August 31, 2008
Pathian hi a tha tuk hringhran. Thau Internet Ministry kan thawk nak in kum khat kan tling cang. Tuni hi a voi 55 nak thawngtha bia kan i hrawmti kho. A hlei khun in, pehtlaihnak a tha deuh chin lengmang i, ramleng i a um lawng hmanh si loin ramchung (Kawlram) lei zong in thawngtha an kan chimh khawh i lung aa lawm khun.
Nihin cu Yangon Lai Baptist Church ah Pathian rian a tuan liomi Pastor Siang Tin Tial nih thawng tha a kan chimh lai. A hnu ahcun, Thau i a tuan liomi kan pastor zong nih an kan chimh lai. A nuam chinchin lai. Caan kan thiah tikah a rian tampi lakin caan a kan pe i thawngtha a kan chimtu Siang Siang cungah kan i lawm. Pathian nih hmailei a rian thiang a tuannak ah hmangchin ko seh. Atu cu amah sinah kan caan kan pek cang lai:
Cathiang relnak:
“Mi sifak hna an au tikah a hna aa chehmi cu, amah a au ve tikah ahohmanh nih an theih piak ve lai lo” (Phungthlukbia 21:13).
“Ka unau pakhat khat cungah, zei tluk hmanh in sifak le nauta si sehlaw, nan tuahmi thil paoh hi ka cung i nan tuah a si ko” (Matt 25:40).
“Ka u le ka nu hna, pakhat khat nih ’Zumhnak ka ngei,’ ti sehlaw, cu zumhnak cu a tuahnak nih a langhter tung lo ahcun, zei dah a thathnem? Cu zumhnak nih cun a khamh khawh lai maw? A biana ah, hnipuan a herhmi le rawl ei awk a ngei lomi nan unau an um hnga. Cu hna cu i thawh riangmang i, ’Pathian nih thluachuah in pe ko hna seh. Lumte in um u law khimte in ei u,’ ti cu, an herhmi nan pek tung hna lo ahcun zeidah a thathnem? Cu bantuk te cu zumhnak zong cu a si ve, tuahnak zeihmanh a chuah ter lo ahcun a thi mi thil a si ko” (Jeim 2:14-17).
Minung kan sinak ahhin midang nih heh tiah kan then peng hna sehlaw kan daw peng hna seh ti hi kan duh dih. Asinain kanmah leikap i zoh kan philh tawn. Kanmah vial nih va thenhpek kan siang lo i kan ui tawn. Kan thenhpek hna tik hmanh ah kan duh ti lo mi, hna a hnok i a fim a har kan timi thil tu hna khi an si tawn. Kanmah vial nih cun a tha mi kan then hna seh ti kan duh hoi. Mi nih dawt kan duh ngai tung nain kanmah nih le kan va daw kho ve hoi tung hna lo. Santlai lo deuh le sifak deuh paoh cu philh an si. U le nau chuakkhat chung hmanh ah santlai lo pa/nu nak in santlai deuh mi a kan bawm kho deuhmi nu/pa kha dawt deuh a hmangmi kan tampi. Sifak santlai lo deuh pawl cu zei an lawh le an um ve ti hmanh kan theih hna lo caan a tampi.
Ka hawinu nih a ka chimhmi bia pakhat cu: voikhat cu kan pa he kan leng le kan lennak lamka ah uico pahnih an i seh i, ui dang pawl kha a der deuh mi lei tang lo in a thawng deuhmi lei ah an tang dih i a der deuhmi uico cu an bawmh i thi deng in an seh a ti. Kan pa kha cu ngai uico cu a dermi lei tang lo in dakaw a thawngmi lei ah an tan dih khi ka ti a ti. An pa nih cun uico cu chim lo minung hmanh pei kan si cu tiah a ka leh a ti.
Ka hawinu nih a ka chimhmi bia ka ruah tikah minung hi lingtalet in kan um ko lo hme maw ti ka ruat. Mi tampi cu a der lei ah tang loin a thawngmi, thil a ti kho mi a nung kho deuh mi, a kan bawmchaan kho deuh mi lei ah kan tan caan a tampi tawn. A naih bik in santlai lo deuh unau le tufa pawl cu kan hlam hna lo caan le kan philh hna caan a tampi. Ai bawmchan kho veve lawng kan i dirpi tawn. Santlai lo mi unau hna le tufa pawl nih zeidah an herh hnga, zeidah kan bawmh khawh hna hnga ti kan ruat ti lo. Cu chinchap ah an ngeihmi chung ah kan duhmi a um ahcun kan va hal rih hna, kan va bawmh khawh hna lo hlei ah. Hihi Khrihfa nih a ngeihmi zia a si awk a si hnga maw? ruat hna usih.
