Tuesday, July 14, 2009

Jesuh Zultu Nun

June 1, 2008

Lunglawmhnak: Tuzarh caan hmannak a hram in a dongh tiang a kan hruaitu Pu Van Luai cungah lawmhnak kan chim.
Thawngthanhnak: Hmaizarh thawngthabia a kan chimtu ding cu kan pa Dr. Robert Siang Lian a si te lai.
__________
Pathian dawtnak thawng in khuakip ramkip um mi, hawidawt khuami hna thawngchia i thei hraw lo te in zarhkar khat chung Pathian nih a kut cak in an kan hruai, an kan zohkhenh ca ah Pathian amin kan thangthat i, Pathian thawngtha ai hrawm mi nan dihlak nan kut kan tlaih hna.

Bible ca rel hna usih. "Unau rual i remte in khuasak tti hi zeitluk in dah a that i, a nomh. Aaron luthlung in a khabe ah, a khabe in a angki hngawng ah a vung luangmi oliv chiti bantuk asi. Hermon tlang dap, Zion tlang cungi a tla mi bantuk asi. Zion tlang cung ah cun Bawipa nih bia a kan kam, zungzal nunnak cu" (Salm 133).

Thlacam hna usih. A kan dawtu kan biakmi kan Pathian, nang cu bochan tlak na si zia kha a lang than i, zarhkar khat chung khuami hna thawngpang chia harsatnak le buaibainak i thei hraw lo te in, kan um khawhhna ca ah kan i lawm i, na min kan in thangthat. Culawnglo, kan pa Sangpuipa le vanthabornu le mandalay ah kan nu, AThai nu, Aizawl ah Vante nu an i zohkhenh cuahmahnak ah na kutcak a lang i, dam deuh lengmang an panh hna caah kan i lawm. Khuami ttamhal nih a tlak hna, Krifa bu buaibainak tete nih a phak hna i, khuatlang i hmuh thiam lo nak tete a um. Kan Pathian Bawipa, vawlei nih nangmah an hlam a herhzia langhter tu hong si hna seh law, pakhat cio thinlung van king than law, REMDAIHNAK THAWNGTHA khuami sin ah van phuang than ko sawh! Elaiza bang hong au than ko sawh! Na thawngttha van kan hrawmh rih law, hi vawlei cung cu a hmunmi ram asi lo zia kan hngalh ter than ko sawh! Dawtu Bawipa, ramleng khuami hna eiding kho, ttuanhawl kho le, khuami bawmchan kho i thlaw na kan chuah ca ah kan i lawm! Nangmah bia le hla i chimhhrawm nak kan neih nak le, vawlei lei i chimh cawnpiaknak kan neih mi hna hi pakhat cio nih a pawm zia kan thiam i, lomhnak ah a can nak lai kan um pi. Lunglawmhnak bia chim in thla kan cam kan Pathian, Amen.

Thawngtha bia ngaihnak lei ah kan kal colh hna lai. Tutan caan a kan hmanpiak tu hi Pu Van luai Zathang asi.

Bible rel usih:-

(1) “Pathian lei ah felte le zumhawk tlak te in um ko law, na sualnak cu an ngaihthiam ko lai.Cun, Bawipa kha ttih law, tthat lo nak nih an tlun hnawh lai lo” (Phungthlukbia 16:6,7)

(2) "Amah a vailamtahnak kha a put i, aka zul lo mi cu aka zul tu asi kho lo" (Luke.14: 27)

(3) "Lungfim te in um u. Nan zumhnak ah khan fekte in dir u. Ral tha ngai in um ulaw, thazaang thawng ngai in um u. Nan tuah mi thil paoh paoh kha dawtnak in va tuah u" (1Kor. 16:13,14)

(4) "Minung nih a tha bik a tuah khawh mi cu a nun rih lio ah i LAWMH LE, ATHA BIK ATI MI KHA A TUAH KHAWH CHUNG IN TUAH KHA ASI KO" (Phungchimtu 3:12)

Nan rak rel rih ding ka duhmi cu Johan 17:22; Ephisa 6:14 ff

Kan tlangtar cu, "JESUH ZULTU NUN" ti hi asi.

Kan theih cio bang in vawlei cung hi thlarau lei cun vanchim lo, vawlei lei hmanh hin har le buaibai lei a panh chin lengmang. Atu Kawlram ah kan ruah lo tuk in Cylcone Nagris ruang ah mi thong 150 an thi cang ti asi. UNO nih hngakchia lawng hmanh thong 30 Kawlram ah an thi rih lai ati. Tuluk nih America a tla thluahmah cang, ati. A ram vennak Defence budget 70 percent in a karh, America tluk ciomau ah a chiah. Middle East le Africa ram pawl chawlehnak ah biakamnak a tuahpi hna. UNO nih vawlei cung ttam atla, ati tik ah US dollar 3 million cu man lo, loan si lo bak in Tuluk nih a thawhcolh. Olympic sunglawi ngang in dong ning law, vawlei pum nih ka bia ngai cang hna seh law, sumdawnnak tawh hi tlai tthup cang ning, ati. Nain, zankhat aram li ai hnin i, a inn le lo, sianginn le lam le sul an cim dih. Minung thong 70 reng lo an thi, an thi rih lai an ti. Amah tu bawmh a hau ko. America zong ah ttotho ruah ruang le incim hleicim ruangah minung an thi thluahmah, India bomb puak ah mi 70 reng lo an thi, Middle East ah mithi nichiar an um.

