liam ni ah, kei nih upat kan peknak le na dawtnak cung ah kai lawm timi ka langhternak a si. Na nunnak ni liam ko cang hmanh sehlaw, ka thinlung ahcun zungzal na nung camcin ko cang lai!!! 

Hai Vung Lian
January 17, 2011
Columbus, Ohio

A cunglei hi Dr. Hai Vung Lian nih Rev. Dr. Sang Awr tuanbia tawi le upat peknak ah a tialmi a si. Atu cu khuami cheu khat nih kan pa upat peknak le philhlonak ah an tonmi chungin an chimmi kan rel hna lai:

Pi Ca Thluai:
Rev. Dr. Sang Awr (Sangpui pa) cu kan hngakchiat lio tein sang khat inn pa te kan si i a rak ka daw ngaimi a si. Ka rak thlaihchan tukmi le ka rak upat tukmi zong a rak si. Thong a rak tlak lio ah hin an rak hrem tuk hna, cu ti cun an chiah hna, an tuah hna, tiah an rak chim le ka pu Run Hre pa le Hniangte ti hin nguingui thlak in kan rak tap hna. Thong a chuak an rak ti ah hin kan rak i lawm tuk. Khua a hun tlun ah Vachia tiang kan va dong hna i kan rak i nuam tuk.

Thantlang i tang 9 ka hung cawn tik zong ah a far chuah pi tluk le atu fa taktak bantuk khin Sangpui nu le pa nih hin an ka dawt tiah ka ruah. Tang hra ka awn lio ah hin Sangpui nu le pa le Bawi Bik Thawng nu le pa i an rak ka lomh pi ning hi, nihin ni tiang ka mitthlam ah a cuang i ka thinlung ah hin a tang peng.

Rangoon ah College ka kai i cu zong ah cun Sangpui pa hi, Rangoon a rat fa tin te a thil ai thumh khawh cang ka in ka sin ah hin a ra i na dam maw, na sin a pi maw tiah, a ka hal tawn. A tlun lai zong ah ka tlung cang lai i ca rak i zuam a ka ti ta tawn le tha a rak ka pek tawn. Ka hawile nih hin an daw tukmi pu tha tuk le pu fim tuk na neih le kan in hngar tuk tiah an rak ka ti tawn. A philh in philh awk a tha lo.

Germany ka phak hnu ah, kan umnak khua ah a rak phan ve i, kan inn te ah ai thum. Mi inn kip ah thlacam ah a kal le ka zulh tawn. Bia thatha le bia sunglawi a ka ruah pah tawn le kan rak i nuam tuk.


Atu hman tlak hi kan innchung te i kan rak i pumh a dih ka tein kan i thlakmi a si, a dang pakhat hi thlacam ka zulhnak hna innchungkhar Tidim kan unau hna inn a si.


Ka pu aw, liam riangmang kan siang hrim lo ee. A rian na tuanmi kan Pathian sin ah dai tein i din ko ne mu.

Na dawtmi na tufa,

Bawi Tha nu
Germany

Pu Sang Uk Lian:
Malaysia ka um lio a si. Borte (Van Tha Bor nu) nih a sia ka herh tuk i, phone in a van ka chonh. Zarh te zaan a si. U Sang, na dam maw? Sangpui pa a kan tlawng i, thai zaan khi kan inn ah khuami he biaruah ka duh a ti le na hong kai thiam hnga maw? Aw, a ka dawtu Borte, kai khawh ka van i zuam lai. Lam ah sahngar zong ka hmu hna lo. Tluangte in Kualalumpur ka phan. Chun caan a dih, zaan caan kan phan. Pu No Thawng (Esther pa) innchung cu tthutnak tlumlo in kan khat. Caan tlaitu ah Pu Tuan Hmung (Siangsiang pa) a si. Hramthoknak keimah nih thla ka cam.

Ka pu, khuami na fa le rual na kan zoh i, na hmai a panh ning kha, ka mitthlam ah a cuang peng. Thau khua ca ah na chunmang na chimmi bia vialte lak i, ka philh khawh lo mi cu: Thau khua sianginn kong le fimcawnnak, Thau khua cu Pathian nih a kan dawt i A rianttuantu cu kanmah tawk in cun kan zaa ve ko na in vulei lei, cozah/ rianttuanmi kan um lo, na timi, Thau khua ah sianginn ttha a um ahcun atu nakin kan tthangcho deuh hrimhrim lai, cucaah cun kan umnak hmun le ram cio in Thau khua kan sersiam lai na timi kha.