Jeim 2:14-17 - hi Bible cang hi rel hna usih law, kan bawmh tung hna lo ahcun sullam ngei lo a si. A thawngthal lei kap lawng ah tan kan i timh peng cu ruahchannak ruangah a si rua ka ti. Pathian duhnak zong a si lai ka zum lo. Hmailei ah a ka bawmh khawh ve te lai, a ka pek khawh ve te lai ti ruahchannak i kan ruahmi hna lawng kan tanh hna le kan dirpi, kan dawt hna i sifak deuh le santlai lo deuh pawl vial i hmuh ter lo cu Khrihfa ziaza le Khrih lungput a si lo. Sifak nih do kan cawi kho ti lo, a rum ngei caah cun an kan cawi lo hmanh ah a um hih na herh maw kan i ti hna. Kan Bible nih cun an in cawi ahcun cawih hna ti a si ko. Sifak nih zawtfah harnak an ton caan le mi ngei deuh nih zawtfah harnak an ton caan kan zoh hna ning teh ai khat kho maw? Fak piin ruat hna usih. Khrih vailam ahcun mirum, sifak, nauta tiin thleidannak a um ti lo.
Kannih Khrihfa piangthar ai timi hna kannih teh khoika lei ah dah kan hoih, kan dir, kan tan? Kan nun i chek ta hna usih. Kan zumhnak hi kan tuahsernak ah langhter ding Jeim nih a kan fial. Cu hmanh ahcun mirum ngei sinah a ti lo, sifak santlailo tanpi tu a ngei lo mi hna sinah langhter ding le zumlo tu sinah langter ding deuh hi a kan fial. Mi tampi nih santlai lo deuh(tah., nu le pa nih thih takmi) tufa hna cu hlam kan thei hna lo. Hlam a tong ti lo mi an tampi cang. Kan hlammi hna cheukhat cu rian a kan bawm kho ding le kanmah caah san a tlai dingmi lawng hna khi an si tawn. An riangvai tuk. An ngaih a chia tuk. Ziah kan hlam hna lo e, ziah kan dirkamh hna lo e, ngaih a chia hringhran ko. Phungthlukbia 21:13 - Kan pawngkam in an au cuahmah ko, hna kan cheh kanh hna lai maw, Kan dirpi hna lai dah. Jesuh a nunnak zoh hmanh hna usih. Ho lei ah dah a dir i a tanpi tawn hna: santlailo, mizaw fak, awkhlawh, tanhtu a ngei lomi hna lei ah a tang i a cawisan hna, thazaang a pek hna, damnak a pek hna, an harnak chungin a chuah hna. Hi nun te hi ai dawh tuk mi nun a si.
Dawtmi khuami, u le nau hna, atu bantukin kan no peng lai lo. Kan thawng peng lai lo. Kan tar caan le kan thazaang a der caan a um te lai. Atu kan thawn bantukin kan thawng peng lai ti kan i chim kho lo. A der khomi le a ba khomi, si a fak khomi kan si ti ruah kan hau. Cucaah kan thawn lio ah, kan no lio ah, mi bawm kho kan si lio ah bawmh a herhmi hna le zuan hnawh a herhmi hna, cawisan a haumi hna le thazaang pek a haumi, lung a dermi hna cungah hin kan dawtnak hi kanmah le kan si khawh tawk in langhter zuam peng ko hna usih. Kan i chir lai lo. Bawmh a herh lomi hna kan va dirpi hna le bawmh kan va timh hna nak in bawmh a herh i cawisan a herhmi tu hna kan va bawmh hna le cawisan hna kha Pathian caah thil lianngan kan tuah a si. Pathian sin lawng in thil lianngan, thluachuah hmuh i tim hlah usih. Amah Pathian caah thil lianngan hi kan tuah khawh chungin tuah i zuam hmasa ding tu kan si.
