Tuesday, July 14, 2009

Jesuh Dah Ti Lo Cun

July 13, 2008

Vawleicung khuaza ramkipi a um mi khuami nu le pa ule nau hna, tuzing July thla a zarhhnihnak zarhni thiang dam le lawmte i nan phak cio zumhnak he, Bawi kri min in nan kut kan tlaih hna i, Pathian thawngtha bia avan i hrawm mi pakhat cio hna zong nan sini lomhnak bia kan van chim pin ah, nanmah thawngin Pathian zong kan thangthat chinchin ti kha bia hmaisa ah van chim ta ka duh.

Cathiang rel hna usih. "Maw ka nunnak Bawipa cu thangthat tuah. ka sining vialte a min thiang cu thangthat tuah. Ka sualnak vialte kha aka ngaihthiami, ka zawtnak vialte kha a ka damter". Kan sualnak an kan ngaithiami, damnak tluantling an kan pe tu kan Pathian Amin thiang thangthat si ko seh.

Tuzing hi kan caantlai tu BiBik (Tv. Thomas Cung Bik, PhD student) cu Taiwan krifa bu panga komhi Joint Summer Retreat 2008, an tuahnak, Desales University, Center Valley, Pensylvenia ah caan hmang ding in an sawm.Mah ah cun, "CHRISTIANITY IN MYANMAR" timi thawngtha ava chim lai ca ah keimah zongi caan van tlaihnak hi asi. BiBik thlacamnak zong in bawm usih.

Tuzing vantthat ngai ngai kan si. American kan pa, Rev. Dr. C. Duh Kam, Chin Baptist Fellowship of America (CBFA) i convener peng le, kan hnuzarh zongi Executive Minister thim thar mi nih thawngthabia an kan chimh khawh colh pinah CBFA report an kan pek khawh ve ca ah, a cung zong ah lawmhnak chimcawk lo kan nei.

Atu cu kan thinlung dihlak le thlacamnak he thawngtha lei hawi cang hna usih.

Bible: “Jesuh dah ti lo cun” (Johan 14:6)

Ruah lo piin, kan chairman Tv. Vante Zathang nih phungchim a ka fial i kaa lawm. CBFA civui cu Dallas, Texas ah cun kan tuah thawng cu na theih pah dih cang ttheu lai. Pathian thangtthat tti a nuamhning hi khuaruahhar a si. Khua dang in nungak le tlangval 300 reng lo an tlung. Dallas khuami hi 300/500 cu an i khawm kho ve. Minung 600-800 hrawng hi aa pum kho mi kan si.

Kan khuami hi Texas ah minung 40 hrawng an um. A ra kho mi hi lamhla deuh minung Pu Van Ram Thleng le Pu Van Bawi te dah ti lo cu an ra kho dih ko hna. Kei hi Civui tawlreltu chungttuan ka si caah pumpak in hawi ka chawn thiam hna lo. Leen caan kan ngei lo. Kan fa le nih nan ruahthiam ttheu lai ti ka zumh. Khua dang in civui a zawhmi kho mi khuami hna cu: Vancouver, Canada in Pu Ngun Cung Lian (Sangboih pa), Michigan in Pu Hmun Sang Uk, Indiana in Tv. Biak Hu, Kentucky in Pu Lian Bik, DC in kanmah chung le Sui Mawi, Biak Tha Hmung long kan si. Pariat long kan si. Kan hrelh sualmi hna nan um ahcun rak ka ngai thiam u. Khual 300 reng lo lakah Thaumi 8 long si cu kan sung ngai in ka ruah.

Zeicatiah, tu tan civui cu Jesuh Khrih hi kan sin ah a phuang taktak. “Jesuh dah ti lo cun” timi Thawngttha chim mi an ttha tuk.

1) Dr. Hre Kio nih cun ka chim bal lo mi ka chim ko lai, vawlei cung thil sining zoh tikah Khrih rat tthannak hi a nai ko lai, vawlei caan a dong tuan kho mi a si, nain, a caan cu hngalh khawh a si lo, ralring tein um kan hau” a ti.

2) Rev. Thawngling Mualhlun nih vawlei uknak ah ramhruaitu hna zong nih Pathian theih an hau. Jesuh Khrih in dah ti lo cun, kan ram le miphun hi kan ser kho lai lo tiah a ti.

3) Rev. Tial Lian nih Laimi hi a rawk kan awl tuk. Zeipaoh nih a kan rawk khawh. Sifahnak long nih a kan rawk lo. Ngeihnak zong nih awl tein a kan rawk khawh a ti.

