June 15, 2008
Exodus 20:12
“Nu le pa upat hna u, cu ti nan tuah ahcun, BAWIPA Pathian nih an pekmi hna ram ah hin saupi nan um lai.”
Efesa 6:1-4
Ngakchia hna, nan nu le nan pa bia ngai hna u, cucu Khrihfa rian a si i a hmanmi thil zong a si caah nan tuah awk a si. “Na nu le na pa upat hna,” ti hi nawlbia hmasabik a si i, “cu ti na tuah ahcun na caah a tha lai i ram chungah saupi na nung lai,” tiah chapchih mi a si. Nu le pa hna, nan fale kha an thin hung seh ti in ti hna hlah u. Khrihfa ziaza le cawnpiaknak he tu than te hna u.
Nihin cu Hringtu Pale Ni a si. Pale vialte upatnak kan in pek hna. Nan cungah kan i lawm tuk. Pathian nih nun saunak in pe ko hna seh!
Tuni cu Pale Ni a si bantuk in kan pale upat peknak ah an hmanthlak ka ngeihmi hna ka vun tar hna lai. [Hika ah hmanthlak cu ka tar ti lo]
I. Pale Ni aa thawknak
Pale Ni aa thawknak hi tawite in chim ta ka duh. Hi ni a thawktu hi Spokane, Wasthington i a ummi Sonora Smart Dodd a si an ti. A nu nih a rak thih tak hna i a fale paruk kha amah te lawngin a rak cawmkengtu a pa dawtnak kha a ruah tikah, Nule Ni caan hmannak (1909) a va kal tikah, Pale hna an kan dawtnak zong hi theihhngalhnak tuah awk a tlakmi a si ti kha a lung ah a hung pem i upa te sinah Pale Ni tuah dingin le June 5 a pa a rak chuah ni ah tuah dingin a rak chimh hna. Nain, June zarh thumnak tu kha Pale Ni ah an thim than.
II. Kum khat voikhat maw ni fatin dah?
Nitlak lei ram ahcun nulepa upat hi a um tuk lo. Cu caah, nulepa kha kum khat ah voikhat tal upat pek kha a tha tiah an tuahmi deuh a si. Nain, ni chuahlei ram, Kawlram ti bantuk ah cun, nu le pa upatnak kha kan thisa tianginn lut in kan i nunpimi a si. Cucu ni tlak lei, atu kan umnak ram, mi nih an ngei lem lo. Annih nih cun kum khat ah voikhat nulepa an upat hna; kannih nih cun ni fa tin in kan upat hna. Ni fatin le caan fatin kan upat hna. Cu caah, ni tlakleimi hna nunphung i cawn si loin ni tlakleimi nih kan nunphung an i cawn ding a si deuh. Cucu kan nunnak in kan cawmpiak hna a hau.
III. Pale Ni ah zei dah kan tuah lai?
Kan pale sinah lawmhnak bia kan chim lai. An kan dawtnak le kan caah retheih an tuarnak kan ruat lai. Cun, lam hla ah a ummi an si ahcun phone kan chawnh hna lai. A hlei in, Pathian nih nun saunak a pek hna nakhnga thla kan campiak hna lai. Zei laksawng dah kan pek hna lai ti zong ruah awk ngai a si.
Zahan ah ka pa ka hei chawnh. Kawlram ahcun Pale Ni a si cang caah. Ka pa nih a ka timi cu, “Ka fa na ka chawnh lai ti cu ka hngalh cia ko” a ka ti. Ka pa dam tein Pale Ni kan phan i kaa lawm tuk, thla kan campiak tiah ka chimh. Ka pa cu aa lawm ngai. Princeton ka um lio ah ka hawipa nih inn lei na phone chawnh a tam tuk ee a ka ti. Part-time in na tuanmi cu phone man ah pei a dih ko lai hi a ti. A si taktak. Ka hei timi cu, kan nu le kan pa le hi atu lio lawngah dakaw chawnh awk an that cu. Atu kan chawnh hna lo ahcun hmailei ah kan chawnh khawh hna lo caan a um te lai. Atu hi a caan bak a si. Kan nu le pa nih kan aw an theih tikah zei tluk in dah an i lawmh ti cu kan hngalh ciomi a si.