Atu ah cun khua chuak taak in kan peem hna i Thantlang in Yangon tiang ah Thau mi kan um ve cang hna. Thau khua ah a pem hmasa bik mi cu na ti i, keimah kha panh sirsiar te in na van ka zoh i, SangUk te chung hi an si, na ti lio kha atu tiang ka mitthlam ah a cuang peng ko ee. Khoi ka ram nan phak zong ah nan tappi le nan lungthu kha philh hlah uh na ti mi kha, philh awk an ttha hrimhrim lo.

Ka nau nu Borte nih, U Sang, cauk zuar ding an kan kuat i na duh ve theo lai ka ti i, kan chiah piak. A ho ttial mi? Sangpui pa. Khawi? KHRIHFABU TUANBIA. Church History Vol. 1. Aw mah hi bantuk cauk hi pei rel ka duh tukmi a si cu. Borte kai lawm tuk. Aizawl ka um lio ah Mizo holh in anttial mi Synod Bookroom ah an zuar an ti le cawk ding in ka va kawl i pei a dih cang an ti cu. Aw si maw? Na ttial mi cauk dang BAPTIST TUANBIA le ZUMHNAK timi zong Rev Dr. Duh Kam (Pa Bawi pa) nih a ka phurh tthan. Na kutneh ka hmuh zawn ah mitthlam ah na cuang zungzal ko lai ee, ka pu.

A rian na ttuan piakmi na Pa ttangnem ah daite in i hngilh ko ne mu.

SangUkLian (BiakHleiSang pa)
2312 Elizabeth Ave
New Bern NC 28562

Pu Hrang Cung: Sangpui pa bia in forhhaihnak
Khuami fanaule hna,
Sangpui pa bia hi nan caah thazaang laknak ah a si hmanh maw ti in a tawinak te in van chim ka duh. Tanghra a awn kum ah hin kan khua ah saya rian a tuan. Tang sarih ka cawn lio a si. Thau ah sang thum kan um i bawlung kan rak chuih tawn. Anih Khuathar sang, kannih Sangpi kan si. Bawlung chuih ah ka mit ka chimh ka naih tuk hlah uh a kan ti. Haka peng kan si lio ah a si. Vaw khat cu Haka tlawn a tim i siangngakchia pahnih nih ka zul u a ti i keimah le atu Rev. Lian Chawn nih kan zulh.

Lampi thluangthluan cacawn a that ning, teimak a that ning, vuleicung thil sining le vulei cung minthang mi kong a rak kan chimh tawn. Vawi khat cu nan duhmi ka hal u a ti i kei nih kai thawh i, Saya, ziah bawlung chuih ah na mit na chimh, tiah ka hal. Ai thawh i, kei cu zei thil ka tuah pauh ah ka biatak tuk i, bawlung chuih zong ah ka biatak. Ka biatak tuknak ah ka mit ka chimh, ka nganh sual i thil dangdang ka chuih sual ahcun a fak tuk lai, kei zong ka fak tuk lai. Zei hmanh tawng lo in ka nganh zong ah ka fak tuk, tiah a rak ka ti. Sangpui pa cu zei thil a tuah pauh ah a biatak tuk. Cu ruang ah a sannak ah Pathian nih a cawi ti hi kan theih awk ah ka duh.

1968 kum ah khan Indakaw ah Pegu pawng ah sianginn ka kai. Nikhat cu chuncaw ei ka lawi ah kan inn ah a rak thu ko. Ziah ruahpak lo pi in na hon ka ti. America tanzung ah Armstrong te pawl thlapa an kai lio kha biscope in an piah. Zarh hnih chung long piah ding a si i ka hong in la, a ka ti. Ziah cu biscope zoh ruah rumro ah na ka lak ka ti. Kan naule nih hin kan hmuhmi pauh hmu ve hna seh, ka thiammi pauh thiam ve hna seh ti kan duh tuk hna i ka hong in la ko. Nan sayate sin ah khuanh kan hal piak lai i kan kal lai a ti i, kan saya sin ah cun khuanh kan va hal i kan kal.

Cu lio ah Hmawbi le Indakaw hrong ah Laimi lak ah an rak chimmi cu, Tidim, Matu ti in Laitlang lei in a rami pauh nih, kal an duhnak zawn kal pitu ah anmah miphun an um ko nain Sang Awr nih in kal pi hna seh an ti i amah nih an duhnak pauh ah a kal pi tawn hna an rak ti tawn. Sianginn khar caan pauh ka va kal tawn i ca rel hi a ka fial bik tawn. Sihni a cawnnak cauk hi a rak ka relter lengmang tawn. Chamber an kai lio zongah hin A Thai pa he hin na kai ve lai an ka ti i ka rak zul tawn hna. Biacaihnak i an bia va ngaih khi a si ko. Vawi 120 an ngaih ah cun an awng ti nak a rak si. Bia phunphun caihnak ah kan rak kal tawn.

