Wednesday, July 15, 2009

Bawi Jesuh Ngaihchiatnak

November 2, 2008

Ni ceu dawh damin a kan phanhter than tu kan Pathian a min kan thangthat. Thawngtha i hrawm dingin timhtuahnak a ngeitu nan zapi cungah kan i lawm. Bawipa he i pehtlaih tlukin hi vawleicung ah hnangamnak a petu zei hmanh a um ti lo. Kan thinlung timhtuahnak ngei buin thawngtha bia i hrawmti hna usih tiah kan sawm hna.

Thla kan cam lai: Dawtu Pathian, kan sual palhnak kan ngaithiam law, nihin kan i hrawm dingmi thawngtha bia hi pumpak pakhat cio caah thlua kan chuahpiak ko. A dam lomi hna caah thla kan cam. Cun, Belle te chung caah zong ah thla kan cam rih, nangmah nih daihnak he umpi ko sawh hna. Cun, Malaysia i thong chung ah a ummi khuami hna tuan ah luat ter ko hna. Malaysia a ummi khuami hna nih ram tha chin ah lanh khawhnak an hmuhnak hnga nangmah nih bawm ko hna. Ram kip ah kan phan hna. Hihi nangmah thluachuahnak a si. Kan i lawm. Nangmah thawng lawnglawng in hi dirhmun kan phan timi kan philh sual nakhnga lo na thlarau in kan umpi. Kan umnak cio ah riantuan awk aa hmuhmi kan siter ko. Na thluachuahnak zong a rel zia thiam i, midang caah, nangmah sunparnak langhternak caah a nung kho tu kan si khawh nakhnga thazaang kan pe ko. Ka fa naule fimnak a cawngmi zong, fimnak pe hna law, an cacawnnak ah mithmai tha a hmumi, zohchunh tlak tiang siter ko hna. Kan ram ah kan kaltak mi kan chungkhar sahlawh rualchan an zapi in nangmah nih kan zohkhenh piak ko hna tiah thla kan cam. Kan umnak cio ah, Satan tukforhnak a tei kho tu, nangmah duhning tein zumhtlak tein a nung kho tu kan si ter ko. Nihin ni tiang lam na kan hruai bantuk in hmailei zong ah kan umpi rih ko sawh, na kan dawt caah kan i lawm. Kan Bawipa Jesuh Khrih min in thla kan cam, kan Pathian.

Nihin thawngtha a kan chimtu cu Pu Van Luai a si. Ruah lo piin caan ka vun thiah i, al lo tein a kan timhpiak khawh caah a cungah upatnak le lawmhnak tampi ka ngei. Ka chim tawnmi ka nolh ahcun, atu tiang ah caan thiah tikah lakhruak piin kan fial tawn hna zong ah, lungtho tein nan cohlan lengmangmi hi, caantlaitu ka caah thazaang a si, caantlaih zong a fawiter ngaingai. Atu cu kan thawngtha chimtu sinah kan caan kan pek cang lai :

Hawidawt khuami nu le pa ule nau hna,

Pathian min in nan kut kan tlaih hna. Nihin ni ah kan thawngttha hrawmnak caantlaitu nih lungthli ruahlo in caan a van ka thiah i, kai lawm ngaingai. Bawipa thawngtha bia aupi cu a ngaitu ca zong ah a hlawk i, a aupitu ca zongah hlawknak, tthawnnak hmual thiamthiam asi. Zarhte zan, zaan suimilam 11:00 nawn asi cang, thaizing thlah ding, phungchim van thlah ko tuah, tiah kan caantlaitu nih a ka ti i, aw si ko e, ka ti ve ko; Pathian tu nih kan umpi ko seh.

Kan thawngtha bia hrawmmi hma hruaitu ding i Pathian bia thiang van rel ka duhmi hna cu a tanglei hna hi an si:

1. Johan 11:33-35 "Jesuh nih Mari a tah le, a sin i a rami Judahmi hna an tah kha a hmuh hna i a hnarno a ttam i, a lung a hno. Khuazei ah dah nan vui, tiah a hal hna. Ra law, ra zoh tuah, Bawipa, tiah, an leh. Cun, Jesuh cu a ttap." (BAWI JESUH A TTAP)

2. Matthai 26:37 "PITER LE ZEBEDI FAPA PAHNIH HNA KHA AA KALPI HNA. A NGAIH A CHIA I A AWLAWK A CHONG. ANNIH CU A THAWH HNA I, KA LUNGCHUNG HI NGAIHCHIATNAK IN A KHAT TUK I KA THI RUA LAI TIAH KA RUAH. CU CAAH CUN HI KA AHHIN RAK UM U LAW HNGILH LO TE IN RAK UM U."