Nu le pa phone chawnh le thawngpang hal kan philh lo awk a si. Pale Ni asiloah Nule Ni lawngah si loin an chuah ni le a dangdang ni zong ah, a zungzal in kan upat hna awk, an kan dawtnak kan ruah i lawmhnak kan chim awk a si.
IV. Ka Pa
Ka pa min cu Pu Za Dun a si. Ka pa hi tanghra a awng lo. Ca cu a duh ngaimi a si nain, a nu le a naule tuanvo lak hna an rak hauh caah sianginn kai a rak i ngol. Cu caah, a fale hi degree hmu dih hna seh tiah fak piin saduh thahnak a rak ngei. Pathian zaangfahnak thawngin kan u nau pali in, a phung men tal cun, degree kan la dih. Tanghra hmanh awng hlah sehlaw, keimah caah cun PhD a ngahmi tluk te a si ko.
Ka pa nih kaa theih ri in voikhat hmanh a ka vel bal lo. Ka pa a thin a hun ka hmu tuk lo. Bia a ka ruah tikah ngakchia biaruah si loin upa biaruah in a ka ruah peng. Tinhmi sangpi ka ngeih nakhnga biapi thlakin a ka chimh tawn. Ca na awn tik i na mark a that ahcun bawi na tuan kho ti khi a ka chimh tawnmi cu a si. Cu nih cun thil ka tuah tikah a sangmi phanh duhnak, tuah khawh duhnak a ka ngeih ter.
Ka pa nih thla a ka campiak lengmang. Baibal sianginn ka kai lio ah CCC cazual le magazine editor ka rak tuan. Cu lio ahcun, ka catialmi le a dangdang kong ah ruahnak ka halmi le lungsau tein a ka ceihpi tu cu ka pa a si. Carel duhnak le tial duhnak hi ka pa sinin kaa lakmi a si ti ahcun ka palh lai lo.
Ka nu le ka pa cu fale caah an tinak ah thil tha hmanh an rak i cawk bal lo. An thil hi a thuatthuat in an belh tawn. A caancaan i thil ka cawkpiak hna tikah hruk loin kuang chung tu ah an i fim i an thil a hlun cangmi tu an i hruk thiam. Zei caah thil tha an i hruk thiam lo? Thil tha an rak i hruk khawh lo tikah thil puan chia i hruk nih a lem cang hna.
V. Pathian le kan pale
Pale Ni kan tuah tikah kan pale a kan petu Pathian a si kha kan philh lo awk a si. Cun, Pathian cu vawleicung mi vialte i kan pa a si. Pathian nih kan pale hi a sermi an si. Pale Ni ah Pathian zong kan lawmh awk a si.
Kan pale hi Pathian nih kanmah zohkhenhtu ah a hmanmi an si. Cu caah, Pathian aiawhtu zong an si. PTS ka kai lio ah cathluan an kan tial ter. Cu ahcun, “Na nu le na pa upat hna” timi nawlbia kong khi ka rak tial. Cu i a bikin ka tialmi cu, hi nawlbia ahhin aa then kho lomi pahnih an um i cucu Pathian upat le nulepa upat a si ka ti. Langhter kaa zuammi cu mit hmuh nulepa hmanh a upat lomi nih cun Pathian kan upat ti cu a si kho ngai hnga maw, Pathian kan dawt ti cu a si kho ngai hna maw ti khi a si. Phundang in kan chim ahcun, nulepa kan upat hna hi Pathian kan upat zong a si. Pathian a upatmi, a tihzahmi nih cun, kan nu le kan pa kan upat hna i kan tihzah hna awk a si, ti kha ka langhter.
Paul nih cun, fale hna nu le pa bia ngai uh, hihi nawlbia vialte lak ah a hmasa bik a si i cu ti nan tuah ahcun thluachuah nan hmu lai a ti. Cucu fale nih kan theih peng ding a si. A peh rihmi cu, nulepa hna nan fale kha an thin hunter hna hlah uh, Khrihfa ziaza tu kha cawn piak hna uh ti a si. Cucu Pale nih kan philh lo awk a si.
Kan pale Pathian nih thluachuah in pe ko hna seh!
