Wednesday, July 15, 2009

Ngaihchihnak

November 16, 2008

Caan tampi ahcun Pathian thangthatnak caan kan hmuhmi hi a sunlawi zia kan ruat tawn lo. Vawleicung hmuntam pi ah, raltuknak ruangah, eidin awk ngeih lo ruangah, le a dangdang harnak ruangah pumhnak caan a ngei kho lomi, eidin awk hmanh aa hmuh lomi tampi an um. Kannih cu atu tiang kan ei khim cu kan i hmuh rih. Pathian kan bia kho rih. Hmailei ah zei kan lawh lai ti a chim kho le a thei kho aho hmanh kan um lo. Pathian thangthat hi daithlang hrim hlah usih.

Nihin zong ah caan sunglawi tuk kan hmu than. Thinlung timhtuahnak le thlacamnak he thawngtha i hrawmti hna dingin kan sawm hna.

Thla kan cam lai: Dawtu Pathian, nihin tiang lam na kan hruai i na kan zohkhenh caah kan i lawm. Kan sualnak kan ngai thiam law, nangmah duhning in a nungmi kan si peng khawh nakhnga tukforhnak teitu kan siter ko. A dam lomi hna caah damnak kan in hal. Pumpak pakhat cio nih kan ngeihmi kan thilrit zong nangmah hmai ah kan rat pi i, nangmah nih zaanter hram ko. Nihin na fapa hmang in kan theih laimi na thawngtha bia zong pumpak cio caah thlarau thazaang thar a kan petu siter ko. Hmailei kan nunnak nangmah kut thiang chungah chanh than buin kan Bawipa Jesuh Khrih min in thla kan cam, kan Pathian. Amen.

Thau Group Sermon

Bible relnak: I ngaichih law, Thawngttha bia hi zum cang tuah (Mark 1:15)

Sermon: Ngaihchihnak (Repentance)
Kan kum upa deuh lengmang i a liam cia ka nunnak ka ruat tthan tawn. Ka tuah ding a si mi, ka tlawlhmi tampi a um ko. Ngaihchih zong ah san a tlai ti lo. A cheu cu kan kumkhua zong nih a duh ti lo. Kan thazang nih a tlinh ti lo. Zeidang nih a kan donh cang. Cu caah, kan fa nau le nih cun nan can hi ngaihchih awk um lo tein hman i zuam u tiah forh kan duh hna i hi Bible “ngaihchihnak” kong hi chim ka duh.

Jesuh nih a cawnpiak mi ngaihchihnak cu misual kan sinak in, ngaihchih i Pathian khamhnak chung ah kan luhnak ding caah a si. Ngaihchih kan hauhnak cu mi sual kan si ruangah a si.

Minung cu misual kan si. Nang le kei cu misual kan si. Kan sual ruangah biacaihnak a ing ding kan si. Thiamlo a co i sual phawt ding mi kan si. Kan no lio ah cun hi kong hi kan ruat duh lo. A tu cu nihin kan sining hi ruat usihlaw ngaihchih ding kan ngei cio maw?:
(a) Pathian thei lo in mah duh ning in a nung mi kan si maw?
(b) Pathian thei lo in vawlei chawva le sui le ngun (dollar) long a hawl mi kan si maw?
(c) Pathian nih hi tluk in vawlei cung ram ttha le nuam ah a kan chiah i thluachuah tampi a kan pek mi hi Pathian sin ah lawmhnak ngei lo in, kan hmuh mi chaw le va long ah kan i lawm sual maw?
(d) Pathian nih cheuhra cheukhat cu keimah ta a si. Minung nih Pathian cu a ramh (fir) awk a si hnga maw? Na cheuhra cheukhat in nan ka ramh. Cheuhra cheukhat cu thawhlawm inn ah rak pu u, ka hneksak tuah ngat u, Thluachuah vanluhnak cu kan thlet hnawh hna le hna lo” tiah a ti. Pathian sin ah chaw pe lo le lawmhnak chim lo in kan um sual maw?
(e) Pathian duhnak kha ruat lo in kan um maw?
(f) Pathian lam kha zul lo in zu le sa nuamhnak ah kan nunnak kan hmang tuk sual maw?
(g) Nangmah le keimah Gental mi caah cun kan chia ttha thleidannak hi kan nawlbia a si. A ttha a ti mi hi tuah ding, a chia kan ti mi hi tuah lo ding. A ttha lo mi kan hngal ko nain, kan tuah mi hi sual a si. A ttha lo kan ti mi hna kan tuah lengmang sual maw?
(h) Nu le pa, u le nau cung ah dawtnak hna kan ngei maw?
(i) Hawi le kawm cungah dawtnak le zawnruahnak kan ngei maw?
(j) Midang cungah ruahnak thinlung ttha lo hna kan ngei sual maw?

Kanmah le kanmah kha bia kan hal ding mi tampi a um. A cung hna hi kan tuah lo ahcun, ngaihchih in Bawipa sinah kal a cu cang. Ngaihchihnak can hna ngei lo in kan um sual lai ti hi phan a um ngai. Kan sualnak in i ngaihchih in Bawipa Pathian hi fuh cang usih. Vawlei cung nuamhnak, din le ei nak men ah kan can dih ter hlah usih. Kan thazang a um lio ah Bawi Khrih caah i hmang hna usih.

Jesuh Khrih nih cun minung hawi cung ah thil ttha tuah a kan fial. Khrih caah ka nung ve cang lai, tiah kan ti ahhin minung hawi caah nun asi. Minung hawi caah nun a duh mi nih mah le khua le ram dawtnak kha ngeih in ngaihchih awk um lo tein, Bawi Khrih le adawtmi minung hawi caah nung cang hna usih.

American Baptist Churches USA General Board meeting ah Baptist zungpi ah ka kai i zarhkhat dengmang ka caam. Saya Thomas Cung Bik khua kam ah a si. Ram dang ah an rianttuannak kong kha siangbawi thlah mi hna nih video a kan piah piak. Miram dang sifak mi hna caah an rianttuanmi hna ka hmuh tikah, kannih Laimi cu an bawmhmi hna nak in sifak deuh kan si. Cozah nih a kan hrem ning le harnak kan tuar mi vialte ka ruah ah ka ngaih a chia. Thaumi hna harsa tuk in kan nunmi vialte ka ruat tthan. Thaumi nih nuamhnak an tem khawh el tiang, kan khua caah rianttuan kan hau ko timi thinlung a chuak deuhdeuh. Ngaihchih awk um lo ding in.

Khrih kan dawtnak cu zapi caah san kan tlaih khawh lo hmanh ah kan khuami ca tal ah santlaih kan i zuam lai, ti hi ka ruat. Kan fa le nih ruat ve ulaw ti ka duh mi cu: Khrih caah na nunnak hmang manh lo in, nan nunnak a liam sual lai maw? Ngaihchih in Bawipa cu fuh cang tuah u. Khrih kan dawtnak cu kan minung hawi cung ah lang seh, ngaihchih awk um lo ding in khua ram caah rian ttuan hna usih.

No comments:

Post a Comment