4) Kei cu a donghnak zan ah phung ka chim. Kei ka sermon hi tuzarh ah kan i ruahtti ding mi sermon cu a si:

Adam le Eve hna nih sualnak ah an tluk cang ka in, kan thlarau hi hliam in a um. Kan thlarau a thi ti cu fahnak a thei ti lo mi a lo. Cu caah, kan thlarau hliam in a um kan ti ah hin, Bible kal ning deuh zong a si. Fahnak a thei peng i a ttap a hrum ai peng. A muisam lang kho ding in Profet Isaiah nih “Nan ke chik in nan luthlung tiang, khua zeihmanh ahhin damnak a um lo, hma le rung in nan khat dih” (Isaiah 1:6) tiah a ti. Hliamhma a pu mi kan thlarau hi hmahnai le thisen he a hram cuahmah ko. Hi kan thlarau dam ter awk ah Profet Isaiah nih dawhnak le rumra a ngei lo mi le iang zong a ngei lo mi Khrih an tuknak vual in kan dam tiah a ti (Isaiah 53). Cu khamhnak Thawngttha cu vawlei khua za kip phuan in a um. Kan Laimi sin zong ah Rev. Arthur le Laura Carson nih March 15, 1899 ni ah Hakha khua ah an rak phakpi.

Hakha an phak zan ah Siangbawinu Laura cu a ttap thluah mah, a pasal Arthur kha, “Kan umpi kho lai lo, kan umpi kho lai lo. Vawlei ngai he i tthen cu a si kho lo. Ka tuar kho hrim lo” tiah a ti. Siangbawipa Arthur nih cun zangfahnak thinlung he, “Hi tluk in na tuar khawh lai lo cu ka ruat lo, Hi ka hmun long hi rianttuannak ding a si lo. Na duhnak ah kan ttuan ko lai, Kawlrawn zong ah teh kan kir tthan ko lai” tiah a ti ve. An thinlung cu a pehpoih ngai. Lairam ah rianttuan ngam lo ding dirhmun ah an um.

Siangbawinu nih a chimmi cu “A thaizing ah kan thil phurtu kuli cu an ra hna i hlawh an rak hlam. Pa upa le nu upa hna cu an hlawh an hlam i an kal ko. Nain, kum 18 hrawng nungak tleirawl te cu holh kan i thei lo nain, a hni pe khat le cheu hrawng te aa fenh i a mit au te le a hawiher zoh ah duh a nung tuk. Lampi kan kal lio ah hawi ah kaa ser pah fawn i an kal lai ah hlawh a hlam pah in panh hirhiar tein a rak ka chawnh pah ahkhin ka thinlung ah Drummon nih a rak chim mi “Vawlei cung ah dawtnak hi thil sunglawi bik (liannganbik) a si ko (Love is the greatest thing in the world) ti mi kha a rak chuak. An thlarau nih a herhmi kha ka hmuh” tiah a ti.

Aho nih dah Lairam ah Khrih hi a sawm. Nanmah mino nih pei nan sawm ko cu! Lung a dong i Kawlrawn ah rianttuan aa tiim mi siangbawi nu le pa cu kum 18 a si mi Lai nute nih pei kan ram ah rianttuan ding in a sawm ko hna cu! Hi nu te hi siangbawinu nih holh thiam lo fam cu a min a thei lo. A min a ttial lo i keimah nih “Zing Biak Tha” tiah kaa sak. Lai mino nih nan sawm mi Khrih cu nan zam tak lai maw?

Khrih thawngttha cu siangbawi 7 long kan ngei nain, zumtu hmasa hna thawng in Lairam ah tlang mei kangh bantuk in a kang i Lairam cu Khrihfa Thawngttha lennak ram a si. Fing le tlang vialte hna cu Pathian biakinn thiang ah an cang dih. Zei ruang ah dah Khrih thawngttha cu kan Lairam ah a phak? Pathian nih cun a thinlung ah vawlei ser hlan in a Fapa Khrih Jesuh cu vailam ah a thah cang. Biathlam 13:8 ah cun “vawlei ser hlan thah cia Pathian Tufa” a ti. Tipilpetu Johan nih cun Khrih a hmuh tikah “Zoh hmanh u, vawlei sualnak a kalpitu Pathian Tufa” tiah a ti. Khrih nih kan sualnak vialte a thisen in a kan thian dih ter cang. Cu vawlei ser hlan ah, thahcia Tufa thawngttha nih kan Laimi zong a kan hrial kho lo. Pathian dawtnak nih a kan hrial in a kan kaltaak kho lo. Cu caah kan Lairam cu Pathian thawngttha in a khat.