Hi bantuk in Sangpui pa nih hin a rak ka thithruai caah hin ka philh kho hrim lo. 2009 ah khan ca zong ka hei kuat. "Na mui hmuh cu ka hnangamnak a si, na biaholh hi ka th zaang a si" ka hei ti. A thi ti thawng ka theih cun ka celh hrim lo. Ka riantuannak ah keimah long mitthli he, ka hong lawi i kan nu sin ah mitthli he rawl ei zaang zong a tlung kho lo e.

A cunglei ka tial bantuk in, Sangpui pa bantuk in zei thil kan tuah pauh ah i biatak usih law, kan khua kan ram mi nih kan hmuhmi hmu hna seh kan tonghmi tong hna seh ti lungput ngei in zawnruahnak ngei kho usih law kanmah pumpak long si loin kan khua kan ram le kan fanau hna zong hawi an tluk lo hmanh ah mah tawk cun thanchonak a si ve ko hnga mu.

Atu Sangpui pa zong nih a liam sia a herh thluahmah mi kan lam kong zong ah biatak van chuah usih law, kan khua kan ram kan fanau caah zawnruahnak le duhpiaknak he van tang cio rih hna usih. A thi ti ka theih in ka lung ah Lai hla a chuak i nan rak rel ko lai na in ka van nawlh than.

1. Kan thawng nih cul khua za van deng tiang,
khua kam hau tlang pur ai cang an ti,
ho val pa hme kan chuan hoi ne lai,
tha ling rawl tu ah.

2. Pacan e kan bih zun sang bik cem
na liam lung herh hlah lai rawn khua
thangthar seino an ruh dir ve cang
khua kam lai hna dawh.

Hrang Cung
Roanoke,Virginia

Rev. Dr. C. Duh Kam: Rev. Dr. Sang Awr (Sangpui pa) Ngaihnak
Kan hnu Zarhteni January 22, 2011 cu Sangpui pa theihtthannak service cu Chin Evangelical Baptist Church, Indianapolis, IN nih an tuahpiak i ka kal kho ve. Ohio le Michigan in kan khuami zong tampi an ra kho. Pumhnak ah upa biachimnak cu zalawng tein an onh. Upa deuh ti mi paoh nih bia an chim. Na mitthli nih a ton dih hna. Bia an chim kho lo. Kei zong phungchim ah ka tho ve. Bible rel ka rel hnik i ttah aw lawng te a chuak. Biachim kaa timh tikah mitthli nih a kham. Ttah pah bu in bia chim a si. Ka pasal ve ko ka ti tawn nain, kan u Sangpui pa kong chim ahcun ka pasal kho bak lo. Ka mitthlam ah a mui a cuang. Ka hnathlam ah a awka a leng. Thinlung dihlak in a kan dawtnak vialte a ziamh ko cu! ka ti. Ka ngaih a chia tuk.

Sangpui pa hi Thau ah saya a rak ttuan lio ahhin tangcheu cheute ka rak kai. Thau sianginn cu sianginn hmun tthing kan ti mi tlang bo cungah a rak um. Sianginn khaan chung luh lai i kan i cer i bia a kan chimh lio ah chimh nan ngai lai a rak kan ti. Ka min bing in a rak ka auh i ka rak lau ngai. Khual ah ca a cawng peng i ka hmu kho ti lo. Caan karlak ah a tlanval chaihphit ling te ah Vailamtlang bawlung chuih zuamnak kha Hmunlipi ah tuah ding a si. Kan khua ah bawlung an cinh i kan rak zoh hna. Pu Siang Uk (Rangoon) he khin full back ah an rak chuih. A tha a tthawng. A mual a fak. A hmai zawn ah a chuakmi bawlung cu tlangval dang nih an zuan hnawh ngam tuk lo. Bawlung chuih zuamnak Hmunlipi in an rak tlun ahkhin hauka in khuapi tein kan rak dong hna. Cu lio ahcun Pu Chan Rawl (Tial Mang pa) pa zong an team ah a rak i tel ve.

Hi hnu vialte hi hmu lo in saupi kan um. Sianginn a kai lio, Thantlang ah lawyer a ttuan i thawng a tlak tiang ah kan i hmu lo. 1974 kum ah thawng in a chuak. Hakha High School ah 10th Standard ka kai lio a si i Thantlang tiang ka hei thlah. Cu lio ruahsur le lam a ceh ning cu a har taktak. A bik in, Hakha khua thar lam khi cawleng nih a nan dih i kan kal kho bak lo. Ruah a sur tuk bu in kan i thawh i kan cin dih colh. Ka bawngbi ngeih chun kawfi rawng ttheton bawngbi par arh nawnmi ka rak i hruk. No lio caan! Ka bawngbi zal ah ks. 30 kaa sanh i lampi ah ka rak thlau. Hi lio ah semrel tein kan nun caah ks. 30 hi thla khat nunnak ah a za. Sangpui pa kha ka chim lo. Amah phaisa a ka pek sual lai ka ti i ka chim duh lo.

