Kan khamhnak caah Vancungmi hna cawlcanghnak

December 25, 2007

Khrismas Lawmhnak le Daihnak Nan cungah um ko seh!

Kan Bawipa Jesuh Khrih chuah camtuak dam tein a kan phakter tu Pathian kan thangthat.

Thlacam hna usih: Fapa ngeihchun pek tiangin a kan dawtu Pathian, na cungah kan i lawm. Na chuah camtuak kan hmannak ah, kan umpi rih law, kan thinlung chungah hung chuak ko. Kan sinah a zungzal in a ummi Pathian na si nak, harnak kan ton tikah a kan chuah tawn tu na si nak, ka herhmi a kan pe i, lam a kan hruai zungzal tu na si nak kha a thar in kan hngalhter than ko. Tukum Khrismas kan hmanmi hi sullam a ngeimi le na sinah do tlami a si nakhnga pumpak pakhat cio kan umpi law, kan thinlung dihlak in nangmah kan in lawmh khawh nakhnga, na thiang thlarau in kan umpi ko. Nihin kan i hrawmtti dingmi thawngtha zong pumpak pakhat cio kan caah thazaang petu hun si ter ko. Hmailei zong ah atu bantuk in nangmah an thangthat kho lengmangtu kan sinak lai zong lam kan hruai ko sawh tiah, Jesuh Khrih min in thla kan cam.

Kan khamhnak caah Vancungmi hna cawlcanghnak

Bible reading: Matthew 1:20-21
Hi kong a ruah lengmang lio ahkhan, a mang ah Bawipa vancungmi pakhat a sinah a lang i, “David tefa Joseph, Mari hi na nupi ca i lak awk ah ttih hlah. Zeicatiah fa a pawi mi hi Thiang Thlarau thawng in a si. Fapa a hrin lai i a min ah Jesuh na sak lai – zeicatiah a mi kha an sualnak chung in a khamh hna lai,” tiah a ti.

Vanmi kong:
Vanmi cu Pathian nih a sermi hna an si. Van le vawlei chung um mi thil zeizong vialte a ser hna ahhin a ser hna tiin ruah a si. Minung ser hlan deuh ah ser dawh an si. A bible cang ngai cu a um lo nain. Pathian thilserning in cu minung nak in vanmi an sang deuh. Ps. 8:5.

Nain, Khrih khamhnak a cotu, hrintthan mi hna cu vancungmi nak in kan sang deuh. Pawl nih cun “vancung mi khi kanmah nih an bia kan ceih te hna lai ti hi nan hngal lo dahra” tiah a ti (I Kor. 6:3).

Vancungmi a tlau mi cu Sehtan kha a si. Eve le Adam a tukforhtu kha. Genesis 1:1 ah Pathian nih van le vawlei kha a ser hna tiah a ttial. Pathian thilsernak a dih in vanmi hi an tlu ttheu lai tiah Bible thiamsang cheu khat nih an ruah. A ruang cu, Genesis 1:2 ah hin “vawlei cu mui zong a ngei lo, pungsan zong a ngei lo. Rilipi cu muihnak nih a khuh i ti cung ahcun thlipi a hrang” a ti caah a si. Pathian thilser cang mi muisam a ngei lo ti cu Sehtan rianttuannak a si hnga maw an tinak a si. A fiang mi cu minung hi Adam le Eve a tukforhtu Sehtan nih a kan tukforh peng i Pathian muisam in ser kan sinak zong hi a rawk lengmang. Duh ning paoh in kan nunnak hi kan hman tawn.

Hi bantuk in sermi thil vialte le minung hna ser tthan ding ah Khrih cu Bethlehem caw inn ah nihin a chuak tthan. “Khrih cu hmuh khawh lo mi Pathian mui a si. Khrih cu Pathian fater, sermi thil vialte hna nak in a cungnung deuh mi a si. Pathian nih Khrih thawng cun van le vawlei i a ummi thil vilate kha a ser hna, hmuh khawh lo mi thil si hna seh, hmuh khawh mi thil si hna seh, amah thawng cun a ser hna; cun nawlngeitu thlarau hna le uknak thlarau hna le tthawnnak thlarau hna zong kha amah thawng cun a ser hna. Pathian nih van le vawlei hi a dihlak in Khrih thawng cu na ser hna i Khrih caah cun a ser hna (Kolose 1:15-16)

