Tuesday, July 14, 2009

Jesuh Khrih Lungput

July 27, 2008
A VOI 50 NAK PATHIAN BIA I HRAWMTINAK

Bawipa cu a tha, a dawtnak a hmun. Nihin cu Bawipa nih a kan serpiakmi ni sunglawi tuk a si. Thau Internet Ministry kan thawk in zarh 50 nak ni a si. Jubilee zarh a si. Luatnak zarh a si. Kan i lawm. Pathian min thangthat si ko seh! Cu lawng si rih lo, kan pa Sangpui pa siseh, kan u Van Tha Bor nu siseh Pathian nih damnak a pek than hna i kan i lawm. Lawmhnak chim ahcun chim ding lawng pi a si ko. Pathian thawngin a si hi philh hin hna hlah usih.

A hlei khun in, a voi 50 nak thawngtha kan i hrawm ni ah thawngtha a kan chimtu cu kan pa Rev. Dr. Sang Awr a si caah kan i lawm khun. Pathian nih lam a hruai i, damnak a hun pekthan lawng si loin thawngtha tiang zong a kan chimh khawh caah kan i lawm. Pathian nih dam chin nak pe in nunsau nak zong chap rih ko seh, tiah ka thlacamnak ka hun langhter duh. Atu cu amah nih caan a kan hmanpiaknak a si cang lai:

JESUH KHRIH LUNGPUT
(Fil. 2:1-11)

Nihin tiang Pathian nih nundamnak a kan pek i a biathiang hna ruah tinak can tha kan ngeih khawh caah Pathian ka thangthat ko. Tutan Bibik nih tam na tial khawh lo hmanh ah tlawmte zong in thawngtha kan chim ve ko a ti i kai lawm ngai. Keimah le Van Tha Bor nu caah siaherhnak taktak he thla nan kan campiak lengmang i nihin ahcun a dam dirhmun kan phak khawh caah kan i lawm tuk i Pathian kan thangthat ko.

Hmun kip a ummi kan khuami zong nan dam cio lai ka zumh. Bawipa nih nan riantuannak le nan saduhthahnak cungah thluachuahnak in pe hna sehlaw, pawcawm kawlhawlnak lawngah si loin Bawipa sunparnak langhtertu ah lam khatkhat in in hmang cio ko hna seh. Tuchun ah Norway Thaumi tonnak an tuahnak zongah Pathian lamhruainak a um khawhnak hnga thlacampiak cio hna usih law, paamnak le harnak a tongmi khua leiah khua a sami kan unau hna ca zongah thlacampiak hna usih.

Nihin kan zapi ruah ti awk ka duhmi cu “Jesuh Khrih Lungput” kong a si. Kaa thimmi Baibal cang rel hna u sih. Filipi 2:1-11:

1 Khrih chung in nan nunnak nih khan an thawnter hna maw? A dawtnak nih khan nan hna an ngamter hna maw? Thlarau he hawikomhnak nan ngei maw? Pakhat le pakhat nan i daw in nan i zangfah maw? 2 Kan fial duhmi hna cu hihi a si: Lungthin ah i khat u, lungrual tein um u law kaa lawmhnak hi tlinter u. 3 Pakhat le pakhat i entainak le mah pumpak thangthat kawlnak kha nan lakah umter hlah u. Toidornak thinlung tu kha ngei cio u law midang nakin ka tha deuh tiah zeitikhmanh ah vaa ruat hlah u. 4 Cun midang duhning kha hmuh thiam i zuam u law nanmah duhnak lawng kha ruat hlah u. 5 Nan lungput cu Khrih nih a rak ngeihmi lungput kha si seh: Cucu hihi a si:

6 Pathian sinak kha a ngeih zungzalmi a si ko nain Pathian tluk sinak kha hranhram in cuh awk ah a rel lo; 7 Amah lungtho tein cu lam cu a hlawt dih i sal sinak tu kha aa lak; Minung bantuk ah a cang i minung mui in a lang. 8 Mi toi ah aa dor i nawlngaihnak lam kha vailam cung thihnak tiangin a zulh- vailamcung thihnak kha. 9 Hi ruangah hin cunglei a sannak bik hmun ah khin Pathian nih a cawi i, min vialte lakah min cungnung bik kha a pek. 10 Cucaah Jesuh min upatnak caah cun vancung i a ummi vialte si hna seh, vawlei i a ummi vialte nih si hna seh, vawlei tang i a ummi vialte nih si hna seh, an khuk an i bil lai i, 11 Pathian kan pa sunparnak caah cun lei vialte nih “Jesuh cu Bawi” a si, an ti lai.