Kan unau nauta bikcung i kan tuah mi hi Pathian cungah kan tuah a si (Matt 25:40) ti philh hna hlah usih. Kan tuahmi paoh zong hi a lak an si ballo. Kan tuah khawh lo bu hmanh ah pei Pathian nih thluachuah a kan pek cu. Amah sunparnak ca, amah Pathian caah thiltha, kan unau hna cungah kan tuah chinchin ahcun kan thluachuah hi a ngan chinchin ko lai. Pathian thluachuah hi hmuh kan duh cio hna. Cucaah kan unau hna aunak aw hi hna phih kanh hna hlah usih. An cungah Khrihfa dik tak kan sinak kha langhter hna usih. An cung i kan tuahmi paoh hi Pathian cungah kan tuah a si ti kan lungput ah i chia in hlam hna usih, cawisang hna usih, daw hna usih, kan bawmh khawh chungin kan thazaang um lio ah bawm hna usih. Pathian caah thil lianngan kan tuah a si. Thluachuah i ham hna usih.
Khrihfa si a nuamh khun cemnak cu pakhat le pakhat kan i bawmh, tanpi, cawisan le nun kan i hrawm hi pei a si cu.
Bawipa nih Thluachuah in pe ko hna seh!
Kai lawm.
Siang Tin Tial
YLBC, Yangon
Thlacam hna usih: Dawtu Pathian, nihin zong ah thawngtha i hrawmtinak caan na kan pek than caah kan i lawm. Na fanu hmangin kan theihmi na bia thiang hi kan zapi caah thlua kan chuah piak ko. Kan sual kan palh nak kan ngai thiam. Kan unau hna cungah zawnruahnak a ngei kho tu, nangmah duhning in a nungmi kan si naklai thazaang a thar in kan pe ko. Kawlram ah kan kaltakmi kan chungkhat, sahlawh rualchan hna caah thla kan cam. A dam lomi hna zong nih a rauh hlan ah damnak an hmuh nak lai thla kan cam. Malaysia ah a ummi khuami caah a hlei khun in, nangmah bawmhnak kan in hal. Cun, hmun kip ah kan phan cio hna. Kan umnak cio ah hlawhtlinnak kan pe cio ko. Hmailei zong atu bantuk in nangmah thangthatnak, thawngtha bia i hrawmtinak le na sinah thlacam tinak caan kan hmuh peng khawh nakhnga pumpak pakhat cio kan umpi ko sawh tiah kan Bawipa Jesuh Khrih min in thla kan cam. Amen.
Pathian hi a tha tuk hringhran. Thau Internet Ministry kan thawk nak in kum khat kan tling cang. Tuni hi a voi 55 nak thawngtha bia kan i hrawmti kho. A hlei khun in, pehtlaihnak a tha deuh chin lengmang i, ramleng i a um lawng hmanh si loin ramchung (Kawlram) lei zong in thawngtha an kan chimh khawh i lung aa lawm khun.
Nihin cu Yangon Lai Baptist Church ah Pathian rian a tuan liomi Pastor Siang Tin Tial nih thawng tha a kan chimh lai. A hnu ahcun, Thau i a tuan liomi kan pastor zong nih an kan chimh lai. A nuam chinchin lai. Caan kan thiah tikah a rian tampi lakin caan a kan pe i thawngtha a kan chimtu Siang Siang cungah kan i lawm. Pathian nih hmailei a rian thiang a tuannak ah hmangchin ko seh. Atu cu amah sinah kan caan kan pek cang lai:
Cathiang relnak:
“Mi sifak hna an au tikah a hna aa chehmi cu, amah a au ve tikah ahohmanh nih an theih piak ve lai lo” (Phungthlukbia 21:13).
“Ka unau pakhat khat cungah, zei tluk hmanh in sifak le nauta si sehlaw, nan tuahmi thil paoh hi ka cung i nan tuah a si ko” (Matt 25:40).
“Ka u le ka nu hna, pakhat khat nih ’Zumhnak ka ngei,’ ti sehlaw, cu zumhnak cu a tuahnak nih a langhter tung lo ahcun, zei dah a thathnem? Cu zumhnak nih cun a khamh khawh lai maw? A biana ah, hnipuan a herhmi le rawl ei awk a ngei lomi nan unau an um hnga. Cu hna cu i thawh riangmang i, ’Pathian nih thluachuah in pe ko hna seh. Lumte in um u law khimte in ei u,’ ti cu, an herhmi nan pek tung hna lo ahcun zeidah a thathnem? Cu bantuk te cu zumhnak zong cu a si ve, tuahnak zeihmanh a chuah ter lo ahcun a thi mi thil a si ko” (Jeim 2:14-17).
