Wednesday, July 15, 2009

Pathian Tehte

October 19, 2008

Salm catialtu nih cun, “Ka pum chung thil vialte hi nangmah ser mi an si dih; ka nu paw chung i a ka sem tertu cu nangmah na si. Hi bantuk thil thuk le khuaruahhar mi thil ruangah hin nangmah cu kan lawmh” (Salm 139:13-14) ah a ti bantuk in kannih a kan ser i, nihin ni tiang harnak kan ton zong ah tei khawhnak thazaang a kan petu, thluachuahnak kan phu tawk lo tiangin a kan petu Pathian hi i tlaih peng hna usih law, amah hi thinlung tak tein thangthat ti hna usih.

Thla kan cam hna lai: Kan nunnak a ngeitu Pathian, nihin zong ah na bia thiang i hramti kho dingin caan sunglawi na kan pek rih caah, kan i lawm. Kan sual kan palhnak kan ngaithiam law, kan sining te hin kan cohlang ko. Khoika hmun le hma i kan um hmanh ah nangmah an zumtu kan sinak hi, kan nuncan kan ziaza in a langhter khotu, na tette tha kan siter ko. Na salpa hmangin kan theih dingmi na thawngtha bia zong, pumpak pakhat cio kan caah thlaci tha, thei tampi a tlaimi ah hun can ter ko sawh. Kan lak ah a dam lomi zong an um. Damnak tuan ah hmuhter ko hna. A bikin Belly pa caah thla kan cam. Minung lei khel cun kan lung a dong ko, sihmanhsehlaw nangmah kut ah a nunnak a um ko caah, nangmah sinah a caah thla kan cam. Damnak hmu than seh ti cu kan duh hringhrang ko. Cun, kan Lairam le Kawlram ah kan kaltakmi kan chungkhar cio hna zong nangmah nih kan zohkhenh piak ko sawh hna tiah kan in nawl. Atu lio cu vawleicung ah sipuazi a tlak lio a si tikah, mi tampi thin domh in kan um. Maw Pathian, khuami hna an umnak cio ah riantuan kho dirhmun le rian ngei in an um dih nakhnga zaangfah kan in nawl. Hi vawlei ah midang bochan ding kan ngei lo, nangmah kan in bochan i nangmah nih lam kan hruai ko sawh, tiah kan Bawipa Jesuh Khrih min in thla kan cam, kan Pathian. Amen.

Nihin thawngtha bia a kan chimtu cu Pu Van Luai a si. Atu lio hi, a hnakruh kan kawl cuahmah lio a si, a hmumi nan um ahcun tuan ah hun kan thanh u    Caan kan pek tikah tlamtling tein a kan timhpiak khawh caah, a cungah tlampi lawmhnak kan ngei. Atu cu amah nih caan a hman cang lai:

Hawidawt khuami nu le pa ule nau hna,

Bawi Khrih min in pumpak pakhat cio nan kut kan tlaih hna. Pathian thawng in khuaza vanrang tang ummi, khuami hna hnangam lungdai te le, dam le lawmte i nan um cio hna zong ka zumh i, Bawi Khrih min ka thangthat.

Tutan ah kan internet phungchimnak caantlaitu nih, van kan chim ko rih, a ti tik ah, mi lung kan si lo sual hnga maw ka ti i, kai thlahrung ngai cang. Na bel in, thawngtthabia phuan cu Paul nih a caan zong ah caan lo zong ah chim zungzal ko u, a ti bang khan van au-pi cu, ka duh i, a lawmh zong kai lawm ngaingai ko.

Kan phungchim hmahruaitu ding i Pathian biathiang kai thimmi hna van rel colh ko hna usih:-

(1) LAMKALTU 1: 8 "THIANG THLARAU NAN SIN I A TLUN TIKAH CUN TTHAWNNAK IN NAN KHAT LAI I, JERUSALEM KHUA LE JUDEA RAM VIALTE LE SAMARI RAM AH LE VAWLEICUNG KHUAZAKIP AH KA TEHTE NAN SI LAI, TIAH A TI HNA."

(2) GALATI 6:17 "AHOHMANH NIH HARNAK KA PE TI HLAH U, KA PUM CUNG I A UM MI HMAPE HNA NIH HIN JESUH SAL KA SI CU A LANGHTER KO."

Mahka zawnte ahhin cun, Mizo Bible in a fiang deuh rua ka ti, zaangfahnak te in van zoh ta rih usih. "Tun achinah chuan tumahin mi tibuai tawh suh se; ka taksa ah hian Isua chhinchhiahnate ka pu si a" ti asi. A Mirang ca cun, "From henceforth let no man trouble me; for I bear in my body the marks of the Lord Jesus" (King James Version).

Tutan van i ruahtti ding i ka duhmi cu, "PATHIAN TEHTE" ti hi a si lai i, lungthli thlacamnak he rak ka bawm cio hram u, tiah ka van in nawl hna.