Sangpui nu le pa an i tthit-umh hnu ah an inn ah ka tlung tawn hna. Sangpui pa kong kan chim ahhin Sangpui nu nih khuami a kan dawtning hi chim chih lo awk a ttha lo. Zawn a kan ruah, a kan dawt caah an inn ah kan tthudir ngam. Kan herhmi tete ah a kan bawmh. A kan tuaktan pi. Keimah nih a cungah lawmhnak chim ding leiba tampi ka ngei. A ngaihchiatnak cu Bawipa nih hnem ko seh ti lawng hi ka chim khawh mi a si.


Biaknak lei ah rianttuan mi kan si hnu ahcun kan i hmu lengmang cang. Rangoon MIT ah sianginn kan kai lio ah Sangpui pa M.Div 1st year ah kei 2nd year ah ka kai. Kum hnih kan kai tti hna. An chungkhar in an um. An inn ah rawl kan ei tawn. Biakhawng kan deng tawn hna. Ka nunnak ah philh khawh lo ding mi tampi a um. Hmai lei ah kan ttial tthan te lai.

Van Bawi Lian pa


Thomas Cung Bik:
Ka pa (Pu Za Dun) hi carel a zuam ngaimi a si i, magazine hi tampi a rak ngei. Carel ka vun thiam in, ka pa khawmhmi magazine cu ka rel tawn i, cu ahcun “Sang Awr” timi hi ka hmuh lengmang. Ka pa nih “Rev. Sang Awr hi kanmah khuami a si. MIT ah cachimtu a si” tiah a rak ka chimh. CCC ah Baibal sianginn kai ka thawk. Cu hnu cun a min hi ka vun theih deuhdeuh. Nain, a voikhatnak ka rak hmuh cu Hakha ah a si. Thawngtha a rak chim. A lang in ka rak hmuh.

October 2009 

Kei nih cun midang sinah dah ti lo ahcun, "ka pa" tiah ka auh. A ka hringtu ka pa tluk in ka tlaihchan i, amah zong nih a chungchuak fale bantuk in a ka dawt. Atu ka dirhmun ka phanh khawh zong, Pathian chim lo ahcun, amah thawngin a si. CCC ah sianginn ka rak kai i, ka dih cun ka peh ti lai lo, peh kho ding dirhmun zong kan si lo, tiah peh ti lo dingin ka rak i tim. Nain, ka upa (Rev. That Lian) he an rak i ton tikah, keimah le Nancy pa kan um lio ah, MIT ah rak kai hrimhrim u law kan in tanpi hna lai tiah ka upa cu thazaang a rak pek. Cu ti cun, MIT ah sianginn kainak camipuai phit dingin kan unau in kan rak i thawh. Anmah inn ah kan rak tlung colh. Zanlei sianginn in a tin in, kan unau cu bia a kan ruah, thazaang a kan pek, Yangon i a ummi khuami kong a kan chimh, cun MIT pawnghrawng ah a kan chawhpi i, a zungkhan ah a kan kalpi. Fak piin i zuam u, nan unau in tiah thazaang a rak kan pek.

Aho paoh nih an inn luhchuah cu a nuam tuk in theih cio a si caah, mileng hi an thing lo ti awk in an ngei. Kan unau in ca an zoh kho sual lai lo ti a phang i, Hyde Park i MIT siangngakchia umnak ah a rak kan umter, siangngakchia kan si hlan in. Pathian zaangfahnak in MIT luhnak camipuai cu kan unau in kan awng. Kan unau in kan rak awn lio, a rak i lawmh tuk vemi, atu tiang ka mitthlam ah a cuang peng rih. Cu lio ahcun, a rak ka capo. Nang CCC in na awn ah na awnnak a sang ngai nain, atu camipuai nan phitmi ahcun na u nih an tei tung, tiah nih pah in a rak ka ti i, ka u nih a ka tei lo ahcun "nau tei" an ti sual lai, tiah ka rak ti i, amah le ka u he cun tha nuam tuk in kan rak i nih sek hna.

MIT ahcun kan hung kai i, bawmtu a kan kawlpiak. A zei paoh ah ruahnak a kan petu le, ka nu Sangpui nu he, kan nu le pa can ah an kan dirpiak. An inn ah rawlei an kan auh. Nan herhmi a um ahcun kan chim u, kanmah kan um i, zei hmanh ah nan tha chia sual lai ucih, tiah thazaang an kan pek zungzal. Kan unau in M.Div. kan lak lio zongah lawmhpinak an kan tuahpiak. Kan nu le pa taktak cu an si ko!