Minung kan sinak ahhin midang nih heh tiah kan then peng hna sehlaw kan daw peng hna seh ti hi kan duh dih. Asinain kanmah leikap i zoh kan philh tawn. Kanmah vial nih va thenhpek kan siang lo i kan ui tawn. Kan thenhpek hna tik hmanh ah kan duh ti lo mi, hna a hnok i a fim a har kan timi thil tu hna khi an si tawn. Kanmah vial nih cun a tha mi kan then hna seh ti kan duh hoi. Mi nih dawt kan duh ngai tung nain kanmah nih le kan va daw kho ve hoi tung hna lo. Santlai lo deuh le sifak deuh paoh cu philh an si. U le nau chuakkhat chung hmanh ah santlai lo pa/nu nak in santlai deuh mi a kan bawm kho deuhmi nu/pa kha dawt deuh a hmangmi kan tampi. Sifak santlai lo deuh pawl cu zei an lawh le an um ve ti hmanh kan theih hna lo caan a tampi.
Ka hawinu nih a ka chimhmi bia pakhat cu: voikhat cu kan pa he kan leng le kan lennak lamka ah uico pahnih an i seh i, ui dang pawl kha a der deuh mi lei tang lo in a thawng deuhmi lei ah an tang dih i a der deuhmi uico cu an bawmh i thi deng in an seh a ti. Kan pa kha cu ngai uico cu a dermi lei tang lo in dakaw a thawngmi lei ah an tan dih khi ka ti a ti. An pa nih cun uico cu chim lo minung hmanh pei kan si cu tiah a ka leh a ti.
Ka hawinu nih a ka chimhmi bia ka ruah tikah minung hi lingtalet in kan um ko lo hme maw ti ka ruat. Mi tampi cu a der lei ah tang loin a thawngmi, thil a ti kho mi a nung kho deuh mi, a kan bawmchaan kho deuh mi lei ah kan tan caan a tampi tawn. A naih bik in santlai lo deuh unau le tufa pawl cu kan hlam hna lo caan le kan philh hna caan a tampi. Ai bawmchan kho veve lawng kan i dirpi tawn. Santlai lo mi unau hna le tufa pawl nih zeidah an herh hnga, zeidah kan bawmh khawh hna hnga ti kan ruat ti lo. Cu chinchap ah an ngeihmi chung ah kan duhmi a um ahcun kan va hal rih hna, kan va bawmh khawh hna lo hlei ah. Hihi Khrihfa nih a ngeihmi zia a si awk a si hnga maw? ruat hna usih.
Jeim 2:14-17 - hi Bible cang hi rel hna usih law, kan bawmh tung hna lo ahcun sullam ngei lo a si. A thawngthal lei kap lawng ah tan kan i timh peng cu ruahchannak ruangah a si rua ka ti. Pathian duhnak zong a si lai ka zum lo. Hmailei ah a ka bawmh khawh ve te lai, a ka pek khawh ve te lai ti ruahchannak i kan ruahmi hna lawng kan tanh hna le kan dirpi, kan dawt hna i sifak deuh le santlai lo deuh pawl vial i hmuh ter lo cu Khrihfa ziaza le Khrih lungput a si lo. Sifak nih do kan cawi kho ti lo, a rum ngei caah cun an kan cawi lo hmanh ah a um hih na herh maw kan i ti hna. Kan Bible nih cun an in cawi ahcun cawih hna ti a si ko. Sifak nih zawtfah harnak an ton caan le mi ngei deuh nih zawtfah harnak an ton caan kan zoh hna ning teh ai khat kho maw? Fak piin ruat hna usih. Khrih vailam ahcun mirum, sifak, nauta tiin thleidannak a um ti lo.
Kannih Khrihfa piangthar ai timi hna kannih teh khoika lei ah dah kan hoih, kan dir, kan tan? Kan nun i chek ta hna usih. Kan zumhnak hi kan tuahsernak ah langhter ding Jeim nih a kan fial. Cu hmanh ahcun mirum ngei sinah a ti lo, sifak santlailo tanpi tu a ngei lo mi hna sinah langhter ding le zumlo tu sinah langter ding deuh hi a kan fial. Mi tampi nih santlai lo deuh(tah., nu le pa nih thih takmi) tufa hna cu hlam kan thei hna lo. Hlam a tong ti lo mi an tampi cang. Kan hlammi hna cheukhat cu rian a kan bawm kho ding le kanmah caah san a tlai dingmi lawng hna khi an si tawn. An riangvai tuk. An ngaih a chia tuk. Ziah kan hlam hna lo e, ziah kan dirkamh hna lo e, ngaih a chia hringhran ko. Phungthlukbia 21:13 - Kan pawngkam in an au cuahmah ko, hna kan cheh kanh hna lai maw, Kan dirpi hna lai dah. Jesuh a nunnak zoh hmanh hna usih. Ho lei ah dah a dir i a tanpi tawn hna: santlailo, mizaw fak, awkhlawh, tanhtu a ngei lomi hna lei ah a tang i a cawisan hna, thazaang a pek hna, damnak a pek hna, an harnak chungin a chuah hna. Hi nun te hi ai dawh tuk mi nun a si.