Nain, kan van a chia. Kawl cozah nih Rungtlang ah a ummi Vailamtah, Lungbang khua thlang ah a ummi Vailamtah, Matupi ah a ummi Vailamtah le Vuichiptlang ah an phunmi Vailamtah hna cu meithal he an thluk dih hna.

Kawl ralkap nih meithal an puah i kan Lairam vailamtah hna an thluk lio ah, Lairam dawhtertu Lai ngaknu le tlangval thawng tampi cu ramdang ah zu thawl he an zam. Zeiruang ko ah dah hi tluk in Laimi nih zu kan din? Pastor zong nih zudin, Bible sianginn kaimi zong nih zudin, Khrihfa upa zong nih zudin. Vawlei cungah zu a ding bik mi miphun thim hna sehlaw Laimi hi a kan thim lai. Vawlei cungah nunnak ruah ah harnak a tuar ngambik mi thim hna sehlaw Laimi hi a kan thim lai tiah ka ruah.

Laimi cu mi tlawmte kan si. Million cheu long kan si caah a tu bantuk in zuding sabah in kan nun ahcun kan miphun a tlau lai. Quality ngei tein kan nun ding a si. Pathian hi kan Pathian ah a canh mi miphun kan si awk a si. Jesuh zumhnak long hi kan Laimi quality a si. Jesuh Khrih nih cun “Van le vawlei ah nawlngeihnak vialte cu pek ka si cang. Vawlei khua za kip ah va kal ulaw miphun kip kha ka zultu ah va ser hna u” tiah a kan fial. Jesuh Khrih dah ti lo cu, nawlngeitu dang an um lo. Khrih bia hi zul lo in kan um ngam lai maw? Zu nan din tikah zeitindah Khrih hmai nan khah! Khrih nih a sawm mi le rian a fial mi a zultu hna cu mino an si. Khrih nih a rianttuan ding in nihin mino hi an fial hna.

Nunnak pek in Thawngttha a kan chimtu hna hmun le ram ah kan phak tikah zu cu kan ding ko rih lai maw? Jesuh dah ti lo cu, lam dang a um lo. Jesuh Khrih nih “Kei cu lam le biatak le nunnak ka si. Keimah in dah ti lo cun, ahohmanh ka Pa sin ah an phan kho lai lo” tiah a ti. Jesuh Khrih long hi kan nunnak a si! Lam le biatak le nunnak a si.

Biadonghnak ah, Pathian Thlarau a phuan caah kan phungchimmi ngaih hi an cim hna lo. Suimilam pali hna kan i pum. Nain, mino tete nih daidap tein Thawngttha an ngai kho. Hla kan sa hna i a nuam tuk. Hi tluk in Pathian thangtthat a nuam mi ah Thaumi pariat long nih civui kan zawh mi cu kan sung tuk kan tinak a si. Tuan deuh ah khan Pathian sinah thawhlawm peknak hmun Khrihfabu ngei lo in a pikpak in a ummi kan tamtuk caah kan sung tuk ka rak ti cang kha. Khuami a um chun cu Pathian sinah i pe in Khrihfabu tein dir i zuam u. 2010 kum ah kanmah church CBMC, DC ah civui cu tuah a si lai. Khi tikah cun a nungmi Pathian hla tthattha kha Ohio Chin Baptist Church, Columbus le Cincinnati Chin Baptist Church in sa kho ve ding in khuami dihlak nih thlacam hna usih.

CBFA Civui tawlreltu ka si caah hlasak duhmi mino nih caan an ka hal tikah zeitlukindah nan sak ding mi Pathian hla ah nan nun ti kha ka hal hmasa hna. Popular nak men ah Pathian hlasak ter kha ka duh hna lo. Thinlung le thlarau in sak aa tiimmi kha caan ka pek hna. Biaknak cu biaknak sining tein thlarau bia in a kal awk a si ka ti hna. Hlaremh zong hi thinlung ah a nun ahcun a ngaitu kan caah a nuam. A satu kan i nuam fawn.

2008-2010 kum chung CBFA hruaitu Executive Minister ah an ka thim tthan. Pathian sinah thla kan cam mi vialte a kan leh dih. CBFA rianttuannak zong hi nan thlacamnak thawng in hmai ah a kal lengmang ko. Thla ka campiak ve lengmang u. Thaumi vialte nih zu cu ka ding ti lai lo tiah Khrih Jesuh sinah biakamnak tuah usih. Kan hrai kha hlonh cang hna usih. Jesuh Khrih ah hrintthan hna usih. Thinlung pe usih. Jesuh dah ti lo cun nunnak dang kan ngei lo. Lei cung nuamhnak a um kho lo. Pathian kawng ah i ok zungzal hna usih. Pathian nih thluachuahnak kan pek cio seh! Amen.

No comments:

Post a Comment