Biahmaithi: 1981 CCOC riantuannak thawk dingah ZBC nih ceihmainak consultation rak tuah lioah Tlangtaar kan rak ruat i Filipi 2:11 a ummi “Jesuh cu Bawi a si” ti hi zapi hnatlaknak in kan rak fehter. Lairam ah Jesuh cu bawi bik si sehlaw minung thinlung chungah “Jesuh Khrih lungput” hi karh seh ti duhnak a rak si.

Khrihfa kan sinak ahhin a phunphun kan tuan ko lai, biakinn ah kan i pum ko lai, thawhlawm kan pek ko lai, mi harmi zong kan ti khawh tawk in kan bawmh ko hna lai, thla zong kan cam ko lai, upa rian a phunphun zong kan tuan ko lai, sihmanhsehlaw kan lungput a rak hmaan kha bia a pi tuk. Lungput dik lem loin upa rian a tuanmi tam tuk ka hmuh hna. Khrihfabu chungah ai zuam ngai ko tung i a lungput tih a nungmi tampi kan um fawn. Cucaah “Jesuh Khrih lungput” ngeih khawh hi Khrihfa kan sinak ah a biapi tuk hringhran in ka thei i tutan sermon zongah chim ka hun duhnak a si. Filipi 2:5 chungah “Nan lungput cu Khrih nih a rak ngeihmi lungput si seh” tiah Pawl nih fiangte in a tialmi kan hmuh. A hmaan ko. A si kun ah “Jesuh Khrih lungput” cu zeibantuk khi dah a si? Baibal chung lila in kan hun zoh tuah lai.

1. Mah le ma i lawnter (Kenotic Spirit):
Filipi 2:6 chungah: “Jesuh cu Pathian sinak aa ngeih zungzal mi a si ko nain Pathian tluk sinak kha aa cuh lo,” ti kan hmuh. Krik holh cun Kenotic spirit an ti i mah sinak kha lawnter, asiloah mah sinak kha kal tak tinak a si. Tahchunhnak ah mirum fa pakhat nih mirum fa ka si tinak lungthin ngei loin mi sawhsawh bantuk tein a um. Siangpahrang fapa nih a sinak kaltak in mi sawhsawh bantuk tein a um khi a si. Minung cu kan rum nawn ahcun kan bia a fai deuh tawn. Asiloah ca kan thiam ngai ahcun kan biachim ah uahnak a lang tawn. TABC ka tuan lioah Church chairman pakhat pa cu Chairman rian kha a sang tuk ah a ruah i aa uang ngai. Church chairman ka si hi mi nih an thei lai lo ti a phang. Cun nawlngeihnak a duh tuk i Church chairman si ti lo ding hi a ruat kho lo. Thimnak a um i Chairman sinak in a sung. A lung a fak tuk i bu dang ah ai thial diam. Church chairman sinak te hmanh kha lawnter kan i siang lo. Kaltak ding kha thil har tukah kan ruah ahcun Khrih lungput cu a hlat ngai rih.