Exodus 20:12
“Nu le pa upat hna u, cu ti nan tuah ahcun, BAWIPA Pathian nih an pekmi hna ram ah hin saupi nan um lai.”
Efesa 6:1-4
Ngakchia hna, nan nu le nan pa bia ngai hna u, cucu Khrihfa rian a si i a hmanmi thil zong a si caah nan tuah awk a si. “Na nu le na pa upat hna,” ti hi nawlbia hmasabik a si i, “cu ti na tuah ahcun na caah a tha lai i ram chungah saupi na nung lai,” tiah chapchih mi a si. Nu le pa hna, nan fale kha an thin hung seh ti in ti hna hlah u. Khrihfa ziaza le cawnpiaknak he tu than te hna u.
Nihin cu Hringtu Pale Ni a si. Pale vialte upatnak kan in pek hna. Nan cungah kan i lawm tuk. Pathian nih nun saunak in pe ko hna seh!
Tuni cu Pale Ni a si bantuk in kan pale upat peknak ah an hmanthlak ka ngeihmi hna ka vun tar hna lai. [Hika ah hmanthlak cu ka tar ti lo]
I. Pale Ni aa thawknak
Pale Ni aa thawknak hi tawite in chim ta ka duh. Hi ni a thawktu hi Spokane, Wasthington i a ummi Sonora Smart Dodd a si an ti. A nu nih a rak thih tak hna i a fale paruk kha amah te lawngin a rak cawmkengtu a pa dawtnak kha a ruah tikah, Nule Ni caan hmannak (1909) a va kal tikah, Pale hna an kan dawtnak zong hi theihhngalhnak tuah awk a tlakmi a si ti kha a lung ah a hung pem i upa te sinah Pale Ni tuah dingin le June 5 a pa a rak chuah ni ah tuah dingin a rak chimh hna. Nain, June zarh thumnak tu kha Pale Ni ah an thim than.
II. Kum khat voikhat maw ni fatin dah?
Nitlak lei ram ahcun nulepa upat hi a um tuk lo. Cu caah, nulepa kha kum khat ah voikhat tal upat pek kha a tha tiah an tuahmi deuh a si. Nain, ni chuahlei ram, Kawlram ti bantuk ah cun, nu le pa upatnak kha kan thisa tianginn lut in kan i nunpimi a si. Cucu ni tlak lei, atu kan umnak ram, mi nih an ngei lem lo. Annih nih cun kum khat ah voikhat nulepa an upat hna; kannih nih cun ni fa tin in kan upat hna. Ni fatin le caan fatin kan upat hna. Cu caah, ni tlakleimi hna nunphung i cawn si loin ni tlakleimi nih kan nunphung an i cawn ding a si deuh. Cucu kan nunnak in kan cawmpiak hna a hau.
III. Pale Ni ah zei dah kan tuah lai?
Kan pale sinah lawmhnak bia kan chim lai. An kan dawtnak le kan caah retheih an tuarnak kan ruat lai. Cun, lam hla ah a ummi an si ahcun phone kan chawnh hna lai. A hlei in, Pathian nih nun saunak a pek hna nakhnga thla kan campiak hna lai. Zei laksawng dah kan pek hna lai ti zong ruah awk ngai a si.
Zahan ah ka pa ka hei chawnh. Kawlram ahcun Pale Ni a si cang caah. Ka pa nih a ka timi cu, “Ka fa na ka chawnh lai ti cu ka hngalh cia ko” a ka ti. Ka pa dam tein Pale Ni kan phan i kaa lawm tuk, thla kan campiak tiah ka chimh. Ka pa cu aa lawm ngai. Princeton ka um lio ah ka hawipa nih inn lei na phone chawnh a tam tuk ee a ka ti. Part-time in na tuanmi cu phone man ah pei a dih ko lai hi a ti. A si taktak. Ka hei timi cu, kan nu le kan pa le hi atu lio lawngah dakaw chawnh awk an that cu. Atu kan chawnh hna lo ahcun hmailei ah kan chawnh khawh hna lo caan a um te lai. Atu hi a caan bak a si. Kan nu le pa nih kan aw an theih tikah zei tluk in dah an i lawmh ti cu kan hngalh ciomi a si.