3. Matthai 27:46 "ELI, ELI, LEMA SABAKTHANI ( KA PATHIAN KA PATHIAN, ZEICADAH NA KA KAL TAK!!!)

Kan tlangtaar duhmi cu "BAWI JESUH NGAIHCHIATNAK" ti asi.

Pathian dawtnak thawngin atu ah cun vawleicung khuaza ramkip cu khuami hna nih kan khua kan ram kan ti khawh ve cang, kan lamh khawh ve cang, an inn lo ah kan tthu dir kho, kan eiding kho hna, fimcawn tiang in mi tampi an/nan cawng kho ve cang hna i, lunglawmh awk ngaingai asi. Hiti vawlei lei kan van tthancho cuahmah lio ahhin kannih Khrihfami hna kan hmuitinh bikmi, kan thlarau ca nun le, zumlo mi hna Bawi Khrih zumtu i siam kho ding hin zeitluk in dah zumhtlak, hmantlak,zohchun tlak kan si timi le, cun, nifa kan nunnak nih Bawi Jesuh Khrih mitthli a luanter peng rih hnga maw, timi hi tutan i ruah tti hna usih ti ka duhmi cu asi.

Minung nunnak ahhin ngaihchiat lilen te hna le, thinhun ttah-hraam ainak te hna a hrihhram bik pakhat cu zumhnak (faith) a hmaan lo ruang hi a rak si bik theu. Micheu khat nih cun an hawikom, an nu va, an chungkhar khat pawl hna kha an neihnun lio, an tthawn lio le thil an ti khawh lio te hna lawng kha an uar tawn hna i, an paar a van ziamh khan cun, hi fa hi cu, zeihmanh thiam zong a ngei loh, a mui nih chia fawn, duh tlak dawt tlak asi loh, ti asi theu. Cuticun, tthenhmalnak le duhdawt lonak kha chungkhat ah le Bu ah le, khuatlang ah a chuah khawh tawnnak hi asi. Mi cheukhat dang tu nih cun rethei ttawmttai lo bu te le mi zoh hawihngar bu tein, awn-au lo te le thinhung ngaihchia lo te in thil umtu hawih ziate an thiam ve i, lungawi tti khawh nak le, lunglawmh hnangam tti khawhnak tu kha an kawl tti ve tawn hna. Hi hna pawl hi an zumhnak (faith) a fekmi pawl cu an si. Zeizong nih hin chia lei le ttha lei a ngei dih i, chia lei i, kan zoh peng ah cun a chia viar ko; ttha lei i kan zoh ahcun, a ttha ve fawn ko. Kan zumhnak Khrihfa nun zong hi a chiat lei zong in si ah a thatnak lei zong in si ah cuai kan thlai peng i, biasi kan phai peng i, asi tak hnga maw, ka ti peng ahcun, zumhnak hmaan lo ah a cang khomi asi. Mah ca cun, kan zumhnak kan fian i, kan zumhnak ah kan feh i, kan zumhnak hmuitinh i, kan kal peng hi a herh taktak in ka thei i, kan ti ngei ding zong asi.

An chim tawnmi cu mit tthep lo te bak in zawngsung a senmi maw asi lo ah a nakmi, zawng ralkah ngaingai mi khi, minit panga hrawng zoh law, a zawng cu a raang kho ko, ai thleng an ti. Cu bantuk thiamthiam cun, saa-ral lak ah tirawl lo i an van um tikah cun ram tang thinghnah le hrizun hna hmanh khi rawl thaw bik bantuk in ei thluahmah, khimpi khawh thluahmah an si ko an ti.

Cu tluk cun, zumhnak cu a rak biapi a sunglawi i, minung nunnak zong ah hmual a rak ngei tawn.

Bawi Jesuh cu hi vawlei a tlawnlen lio ah ngaihchiat lilen a ton hi voithum khan asi. A voi khatnak cu Martha le Mari tapa nili thi cangmi a thawhter tthan tan ah khan asi. Mari nih, Bawipa, nang cu hi ka hin, rak um law, ka ta hi a thi hnga lo, ti in, Judahmi hna he an ttap len. Bawi Jesuh hnarno a ttam, a lung a hno i, minung sunlawi ning le i sunhsak fakning a van thei than. Cu tik ah, khoika dah Lazaruh cu nan vui, a ti hna. Martha nih Bawipa, kan vui nak nili asi cang, a nam tuk cang lai, ati. Asinain Bawipa nih an ngaihchiatnak mitthli a hnawhpiak hna; lawmhnak ah a thlen. An tta a thawhter.