Sihmanhsehlaw Jesuh cu Pathian fapa a si ko nain Pathian fapa pei ka si cu tiah porhlawtnak in a ruat bal lo. Amah lung tho tein a sinak vialte a kaltak dih i a niam bikmi sal sinak tu kha aa lak (Fil. 2:7). “Keimah” ti thinlung kha a hlawt dih. Asinain Pathian riantuannak ah “Keimah” ti a tam tuk tawn. Ka theihmi ka hawipa pakhat cu thil tha vialte hi amah nih hlah maw a tuah dih viar ti awk in a chim tawn. Amah nih cun lungtho ngai in a chim ko nain mi nih zei ah an rel lo ngai. Cun khua pakhat ah Khrihfa an sinak kum 50 Jubilee tuah an tim i ahodah a thawktu an si timi kongah an i al. Cun min tial tikah a cung cem ah aho min dah kan tial lai timi an i al fawn. An buai tuk cang i an Jubilee cauk hmanh an chuah kho phah lo. Chim duhmi cu kan sinak kaltak, lawnter, asiloah “Keimah” ti ruahnak le lungput kaltak khawh hi “Jesuh Khrih lungput” nih a kan fialmi a si.

2. Sal Sinak (Diakonostic Spirit)
Filipi 2:7 chungah “Sal sinak kha aa lak” ti kan hmuh. Sal sinak nih a chim duh tawnmi cu toidornak lungput a si. Toidornak lungthin le sal sinak cu then awk a tha lo. Toidornak lam kha a zulh i misual mi khamhnak caah vailam cung thihnak tiang a in. Cun hika zawn ah a chim duh rihmi cu midang caah riantuan piaktu ti kha a sawh duhmi a si fawn. Biadang in kan chim ahcun sal cu amah nawl in rian a tuan bal lo. A bawipa nih a fial ningin a tuan tawn. Cu bantukin Jesuh nih a ka thlahtu ka pa nawl in ka tuah a ti tawn. Jesuh cu Pathian sal a si. Mark 10:45 chung ah Jesuh nih, “Mi fapa hmanh hi rian tuanpiakmi si awkah ka rat tung lo, midang rian tuanpiaktu si awk ah le mi tampi tlanhnak ding ca i ka nunnak pek awkah pei ka rat cu” a ti hna. Cucaah Jesuh vawlei a ratnak hi midang caah a nunnak pek dingah a si.

Johan 13: 1-20 chung kan zoh tikah Jesuh nih a zultu ke a tawlpiak hna nak kan hmuh. Piter nih saya nih mah kut tangmi ke tawl cu a phung a si lo na ka tawl lai lo tiah a al. Jesuh nih na ke tawl na duh lo ahcun a ka zultu na si kho lai lo a ti. Cu ti cun pakhat hnu pakhat an ke a tawl hna. Hi baibal nih a langhter duhmi cu Pathian riantuantu hna, asiloah Khrihfa zumtu hna nih midang caah kan nunnak cheuh le hromh kha a si. Baibal cauk ningpi in kan zoh tikah midang caah pumpek nun le riantuannak lawngte hi a kan hmuhsak. Jesuh nih a nunnak hrimhrim in Pathian fialmi rian kha a dongh tiang a tuan bantukin zumtu hna nunnak zong, hi bantuk nun ve awk ah Khrih lungput nih a kan fialmi a si fawn.

3. Nawlngaihnak Lungput (Obedient Spirit):
Filipi 2:8 chungah, “Nawlngaihnak lam kha thih tiangin a zulh, vailamcung thihnak kha” ti kan hmuh. Sal sinak, toidornak le nawlngaihnak hna hi then awk tha lo in Jesuh nunnak chungah kan hmuh hna. A chim in chim sawhsawhmi si loin a nunnak in a tuahmi le aa nunpi taktakmi an si. Jesuh cu thah awk ah an tlaih zan ah khan Gethsemane dum chungah thla a cam i, “Ka pa a si khawh ahcun hi hrai in ka luatter ko, sihmanhsehlaw keimah duhmi cu si hlah seh nangmah duhmi na nawl tu si ko seh’ tiah thla a cam. Vailam cung thinak tiangin nawlngaihnak lam kha a zulh (Matt 26:36-46).