M.Div. ka dih in, MIT ah cachimtu ah an ka auh. Cu kong zong ah amah thawngin a si ti ahcun ka palh lai lo. MIT i ka tuan chung vialte an inn cu, ka nu le pa inn bantuk in ka luh chuahnak a si. MIT kum thum ka kai chung le kum thum le cheu rian ka tuan chungah voikhat hmanh thachiatnak a simi a chim ka thei lo. Yangon Thau upa i tonnak ah mino ka si rih nain, a ka sawm i, kan ule pale sinah meeting ka va kai ve tawn. Ka pa Sangpui pa he kan i ton dih le bia kan i ruah dih paoh ahcun, thil thar ruah awk le i zuam duhnak thinlung hi ka ngei peng. Catial kong hi, kan ceih ti tawn i, catial duhnak thinlung zong tampi a ka pek. Ka riantuannak ah ka ba tuk, catial caan ka ngei lo tiah ka ti tawn. Nain, amah ka hmuh tikah thazaang kaa lak peng. Riantuannak in hnu pi ah a tin zongah, rawl a ei, ti aa kholh i, chungkhar caan a pek hna hnu ah, catialnak caan a pek khawh rih.

2009 i Kawlram ka va tlun lio zong ah, a damlo lio, sii aa ronh lio a si bu ah, panh tein bia a kan ruah i, thazaang a ka pek rih. Cun, nupi ka thit lai zong ah, Laimi kan phung ningin nupi halnak zong ah ka nu Sangpui nu he an kan kalpi i, amah bak nih nupi a ka halpiak. Zaan ah a si i, nu lei in Za Biak pa nih a dir i, Sangpui pa nih a chimmi le a tha a timi cu, a tha dih tiah kan ruah ko, zei hmanh al ding le chap ding kan ngei lo tiah panh ngai in a rak, kan ti. A damlo hnu zong ah nupi a ka thitpiaktu a si.


Kawlram in ka rak i thawh hnu belte ahcun kan i chawn kho ti lo. Email cu kan i kua rih nain. January 16, 2011 ah a dawtu, a rianhmi Pathian tang ah a kan tinh tak tikah kan ngaihchia tuk hringhran. Hawidang nih ca an tial i, heh tiah kan pa Sangpui pa nih a dawt hna nak, an upatnak le a ngaihchiatnak an langhter lio ah, kei cu mang a manh i aa thang kho lo bantuk ka si. A kan thih tak lai ti cu, kan theih cia a si nain, a thih taktak tikah cun, kan mang sisehlaw a tha tuk hnga, kan i hlau lai i, kan i tong than lai ti hi kan duh cio lai dah. Cu mang ahcun ka pil. Nain, kan mang a si lo cu a poi tuk hringhran. A kan liamtak taktak cang ko. Kan ngaih a chia, kan khuaruah a caw. Kan zaang a ram tuk. Amah bantuk Laimi ah kan ngei ti sual hna lai lo ti ruah ko ah, lung a fak. Bawipa, chungkhar hna le kan Laimi vialte kan hnem ko, thazaang kan pe ko tihi ka thlacamnak a si.

Ka nunnak ah pumsa lei he thlarau lei he lam tha a ka hmuhsaktu a si i, ka cungah a tuahmi hi philh khawh ti lo dingin ka thinlung ah a caam lai ti vun langhter ka duh. A nunnak ah a tuahmi, a duhmi, le aa tinhmi ka theih le hngalh tawk vun tial i, cucun amah upatnak pek ka duh. Mirang holh ka hlan pah lai i, Mirang cun Rev. Dr. Sang Awr nih hi vawlei a nunnak ah hmuh khawhmi P-9 in vun langhter ka duh.

Parent: Hringtu pa a si. A fale caah zohchunh tlak in a nungmi le a fale kha tha tein a cawnpiaktu a si. Tuanvo a lakmi a tampi ko nain, chungkhar caah caan a pek khawh peng. Chungkhar hi zaan inn ah a um caan paoh ah, pumhnak a tuahpi hna i, cu ahcun Baibal hi chungkhar dihlak in an rel ti tawn. Aa changchang in rel a si i, zapi nih Baibal hi rel dih a si. Kawlram ah an um nain a fale nih Baibal hi Laiholh in tha tein an rel khawh. Zaan pumhnak an tuah ah voi tam nawn ka tel ve. Atu tiang kan i kulh hna i, Baibal kan rel hna kha ka mitthlam ah a cuang peng.