Jesuh Khrih a chuahnak kan zoh tikah vancungmi hna an cawicangh ning hmuh khawh a si.
1. A chuahnak kong kha an chim.
2. Joseph sin ah a lang i, tho law, ngakchia le a nu kha i kalpi hna law Izip ram ah va zam u a ti.
3. Herod a thih tik ah Joseph sin ah a lang tthan i “tho law, ngakchia le a nu kha Israel ram ah hun kirpi tthan cang hna, zeicatiah ngakchia thah a tiim mi kha an ti cang,” tiah a ti.
4. Bawipa vancung mi cu tukhal hna sin ah a lang. “Nan thin phang hlah u, nan sin i ka ratnak cu nan caah thawngttha he a si, cu thawngttha nih cun mi vialte sinah lunglawmhnak a tlun ter lai. Tu zan hrimhrim ahhin David khua ah nan Khamhtu cu a chuak cang – Khrih Bawipa cu! Cun hihi nan caah hmelchunhnak cu a si lai; ngakchia te pakhat kha puan in an zual i cawrawl einak kuang chung ah an thlim kha va hmuh lai,” tiah a ti (Luka 2:8-12)
5. Cu cangka cun vancung ralkap bu nganpi cu vancungmi sinah khan an rung lang i Pathian kha hla in an thangtthat; A sangbik van ahkhin Pathian cu thangtthat si ko seh, Cun a dawt mi hna umnak vawlei ah hin remnak um ko seh,” tiah an ti (Luka 2:13-14).

Vancungmi nih Jesuh Khrih in khamh kan sinak ding cu an chim. Khrih Jesuh kong kha an chim. Kan khamhnak kong kan chim lengmang mi hi zeitluk in dah kan fian ti hi ruah tthan kan hau.

Vancungmi kong hi Biakam Hlun le Thar ah voitam ngai an chim. Jesuh Khrih zong nih a rak chim ve.

Tuu tlau bianabi a chim tikah “Hi ngakchia tete hi pakhat hmanh zomhtaih hna hlah u. Annih a vengtu hna an vancungmi kha vancung khua ah ka Pa hmaika ah an um zungzal ko. Mi Fapa cu a tlaumi khamh awk ah ka ra” tiah a ti (Matthew 18:10).

A rat tthannak ding kong a chim tikah “cu ni le caan cu ahohmanh nih an hngal lo, vancung i a um mi vancungmi zong nih a hngal lo, Fapa zong nih a hngal lo. Pa lawnglawng nih a hngalh” tiah a ti (Mark 13:32).

“Mi pakhat nih vawlei hi a ningpi in co sehlaw, a nunnak sung ttung sehlaw zeital a miak hnga maw” Miak hlah. Cu a nunnak cu zeital in a caw tthan kho hnga maw, caw tthan kho hlah. A tu chan, Pathian zeiah a rel lo mi chan ttha lo a si mi chan ah hin, keimah le ka cawnpiaknak a ka zahpi mi cu, Mi Fapa hi ka Pa sunparnak in vancung mithiang mi hna he ka rat tikah ka zahpi ve hna lai” a ti (Mark 8:36-38).

“Mi Fapa nih hin vancungmi kha a thlah hna lai i, a Pennak chung i tthatlonak a tuahtu vialte hna le mi a sualtertu vialte hna kha an pumh hna lai i meiphu chungah an paih hna lai, cu ka ahcun an ttap lai I an hacang an rial lai. Cun Pathian mi hna cu Pa Pennak chungah ni bang in an ceu lai. Cucaah hna nan ngeih ahcun, thei ko u,” tiah a ti (Mattheu 13:41-43). 26:53.

Vancungmi hna cu Pathian nih a hmanmi hna a biaphurtu an si. Kannih Bawi Khrih zumtu hna zong “Vancung rammi kan si” tiah Paul nih a ti (Filipi 3:20). Pathiang thawngttha chim ding ah fialmi kan si ve.

Cu caah nihin ah a chuak mi Bawi Khrih nih kanmah hi a vancungmi hna can ai ah a rianttuantu ding ah fial mi kan si. Vawlei ah a ratnak cu kanmah kha rian fial ding ah a ra a si. Vancungmi hna nih Khrih kong cu manh lo ngai in an chim bantuk in kannih zong nih Khrih kong cu khawika kan umnak paoh ah chim cio hna usih. Pathian rian ttuan cio hna usih. I pumpe deuh hna usih. Christmas lawmhnak nan cungah um ko seh!

Van Bawi Lian pa