Wednesday, July 15, 2009

Hawikom Thabik (Best Friend)

November 23, 2008

Ni ceu dawh kan phan than. Vawleicung a si bantuk in thil a tha he, a tha lo he kan tong. Lungretheihnak kan tong. Lunglawmhnak zong kan tong. Zei bantuk dirhmun kan phanh hmanh ah Pathian he tha tein pehtlaihnak kan ngeih ahcun hna a ngam i, kan nunnak zong sullam a ngei khun. Kan thinlung i timtuah hna usih law, Pathian bia ti hna usih tiah kan sawm hna.

Nihin thawngtha a kan chimtu cu Sayama Sun Par a si. Atu bantuk in thawngtha chim dingin a kan timhlamh piak khawh caah a cungah tampi kan i lawm. Atu cu amah kut ah caan kan pek cang lai:

Bible ca kan rel lai: Mattai 11: 28-30

"Re a thei mi le thil a ritmi vialte hna, ka sinah ra tuah u; dinhnak kha kan pek hna lai. Ka seihnam kha i bei u, kei cu nunnen le toidornak lungthin a ngeimi ka si caah ka nawl hi i cawn ve u; cun dinhnak kha nan hmuh ko lai. Ka seihnam cu a bei a nuam i ka thil cu a zang" tiah a ti.

India ram Serampore Bible College i ka um lio ah kan professor pakhat nih "What is the meaning of best friend?" (Hawikom thabik timi hi zeidah a sullam a si?) tiah definition a sullam tawifiang in a kan hal cio. James Wati nih a chimmi cu "Best friend is like a mosquito net" (Hawikom thabik cu khiangthong bantuk a si) a ti i ka ruah lengmang ah hin a hmantuk in ka ruah. Fikfa a tamnak hmun ah khiangthong tang i kan ih ah cun minung kan thihnak raifanh hrik a phurtu fikfa seh kan luat. Cu bantuk in hawikom thabik nih cun a hawinu a hawipa cungah chiatnak a tlun sualnak hnga lo a huhphenh.

Tuzing tlangtar caah ka duhmi cu:

Hawikom Thabik (Best Friend)

Mi vialte nih hawikom tha ngeih kan duh cio hna i kawi le maw hna kan i tlai hna. Caan tampi cu hawikom caah thihngamh in bia kan chim hna i, kan si khawhtawk in kan i dirkamh cio hna. A cheukhat ca le bang ah cun chuahpi u le nau nak hmanh in hawi le kom he i tlaihchan deuh hi a si tawn. Kan hawikom sin ko ah hin kan thinlung hi a zalong deuh cio. Hawikom sin ah cun chim ngam lomi bia hi kan ngei cio hna lo i, kan pawpi chung bia hna hi kan i ruah cio hna i ruahnak thatha kan i cheu hna. Ka no deuh lio Thantlang i ka nu le ka pa sin ka rak um lio ah ka nu le ka pa bia nak in ka hawi le bia hi ka rak ngai deuh le ka nu nih "Hawi duh pi" arak ka ti tawn le ka pa hi merhzung in a rak um tawn. Atu belte ah hawikomh ka duh zong ah ka thirual hna an um ti loh i hawi lo in um hi a har zong ah i nek hi kai zuam. Hawikom thatnak hi chim lengmang ah cun a dong kho lai lo. Vawleicung i kan nun chung ah cun hawikom lo in nun hi a har bik le a nuam lo bik hi a si.

Amah belte te caan tampi cu vawleicung a si bantuk in le minung thinlung a sualmi a si bantuk in toidornak le ngaihthiamnak hi a dih tawn, caan khat te lung i ton lonak ruangah ka kawi ka ral ah a cang timi phungthluk bia hna nih a vun kan tlun hnawh tawn. Minung le minung kan karlak ah cun zeitluk fang in dah a hlat a naih a herh ti hi philhlo zungzal a hau. Minung le minung hawikom thabik kan si khawhnak ding ah ramri a um zungzal. Abik in a niam le a sang thleidannak ramri hi a tlau kho lomi a si zungzal.

Nihin ni ah kan Best Friend cu Pathian Thiangthlarau lawng a si. Anih cu ramri a ngei lo a sin i a rami paoh le Amah a naih pengmi paoh cu an him zungzal. Ka sin ah ra tuah uh dinhnak kha kan pek hna lai a ti tu kan Pathian sinah zingzan in kan lungretheihnak thilrit hi khupbil in kan chim lai lo maw? Zeica tiah kan Pathian cu kan caah a thabik in khua a kha khan piak khotu zeizong a kan pe kho tu a si. A kut chuak kan si. Salm 117:8-9 ahcun, minung ibochannak cun Bawipa i bochan kha a tha deuh. Bawi i bochan nakcun Pathian i bochan kha a tha deuh, a ti.

James Wati nih hawikom thabik a sullam cu khianhthong a tahchunh bantuk in kan hawikom thabik a kan huppheng kho tu taktak cu minung an si lo i kan biakmi Pathian Thiangthlarau lawng a si. Pathian Thiangthlarau nih hawikom thabik ah a kan ser venak lai thlacamnak he ka bia ka donghter.

Kai lawmtuk

Sunte
Washington DC

Thla kan cam lai: Dawtu Pathian, nihin zong ah thawngtha bia i hrawmtinak caan na kan pek than i kan i lawm. Na fanu hmangin kan theihmi na biathiang hi pumpak pakhat cio kan caah thlua kan chuah piak law, nangmah lawnglawng hi a kan huppheng khotu na si zia a thar in kan hngalhter than ko. Nangmah ah aa hngatmi, nunzia dawh in a nung i, midang zohchunh tlakmi kan siter ko. Mi sual kan si. Kan sualnak kan ngai thiam ko. Nihin ni tiang kan phu kan tawk loin na thluachuah na kan donter i kan i lawm. Fim hring tein a nunzia a thiammi kan si khawh nakhnga kan umpi. Kan ram ah kan kaltakmi kan chungkhar, sahlawh rualchan, hawikom hna caah thla kan cam. Nangmah nih zohkhenh cio ko hna. Kan khua kum 200 tlinnak tuah kan i timhmi kong zong ah nangmah kan in sawm. Kan i timhtuahnak ah thluachuah kan pe law, tlamtling te in kan tuah khawh nakhnga kan bawm ko. A dam lomi le thong chungah a ummi caah thla kan cam. An thilrit in luatnak pe ko hna. Kan nunnak hi caan tawi te hmanh aa uk kho kan um lo. Nangmah kut ah kan nunnak kan ap i, na daihnak le thluachuahnak he kan umpi rih ko sawh tiah kan Bawipa Jesuh Khrih min in thla kan cam, kan Pathian. Amen.

No comments:

Post a Comment