July 2010 a chuah ni ah an chungkhar in an i chawnh lio

Lily chuah ni (Feb 7, 2010) ah

Pastor: Khrihfabu tukhal rian a tuantu a si. Baibal sianginn zong ah Pastor riantuannak le pastor nih zei tin dah mizapi kha hruai hna awk an si timi a cawnpiaktu a si. A cawnpiak lawng si loin amah hrim nih, a cawnpiakmi cu a nunpi. Amah bantuk si cio usih tihi duh ciomi a si. An kan chimh lengmang i, kanmah zong nih kan mit in kan hmuhmi cu, mi min a theih tuk hna. Aho paoh panh tein a chawnh hna. Khrihfabu lawng si loin a kuttang pastor zong tha tein a hruai kho tu a si. LBC i a tuan liomi Pastor Helly Ca Hnem hi aa daw ngaimi kan si i, LBC ah pastor a tuan ka ah, nai hrawng zei dah biapi in nan tuah tiah ka hal i, ka pa Sangpui pa nih LBC chungtel min a kan ciahpi lio a si. Atu hi mi ka vun thei deuh ngaingai cang, a ti. Mi min theih le i cinken hi nuhrin thluak that lawng a rak si lo, mi kha an sining theihpiak duhnak thinlung ruangah a rak si.

Preacher: Khrih thawngtha bia aupitu a si. Pastor a si pinah thawngtha chimtu a si. A thawngtha chim ngaih a nuam. Mi tampi nih thazaang kan i lak cio. A thawngtha chimmi tampi lakah, mitsur theology kan ti lai kong a rak chim i, cu ko nih cun thazaang a ka pek tuk. Mitsur cu hmunhma kipah cin khawh a si i, a thei a tlai kho. Cu bantuk in Khrihfami zong khoika hmun hmanh ah mitsur bantuk in thei tha a tlaimi kan si awk a si, tiah a rak chim. Cu a chimmi cu nihin ah sullam a ngei chin in ka thei. Laimi nih ramkip kan phanhnak ah, kan phanhnak kip ah, thei tha kan tlai ding a si zia kha a kan cawnpiakmi cu a si.
Singapore 2008

Professor: Baibal sianginn ah cawnpiaktu a si. M.Div. ka kai a donghnak kum ah, nikhat cu ka hawipa hmai panh nawn in, a kaimi class in a rak tin. Ziah ka panh tuk na thei maw, tiah a ka hal. Ka leh manh hlan ah, amah nih, kum thum chung i, ka cawnmi vialte nakin, nihin suimilam pahnih chung ka cawnmi hi kaa lunghmuih deuh, tiah a ka ti. Aho class dah na lak tiah, ka hal i, Saya Sang Awr class a si i, a kan chimhmi a tha tuk, kaa lunghmuih tuk, tiah a ti. Anih nih a chimmi cu Pastoral Theology chimtu a si. Kawlram ahcun pastoral lei ahcun a thiam bik tiah timi professor a si.

Prolific writer: Ca tampi a tialtu a si. Laimi catialtu lakah catial bik a si lai tiah ka ruah. A tialmi cauk le capar hi an tam ngaingai. A dang kong ceih zong ah thanuam ngai in a ceih nain, catial kong a ceih ahhin a nuam khunmi ka lawhter. Siangpapore sizung a kai lio, phone in ka chawnh zongah catial kong kan ceih. Laimi nih cauk thatha ngei usih tihi a saduhthah nganpi a si. Cucaah “Laimi Khrihfa Catialtu Phu” zong amah hruainak in thawk a si. Keimah zong chungtel si dingin a ka sawm ve i, LKCP chungtel ka si ve. A tanglei hmanthlak hi LKCP nih Baibal hrilhfiah a voikhatnak a chuahmi Marka Hrilhfiah Cauk (Rev. Dr. J. Mang Hup tialmi) Pathian sin apnak tuah ni ah thlakmi a si. A damlo hnu a si nain, Laimi nih ngei kho usih tiah a rak duh tukmi cauk uk khatnak a chuah tikah, aa lawmh tuk hi, a mit hmai ah fiang tuk in a lang, amah a chimmi pinah.

(LKCP nih Marka Hrilhfiah Cauk Pekchanhnak tuah ni ah bia a chim lio)

Principal: Sianginn uktu zong a si. MIT (Myanmar Institute of Theology) ah cachimtu lawng si loin Vice-Principal zong aa dinh hlan chung a tuan. Amah tuan lio ah MIT ah thil tampi a thacho ter. MIT i Diamond Jubilee Building le a dangdang zong amah nih biatak tein a cawlcangh caah a si. MIT Staff meeting kan tuah i, amah nih a hruai caan ahcun, kan biaceih hi hma a kal tuk, tuan te ah kan dih kho. Meeting hruai a thiam i, uknak (administration) lei zong a thiammi a si.