Nawlngaihnak hi santlai lo deuhmi rian ah kan chiah sual tawn. A rak si lo. Pasal rian tu a si. Moses kha pasal taktak a si nain Pathian nawl a ngaimi pa a si. Vawlei cungah mi nunnem bik a si tiah an ti phah. Piter te zan khuadei sur an chep i nga pakhat hmanh an tlaih lo lioah Jesuh nih, “A thuhnak ah hei chep u” a ti hna. Piter cu ngatlai rian in paw aa cawmmi a si caah hika zawn cu kan ngakchiat in kan theihnak hmun a si, atu pei kan rak kir cu a ti khawh ko. Sihmanhsehlaw al lo tein, “Bawipa chep ko u na kan ti ahcun kan cheh ko lai” tiah an cheh tikah nga tampi an tlaih ti kan hmuh. Nawlngaih a thathnemnak a si (Luk 5:1-11).

Saul siangpahrang a tumchuknak cu nawlngaih lonak ruangah a si. Pathian nih Amalek mi kha a dohter hna i, ral na tei tikah zeihmanh na la lai lo tiah nawl a pek. Asinain cawtum thaukha a mit a thit caah raithawinak ah ka rak phurh hna a ti. Pathian bia cu Samuel ka in a langh tikah, “Nawlngaihnak hi raithawinak in a tha deuh, Amah bia ngaih hi tu kawng thau hna nakin a tha deuh” (I Samuel 15:22) ti kan hmuh. Nawlngaihnak hi thluachuahnak a si.

Jesuh nih Pathian nawl a ngaih caah min vialte lakah min cungnung bik kha a pek. Cucaah Lei vialte nih “Jesuh cu Bawipa a si” an tinak a si.

Biatlang kawmnak:
Filipi 2:5 chungah Pawl nih “Jesuh Khrih nih a rak ngeihmi lungput cu nan lungput siseh” a timi kan hmuh bantukin a cunglei kan tialmi Jesuh lungput hna hi zumtu dihlak nih ngei cio hna seh ti kha a kan duh. Hi lungput nih cun Khrihfa tak le tak lo zong a kan fianh khawh ding a si. Cucaah kan nunnak cioah nunpi ding in zuam cio hna u sih. Amen.

Thla kan cam lai: Dawtu kan Pathian, minung menmen a simi, san tlai lo, aa hlawh lo tukmi Thaumi hi zei ruang ko ahdah na kan dawt ti kan ruah ah kan lung nih a phan kho lo. Kan i lawm tuk hringhran. Thau Internet Minstry zong thlua na kan chuahpiak i a voi 50 tlinnak zarh tiang tlamtling tein nangmah kan in thangthat ti khawh caah kan i lawm. Hmailei zong ah cat lo tein kan in thangthat khawh rih naklai lam kan hruai ko. Kan pa Sangpui pa siseh, kan u Van Tha Bor nu siseh, damnak na pek than hna i kan i lawm. Dam chinnak pe ko hna. Cun a dang a dam lomi hna, damnak an hmuh cio nak hnga zong thla kan cam. Tuzarh ah Norway ram ah tonnak le nangmah thangthat tinak a ngeimi Lami hna, a bikmi kan khuami hna, nangmah nih umpi hna in thluachuah ko hna. Lai lei ah har ngaiin khua a sami kan miphun hawi ca zong ah thla kan cam. Pumpak pakhat cio zong, cu hna caah cun nangmah kut le ke ah kan hmang ko. Malaysia ah a ummi khuami caah a hlei khun in thla kan cam. Thong chung ummi a rauh hlan ah luatnak pe hna, khuami vialte nih an i tinhning cio in, ram tha deuh ah an peh cio khawh nakhnga, cun nangmah tihzahnak he khua an sak cio khawh nakhnga nangmah nih lam hruai ko hna. Kan sual palhnak rel cawk lo kan ngai thiam. Khrih lungput a simi toidornak le nawlngaihnak a ngei ciomi kan si nakhnga kan theihmi na thawngtha bia hi kan zapi caah thlua kan chuahpiak ko sawh tiah kan Bawipa Jesuh Khrih min in thla kan cam, kan Pathian. Amen

No comments:

Post a Comment

Post a Comment