Nu le pa phone chawnh le thawngpang hal kan philh lo awk a si. Pale Ni asiloah Nule Ni lawngah si loin an chuah ni le a dangdang ni zong ah, a zungzal in kan upat hna awk, an kan dawtnak kan ruah i lawmhnak kan chim awk a si.
IV. Ka Pa
Ka pa min cu Pu Za Dun a si. Ka pa hi tanghra a awng lo. Ca cu a duh ngaimi a si nain, a nu le a naule tuanvo lak hna an rak hauh caah sianginn kai a rak i ngol. Cu caah, a fale hi degree hmu dih hna seh tiah fak piin saduh thahnak a rak ngei. Pathian zaangfahnak thawngin kan u nau pali in, a phung men tal cun, degree kan la dih. Tanghra hmanh awng hlah sehlaw, keimah caah cun PhD a ngahmi tluk te a si ko.
Ka pa nih kaa theih ri in voikhat hmanh a ka vel bal lo. Ka pa a thin a hun ka hmu tuk lo. Bia a ka ruah tikah ngakchia biaruah si loin upa biaruah in a ka ruah peng. Tinhmi sangpi ka ngeih nakhnga biapi thlakin a ka chimh tawn. Ca na awn tik i na mark a that ahcun bawi na tuan kho ti khi a ka chimh tawnmi cu a si. Cu nih cun thil ka tuah tikah a sangmi phanh duhnak, tuah khawh duhnak a ka ngeih ter.
Ka pa nih thla a ka campiak lengmang. Baibal sianginn ka kai lio ah CCC cazual le magazine editor ka rak tuan. Cu lio ahcun, ka catialmi le a dangdang kong ah ruahnak ka halmi le lungsau tein a ka ceihpi tu cu ka pa a si. Carel duhnak le tial duhnak hi ka pa sinin kaa lakmi a si ti ahcun ka palh lai lo.
Ka nu le ka pa cu fale caah an tinak ah thil tha hmanh an rak i cawk bal lo. An thil hi a thuatthuat in an belh tawn. A caancaan i thil ka cawkpiak hna tikah hruk loin kuang chung tu ah an i fim i an thil a hlun cangmi tu an i hruk thiam. Zei caah thil tha an i hruk thiam lo? Thil tha an rak i hruk khawh lo tikah thil puan chia i hruk nih a lem cang hna.
V. Pathian le kan pale
Pale Ni kan tuah tikah kan pale a kan petu Pathian a si kha kan philh lo awk a si. Cun, Pathian cu vawleicung mi vialte i kan pa a si. Pathian nih kan pale hi a sermi an si. Pale Ni ah Pathian zong kan lawmh awk a si.
Kan pale hi Pathian nih kanmah zohkhenhtu ah a hmanmi an si. Cu caah, Pathian aiawhtu zong an si. PTS ka kai lio ah cathluan an kan tial ter. Cu ahcun, “Na nu le na pa upat hna” timi nawlbia kong khi ka rak tial. Cu i a bikin ka tialmi cu, hi nawlbia ahhin aa then kho lomi pahnih an um i cucu Pathian upat le nulepa upat a si ka ti. Langhter kaa zuammi cu mit hmuh nulepa hmanh a upat lomi nih cun Pathian kan upat ti cu a si kho ngai hnga maw, Pathian kan dawt ti cu a si kho ngai hna maw ti khi a si. Phundang in kan chim ahcun, nulepa kan upat hna hi Pathian kan upat zong a si. Pathian a upatmi, a tihzahmi nih cun, kan nu le kan pa kan upat hna i kan tihzah hna awk a si, ti kha ka langhter.
Paul nih cun, fale hna nu le pa bia ngai uh, hihi nawlbia vialte lak ah a hmasa bik a si i cu ti nan tuah ahcun thluachuah nan hmu lai a ti. Cucu fale nih kan theih peng ding a si. A peh rihmi cu, nulepa hna nan fale kha an thin hunter hna hlah uh, Khrihfa ziaza tu kha cawn piak hna uh ti a si. Cucu Pale nih kan philh lo awk a si.
Kan pale Pathian nih thluachuah in pe ko hna seh!
No comments:
Post a Comment