President: Hruainak bu tampi ah lutlai rian a tuantu a si. I hruainak bu tampi ah hruaitu a si. Laimi nih tuahmi i hruaitu a lu bik a sinak cu kan chim lai lo. Kawlram pumpi huap in, a tuanmi le a tuahmi hi a tam ngaingai. MBC ah President a tuan. MCC i Theological Department zong ah President a tuan. Committee tete i chairman a tuanmi hi cu amah a chungle hmanh nih an thei dih lai lo dah.

Politician: Ramrian a tuantu a si. Biaknak lei ah aa mer hlan ah, ramrian tuannak ah a rak i biaktak ngai ti cu, an kan chimh tawnmi a si. Thong zong a rak tla. Biaknak lei ah aa mer hnuah cun ramrian tuannak ah aa tel ti lo tiah an ti tawn nain, cucu a hman lo. Ramrian hi thih tiang a tuan. Kan ram thanchonak rian tampi ah aa tel. Biaknak lei kong lawng siloin vawlei lei ramkhel riantuannak kong zong ah ca a tial i, ruahnak tampi a chuahtu a si.

Patriarch: Laimi i kan pa a si. Laimi ah kum khua lai i pale tampi kan ngei ko hna. Nain amah bantuk cu an tlawm ti cu zapi hngalh a si ko. Judahmi nih Abraham, Isaak le Jacob cu kan pale (our patriarchs) tiah an ti hna. Cucu anmah hringsortu an si caah a si bik. A cheu Khrihfabu nih an hruaitu hmasa hna kha patriarch an ti ve hna. Atu sianginn ka kainak hi Lutheran Seminary a si i, kan sianginn luhnak kutka pawngah Henry Muhlenberg i a milem kha an phun. Muhlenberg cu biaknak ah a rak hruaitu hna, an pa a si caah a si. Hmailei ah Laimi tuanbia kan chim tikah, kan pale kan timi hna kong kan chim tikah, Rev. Dr. Sang Awr timi cu a um peng lai. Zei cah tiah, Laimi kan pa pei a si cu. Lai miphun a kan dawtu, Khrihfa saltha pei a si cu!

A cunglei ka langhtermi P-9 pinah chap a duhmi nan um len lai tiah ka ruah. A sau tuk sual lai tiah a tawinak in ka tialmi a si. Kan pa a nunnak cu duh a nung. I cawn awk tampi a um. Khrih rian kha thih tiang zumhawk tlak tein a tuantu Khrihfa tha a si. Nihin amah upatnak le philhlonak kan tuah ni ah, zei tluk in dah Pathian le midang caah kan nun khawh lai, tihi kan i hal cio awk ah a thami biahalnak a si. Kan pa kan dawt i, kan upat bantuk in, saduh a rak kan thahpi mi le a rak kan chimhmi kha philhlo tein tlamtlinh i zuam hna usih.

Thomas Cung Bik
Philadelphia

Thau Khrismas (Yangon 2007)

Pu Tuan Hmung he (Malaysia 2008)


Ukte le Lily he webcam in an i chawnh lio (2009)

Nancy nu le pa he

Lily he

Ukte he


Chungkhar aiawh in biachimnak: Pu Ram Lian Sang (Sangpui)
Bibik nih ka pa caah Memorial service kan tuah lai tiah thawng a van thanh, pumpak cun ka lawm. Ka pa hi Thau mi nih zeiruang ahdah an dawt tuk hnga? Ka pa le kan in chungkhar a kan dawtu khua mi hna kong hi ka ruat. Ka pa nih Thau khua mi caah thil a tuahmi ka ruah tik ah amah nih Thau khua a dawt nak in khua mi nih nan dawt deuh tiah ka hmuh. Kai lawm tuk, cun a sullam kawl khawh zong ka zuam. Ka hmuh ning cu hi tin a si.

Kan hngakchiat lio tein Thau khuami kan simi hi hawihlei in i uar ding phun khin ka pa nih a rak kan cawnpiak lengmang. Cun amah lila nih Thau khuami a si mi hi ai uar tuk. Phundang chim ahcun Thau khua mi si hi “hawi hlei in phun sang le uanthlar ding” khin ai hmuh. Cucu a thin lungput a si. Nain a fa le nih ka pa ai uanthlar mi a khua cungah ttanpinak le tuahsernak in kan langhter kho bel lo. Kan khua a si ti pin khi zei hmanh tuahsernak le ttannak kan ngei kho bel loh. Nain ka pa nih ai uarmi hi uarphu a si. Zei ca tiah Thau khua mi cu ka pa ruahnak bantuk lawng te a ngeimi nan si ti hi kai fiang. Ka pa thin lungput zong hi Thau mi nih nan rak ronhmi a si. Amah thil tuah khawh nak a si loh. Hi nunphung hi Thau khua mi nih an rak ngeihmi a si ruangah an rak dawtnak a si tiin ka ruah.