Dawtmi khuami, u le nau hna, atu bantukin kan no peng lai lo. Kan thawng peng lai lo. Kan tar caan le kan thazaang a der caan a um te lai. Atu kan thawn bantukin kan thawng peng lai ti kan i chim kho lo. A der khomi le a ba khomi, si a fak khomi kan si ti ruah kan hau. Cucaah kan thawn lio ah, kan no lio ah, mi bawm kho kan si lio ah bawmh a herhmi hna le zuan hnawh a herhmi hna, cawisan a haumi hna le thazaang pek a haumi, lung a dermi hna cungah hin kan dawtnak hi kanmah le kan si khawh tawk in langhter zuam peng ko hna usih. Kan i chir lai lo. Bawmh a herh lomi hna kan va dirpi hna le bawmh kan va timh hna nak in bawmh a herh i cawisan a herhmi tu hna kan va bawmh hna le cawisan hna kha Pathian caah thil lianngan kan tuah a si. Pathian sin lawng in thil lianngan, thluachuah hmuh i tim hlah usih. Amah Pathian caah thil lianngan hi kan tuah khawh chungin tuah i zuam hmasa ding tu kan si.
Kan unau nauta bikcung i kan tuah mi hi Pathian cungah kan tuah a si (Matt 25:40) ti philh hna hlah usih. Kan tuahmi paoh zong hi a lak an si ballo. Kan tuah khawh lo bu hmanh ah pei Pathian nih thluachuah a kan pek cu. Amah sunparnak ca, amah Pathian caah thiltha, kan unau hna cungah kan tuah chinchin ahcun kan thluachuah hi a ngan chinchin ko lai. Pathian thluachuah hi hmuh kan duh cio hna. Cucaah kan unau hna aunak aw hi hna phih kanh hna hlah usih. An cungah Khrihfa dik tak kan sinak kha langhter hna usih. An cung i kan tuahmi paoh hi Pathian cungah kan tuah a si ti kan lungput ah i chia in hlam hna usih, cawisang hna usih, daw hna usih, kan bawmh khawh chungin kan thazaang um lio ah bawm hna usih. Pathian caah thil lianngan kan tuah a si. Thluachuah i ham hna usih.
Khrihfa si a nuamh khun cemnak cu pakhat le pakhat kan i bawmh, tanpi, cawisan le nun kan i hrawm hi pei a si cu.
Bawipa nih Thluachuah in pe ko hna seh!
Kai lawm.
Siang Tin Tial
YLBC, Yangon
Thlacam hna usih: Dawtu Pathian, nihin zong ah thawngtha i hrawmtinak caan na kan pek than caah kan i lawm. Na fanu hmangin kan theihmi na bia thiang hi kan zapi caah thlua kan chuah piak ko. Kan sual kan palh nak kan ngai thiam. Kan unau hna cungah zawnruahnak a ngei kho tu, nangmah duhning in a nungmi kan si naklai thazaang a thar in kan pe ko. Kawlram ah kan kaltakmi kan chungkhat, sahlawh rualchan hna caah thla kan cam. A dam lomi hna zong nih a rauh hlan ah damnak an hmuh nak lai thla kan cam. Malaysia ah a ummi khuami caah a hlei khun in, nangmah bawmhnak kan in hal. Cun, hmun kip ah kan phan cio hna. Kan umnak cio ah hlawhtlinnak kan pe cio ko. Hmailei zong atu bantuk in nangmah thangthatnak, thawngtha bia i hrawmtinak le na sinah thlacam tinak caan kan hmuh peng khawh nakhnga pumpak pakhat cio kan umpi ko sawh tiah kan Bawipa Jesuh Khrih min in thla kan cam. Amen.
No comments:
Post a Comment