Fimnak thiamnak a sang chin lengmang. Mirum thawng an tam chin lengmang. In lo tha tha, motor vanlawng, si-ai zeikip a tha tha a tam chin lengmang. Nain tlam a tling kho hlei lo. Vawlei cu harnak in ai veng kho hlei lo. Chiat a chuak ve thluahmah i, kilkip in ttahhrum thawng a thang chin lengmang. Atu ah hin vawlei cung pumpi ah eidaih lo ram ram 30 an um cang tiah UN nih ati. Thilman hi a niam ti a um kho lo i, a sang ti lei lengmang hi asi fawn ti asi.

Iraq raldoh ruang ah America ram sumdawnnak an tla thluahmah i, an company lian lian, Bank lian lian zong an tla thluahmah. Cutik ah a hawitha bik , European Union a cawl kho ti loh. Thil man sanh le rian thumh thluahmah lawng an rian cang ko. UNO zong America zohkhenh bik mi asi ko ca ah mi har ram harsa pawl bawm in a cawl kho bik ti lo. Tha pakhat hmanh a thlah kho ti lo.

Hiti asi tik ah vawlei cung hi a har ngaingai ko!!!

Zeitinthla kan ti hna hnga? Harsatnak, remlonak buaibainak le, keimah ti nak vawlei ah a tam chin lengmang. Mi nih an fimthiamnak in mi an uk, mi cung an laam i, mi an nihsawh cang. Riantuannak hmun ah chuahvahnak hmun dangdang ah i nihsawh le i thlanglamh a tam cang. Mirum an rum chin lengmang ve i, sifak kan si a fak chin lengmang, kan ngandamnak a ttha lo chin lengmang, rian nih a tlawm, tangka a tlawm chin lengmang. Khatlei ah tangka chuahnak ding a tam, bawmh halnak a tam, cawnthiam hngalh duh le neih duh mi a tam chin lengmang ve i, kan har ngai. A buai lei le a har lei cun a va fawi lo dah. Mah pin ah i hlenrawi le, ziar ngeih, lihchim, hnahchuah ti bantuk a van tam tuk rih fawn.

Sihmanhsehlaw, ka zumh mi ka hngalh! (Hla Bu.185). Pathian lei ah felte le zumh awk tlak te i kan um ko ah cun kan sualnak ngaithiam ka si lai; vanram co tu ka si ve lai. Zeiruang ah, kannih cu Kalvary tlang ah tufa thisen in thihnak in tlanh cangmi kan si caah asi. Asina bel te in kan riantuannak ah, kan in chungkhur khar ah, kan motor cung ah, Bawi Jesuh zumtu kan sinak le, a zultu kan si hna kha philh bal hna hlah usih. A herh ah cun, raltha te in Bawi Khrih ruang ah cun kan unau hawittha, riantha le chaw-hlawn zong hlawt ngam in, thlemnak le hronak te hna zong do ngam usih. BAWIPA TU KHA LUNGKIL TE IN TTIH USIH LAW, THATLONAK NIH AN KAN TLUN HNAAWH LAI LO. Aherh bik mi cu, zungzal nunnak roco hi asi ko. Mah ding cun, hi vawlei nih hin harnak kan pe cuahmah ko hmanh seh law, lungfim te um usih, raltha ngai in um usih law, thawng ngai in um hna usih. Kan tuahmi vialte belte cu Khrihfa ziaza ttha le sunglawi bik mi Dawtnak he si zungzal ko seh. Amen.

KA ZUMH MI KA HNGALH
==================
1. Pathian nih zeica velngeihnak a ka pek ka hngal lo,
Dawtnak in zeica tlanhtlak lo, a ka tlanh ka hngal lo.
2. Zeitin khamh hmuhnak zumhnak hi a ka pek ka hngal lo,
Ka lung chungah Amah bia nih daihnak a ka pek zong.
3. Zeitin thlarau nih misual lung a thlen hi ka hngal lo,
Baibal in Jesuh kong a thanh, zumhnak lung a kan pek.
4. Zeitik ka Bawi rat lai hngal lo, zan ah maw chunceu ah,
Nelrawn ah maw kan kal tti lai, van ah dah kan ton lai.

Doh: Sihmanhsehlaw ka zumhmi ka hngalh,
Ka Pathian sin ah ka chiah mi vialte;
Khi nitiang a huhphenh khawh lai,
Cu caah ka ning zak lo.

Kai lawm.

Van Luai
12706 Flack Street
Silver Spring, MD 20906
(05-31-2008)

No comments:

Post a Comment