Kanmah unau zong nih ka pa nan kan dawt piak nak le nan ttanpinak hi a cham cun kan in cham kho hna la lo. Mah bantuk in kan khua le kan chuahkehnak a tthanh mi khua mi sinah ai tel kho mi le, hi nungphung a philh lo mi si, cun ka pa a ttanh bangin a tanh kho mi kan si khawh nak hi kan i zuam la, thla zong rak kan campi ve rih ko uh, tiah kan sawm hna, kan i lawm tuk.

Nan dawtmi
Sangpui te unau rual

Chungkhar caah thlacamnak: Rev. Dr. C. Duh Kam
A kan dawtu kan Pathian bawipa,
A kan dawtu le kan dawtmi kan u/pa Rev. Dr. Sang Awr nih mual a kan liam taak ruangah kan ngaih a chia. Kan mitthli a tlak lio caan a si. Amah philh lonak caah atu bantuk in nangmah min thangtthatnak caan zong na kan pek. Kan ngaihchiat lio caan zong ah Bawipa, nang nih cun na kan dawt. Na kan umpi. Na kan hnemh caah na sin ah lawmhnak chim lo in kan um kho lo. Harnak le ngaihchiatnak kan ton mi thil hna hi Bawipa, na sin ah kan i pumpek khawh nak caah hmang ko. Na lianhngannak caah hmang ko. Na salpa a nunnak cu mi tampi nih nangmah ceunak kan hmuh chin khawh nak caah hmang ko. Minung sinak in a har tuk in kan ruah mi ngaihchiatnak cu kan tei khawh nak lai, hnangam lungdaihnak kan pe ko.
A bik in, a taantaak mi Sangpui nu le a fa le caah thla kan cam. Bawipa, na fapa temtuarnak hi vanchiat bik in kan rak ruat nain, a temtuarnak a sau deuh tikah, nangmah thawng in hnemtu le dawtu tampi mui a lang ve. Hi vialte hawikom dawt hna hmang in na hnemh ko hna ti kan hmuh tikah kan hna a ngam cio. Thihnak le ngaihchiatnak an mitthli cu nang nih hnawhpiak ko hna. Ngaihchiatnak cu hnu ah chit in hmai lei ah nangmah lawmhnak le hnangamnak an co khawh nak lai, thluachuahnak he lam hruai ko hna. Lu nun ngandamnak phaw ko sawh hna. Khamhtu Khrih min in thla kan cam. Amen!
Rev. Dr. Sang Awr nih bia a rak chimmi: LCF, Siangpore nih a biachim lio Youtube ah an kan chiahpiaktu Pu Ro Thawng cungah, kan i lawm. 2008 le 2009 ah a chimmi hi, kan rak zoh le ngaih cangmi a si ko lai nain, ngai than hna usih:


Kan zapi ZBC 186 “Kan Pupa Zumhnak” timi kan sa lai i, a dih in Rev. Dr. C. Duh Kam thluachuah peknak in kan caan kan donghter lai.

Kan Pupa Zumhnak
Kan pupa zumhnak a nungmi
Mei le nam zong hrawh khawh lomi
Hi bia sunglawi kan theih tikah
Kan lung cu lawmhnak in a khat
Kan pupa zumhnak thiang Bawipa
Kan hmun ko lai kan thih tiang in

Kan pupa bang in kan tuan lai
Mi vialte nang ca tei awk ah
Pathian pekmi biatak thawngin
Mi zakip nih an luat cang lai.
Kan pupa zumhnak thiang Bawipa
Kan hmun ko lai kan thih tiang in.

Kan pupa hna zumhnak bang in
Hawikawm le ral kan dawt hna lai
Kan thanter lai dawtnak thawng cu
Kan hmurka le kan ziaza in
Kan pupa zumhnak thiang Bawipa
Kan hmun ko lai kan thih tiang in.

Thluachuah peknak: Rev. Dr. C. Duh Kam
Kan pa Pathian dawtnak, kan Bawipa Jesuh Khrih vel le zangfahnak le Thiang Thlarau umpi hnemhnak le daihnak cu ngaihchiatnak a tuarmi Sangpui nu le a fa le dihlak le chungkhat vialte, khuami le hawikom nan dihlak cung ah tlung ko seh! Amen.