Wednesday, July 15, 2009

Authawng Kan Thei Cio Maw?

September 21, 2008

Thaizing zei kan lawh lai, aho hmanh nih kan thei lo, kan chim kho lo. Minung kong ahcun chim ding a harmi a tam tuk. Sihmanhsehlaw, fiang tein kan chim khawhmi cu, Pathian nih a kan dawt timi le, Amah aa bochanmi cu vawleicung ca lawngah si loin vanram tiang zong kamh kan si. Cu caah, zei kan tuah hmanh ah a biapi bikmi cu Pathian theih le tihzah buin nun kha a si.

Nihin zong ah Pathian kan thangthat ti kho than hna. Pathian dawtnak hi ruah deuhdeuh ah a thuk chin, a kau chin. Pathian sinah nunnak a kan hlanh ruangah le, thluachuahnak tampi a kan pekmi ruangah lawmhnak chim hna usih.

Thla kan cam ta hna lai: Zungzal in a nungmi kan Pathian, na dawtnak a ngan hringhran ko. Na cungah kan i lawm tuk. Nihin zong ah na thawngtha bia i ruahtinak caan sunglawi na kan pek than i kan i lawm. A hmasa bik ah kan sualnak kan ngaithiam ko. Na hmaika ah kun in thla kan cam tikah, kan cohlang law, thluachuahnak kan pe ko. Na duhnak kha fiang tein kan theih i, kan i nunpi khawh nakhnga zong thla kan cam. Nihin ah kan ram ah mautaam ruang le a dangdang ruangah eidin awk a ngei lomi tampi an um. Cu hna caah thla kan cam. Jehova Jireh, kan herhmi a kan damhpiak tawn tu, na si nak kha na phuan than dingah kan in nawl. A bikin kan khuami caah thla kan cam. Ngakchia bikin upa bik tiang nangmah nih umpi ko hna law, an herhmi thluachuahnak pe ko hna. Kanmah cio zong nangmah kut le ke can ah kan hmang ko. Khuami caah, kan miphun hawi caah, thazaang a chuah chin kho tu kan si nakhnga kan umpi law, midang caah nun duhnak thinlung kan pe than ko. Cu pin ah, khuahlun le khuathar i a ummi zong an karlak ah remnak a um i, daw tein khua an sakti khawh nakhnga na sinah thla kan cam. Nangmah nih an thinlung chungah riantuan ko. A dam lomi ca zong ah thla kan cam. Damnak pe kho tu, sibawi ngan bik na si nak kha an nunnak ah i phuang law, a rauh hlan ah ngandam tein an um khawh nakhnga thla kan cam. Kan umnak cio ah, nihin ni tiang lam na kan hruai bantuk in, hi pinlei zong ah nangmah kan in sawm i, nangmah nih lam kan hruai rih law, kan herhning cio in na thluachuahnak he kan umpi rih ko. Na kan dawt caah kan i lawm tuk. Kan Bawipa Jesuh Khrih min in thla kan cam, kan Pathian. Amen.

Nihin thawngtha a kan chimtu cu Pu Tuan Hmung (Norway) a si. Caan a kan hmanpiak khawh caah a cungah tampi kan i lawm. Amah kut ah kan caan kan pek cang lai:

Baibal relnak: Genesis 3:9-10.
Bawipa nih Kain cu, “Na nau Abel tah, khuazei ah dah a um?” tiah a hal. Kain nih cun, “Ka hngal lo. Ka nau cawngtu maw ka si awk a si?” tiah a leh. Cun Bawipa nih cun, “Zeicadah hi thil tthalo hi na tuah? Ngai hmanh! Nangmah nih na chuahmi na nau thisen nih khan vawlei in a ka auh lengmang ko.”

AU THAWNG KAN THEI CIO MAW?

1. Evi le Adam nih fapa pahnih an ngeihmi hna tuanbia kan zoh tikah, u nau ciocio nu khat, pa khat hrin an si ko nain an lungput ning le an khuaruah ning cu, van le vawlei in an i dang. Hi fapa le pahnih nih hin nihin zumtu hna kan dir hmun le, kan khuaruah ning, kan tuaktaan ning ai dan liangluang cio ning hi, fiangfai te in a langhter bik ko rua tiah ka ruah caah, tutan ah hin kan khuami vialte i hrawmtti ve hna usih law tiah kai thim ve nak a si.