A voi hnihnak Bawi Jesuh ngaihchiatnak cu Amah zultu hna lak i a hawi ttha bik le a rinhcanh bik, Lungpi ti i min a bunhmi, Peter nih a hlawtnak ahhin asi. (Matt 26:69-75).

Zultu Peter nih Bawi Jesuh a dawt ning le Bawi Jesuh zong nih ai bochan ning hi chim awk ttha lo asi. Peter nih cun, na sin i ka thih ve ding asi hmanh ah amah cu ka hngal lo ka ti bal ve lai lo, ati. Asinain, tlangbawi ngan salnu nih Peter cu, nangmah hi, Jesuh sin um tawn kha na si maw, ati tik ah, ai pheh i, Jesuh cu ka hngal lo ati. A voi hnihnak ah mi sin-um ngaknu a ra than i, hipa hi, Nazareth khuami Jesuh sin um a rak si ve, a ti tthan; Peter nih ai pheh tthan. A voithumnak ah cuka a dirmi hna nih khan Peter cu, Jesuh zultu na si hrim ko, NA AW-CAWI NIH AN PHUAN KO, ANTI. Peter tu nih cun, Jesuh ka hngal hrim lo, biatak kan chimh lo ah cun PATHIAN HRIM NIH DAN KA TAT SEH a ti ko. Peter nih Bawi Jesuh a phatsan zawn hi a aw-cawi tiang hmanh hin biahaltu hna nih hin an tlaih khawh. A thawngtha bia aupi le, a cawlcangh, zumtu hna a bawmhnak, le a cakuat ttial le thildang dang he cun, zumtu nun par a cuannak a tampi lai. Mah ca cun, zumtu kan sinak nih Bawi Khrih ngaihchiat ter loin, Bawi Khrih nun a langhter hi a herh ngaingai. Minung kan nunnak ahhin thlarau nih cun a huam ko na in, taksa nih a ti khawh lo caan a um theu tawn. Mah ca hin, Bawi Jesuh zong nih Peter le Zebedi fapa le zong kha, Gethsemani dum chung an um lio i thlacam i a va kal ahkhan, a zultu hna nih cun an rak hngilh tak tawn i, zeitindah hngilh lo in, suimilam pakhat hmanh nan ka hngah khawh lo; thlarau nih cun a huam ko, sihmahsehlaw titsa cu a der ko hi ta, ati tawn hna. Bawi Jesuh zeitik paoh dir ngam mi si i zuam rih hna usih.

A voi thumnak Bawi Jesuh ngaihchiatnak le, a donghnak ngaihchiatnak hi vailamtahnak cung nganfah a in dongh lai kha asi. Bawi Jesuh cu misual mi hna kan sual thiannak ca ding ah a kut khinghnih thir an khen, a ke thir an khenh, hling luchin an chinh i, thihnak fak bik vailamtahnak cungah an phun. A nganfah le retheih cu khuari le nimtlau lek tiang in an tuarpi i, vantek a tla, rial ti bang a sur i, thlan lung ai cheu. Kan Bawi Jesuh nih Golgotha sarthlam tuallennak hmun a van lawn lai, vawlei le van a muih khup lio ah cun a sumtti le maw si hnga, a hraam thluahmah “Eli,Eli,lema sabakthani” - ka Pathian, ka Pathian, zeicadah na ka kal tak? ti in.

Kan Bawi Jesuh Khrih nun cu a dih dongh tiang nuam a tawl lo i, vawlei duhning in a nung lo i, chan ti luan in a nung lo i, fimthiamnak nawl in a nung lo ti a fiang. Khamhnak roco an kan duh i, mah cu rikhamtu cu fiang tein an kan chiah piak i, cucu Bethlehem in vailamtah tlang tiang amah hrim nih, sifak nganfah tuar buin, lam an kan piah piak. Lam dik, lam hmaan cu zul ve hna usih.

Nifa zanfa kan nunnak, kan holhrel, kan eidin, kan zeizong hi, Bawipa ngaihchiat tertu si lo in, Amah thangthatnak si ko hna seh.

Pathian nih thlaw kan chuah piak ko seh! Amen.

Van luai
12706 Flack street
silver spring,Maryland-20906
Nov.2/08

No comments:

Post a Comment