Bawi Jesuh vawleicung a tlawnlen chung hi kum (33) a si i, a pa Pathian rianthiang a ttuan taktak chung cu kum (3) lawng a si. Hi kum (3) a ttuan chungte ahhin ciammam te le biatak te in a ttuan ti belte cu Jesuh a thawhkeh kaa in a thih tiang a konglam ttial i, Jesuh Thawngtthabia aupitu hna, Matthai, Luka, Marka, le Johan hna cakuat hin kan hmuh khawh. Zumlomi hna kha amah zumtu ah ser ai zuam i, amah zummi Khrihfa si cangmi hna zong kha Khrihfa si a harning le, vancung pennak roco a harning kong kha fakpi in a chimh tawn hna. Kha lio kha cu Moses nawlbia le, phung le lam lar tuk lio kha a si caah nawlbia pahra tlingte i a zul khomi hna nih khan vanram an co ding ah an ruah. Sihmanhsehlaw, Bawi Jesuh nih cun, cuti lawng cun a si thlu dih lo, hi vawleicung ka rat chan zong hi, hi phung le lam hna fehter ding i ka rat lawng si lo hin, mi nih ti le thlarau in hrinthan a si lo ahcun, vanram a co lai lo, ti kha fakpi a aupi. Nain a thawngttha bia chimmi le, zumlomi hna zumhnak cu ai pai peng ko.

A hnuhnung bik ah cun, a celh ti lo; zultu pahleihnih hna lakah amah pumpak tu kha ai pe. Phung le lam lei in siseh, thlarau lei in siseh, mifel tlamtling sawisel awk um lo a si khawhnak ding in, vailamtahnak cu a in. Thihnak fakbik, ningzah ngaihchiat ttahhramnak, a tuar. Lungdam hnangam le lawmte i a pa sin kir cu um lo in, thihnak fak bik le, mitthli he a kir. Asinain, amah pumpak lei in zoh ahcun, a rian a tlinh dih. Titsa lei in zoh ahcun, phunglam nih a herhning bang in Bethlehem caw rawl-einak in Golgotha sarthlam tuallennak thlanmual tiang kha phung a zulh dih i, thlarau lei zong in amah ah pa le fapa le thlarau thianghlim thumkawmh nun a tlinh dih fawn. Cucacun titsa le thlarau nun in mi famkim, sawisel awk um lo, mi thiang, van le vawlei mi taktak a si.

Hi dirhmun roco tu si ding hin Evi ruang ah thihnak dantat si cangmi vawleimi hna cu vawlei in vanram tiang Bawi Jesuh nih a kan timhtuah, lamzulh ding hma an kan sial piak i, cu lamzulh i, Ami hna le, A Tehte kan si le, sehtan ral tei lawng si loin kan ca i vanram nuam rocotu kan si kha a kan duh piak tukmi cu a si.

Kan Bible rel hmasa mi lamkaltu 1:8 kha Bawi Jesuh a thih hnu i a zultu hna sin ah ailangh hmasa bik a si i, ai langhnak hmun cu Galili ram ah a si. Galili ram cu Israel ram in nichuah chaklei pi ah a si i, hi Bible i a chimmi Jerusalem khua, Samaria le Judea ram pawl hi cu thlanglei pi ah an um hna. Hi Galili ram ahhin kan Bawipa Jesuh Khrih cu a thih hnu ah a voikhatnak ah a zultu hna sin ah ai langh. A zultu hna cu thlarau thazaang pek hna a duh hna lawng si lo in, a ngaih zong a ngai ve hna a si lai. Bia an i ruah hna i, hmailei Israel konglam ding kha a zultu hna nih an hal.

Jesuh cu titsa mi a si lo, thlarau mi a si cang caah zultu hna sin umpeng kha ai rem ti lo; kal tak hna a zat tik ah, a zultu hna cu thlarau ti a tawih hna i, ti hin thluachuah a pek hna: THIANG THLARAU NAN CUNG I A TLUN TIKAH CUN THAWNNAK IN NAN KHAT LAI I, JERUSALEM KHUA LE JUDEA RAM VIALTE LE SAMARIA RAM AH LE VAWLEI CUNG KHUAZA RAMKIP AH KA TEHTE NAN SI LAI. Cu a bia bang cun zultu hna thlarau thawnnak an ngeih hnu cun Rome cozah ralkap ttihnung hna hmai hmanh ah ttihhunak ngei lo te in Bawi Jesuh caah thihngamh lupu in an thihdongh tiang Bawipa rianthiang an ttuan hna. Vawlei sunpar lianhngannak le, chawva rumthawn le thlemnak lungthin vialte nih PATHIAN TEHTE an sinak cu a tei kho in a phan kho ti hna lo!!! A fawi lai lo ti.