2. Vawlei thluachuah cu an unau in an kawl veve i, Kain nih lothlawh lei in pawcawm kawl hawl nak ah rian faakpi in a ttuan ve. Pathian nih thluachuah a pek i, a lo chungin haanghnah haangrah phuntling a chuak, a vuiter. Sihmanhsehlaw na mit thlam in hei cuan hmanh. Nukaitlang lo pil khi hei suai law, kan cinmi thlai an zaat lio te khi hei si ter. Thawhlawm pek dingah kawm fo sausau nakin a hme deuhmi khi hei thim ve. Zil pum tthattha lak ah ai kingkuaimi hei thim rih. Anhnah kaukaumi sianglo in ai sawngkawr deuhmi va si rih seh. Pathian sinah a tthami le ai dawhmi pakhatnak thim duh lo ahcun, petu Pathian a lung a awi hnga tiah na ruat maw? Nihin ni tiang kan ttuan kan hmuh theihmi thluachuah vialte lak ah hin zeibantuk dah, a kan petu Pathian kan pek vemi a si cio. Kain nih laksawng a pekmi cungah cun Pathian a lung a awi (tling) lo.

3. Kain cu a thin a hung i a hmai a chia. Cu tikah Bawipa nih Kain cu a thawh i, “Zeicahdah na thin a hun i na hmai a chiat? Thatnak kha rak tuah law cu na merh ko hnga; sihmanhseh law tthatlonak kha na rak tuah caah, sualnak nih cun nangmah tei awkah sahrang bantukin an bawh ko. Nangmah kha uk an duh, sihmanhsehlaw nangmah nih na tei awk a si,” tiah a ti (Gen 4:6-7). Nihin ni thluachuah kan hmuhmi cio a kan thluachuahtu Pathian sinah zeitindah kan pek cio ning a si. Nangmah cu chiatserh na si cang timi aw thawng nih a kan auh hlan ah, i biatak kan herh. Thatnak tuah hi hmaipanhnak, lunglawmhnak, merhnak a si. Thatnak kha rak tuah law cu na merh ko hnga (Gen 4:7). Thatnak tuahlo hi hawikawm sinah hmai a panh kho lo, i nuamh khawh zong a si lo, do tla lo mi kan lo peng. Kan i phuhrung peng, mithmai ah ni a tlaang kho lo.

4. Abel nih a kawl hawlmi lak ah a tthabikmi cu Pathian caah a thim i a pek caah Pathian a lung a lawm. Cu zong cu tthatnak a tuah duhlomi Kain nih cun a hnahchuah tthan. Thatnak a tuah duhlo mi nih hin, tthatnak a tuahmi hna hi cawnglawmh le thangtthat timi hi a um kholo ti ding tluk in a langhning a si fawn. Soiselnak, thangchiatnak a chuahnak cu tthatnak a tuah duhlomi hna sin in a chuak duh bikmi a si fawn. Cu caah kanmah le kan si khawh tawk, kan hmuhmi tawkte, kan i chuahpimi kan thinlung le kan khuaruah khawhmi cio ah hin, tthatnak tuah hi kan i thim i kan i nunpi hi a herhtuk hringhran.

5. Pathian hi a biakam ning zulh duhlo ahcun, miphun ning tiangin sunghnak le rawhralnak a chuak tawn. Joshua le a ralkap i ral an doh lio ah khan Pathian nih bia a kamhmi hna cu, hranchaw nan la lai lo i nan fir lai lo tiah bia a kamh hna. Cu bia cu a thei ko nain Karmi fapa Akhan nih Shinar puan, sui le ngun a lak hna ruangah, an miphun ning in ral an sunghnak a si (Joshua 7:21). Hi ruangah siikmi cu Akhan si loin Joshua tu kha, Joshua zeicaahdah na bawh ko tiah mawhchiat a si. Hruaimi hna nih hin, hruaitu hna phurh a rih ning le a har ning zong hi i fian a herh ngaingai. Akhan cu a mit thit nak ruangah a nunnak tiang a liam nain, a nunnak a liam hlan i a sualnak ruangah khan minung 36 an thi. Thatnak tuahnak dingah hin, mi pakhat ruangah rawhralnak a chuak kho i, tlamtlinlonak zong a chuak kho tiah a kan hmuh sak.

6. Nihin ni ah kannih rual zong na u na nau khuazei ahdah an um tiah a kan auh ve. Kan chuah semnak kan khua kan ram nih a kan auhmi thawng hi nan thei cio maw? Joshua bantukin Thlacam in bawh sawsawh awk a si ti lo. Nan lak in pekchanhmi thil kha nan hrawh lo ahcun nan sinah ka um ti lai lo. Tho law, mizapi kha thianter hna, pekchanhmi thil nan hlawnh hna hlan tiang nan ral hna hmai ah nan dir kho lai lo, tiah a ti hna bantuk in kan khuami sin zongah a au ruangmang ve. Mah pumpak miaknak nih Pathian lung a lawmhter lo. Kain nih amah caah a ttha deuhmi poh ai chiah bantuk hna kan si sualnak hnga lo ding caah le, kan nun a kan cawnpiaktu i a can nakhnga, Pathian nih thluachuahnak kan pek piak ko seh. Amen.

Siang Siang pa
Norway

No comments:

Post a Comment