Cauk pakhat, "The Pilgrim's Progress" timi kha Rev. Chauatera timi Mizoram Baptist Pastor nih hin kum 1910 ah khan a rak leh. Cu ca-uk ah cun zumtu hna le zumlo mi hna tampi vanram an kalnak kong le, an lamthluan ah thlemnak, harnak, siktthiatnak, thil ttihnung, Pathian sawisel duhnak thil phunphun tampi an tawn ning ai ttial. Cu hna lak ah Thlem-awl timi pa le Kristian timi pa kha bia an i el peng. Thlem-awl timi pa nih Kristian timi pa cu, Pathian Pathian na timi hi sawisel cang ko, a lam le sul a har tuk, kal ti hlah usih, kir cang ko usih, ka huam ti loh kei cu, ka kir ko cang lai , a ti tawn. Abia bang Thlem-awl cu a zumhnak a der i, cirh thuk ah a pil i, a thi. Kristian pa bel a vanram dihdongh tiang a zulh, a kross lamtluan har hmanh seh law a dih donghnak ah cun van suiluchin a co kong kha kan hmuh.

Bawi Jesuh zultu hna nun a cunglei i kan chim bang khin Khrihfami hna nun cu PATHIAN TEHTE a si le a fian hi a rak herh taktak. Bawi Jesuh nih cawnpiaknak ah zumtu nun cu Cite le tlangcung mei ceu bantuk he a tahchunh tawn (Matt 5:13-16). Cite cu a alnak a dal hnuah zeitluk buh le saa thaw hmanh kha a thawtter kho ti lo i, rawl thaw lo ah a cang kho. Meiceu zong hrai in khuh a si ahcun a ceunak a lo i, Inn cu a ning pi in a mui i, um a nuam lo i, zan le bang ah cun inn santlai lo ah a siam i, umnak tlak lo ah ai cang ko. Pathian mi hna cu hi cite le, tlang cung meiceu bang hmantlak kan si le, Pathian le a mi hna mithmuh ah zohrem zohdawh, hmantlak kan si hi a rak herh hringhran ko.

Kan nu kan pa le hna nih kan hngakchiat lio khualeng kan chuah lai ah, kha, nute pate, dawhthih te in aw, zohchia lo te in dawh na va um tthut to lai, ti in, ttha tein bia an kan cah tawn.

Laimi, khuami hna atu ah cun America, Europe, Australia le Asia ram kip ah kan i pharh cang hna. Thluachuah ngaingai zong a si. Cun, hihi kan dih donghnak cio, le hi pin hlei cu khuazei kal duhnak ngeih hlei ti dawh kan si cio ti hna lo. Kan i tawn tthan hna nak ding cu Vanram khi si cang dawh a si cang ko!!! Ruah ah hin vanram a nai khun zong hin a langi, minung hawi, khuaram khat, ule nau, chungkhar khat titsa i i hmunton tthan umdawh a si ti lo ning ruah ah lung a hno ngai tawn.

Cucacun nifa kan nunnak ah i ralring peng i kan um hi a herh cang ko. Zumtu mi hna nih PATHIAN TEHTE kan si zia le Pathian thawngtthabia kengtu zumtu kan si zia hi kan inn-lo le kan riantuannak ah kan langhter khawh a hau, nawlngeih sunpar duh tuk thlemnak kan ton zawn ah PATHIAN TEHTE kan si nak philh lo khawh a hau, chaw-va duhfah hakkauhnak in thlemnak kan ton zawn ah hi PATHIAN TEHTE kan sinak hi philh lo a hau i, ngaknu tlangval lak thlemnak tthalo ton zawn le, zumlo mi hna le, mi ttihnung saral hna lak zong ah hi zumtu kan sinak PATHIAN TEHTE te hi theih peng a hau i, a herh caan ah tthawnnak zong ah hman thiam i, a herh caan ah cun, nunnem toidornak le thinfualnak zong ah hman thiam a herh taktak mi a si.

Hi bang in Lamkaltu Paul nih Khrih thawngtthabia cu thlarau le titsa rawl bik i a hman khawh tikah mah cu thawng cun, zei poah kha a ngamh lawng si lo in, a ti khawh ti kha ai thei fiang cang i, Galati khuami hna sin ca a kuat nak hna ahkhan "Tu hnu ah cun a hohmanh nih harnak ka pe ti hna hlah seh. Ka taksa ahhin Bawi Jesuh Khrih chinchiahnak ka pu cang" a ti cu. A ropui in a sunglawi tuk hringhran. Setan ral a ngamh tuk cang. Zumtu nun cu mi zei paoh nih har ti cio a si. Duhnak lei si loin, duh lo nak lei tu ah kal peng a si i, sihmanhsehlaw, Bawipa riantuan ka si, i lungsi a hau ko. Bawi Jesuh Khrih chinchiahnak pu mi, si ve hna usih

Zumtu pakhat cio nih kan aw-ka in siseh, kan muihmai, kan ziaza le kan thinlung in siseh kan thil tuahsernak ah siseh Bawi Jesuh Khrih chinchiahnak a pumi si kho ve hna usih law, zungzal dong lo vanram tiang khin PATHIAN TEHTE kengmi si peng ko hna usih.

Bawipa nih a biathiang kan i hrawmmi a thar in thlua kan chuah piak ko seh.

Kai lawm.

Van luai
12706 Flack street
Silver Spring,Maryland 20906
Ph: (301)468-0556 (R)
(240)281-5021 (C)

No comments:

Post a Comment